GWAY GI IDAWUU’D 6
6
Eya manyuḵ gway mo nyaḵki dheŋdhenye/ isi ki koŋ ko jin ’kula ’kus ki ’kul mo. Gway ma Dawuu’d.
1Ayy Tap̱a, dhalku/ ki ḵucur aha/ ka nyor pini mo,
walla dor aha/ ka nyor pini jin ’batha’ba’th mo.
2Miiyi mii ma ’the gom aha/ mo, ayy Tap̱a, haali/ aha/ ’dushura ki ’dushur mo.
Ayy Tap̱a, wac̱i/ aha/ mo, haali/ arisa simam pem ṯocu bwa mo.
3Aḵashiram pem si’da/ a’di puru/ ki monṯo’c bwa mo.
Hili /e, ayy Tap̱a – kakasja sa/?
4Ṯuki mo, ayy Tap̱a, tayi mondiki/em pem is ki me’d mo,
’cuḵi aha/ mo gom gway gi mo/en pini jin ṯelki sho’k mo.
5Haali/ e mowu mo tani moŋkamu/ yisa di’da jin kanu /e e mo.
E mo ma Haawiya mo tani aja si’da/ imidi c̱i /e momaŋ mo?
6Aha/ ’thabula is mo gom is pem jin shunki aha/ mo,
aris mon’thinyi ’baar mo aha/ up̱a cim pem ki jabu’th mo.
Aha/ c̱orosa/ ki c̱oros ap̱owa cim pem mo ki jabu’th pem jin gwoka/ mo.
7Em pem c̱a’bki reŋ reŋ mo gom monyjwakaṯ pem mo,
a’di warki’d ki moŋ’ka’d is mo haala ris ’kup̱ pem tana ris ka ris mo.
8Iiku/ ’peni aha/ mo, aris um gun miiki tonthus mo,
haali/ Tap̱a a’di ciḵki cuuwa/ gi kom pem mo.
9Tap̱a ciḵki aha/ ko gom mo ma di’b is mo.
Tap̱a bu’thki mo ma ’thom pem mo be.
10Aris uni gun ta ’kup̱ pem minu dhu ki mo ma ’the is mo dhali pura du ki monṯo’c bwa mo,
uni mini doḵ ka nyaŋ’ko’d mo dhali minu dhu ki mo ma ’the is ki e ’kamu’thki’d hila/ mo.
Currently Selected:
GWAY GI IDAWUU’D 6: Udk
Highlight
Copy
Compare
Share
Want to have your highlights saved across all your devices? Sign up or sign in
©Society for International Ministries, 2013
