Ruˉhtaˆ li‸ 1
1
Eˇliˆmaˍlehˆ Mawˇbaˆ mvuhˇmiˬ lo hpaw-e ve
1Aˬ sho-eˬ Iˉsaˍreˍlaˆ chaw hui jawˇmawˇ teˇ gʼaˇ ka‸ maˇ cawˬ sheˍ gʼuˇ suhˍ htaˇ, Iˉsaˍreˍlaˆ mvuhˇmiˬ hkʼaw meu‸ lonˉ kaˆ lonˉ teˇ pawˆ gaˬ la ve yoˬ. 2Oˇ htaˇ, Yuˇda‸ mvuhˇmiˬ Behˍlehˍhehnˍ venˇ hkʼaw chehˇ ve Eˇhpaˍraˆ ve awˬ ceuˬ awˬ hkʼaˇ Eˇliˆmaˍlehˆ lehˬ, yawˇ ve awˬ miˇ ma Nawˉmi‸ leh, yawˇ ve yaˇ paˍ Maˍlonˍ, Hkiˍlonˍ hui hta‸ shiˍ veu leh, Mawˇbaˆ mvuhˇmiˬ lo teˇ hkui teˇ yanˇ ca hpaw chehˇ kʼai ve yoˬ. 3Yawˇ hui oˇ kaˬ lo chehˇ taˍ htaˇ Eˇliˆmaˍlehˆ suh-e leh, Nawˉmi‸ leh yawˇ ve yaˇ paˍ nyiˇ gʼaˇ ceh cawˬ taˉ ve yoˬ. 4Yaˇ paˍ oˇ ve nyiˇ gʼaˇ lehˬ, Mawˇbaˆ chaw Awˇraˍpaˆ leh Ruˉhtaˆ hta‸ heuˆ ve yoˬ. Awˬ hkʼaw‸ nawˉ teˇ chi hkʼaw‸ gaˬ ve teˇ yanˇ, 5Maˍlonˍ leh Hkiˍlonˍ htawˇ suh-e ve yoˬ. Hkʼe te leh, Nawˉmi‸ teˇ gʼaˇ tiˉ cawˬ taˉ ve yoˬ.
Nawˉmi‸ leh Ruˉhtaˆ Behˍlehˍhehnˍ lo kʼaw‸ la ve
6Oˇ ve hkʼaw‸ nawˉ maˇ maw maw gaˬ leh, Gʼuiˬsha lehˬ yawˇ ve chaw teˇ hpaˍ hta‸ awˬ bon kʼaw‸ na‸ piˇ leh, awˬ shiˍ awˬ nu maˇ maˇ kʼaw‸ cawˬ la ve awˬ hkawˇ hta‸ Nawˉmi‸ gʼa kaˇ ve yoˬ. Hkʼe te leh, yawˇ lehˬ awˬ hkuiˇ ma nyiˇ gʼaˇ hta‸ shiˍ veu leh Yuˇda‸ mvuhˇmiˬ lo kʼaw‸ kʼo‸-e ve yoˬ. 7Yawˇ hui kʼo‸-e leh ya‸ kʼaw teˇ tawn lo gaˬ htaˇ, yawˇ ve awˬ hkuiˇ ma nyiˇ gʼaˇ hta‸ chi hkʼe kʼoˆ piˇ ve yoˬ. 8Nawˬ huiˉ maˬ kʼaw‸ kʼo‸-e leh a shu yawˇ ve awˬ pa awˬ e geh ca kʼaw‸ chehˇ taˍ-o‸. Nawˬ huiˉ maˬ ngaˬ hta‸ ha‸ shaˉ laˇ ve hkʼe, Gʼuiˬsha nawˬ huiˉ maˬ hta‸ ha‸ shaˉ laˇ piˇ-oˆ. 9Gʼuiˬsha nawˬ huiˉ maˬ hta‸ yehˬ kʼa awˬ suhˉ kʼaw‸ piˇ laˇ piˇ-oˆ, teh‸ yawˇ huiˉ maˬ hta‸ kʼoˆ piˇ ve yoˬ.
Oˇ hkʼe kʼoˆ peuˬ hkʼaw‸ nawˉ, yawˇ ve awˬ hkuiˇ ma nyiˇ gʼaˇ hta‸ yawˇ boˆ nu piˇ ve yoˬ. 10Ya‸ hkʼaˇ yawˇ huiˉ maˬ hawˬ leh, Ngaˬ huiˉ maˬ maˇ kʼo‸-e gaˇ. Nawˬ geh kʼai tuˬ yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.
11Oˇ htaˇ Nawˉmi‸ kʼaw‸kʼoˆ ve, Yaˇ miˇ teˇ hpaˍ-oˬ, nawˬ huiˉ maˬ kʼaw‸ kʼo‸-e loˬ. Aˬ hto‸ ma pa taw, nawˬ huiˉ maˬ ngaˬ geh kʼai gaˇ ve le. Nawˬ huiˉ maˬ hta‸ kʼaw‸ ka laˇ tuˬ, ngaˬ geh yaˇ paˍ cawˬ sheˍ hehˉ teh‸ nawˬ huiˉ maˬ dawˇ ve laˇ. 12Kʼaw‸ kʼo‸-e loˬ. Ngaˬ lehˬ mawˇ la peuˬ. Awˬ hpawˇ kʼaw‸ heuˆ maˇ hpeh‸-o. Ngaˬ ya‸ puiˉ awˬ hpawˇ kʼaw‸ heuˆ leh yaˇ kʼaw‸ cawˬ la puiˉ sheˍ ka‸, nawˬ huiˉ maˬ ca law heuˆ maˇ gʼa taˬ. 13Yaˇ miˇ teˇ hpaˍ-oˬ, Gʼuiˬsha ngaˬ hta‸ baˬ taˉ laˇ peuˬ. Nawˬ huiˉ maˬ awˬ pon ka‸ ngaˬ dawˇ haˍ jaˇ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ.
14Oˇ htaˇ yawˇ huiˉ maˬ teˇ pawˆ kʼaw‸ hawˬ ve yoˬ. Oˇ hkʼe te peuˬ hkʼaw‸ nawˉ, Awˇraˍpaˆ lehˬ yawˇ ve awˬ pi ma hta‸ boˆ nu taˉ leh, aˉ hkʼaw lo kʼaw‸ kʼo‸-e ve yoˬ. Ya‸ hkʼaˇ, Ruˉhtaˆ lehˬ yawˇ ve awˬ pi ma hta‸ kʼuˉ tiˍ taˍ ve yoˬ. 15Hkʼe te leh, Nawˉmi‸ yawˇ hta‸kʼoˆ piˇ ve, Ruˉhtaˆ-oˬ, Awˇraˍpaˆ lehˬ yawˇ ve chaw leh yawˇ ve gʼuiˬsha geh kʼaw‸ kʼo‸-e peuˬ. Nawˬ htawˇ yawˇ geh kʼaw‸ kʼo‸-e loˬ, teh‸ yawˇ hta‸ kʼoˆ piˇ ve yoˬ.
16Ya‸ hkʼaˇ, Ruˉhtaˆ kʼaw‸ yaw hkʼaw‸ leh kʼoˆ ve, Nawˬ hta‸ baˬ taˉ tuˬ taˇ kʼoˆ laˇ-oˆ. Nawˬ kʼai kuiˬ teˇ kaˬ le le, ngaˬ nawˬ geh kʼai leh nawˬ geh chehˇ tuˬ yoˬ. Nawˬ ve chaw ceuˬ lehˬ ngaˬ ve chaw ceuˬ hpeh‸ la piˇ leh, nawˬ ve Gʼuiˬsha htawˇ ngaˬ ve Gʼuiˬsha hpeh‸ la tuˬ yoˬ. 17Nawˬ suh-e kuiˬ lo ngaˬ htawˇ oˇ kaˬ suh tuˬ yoˬ. Suh ve teˇ ceuˬ maˇ heˆ kʼo, ngaˬ nawˬ hta‸ hpaˆ da‸ maˇ hpeh‸ taˬ. Ngaˬ nawˬ hta‸ hpaˆ da‸ ve kʼo, Gʼuiˬsha ngaˬ hta‸ ciˍ yanˍ laˇ piˇ-oˆ, teh‸ yawˇ hta‸ kʼoˆ piˇ ve yoˬ.
18Ruˉhtaˆ yawˇ geh kʼai tuˬ dawˇ cheˆ taˍ peuˬ ve hta‸ Nawˉmi‸ gʼa shiˍ ve teˇ yanˇ, yawˇ te‸ chiˉ maˇ kʼaw‸ kʼoˆ ve yoˬ.
19Hkʼe te leh, yawˇ huiˉ maˍ Behˍlehˍhehnˍ venˇ lo kʼo‸-e ve yoˬ. Yawˇ huiˉ maˬ oˇ kaˬ lo gaˬ ve teˇ yanˇ, venˇ yaˇ teˇ hpaˍ anˇ jaˇ leh, Chi ve ma Nawˉmi‸ yoˬ laˇ, teh‸ teˇ gʼaˇ leh teˇ gʼaˇ kʼoˆ da‸ ve yoˬ.
20Oˇ htaˇ, Nawˉmi‸ kʼaw‸ yaw hkʼaw‸ leh kʼoˆ ve, Ngaˬ hta‸ Nawˉmi‸ teh‸ taˇ kʼaw‸ kʼoˆ. Ngaˬ hta‸ Maˍraˍ#1:20 Chi lehˬ hkʼaˇ ve teh‸ kʼoˆ gaˇ ve yoˬ. teh‸ kʼaw‸ kuˬ-o‸. Awˬ lawn kʼo, Gʼuiˬsha lehˬ ngaˬ hta‸ hkʼaˇ jaˇ ve awˬ ceuˬ pe‸ laˇ peuˬ. 21Ngaˬ choˬ kaˬ lo tawˆ kʼai htaˇ, ngaˬ geh mawˇ jeˬ hkʼa biˇ cawˬ ve yoˬ. Ya‸ hkʼaˇ chi beu‸ ngaˬ awˬ to kʼawˇ lehˍ kʼaw‸ la taˍ ve yoˬ. Gʼuiˬsha ngaˬ hta‸ ciˍ yanˍ leh tu‸ hkanˍ piˇ lawˬ peuˬ ve pa taw, aˬ hto‸ ma pa taw nawˬ hui ngaˬ hta‸ Nawˉmi‸ teh‸ kʼoˆ laˇ ve le, teh‸ yawˇ hui hta‸ kʼoˆ piˇ ve yoˬ.
22Chi ve lehˬ, Nawˉmi‸ leh yawˇ ve awˬ hkuiˇ ma Ruˉhtaˆ Mawˇbaˆ mvuhˇmiˬ hkʼaw lo hkʼaˬ hkʼe te kʼaw‸ la taˍ ve awˬ lawn hpeh‸ ve yoˬ. Yawˇ huiˉ maˬ Behˍlehˍhehnˍ venˇ lo kʼaw‸ gaˬ la htaˇ, venˇ yaˇ teˇ hpaˍ caˬ tanˬ gʼeu‸ chehˇ taˍ peuˬ ve yoˬ.
Currently Selected:
Ruˉhtaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.