Luˉka‸ li‸ 1
1
Htawˇhpiˇluˆ hta‸ tawˇ awˉ lawˉ teˇ hkawˇ bvuh‸ piˇ ve
1Awˬ me‸ awˬ hponˇ uiˍ ve Htawˇhpiˇ luˆ-oˬ, ngaˬ hui awˬ hkʼaw lo hpeh‸ la peuˬ ve awˬ lawn teˇ hpaˍ hta‸ chaw laiˉ gʼaˇ puiˉ ve hpeh‸ ve hkʼe, awˬ lawn teˇ ceuˬ peuˬ teˇ ceuˬ awˬ hkʼaˇ hteˇ lehˍ bvuh‸ taˍ peuˬ. 2Hkʼa hpeh‸ la peuˬ ve eˇ hpaˍ hta‸ awˬ hkuiˉ puiˍ htaˇ ka‸ gʼa mawˬ taˍ leh, bon hkawˇ gʼa maˍ ve chaw teˇ hpaˍ ngaˬ hui hta‸ hto laˇ peuˬ ve hkʼe yawˇ hui bvuh‸ taˍ ve yoˬ. 3Ngaˬ htawˇ, awˬ hkuiˉ puiˍ htaˇ ka‸ yawˇ hui bvuh‸ taˍ ve teˇ hpaˍ hta‸ hkʼa deh‸ shawˍ nyi tehˆ nyi taˍ peuˬ. 4Hkʼe te leh, nawˬ gʼa henˇ taˍ peuˬ ve teˇ hpaˍ lehˬ, awˬ tehˬ awˬ na cawˇ ve yoˬ teh‸ nawˬ gʼa shiˍ tuˬ, awˬ lawn chi teˇ hpaˍ teˇ ceuˬ peuˬ teˇ ceuˬ awˬ hkʼaˇ hteˇ lehˍ nawˬ hta‸ li‸ bvuh‸ laˇ cawˇ ve yoˬ teh‸ ngaˬ dawˇ taˍ ve yoˬ.
Baˆtiˆsaˬ piˇ paˍ Yoˇhanˬ paw la tuˬ ve awˬ lawn hto piˇ ve
5Yuˇda‸ mvuhˇmiˬ hta‸ hkunˉ hawˉ hkanˇ Heˍroˆ uˉ peunˍ chehˇ ve teˇ yanˇ, Aˍbiˉya‸ awˬ moˍ awˬ hkʼaw lo Zaˍhkaˍriˆ meh ve paw hkuˇ teˇ gʼaˇ cawˬ ve yoˬ. Yawˇ ve awˬ miˇ ma lehˬ Aˍronˍ ve awˬ ceuˬ awˬ hkʼaˇ hpeh‸ leh, yawˇ ve awˬ meh Eˇliˇsaˍbehˆ yoˬ. 6Yawˇ huiˉ maˬ lehˬ, Jawˇmawˇ Gʼuiˬsha ve awˬliˇtawˇhkawˇ leh piˇ taˍ ve awˬ liˇ awˬ hkʼaˇ hkʼa peu-eˬ awˬ hkʼaˇ suh te leh ya‸ kuiˬ maˇ cawˬ. Gʼuiˬsha mehˆ gʼuˇ suhˍ yawˇ huiˉ maˬ nyiˇ gʼaˇ gʼaˇ hteˇ ve cawˇ ve chaw hpeh‸ ve yoˬ. 7Yawˇ huiˉ maˬ yaˇ maˇ cawˬ. Awˬ lawn kʼo, Eˇliˇsaˍbehˆ lehˬ chaw meh ma hpeh‸ leh, yawˇ huiˉ maˬ nyiˇ gʼaˇ gʼaˇ mawˇ la peuˬ.
8Zaˍhkaˍriˆ ve awˬ moˍ kanˉ te ve awˬ yanˇ gaˬ leh, Gʼuiˬsha mehˆ gʼuˇ suhˍ yawˇ paw hkuˇ ve kanˉ hta‸ te chehˇ htaˇ, 9Jawˇmawˇ Gʼuiˬsha ve bon yehˬ lonˉ awˬ hkʼaw lo lo‸-e leh sha hawnˉ ve hta‸ tuˉ tanˇ tuˬ, paw hkuˇ awˬ liˇ cawˬ taˍ ve hkʼe, yawˇ hui kuˇ da‸ leh yawˇ hta‸ cawˇ ve yoˬ. 10Sha hawnˉ ve hta‸ tuˉ tanˇ ve awˬ yanˇ awˬ hkʼaw lo, chaw awˬ moˍ lonˉ hkʼa peu-eˬ lehˬ, awˬ baˬ hpawˇ lo bon lawˬ chehˇ ve yoˬ.
11Oˇ htaˇ, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ yawˇ mehˆ gʼuˇ suhˍ tawˆ la leh, sha hawnˉ ve tuˉ tanˇ kuiˬ la‸ sha paˉ lo huˉ chehˇ taˍ ve yoˬ. 12Zaˍhkaˍriˆ yawˇ hta‸ gʼa mawˬ ve teˇ yanˇ, nyi ma sho‸ sha‸ leh kawˆ ve yoˬ. 13Ya‸ hkʼaˇ, mvuhˇ naw ma tcuh yaˇ yawˇ hta‸ kʼoˆ piˇ ve, Zaˍhkaˍriˆ-oˬ, taˇ kawˆ. Awˬ lawn kʼo, nawˬ bon lawˬ ve hkawˇ hta‸ Gʼuiˬsha kaˇ peuˬ. Nawˬ ve awˬ miˇ ma Eˇliˇsaˍbehˆ lehˬ, nawˬ awˬ pon yaˇ paˍ paw la piˇ tuˬ yoˬ. Yaˇ paˍ oˇ ve hta‸ Yoˇhanˬ teh‸ nawˬ gʼa meh piˇ tuˬ yoˬ. 14Nawˬ lehˬ ha lehˬ tuˬ maˇ maˇ cawˬ tuˬ yoˬ. Yaˇ paˍ oˇ ve paw la ve pa taw, chaw laiˉ gʼaˇ htawˇ ha lehˬ jaˇ tuˬ yoˬ. 15Awˬ lawn kʼo, yawˇ lehˬ Jawˇmawˇ Gʼuiˬsha mehˆ gʼuˇ suhˍ chaw uiˍ chaw mvuh hpeh‸ tuˬ yoˬ. A pehˉ meuˇ gʼuiˬ leh bvuhˆ puiˉ ve awˬ ceuˬ hta‸ yawˇ a ciˉ ka‸ dawˬ tuˬ maˇ heˆ. Yawˇ paw la htaˇ ka‸ da‸ ve kehˬ ve Awˬ ha hpu hkʼa biˇ cawˬ tuˬ yoˬ. 16Iˉsaˍreˍlaˆ chaw maˇ maˇ hta‸ yawˇ hui ve Jawˇmawˇ Gʼuiˬsha geh lo kʼaw‸ hpfuhˆ kʼaw‸ la tuˬ ve yawˇ te tuˬ yoˬ. 17Awˬ pa teˇ hpaˍ leh awˬ yaˇ teˇ hpaˍ cawˇ da‸ tuˬ maˇ kʼoˆ, maˇ na yuˬ puiˉ ve chaw teˇ hpaˍ hteˇ ve cawˇ ve chaw hui ve cuˇ yiˍ awˬ hkʼaˇ suh kʼai tuˬ maˇ kʼoˆ, Jawˇmawˇ Gʼuiˬsha awˬ pon gu taˍ ve chaw ceuˬ teˇ ceuˬ hpeh‸ la tuˬ yawˇ hui hta‸ hkʼa deh‸ gu piˇ tuˬ maˇ kʼoˆ, yawˇ lehˬ Eˇliˇya‸ ve nyi ma leh kanˇ paˆ cawˬ ve awˬ hkʼaw lo, Gʼuiˬsha mehˆ gʼuˇ suhˍ kʼai tuˬ yoˬ teh‸ mvuhˇ maw ma tcuh yaˇ yawˇ hta‸ kʼoˆ piˇ ve yoˬ.
18Oˇ htaˇ Zaˍhkaˍriˆ lehˬ, Chi hkʼe hpeh‸ la tuˬ ve hta‸ ngaˬ hkʼaˬ hkʼe te shiˍ tuˬ le. Ngaˬ lehˬ mawˇ la peuˬ. Ngaˬ awˬ miˇ ma htawˇ mawˇ la peuˬ teh‸, mvuhˇ naw ma tcuh yaˇ hta‸ kʼoˆ piˇ ve yoˬ.
19Mvuhˇ naw ma tcuh yaˇ kʼaw‸ kʼoˆ ve, Ngaˬ lehˬ Gʼuiˬsha mehˆ gʼuˇ suhˍ huˉ taˍ ve Gaˍbeˍlaˆ yoˬ. Nawˬ hta‸ tawˇ yaw laˇ leh, ha lehˬ ve tawˇ hkawˇ chi hto laˇ tuˬ, yawˇ ngaˬ hta‸ peu laˇ ve yoˬ. 20Ngaˬ ve tawˇ hkawˇ hta‸ maˇ yonˍ ve pa taw, awˬ lawn chi teˇ hpaˍ hpeh‸ la ve teˇ nyi hkʼa gaˬ nawˬ tawˇ yaw maˇ gʼa leh chaw kʼaˍ gʼa hpeh‸ tuˬ yoˬ. Ngaˬ ve tawˇ hkawˇ lehˬ, awˬ yanˇ cawˇ ve teˇ yanˇ biˇ la tuˬ yoˬ teh‸, yawˇ hta‸ kʼoˆ piˇ ve yoˬ.
21Chaw chi ma ve lehˬ, Zaˍhkaˍriˆ hta‸ law chehˇ ve yoˬ. Bon yehˬ lonˉ awˬ hkʼaw lo yawˇ maw chaweh chehˇ taˍ ve hta‸ yawˇ hui anˇ ve yoˬ. 22Yawˇ tawˆ la ve teˇ yanˇ, yawˇ yawˇ hui hta‸ tawˇ yaw maˇ gʼa leh, bon yehˬ lonˉ awˬ hkʼaw lo hpeu‸ maˍ piˇ ve teˇ ceuˬ ceuˬ hta‸ yawˇ gʼa mawˬ peuˬ teh‸, yawˇ hui shiˍ ve yoˬ. Yawˇ kʼaˍ chehˇ leh, la‸ sheh awˬ heˆ ceh tiˉ te maˍ piˇ ve yoˬ.
23Yawˇ kanˉ te ve awˬ nyi awˬ haˉ peuˬ ve teˇ yanˇ, yawˇ ve aˉ hkʼaw lo kʼaw‸ kʼo‸-e ve yoˬ. 24Oˇ ve hkʼaw‸ nawˉ, yawˇ ve awˬ miˇ ma Eˇliˇsaˍbehˆ yaˇ hu la leh, ha pa ngaˇ maˬ hkʼa gaˬ va‸ chehˇ taˍ ve yoˬ. 25Yawˇ kʼoˆ ve, Jawˇmawˇ Gʼuiˬsha lehˬ, ngaˬ hta‸ nyi laˇ ve awˬ nyi teˇ hpaˍ awˬ hkʼaw lo, chaw yaˇ hui mehˆ gʼuˇ suhˍ shu hkʼaiˉ leh venˇbaˆ taˍ ve hta‸ yuˬ baˬ laˇ tuˬ, yawˇ ngaˬ awˬ pon chi hkʼe te laˇ peuˬ teh‸ kʼoˆ ve yoˬ.
Yeˍsuˆ paw la tuˬ ve awˬ lawn hto piˇ ve
26Ha pa hkaw‸ maˬ gaˬ htaˇ, Gaˍliˍlehˇ mvuhˇ miˬ Naˍzaˍrehˆ venˇ hkʼaw chehˇ ve yaˇ miˇ teˇ gʼaˇ geh, Gʼuiˬsha lehˬ mvuhˇ naw ma tcuh yaˇ Gaˍbeˍlaˆ hta‸ kʼai tcuh ve yoˬ. 27Yaˇ miˇ oˇ ve lehˬ, Daˍviˆ ve awˬ ceuˬ awˬ hkʼaˇ Yoˇseh‸ meh ve teˇ gʼaˇ hta‸ heuˆ da‸ tuˬ ka ti‸ te taˍ ve yaˇ miˇ haˉ hpeh‸ ve yoˬ. Yaˇ miˇ haˉ oˇ ve lehˬ, Maˍriˆ meh ve yoˬ. 28Mvuhˇ naw ma tcuh yaˇ oˇ ve Maˍriˆ geh gaˬ la htaˇ, Awˬ bon gʼa maˇ ve yaˇ miˇ-oˬ, awˬ bon uiˍ piˇ-oˆ. Jawˇmawˇ Gʼuiˬsha nawˬ geh chehˇ ve yoˬ teh‸, yawˇ hta‸ kʼoˆ piˇ ve yoˬ.
29Maˍriˆ lehˬ, tawˇ hkawˇ oˇ ve hta‸ pa taw nyi ma sho‸ sha‸ jaˇ leh, na‸ laˇ ve tawˇ hkawˇ chi hkʼaˬ hkʼe kʼoˆ gaˇ ve leh naˍ teh‸, yawˇ dawˇ nyi chehˇ ve yoˬ. 30Oˇ htaˇ mvuhˇ naw ma tcuh yaˇ kʼoˆ ve, Maˍriˆ-oˬ, taˇ kawˆ. Awˬ lawn kʼo, Gʼuiˬsha nawˬ hta‸ nyi ma cawˇ ve yoˬ. 31Nawˬ yaˇ hu la leh, yaˇ paˍ paw la tuˬ yoˬ. Yawˇ hta‸ Yeˍsuˆ teh‸ nawˬ gʼa meh piˇ tuˬ yoˬ. 32Yaˇ paˍ oˇ ve lehˬ, chaw uiˍ chaw mvuh hpeh‸ leh, uiˍ jaˇ mvuh jaˇ ve Awˬ shehˍ hpaˇ ve Yaˇ hpu hpeh‸ ve yoˬ teh‸ shu kʼoˆ tuˬ yoˬ. Jawˇmawˇ Gʼuiˬsha lehˬ, yaˇ paˍ oˇ ve hta‸ yawˇ awˬ pa Daˍviˆ ve kʼaw jaw piˇ tuˬ yoˬ. 33Yawˇ lehˬ, Yaˍkoˆ ve yehˬ awˬ hkʼoˆ hta‸ co co taiˍ taiˍ uˉ peunˍ tuˬ yoˬ. Yawˇ hkunˉ hawˉ hkanˇ te ve teˇ ceuˬ lehˬ, awˬ leh meuˇ maˇ cawˬ, teh‸ Maˍriˆ hta‸ kʼoˆ piˇ ve yoˬ.
34Oˇ htaˇ Maˍriˆ lehˬ, Ngaˬ awˬ hpawˇ maˇ cawˬ. Hkʼaˬ hkʼe te chi hkʼe hpeh‸ la tuˬ le teh‸, mvuhˇ naw ma tcuh yaˇ hta‸ kʼaw‸ kʼoˆ piˇ ve yoˬ.
35Mvuhˇ naw ma tcuh yaˇ kʼaw‸ kʼoˆ ve, Da‸ ve kehˬ ve Awˬ ha hpu nawˬ awˬ hkʼoˆ ya‸ la leh, uiˍ jaˇ mvuh jaˇ ve Awˬ shehˍ hpaˇ ve kanˇ paˆ nawˬ hta‸ beh taˍ tuˬ yoˬ. Chi hta‸ pa taw, paw la tuˬ ve yaˇ lehˬ, Gʼuiˬsha ve Yaˇ hpu hpeh‸ leh, da‸ kehˬ shehˍ hpaˇ teh‸ shu kʼoˆ tuˬ yoˬ. 36Chaw meh ma teh‸ kʼoˆ ve nawˬ ve awˬ ceuˬ awˬ hkʼaˇ Eˇliˇsaˍbehˆ htawˇ, yawˇ mawˇ la peuˬ ve ka‸, yaˇ paˍ hta‸ hu chehˇ ve ha pa hkaw‸ maˬ gaˬ peuˬ. 37Awˬ lawn kʼo, Gʼuiˬsha maˇ te puiˉ ve teˇ ceuˬ ka‸ maˇ cawˬ teh‸ yawˇ hta‸ kʼoˆ piˇ ve yoˬ.
38Maˍriˆ kʼaw‸ kʼoˆ ve, Ngaˬ lehˬ Jawˇmawˇ Gʼuiˬsha ve awˬ ceˬ ma yoˬ. Nawˬ kʼoˆ ve hkʼe ngaˬ awˬ hkʼaw lo hpeh‸ la piˇ-oˆ teh‸ kʼoˆ piˇ ve yoˬ. Oˇ htaˇ, mvuhˇ naw ma tcuh yaˇ tawˆ kʼai ve yoˬ.
Maˍriˆ Eˇliˇsaˍbehˆ geh ca guiˇ kʼai ve
39Awˬ nyi awˬ haˉ oˇ ve teˇ hpaˍ awˬ hkʼaw lo, Maˍriˆ tu leh Yuˇda‸ mvuhˇmiˬ hkʼaw hkʼoˆ lawˬ hkʼoˆ lo cawˬ ve venˇ teˇ venˇ lo haˆ haˆ kʼai ve yoˬ. 40Yawˇ Zaˍhkaˍriˆ ve yehˬ hkʼaw lo lo‸-e leh, Eˇliˇsaˍbehˆ hta‸ na‸ piˇ ve yoˬ. 41Maˍriˆ na‸ piˇ ve hkawˇ hta‸ Eˇliˇsaˍbehˆ gʼa kaˇ htaˇ, yawˇ ve gʼoˇ peˬ awˬ hkʼaw lo yaˇ ehˉ lehˬ, hiˆ hiˆ naˇ naˇ te ve yoˬ. Eˇliˇsaˍbehˆ awˬ hkʼaw lo da‸ ve kehˬ ve Awˬ ha hpu biˇ la leh, 42yawˇ awˬ hkawˇ bvuhˬ chaweh kuˬ leh kʼoˆ ve, Yaˇ miˇ teˇ hpaˍ awˬ hkʼaw lo nawˬ lehˬ awˬ bon uiˍ ve yoˬ. Nawˬ ve gʼoˇ peˬ hkʼaw ve yaˇ ehˉ htawˇ awˬ bon uiˍ ve yoˬ. 43Ngaˬ ve Jawˇmawˇ ve awˬ e ngaˬ geh laˬ ve awˬ bon hta‸ ngaˬ aˬ hto‸ ma pa taw gʼa ve le. 44Awˬ lawn kʼo, nawˬ na‸ laˇ ve tawˇ hkawˇ hta‸ ngaˬ gʼa kaˇ htaˇ, ngaˬ ve gʼoˇ peˬ hkʼaw ve yaˇ ehˉ lehˬ, ha lehˬ leh hiˆ hiˆ naˇ naˇ te ve yoˬ. 45Yonˍ ve yaˇ miˇ lehˬ, awˬ bon uiˍ ve yoˬ. Awˬ lawn kʼo, yaˇ miˇ oˇ ve hta‸ Jawˇmawˇ Gʼuiˬsha kʼoˆ piˇ taˍ ve tawˇ hkawˇ teˇ hpaˍ biˇ la tuˬ yoˬ teh‸ kʼoˆ ve yoˬ.
46Oˇ htaˇ Maˍriˆ kʼoˆ ve,
Ngaˬ ve nyi ma lehˬ, Jawˇmawˇ Gʼuiˬsha hta‸ chiˇ uiˍ chiˇ mvuh ve yoˬ.
47Ngaˬ ve co ha htawˇ, ngaˬ ve Htaiˍ hkʼaw‸ shehˍ hpaˇ Gʼuiˬsha awˬ hkʼaw lo ha lehˬ jaˇ ve yoˬ.
48Awˬ lawn kʼo, awˬ me‸ awˬ hponˇ maˇ cawˬ ve yawˇ ve awˬ ceˬ ma hta‸ yawˇ nyi laˇ peuˬ.
Ya‸ nyi hkʼaw‸ nawˉ kʼo, chaw teˇ co peuˬ teˇ co ngaˬ hta‸ awˬ bon uiˍ ve yaˇ miˇ teh‸ kʼoˆ tuˬ yoˬ.
49Kanˇ paˆ uiˍ shehˍ hpaˇ lehˬ, ngaˬ hta‸ uiˍ jaˇ ve teˇ ceuˬ te laˇ peuˬ.
Yawˇ lehˬ da‸ kehˬ ve yoˬ.
50Yawˇ hta‸ yawˆ yan ve chaw hui awˬ hkʼoˆ hta‸
yawˇ ha kʼaˉ ve teˇ ceuˬ teˇ co peuˬ teˇ co cawˬ ve yoˬ.
51Yawˇ ve la‸ sheh lehˬ, kanˇ paˆ uiˍ ve hta‸ te taˍ peuˬ.
A shu yawˇ ve dawˇ hkʼaˇ awˬ hkʼaw lo
nyi ma uiˍ ve mvuh ve chaw teˇ hpaˍ hta‸ yawˇ hpaˆ da‸ piˇ lawˬ peuˬ.
52Jawˇmawˇ teˇ hpaˍ hta‸ a shu yawˇ ve kʼaw jaw hkʼoˆ lo yawˇ yuˬ ce piˇ leh,
awˬ me‸ awˬ hponˇ maˇ cawˬ ve chaw hui hta‸ yawˇ chiˇ taˆ piˇ peuˬ.
53Meu‸ ve kaˆ ve chaw teˇ hpaˍ hta‸ yawˇ da‸ ve awˬ ceuˬ hkʼa bvuhˆ caˍ piˇ leh,
paw sha ve chaw teˇ hpaˍ hta‸ awˬ to kʼawˇ lehˍ hpehˇ peu piˇ ve yoˬ.
54Ngaˬ hui ve awˬ puˍ awˬ pi hui hta‸ yawˇ kʼoˆ piˇ taˍ ve hkʼe.
55Aˍbraˍhanˍ leh yawˇ ve awˬ yaˇ awˬ duˬ teˇ hpaˍ hta‸
co co taiˍ taiˍ ha kʼaˉ ve teˇ ceuˬ dawˇ nawˇ tuˬ awˬ pon,
Gʼuiˬsha yawˇ ve awˬ ceˬ Iˉsaˍreˍlaˆ hta‸ ga piˇ peuˬ.
56Maˍriˆ lehˬ, Eˇliˇsaˍbehˆ geh shehˆ ha pa chehˇ taˉ peuˬ hkʼaw‸ nawˉ, yawˇ ve aˉ hkʼaw lo kʼaw‸ kʼo‸-e ve yoˬ.
Baˆtiˆsaˬ piˇ paˍ Yoˇhanˬ paw la ve
57Eˇliˇsaˍbehˆ yaˇ paw ve awˬ yanˇ gaˬ la leh yaˇ paˍ paw la ve yoˬ. 58Jawˇmawˇ Gʼuiˬsha lehˬ, uiˍ jaˇ ve awˬ bon yawˇ hta‸ te piˇ ve awˬ lawn, awˬ paˇ awˬ kui lo chehˇ ve chaw teˇ hpaˍ leh awˬ ceuˬ awˬ hkʼaˇ teˇ hpaˍ gʼa kaˇ ve teˇ yanˇ, yawˇ geh hkʼa geh ha lehˬ ve yoˬ.
59Hiˉ nyi teˇ nyi gaˬ htaˇ, yaˇ ehˉ hta‸ awˬ guiˬ meuˇ shoˍ piˇ tuˬ yawˇ hui laˬ ve yoˬ. Yawˇ awˬ pa ve awˬ meh hkʼa shuˍ shuˍ yawˇ hta‸ Zaˍhkaˍriˆ meh piˇ-a teh‸ te ve teˇ yanˇ, 60awˬ e kʼoˆ ve, Maˇ heˆ. Yawˇ hta‸ Yoˇhanˬ gʼa meh piˇ ve yoˬ teh‸ kʼoˆ ve yoˬ.
61Yawˇ hui lehˬ, Nawˬ ve awˬ ceuˬ awˬ hkʼaˇ awˬ hkʼaw lo chi hkʼe meh ve chaw teˇ gʼaˇ ka‸ maˇ cawˬ teh‸, yawˇ hta‸ kʼoˆ piˇ ve yoˬ. 62Oˇ htaˇ, yaˇ ehˉ oˇ ve hta‸ hkʼaˬ hkʼe meh piˇ tcuh gaˇ leh naˍ teh‸, awˬ pa hta‸ yawˇ hui awˬ heˆ te leh na nyi ve yoˬ.
63Yawˇ lehˬ, bvuh‸ tuˬ ve awˬ baˉ hta‸ lawˬ leh, Yawˇ ve awˬ meh Yoˇhanˬ yoˬ teh‸, bvuh‸ maˍ piˇ ve teˇ yanˇ, yawˇ hui hkʼa peu-eˬ anˇ jaˇ ve yoˬ. 64Oˇ ve teˇ hkui awˬ hkʼaw lo yawˇ ve maw‸ kʼaw ngaˉ leh ha tehˍ htawˇ nuˇ la ve yoˬ. Hkʼe te leh, yawˇ tawˇ yaw leh Gʼuiˬsha hta‸ chiˇ mvuh ve yoˬ. 65Oˇ htaˇ, yawˇ hui awˬ paˇ awˬ kui lo chehˇ ve chaw hkʼa peu-eˬ kawˆ ve yoˬ. Awˬ lawn oˇ ve teˇ hpaˍ Yuˇda‸ mvuhˇmiˬ hkʼaw hkʼoˆ lawˬ hkʼoˆ teˇ kaˬ le le lo bvuhˬ kʼai ve yoˬ. 66Hkʼa gʼa kaˇ ve chaw hkʼa peu-eˬ a shu yawˇ ve nyi ma hkʼaw tawnˇ taˍ leh, Yaˇ ehˉ chi lehˬ, hkʼaˬ hkʼe ve chaw hpeh‸ la tuˬ leh naˍ teh‸ kʼoˆ da‸ ve yoˬ. Awˬ lawn kʼo, Jawˇ mawˇ Gʼuiˬsha ve kanˇ paˆ yawˇ geh cawˬ ve yoˬ.
Zaˍhkaˍriˆ Gʼuiˬsha ve tawˇ hkawˇ yaw ve
67Oˇ htaˇ, yawˇ awˬ pa Zaˍhkaˍriˆ lehˬ, da‸ ve kehˬ ve Awˬ ha hpu biˇ la leh, Gʼuiˬsha ve tawˇ hkawˇ yaw leh kʼoˆ ve,
68Iˉsaˍreˍlaˆ ve Jawˇmawˇ Gʼuiˬsha hta‸ chiˇ mvuh-o.
Awˬ lawn kʼo, yawˇ ve chaw ceuˬ hta‸ yawˇ ca nyi la leh htaiˍ hkʼaw‸ piˇ peuˬ.
69Yawˇ ve awˬ ceˬ Daˍviˆ ve yehˬ awˬ hkʼaw lo
yawˇ ngaˬ hui awˬ pon kanˇ paˆ uiˍ jaˇ ve Htaiˍ hkʼaw‸ paˍ hta‸ tawˆ la piˇ peuˬ.
70Yawˇ chi hkʼe te ve lehˬ, aˬ sho-eˬ htaˇ ka‸
yawˇ ve da‸ kehˬ ve tcuh kaˍ paˍ teˇ hpaˍ hta‸ cuˇ leh kʼoˆ taˍ ve hkʼe te ve yoˬ.
71Yawˇ ngaˬ hui awˬ pon Htaiˍ hkʼaw‸ paˍ hta‸ tawˆ la piˇ ve lehˬ,
ngaˬ hui ve canˇ paˍ teˇ hpaˍ leh ngaˬ hui hta‸
nyi bawˬ ve chaw teˇ hpaˍ ve la‸ sheh awˬ hkʼaw lo ngaˬ hui hta‸ htaiˍ hkʼaw‸ laˇ tuˬ awˬ pon yoˬ.
72Yawˇ chi hkʼe te ve teˇ yanˇ, ngaˬ hui ve awˬ puˬ awˬ pi teˇ hpaˍ hta‸
ha kʼaˉ ve teˇ ceuˬ te piˇ leh,
yawˇ ve da‸ kehˬ ve ka ti‸ shaˉ caˆ hta‸ dawˇ nawˇ tuˬ awˬ pon te ve yoˬ.
73Ka ti‸ shaˉ caˆ oˇ ve lehˬ, ngaˬ hui ve awˬ puˍ lonˉ
Aˍbraˍhanˍ hta‸ yawˇ hkanˍ taˍ ve ka ti‸ shaˉ caˆ hpeh‸ ve yoˬ.
74Ka ti‸ shaˉ caˆ chi hta‸ pa taw, ngaˬ hui ve canˇ paˍ ve
la‸ sheh awˬ hkʼaw lo gʼa ponˬ peuˬ hkʼaw‸ nawˉ,
75ngaˬ hui ve a sha‸ leh htaˇ hkʼa gaˬ,
da‸ ve kehˬ ve leh hteˇ ve cawˇ ve awˬ hkʼaw lo,
kawˆ ve nyi ma maˇ cawˬ leh yawˇ mehˆ gʼuˇ suhˍ yawˇ awˬ pon kanˉ te hpeh‸ ve yoˬ.
76Yaˇ ehˉ-oˬ, nawˬ lehˬ uiˍ jaˇ mvuh jaˇ ve
Awˬ shehˍ hpaˇ ve tcuh kaˍ paˍ hpeh‸ ve yoˬ teh‸ shu kʼoˆ tuˬ yoˬ.
77Awˬ lawn kʼo, ngaˬ hui ve Gʼuiˬsha ha kʼaˉ puiˉ jaˇ ve hta‸ pa taw,
venˇbaˆ teˇ hpaˍ hta‸ hpehˇ hkʼa ve awˬ hkʼaw lo htaiˍ hkʼaw‸ ve awˬ lawn
yawˇ ve chaw ceuˬ hta‸ shiˍ piˇ tuˬ, nawˬ lehˬ Jawˇmawˇ Gʼuiˬsha awˬ gʼuˇ suhˍ lo gʼa kʼai leh,
yawˇ ve ya‸ kʼaw hta‸ gʼa gu taˍ piˇ tuˬ yoˬ.
78Mvuhˇ naw ma ve awˬ gʼeuˆ ngaˬ hui awˬ hkʼoˆ hta‸ ba la htaˇ,
79naˆ ho‸ ve leh suh ve aˉ gʼuiˬ ha awˬ hkʼaw lo chehˇ ve chaw hui awˬ hkʼoˆ hta‸
awˬ gʼeuˆ ba piˇ leh, dawˇ sha gaˇ sha ve ya‸ kʼaw awˬ hkʼaw lo ngaˬ hui hta‸ sheh maˍ laˇ tuˬ yoˬ.
teh‸ Zaˍhkaˍriˆ kʼoˆ ve yoˬ.
80Yaˇ ehˉ oˇ ve uiˍ la leh, co ha hpawˇ htawˇ awˬ gʼaˇ uiˍ la ve yoˬ. Iˉsaˍreˍlaˆ chaw hui mehˆ gʼuˇ suhˍ yawˇ tawˆ la ve teˇ nyi hkʼa gaˬ, heh puiˉ hkʼaw lo ceh tiˉ chehˇ taˍ ve yoˬ.
Currently Selected:
Luˉka‸ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.