Kupetighwa 2
2
Tsindalo tsa Isiraeli pfatsitsokala
1IMNDEWA kalonga na Musa na Aruni, kalonga, 2Waisiraeli watsotsenga pfibumbulika pfao kutsunguluka lihema lya kwitinganila chila munu katsokala hane ibendela yake na chitango cha tsikaye tsa aba tsao, ukwilolesa na Lihema Lienzeluka. Watsakwika tsindalo kutsunguluka lihema alyo lyo lienzeluke. 3Awala iwatsotsenga ubali wa kwalilawila litsuwa kulolesa ubali wa mashaliki watsakuwa iwanu wa bendela ya Yuda kwa ghamakingili ghao, imkulu we iwanu wa Yuda katsakuwa Nashoni imwana wa Aminadabu. 4Kingili lyake ka pfawapetighwe tsa iwanu elufu sabini na nne na miya sita. 5Wang'amalitsa iwanu wa Yuda watsenge wanu wa lukolo lwa Isakari, na imkulu wao katsakuwa Natanaeli mwana wa Suari, 6Kingili lyake ka pfawapetighwe tsa iwanu elufu hamsini na nne na miya nne. 7Kuya likabila lya Zabuloni, imkulu wao katsakuwa Eliabu imwana wa Heloni. 8Kingili lyake ka pfawapetighwe tsa iwanu elufu hamsini na saba, na miya nne. 9Awala wose iwapetighwe kwa ghamataghwa ghao mna indalo ya Yuda, tsa laki imwe, elufu semanini na sita na miya nne. Awo wawo iwatsolongola mna ghumwanza. 10Kuna ubali wa kusini watsotsenga iwana wa bendela ya Rubeni kwa ghamakingili ghao, imkulu wao katsakuwa Elisuri imwana wa Shedeuri. 11Kingili lyake ka pfawapetighwe tsa iwanu elufu alubaini na sita na miya tano. 12Awala iwatsakwika indalo hambalimbali ha wanu wa Rubeni, watsakuwa iwanu wa lukolo lwa Simioni, na chilongotsi wawo katsakuwa imwana wa Surishadai yakemighwe Shelumieli, 13kingili lyake litsakuwa na wanu elufu hamsini na tisa na miya ndatu. 14Kuya kabila lya Gadi, chilongotsi wawo katsakuwa imwana wa Reueli yakemighwe Eliasafu, 15kingili lyake liisakuwa na wanu elufu alubaini na tano na miya sita hamsini. 16Iwamale wose iwatsakuwa mna ndalo ya Rubeni watsakuwa laki imwe, elufu hamsini na moja miya nne na hamsini. Awano watsakuwa mna kingili lya keli mna ghumwanza.
17Kuya ndalo ya Walawi, awano tsawakala haghatighati he ndalo tsose aku waghala Lihema Lienzeluke, watsakuka kwa kuwinza tsibendela tsao pfatsili.
18Kwa ubali wa kwalikuswela litsuwa litsokala kingili lya bendela ya Efulemu, watsakwika ndalo kwa makingili ghawo, chilongotsi wawo katsakuwa imwana wa Amihudi yakemighwe Elishama, 19kingili lyake litsakuwa na wanu elufu alubaini na miya tano. 20Hawotsolawa Waefulemu, litsokala kabila lya Manase, chilongotsi wawo katsakuwa imwana wa Pedasuri yakemighwe Gamalieli, 21kingili lyake lina wanu elufu selasini na mbili na miya mbili. 22Kuya kabila lya Benyamini, chilongotsi wawo katsakuwa imwana wa Gidioni yakemighwe Abidani, 23kingili lyake litsakuwa na wanu elufu selasini na tano na miya nne.
24Iwanu wose iwatsakuwa mna likingili lya Efulemu watsakuwa laki imwe, elufu nane, na miya imwe. Kingili lino lya Efulemu litsakuwa lya kadatu mna ghumwanza.
25Kwa ubali wa kasikazini, awala iwatsokala mna ndalo watsakuwa iwanu iwolongotsighwa na bendela ya Dani, na chilongotsi wawo katsakuwa imwana wa Amishadai yakemighwe Ahiezeri, 26kingili lyake litsakuwa na wanu elufu sitini na mbili na miya saba. 27Wang'alawa wanu wa Dani, iwatsakwika ndalo watsakuwa wanu wa kabila lya Asheli, chilongotsi wawo katsakuwa imwana wa Okilani yakemighwe Pagieli, 28kingili lyake lina wanu elufu alubaini na moja na miya tano.
29Kuya wanu wa kabila lya Nafutali, chilongotsi wake imwana wa Enani yakemighwe Ahila, 30kingili lyake lina wanu elufu hamsini na ndatu na miya nne. 31Iwanu iwatsakuwa mna kingili lya Dani watsakuwa wanu laki imwe, elufu hamsini na saba na miya sita. Kingili lino litsakuwa lya kane na lya utsighilo ka tsibendela tsawo pfatsili.
32Tsahana Waisiraeli laki sita, elufu ndatu, miya tano na hamsini iwapetighwe kwa kuwinza kolo tsawo ne tsindalo tsawo. 33Lekeni Walawi ng'awapetighwe baye hamwe na iwanu wa Isiraeli ka IMNDEWA pfayamlaghitse Musa. 34Apfo pfipfo Waisiraeli pfawatendile chila chinu ka IMNDEWA pfayamlaghitse Musa. Tsaweka tsindalo tsawo na woka, chila yumwe na kolo tsake.
Currently Selected:
Kupetighwa 2: LBV
Highlight
Copy
Compare
Share
Want to have your highlights saved across all your devices? Sign up or sign in
Pioneer Bible Translators and The Word For The World
Learn More About Laghano Lya Sambi Kwe Iwanu Wose