KURINṮH̱UUS ’DE/ 16
16
Mo jin C̱inu To gom Uni kun Dhunu mo ki She/ ki Dhelel Dhelel mo
1Dhali isi gwo gom to jin c̱inu mo gom uni kun dhunu mo ki she/ ki dhelel dhelel mo. Me’d jin ḵankika/ ’kwaniŋ ḵaniisa gi Paŋ Galathiyya gwo mo tani wakan si’da/ miiyi um a’di mo ma. 2Ka cim jin ṯwa/a/ ka dhas mo isa yempa/ mo tani aris um ka ’deṯe/ ’deṯe/ mo mini dhu to ’pen ka pije/ mo dhali dhu a’di e mo jin dhunu to mo, ma to yin jin gamkina um mo, wakan ki to gun c̱inu mo tani minu ’koki mii tul is mo me’d jin miga/ p̱u’dku/ mo be. 3Dhali ki aha/ mina bumburku/ mo tani aha/ mina hashki uni gwansan gun mina umi mish ’ban ki gwo jin ’kwara um mo mmoḵal tom bum jin c̱ina um ki me’d mo e Pa Urushaliim mo be. 4Waḵki/ a’di midi ’taki ta shi/ miim ’boro’d gom aha/ mmoyaku/ mo si’da/ tani uni mini ta kum pem kun mini sus aha/ mo be.
Mo jin ’Kawurkunu mo gom Ii jin Iinu mo
5Aha/ mina buṯi um mo ’ko’di mom pem jin miga/ pe Pam Makiduniyya mo haali/ aha/ dina gwo ibwa mo mmoya pe Pam Makiduniyya mo be. 6Dhali wari aha/ mina c̱a’b nyaḵki um mo walla isi kan aha/ mina ’baar mondiṯ mo nyaḵki um mo, wakan ki um mini sus aha/ e yam pem jin yaka/ mo e mo gunn kun miga/ ya mo be. 7Haali/ aha/ ona bwa mmop̱ar um e shwane/ mo, yisa jasi e yampe yisa. Aha/ tana gi mo ma ’teŋ kap̱e/ mo mmo’baar yila tiya mo nyaḵki um mo waḵki/ Tap̱a midi dhal aha/ bway mo be. 8Hili aha/ mina c̱a’b mo e Pan Ep̱asus mo ntaga Acim Ḵamsiin mo be. 9Haala campur waŋgala waŋgal mo dhali mo jin midi uma ṯu’c mo tani a’di ḵa’dkunu aha/ mo dhali ’kwani kun ta ’kup̱ mo tani tana ris ka ris mo be.
10Ka Ṯimuṯẖawuus midi p̱u’dku/ mo tani hili a’di i e ki ’bore/ mo ma mmokar a’di ki kar ’pempa mo e bwam um mo haali/ a’di miiki’da ṯu’c gi Tap̱a mo me’d aha/ mo be. 11Wakan dhalku/ ki dhal wathin ’deŋ kamu/ bway mo mmowaḵ a’di mo. Susu/ a’di e bway piti ki moŋḵu’th is mo ki a’di midi ’taki doḵu/ i aha/ mo, haali/ aha/ timkina a’di mo nyaḵka waḵ mo be.
Ḵwalany ’Te/ be. Gwondoṯ kun Doṯu mo dhali Monthe Me’d mo be
12Haali/ goma kam bana ka Abulluus mo tani aha/ okina bwa ka daran du mo gom a’di mmobuṯi um mo nyaḵka waḵa tiya mo, hili a’di yisa ta bwa ma Arumgimis mo gom a’di mmoyaku/ shwane/ mo. A’di midi yaku/ mo waḵki/ a’di ta’d gi embula ’borga/ mo be.
13’Koyi ki montim mo mo ma. Doshi mmoṯel shoka ’cesh e moŋgam gwo is bum mo. ’Bithi adu is mo dhali ’bithi ki ’bi’th mo. 14Dhalka ris to gwansan gun miina um mo tani miinu ki mo/en mo.
15Shwane/ iwaḵ mo, um mishin ki kuŋ gu’b ma Isṯip̱anuus uni ta ku gi ṯwa/a/ kun gamki gwo is mo e Pa Aḵaa/iya mo dhali uni dhuki is buniŋ gana/ ki ’kwaniŋ gayiin mo goma ṯu’c gi uni kun dhunu ki she/ ki dhelel dhelel mo be. 16Aha/ yuḵa um mo ki bwa jin o’d ka daran du mo jin mina umi ha gwo gi ’kwani kun wakan e mo dhali ka ris uni ’baar ka ’deṯe/ ’deṯe/ mo, kun ta kun nyaḵkana ṯu’c mii mo dhali kun mii to mo. 17Aha/ ’kunya bwa mo gom p̱u’d jin p̱u’dkin ma Isṯip̱anuus mo dhala P̱urtunatus mo dhala Aḵaa/ikus mo haali/ uni ’tu’dki embul bum gun p̱ina um mo ba/. 18Haali/ uni yeeyaa/ shi/in pem mo ki jim bum gana/ ilu/ mo. Hayyi ’kwani gi wakansan mo ma.
19Arisa ḵaniisa gun ’kon e Pa Asiyya mo tani hashki um monthe me’d mo. Akiila dhala Piriskilla mo nyaḵki ’kwaniŋ ḵaniisa gi gu’b buni mo tani hashki uma du gi monthe me’d e Tap̱a mo be. 20Arisa waḵi ’baar mo hashki um monthe me’d mo be. Theka the me’d ka rem ’kup̱ ki ’twaŋ gana/ jin p̱inu mo ma.
21Aha/ jin tana Buulus ’kwarkina monthe me’d yansan ki me’d pem gana/ mo be. 22Waḵka cin ’deŋ kamu/ dara’d gi mo/en gi Tap̱a mo tani dhalki a’di jeenu mo. Tap̱am bam, p̱u’du/ ma. 23A’the gi Tap̱a Yesus midi di e um mo. 24Mo/en pem midi di gom umi ’baar mo eya Ḵrisṯẖos jin ta’da Yesus mo be. Amen.
Currently Selected:
KURINṮH̱UUS ’DE/ 16: Udk
Highlight
Copy
Compare
Share
Want to have your highlights saved across all your devices? Sign up or sign in
©Society for International Ministries, 2013
