Yoˇnaˆ li‸ 1
1
Yoˇnaˆ Gʼuiˬsha hkawˇ maˇ na yuˬ ve
1Teˇ nyi htaˇ, Gʼuiˬsha Aˍmiˆtehˇ ve yaˇ paˍ Yoˇnaˆ hta‸ kʼoˆ piˇ ve, 2Niˇnaˍveˍ venˇ lonˉ lo kʼai leh, yawˇ hui hta‸ tawˇ ca yaw piˇ-oˆ. Awˬ lawn kʼo, chaw oˇ ve teˇ hpaˍ hkʼaˬ ma haiˬ jaˇ chehˇ ve hta‸ ngaˬ gʼa mawˬ peuˬ, teh‸ kʼoˆ ve yoˬ. 3Ya‸ hkʼaˇ, Yoˇnaˆ lehˬ maˇ heˆ ve teˇ hpawˇ lo hpaw-e ve yoˬ. Yawˇ Yuˇpeˍ venˇ lo kʼai leh, Saˍpenˍ venˇ lo kʼai tuˬ ve haw lo‸ kʼoˍ teˇ maˬ hta‸ gʼa mawˬ ve yoˬ. 4Hkʼe te leh, yawˇ awˬ hpfuhˇ piˇ leh haw lo‸ kʼoˍ oˇ ve hta‸ ciˇ kʼai ve yoˬ. Ya‸ hkʼaˇ, Gʼuiˬsha lehˬ laˇ tsuhˇ gʼuiˬ hkʼoˆ lo mvuhˇ haw lonˉ meuˆ laˬ piˇ lawˬ ve yoˬ. Gʼuiˬ baˇ teˇ hpaˍ uiˍ taˆ la leh, haw lo‸ kʼoˍ oˇ ve luˬ kʼai la paˇ neˇ ve yoˬ. 5Haw lo‸ kʼoˍ hkʼaw kanˉ te chehˇ ve chaw teˇ hpaˍ kawˆ jaˇ leh, a shu yawˇ ve gʼuiˬsha hta‸ gʼaˇ hte‸ kuˬ ca ve yoˬ. Haw lo‸ kʼoˍ hta‸ a ciˉ lawˬ la piˇ tuˬ, yawˇ hui lehˬ taˆ taˍ ve mawˇ teˇ hpaˍ hta‸ laˇ tsuhˇ gʼuiˬ hkʼaw baˬ keu ve yoˬ. Ya‸ hkʼaˇ, Yoˇnaˆ lehˬ haw lo‸ kʼoˍ awˬ hawˉ teˇ htai‸ lo ya‸-e leh, zuh‸ muiˉ kʼa chehˇ ve yoˬ.
6Haw lo‸ kʼoˍ awˬ hoˉ yawˇ hta‸ mawˬ leh, Aˬ hto‸ ma pa taw nawˬ zuh‸ muiˉ kʼa chehˇ ve le. Tu leh nawˬ ve gʼuiˬsha hta‸ kuˬ-o‸. Oˇ hkʼe te ve kʼo, yawˇ ngaˬ hui hta‸ ha kʼaˉ laˇ leh, ngaˬ hui ve a sha‸ hta‸ ponˬ laˇ tuˬ naˍ maˇ shiˍ, teh‸ yawˇ hta‸ kʼoˆ piˇ ve yoˬ.
7Oˇ htaˇ haw lo‸ kʼoˍ hkʼaw kanˉ te chehˇ ve chaw teˇ hpaˍ lehˬ, A shu teˇ gʼaˇ hta‸ pa taw ngaˬ hui chi hkʼe gʼa hkanˍ ve leh naˍ, ngaˬ hui awˬ meh bvuh‸ keu leh hkaˆ yuˬ nyi shaˍ, teh‸ teˇ gʼaˇ leh teˇ gʼaˇ kʼoˆ da‸ ve yoˬ. Yawˇ hui oˇ hkʼe te nyi leh, Yoˇnaˆ ve awˬ meh hta‸ hkaˆ tawˆ la ve yoˬ. 8Oˇ htaˇ yawˇ hui lehˬ, Chi hkʼe hpeh‸ la ve a shu hta‸ venˇbaˆ gʼa taˍ tuˬ le. Ngaˬ hui hta‸ hto laˇ-oˆ. Nawˬ choˬ kaˬ lo aˬ hto‸ ma te chehˇ ve le. Nawˬ hkʼaˬ lo laˬ ve le. Nawˬ aˬ hto‸ ma chaw ceuˬ le, teh‸ Yoˇnaˆ hta‸ na nyi ve yoˬ.
9Yoˇnaˆ kʼaw‸ yaw hkʼaw‸ leh kʼoˆ ve, Ngaˬ lehˬ Heˍbrehˇ chaw hpeh‸ ve yoˬ. Ngaˬ lehˬ miˬguiˬ leh laˇ tsuhˇ gʼuiˬ hta‸ te hpanˍ shehˍ hpaˇ mvuhˇ naw Gʼuiˬsha hta‸ oˉ kʼoˍ pui ve yoˬ, teh‸ yawˇ hui hta‸ kʼoˆ piˇ ve yoˬ.
10Oˇ htaˇ chaw oˇ ve teˇ hpaˍ kawˆ jaˇ leh, Nawˬ lehˬ kawˆ tuˬ uiˍ jaˇ ve kanˉ hta‸ te taˍ peuˬ ve yoˬ, teh‸ yawˇ hta‸ kʼoˆ piˇ ve yoˬ.(Yoˇnaˆ yawˇ hui hta‸ kʼoˆ maˍ piˇ ve pa taw, yawˇ lehˬ Gʼuiˬsha hkawˇ maˇ na leh hpaw toˇ chehˇ ve chaw hpeh‸ ve hta‸ yawˇ hui shiˍ la ve yoˬ.) 11Gʼuiˬ baˇ teˇ hpaˍ shaˬ te shaˬ hehnˇ la chehˇ ve pa taw, haw lo‸ kʼoˍ hkʼaw kanˉ te chehˇ ve chaw oˇ ve teˇ hpaˍ lehˬ, Laˇ tsuhˇ gʼuiˬ kʼaw‸ gawˬ kʼai tuˬ ngaˬ hui nawˬ hta‸ hkʼaˬ hkʼe gʼa te laˇ tuˬ le, teh‸ Yoˇnaˆ hta‸ kʼoˆ piˇ ve yoˬ.
12Yoˇnaˆ kʼaw‸ yaw hkʼaw‸ leh kʼoˆ ve, Ngaˬ hta‸ yuˬ leh laˇ tsuhˇ gʼuiˬ hkʼaw baˬ keu laˇ-oˆ. Oˇ hkʼe te ve kʼo, laˇ tsuhˇ gʼuiˬ kʼaw‸ gawˬ kʼai tuˬ yoˬ. Ngaˬ hta‸ pa taw gʼuiˬ baˇ chi teˇ hpaˍ uiˍ taˆ la chehˇ ve yoˬ, teh‸ yawˇ hui hta‸ kʼoˆ piˇ ve yoˬ.
13Chaw oˇ ve teˇ hpaˍ lehˬ, gʼuiˬ pfuhˍ lo gaˬ tuˬ gʼaˇ hte‸ coˇ caˇ leh haw lo‸ kʼoˍ hta‸ gʼawˆ kʼai nyi ve yoˬ. Ya‸ hkʼaˇ, gʼuiˬ baˇ shaˬ te shaˬ hehnˇ jaˇ la chehˇ ve pa taw, yawˇ hui dawˇ taˍ ve hkʼe maˇ hpeh‸ la. 14Hkʼe te leh, yawˇ hui Gʼuiˬsha hta‸ kuˬ leh kʼoˆ ve, Gʼuiˬsha-oˬ, chaw chi hpaˇ ve a sha‸ hta‸ ngaˬ hui yuˬ suh piˇ ve pa taw, ngaˬ hui hta‸ taˇ ciˍ yanˍ laˇ-oˆ. Hpeh‸ la ve awˬ ceuˬ chi hkʼa peu-eˬ hta‸ nawˬ te taˍ ve yoˬ, teh‸ kʼoˆ ve yoˬ. 15Oˇ hkʼe kʼoˆ peuˬ hkʼaw‸ nawˉ, yawˇ hui Yoˇnaˆ hta‸ yuˬ leh laˇ tsuhˇ gʼuiˬ hkʼaw baˬ keu ve yoˬ. Oˇ htaˇ, laˇ tsuhˇ gʼuiˬ teˇ cawˬ haˉ gawˬ kʼai ve yoˬ. 16Haw lo‸ kʼoˍ hkʼaw kanˉ te chehˇ ve chaw oˇ ve teˇ hpaˍ Gʼuiˬsha hta‸ kawˆ jaˇ ve yoˬ. Hkʼe te leh, yawˇ hui Gʼuiˬsha hta‸ tuˉ tanˇ piˇ leh, yawˇ ve kanˉ hta‸ te tuˬ ka ti‸ te ve yoˬ.
17Gʼuiˬsha lehˬ ngaˇ lonˉ teˇ hkeh hta‸ gu taˍ leh, Yoˇnaˆ hta‸ hehˆ dawˬ tcuh ve yoˬ. Hkʼe te leh, Yoˇnaˆ lehˬ ngaˇ lonˉ gʼoˇ peˬ hkʼaw shehˆ nyi shehˆ haˉ chehˇ taˍ ve yoˬ.
Currently Selected:
Yoˇnaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.