Yoˇhanˬ li‸ 18
18
Yeˍsuˆ hta‸ chiˇ a‸ piˇ leh hpeh yuˬ ve
1Yeˍsuˆ oˇ hkʼe kʼoˆ peuˬ hkʼaw‸ nawˉ, yawˇ ve awˬ la‸ gʼawˇ hui geh teˇ geh tawˆ kʼai leh, Keˍdronˍ lawˬ kʼaˉ coˇ paˉ lo hkanˍ kʼai ve yoˬ. Oˇ kaˬ lo cawˬ ve hko awˬ hkʼaw lo yawˇ leh yawˇ ve awˬ la‸ gʼawˇ teˇ hpaˍ teˇ geh lo‸-e ve yoˬ. 2Yeˍsuˆ lehˬ yawˇ ve awˬ la‸ gʼawˇ hui geh teˇ geh oˇ kaˬ lo laiˉ pawˆ kʼai jaw ve pa taw, yawˇ hta‸ chiˇ a‸ piˇ shehˍ hpaˇ Yuˇda‸ lehˬ, chehˇ kuiˬ oˇ ve hta‸ shiˍ ve yoˬ. 3Hkʼe te leh Yuˇda‸ lehˬ, ma‸ yaˇ teˇ moˍ leh paw hkuˇ lonˉ leh Hpiˍriˍsehˇ hui hta‸ caˉ da‸ ve ma‸ yaˇ teˇ hpaˍ hta‸ shiˍ veu laˇ leh laˬ ve yoˬ. Yawˇ hui lehˬ, kawˆ faiˇ tuˉ aˬ miˍ tuˉ leh, la‸ caˉ ka‸ yuˬ veu laˇ ve yoˬ. 4Yeˍsuˆ lehˬ, yawˇ awˬ hkʼoˆ hkʼaˬ hkʼe gaˬ la tuˬ ve hkʼa peu-eˬ hta‸ shiˍ leh, yawˇ yawˇ hui geh kʼai leh, Nawˬ hui a shu hta‸ ca ve le teh‸, yawˇ hui hta‸ na nyi ve yoˬ.
5Yawˇ hui kʼaw‸ kʼoˆ ve, Naˍzaˍrehˆ chaw Yeˍsuˆ hta‸ ca ve yoˬ teh‸ kʼoˆ ve teˇ yanˇ, Ngaˬ lehˬ yawˇ yoˬ teh‸, Yeˍsuˆ yawˇ hui hta‸ kʼaw‸ kʼoˆ piˇ ve yoˬ.
Yawˇ hta‸ chiˇ a‸ piˇ shehˍ hpaˇ Yuˇda‸ htawˇ yawˇ hui geh huˉ taˍ ve yoˬ. 6Ngaˬ lehˬ yawˇ yoˬ teh‸ Yeˍsuˆ kʼoˆ ve teˇ yanˇ, yawˇ hui awˬ hkʼaw‸ nawˉ htunˍ kʼo‸-e leh miˬ chaˇ hkʼoˆ paiˍ ve yoˬ.
7Nawˬ hui a shu hta‸ ca ve le teh‸ yawˇ yawˇ hui hta‸ teˇ pawˆ kʼaw‸ na nyi htaˇ,
Naˍzaˍrehˆ chaw Yeˍsuˆ hta‸ ca ve yoˬ teh‸, yawˇ hui kʼaw‸ kʼoˆ ve yoˬ.
8Yeˍsuˆ kʼaw‸ kʼoˆ ve, Ngaˬ lehˬ yawˇ yoˬ teh‸ nawˬ hui hta‸ ngaˬ hto laˇ peuˬ. Hkʼe te leh, nawˬ hui ngaˬ hta‸ ca ve kʼo, chaw chi teˇ hpaˍ hta‸ hpehˇ piˇ-oˆ teh‸ kʼoˆ ve yoˬ. 9Yawˇ chi hkʼe kʼoˆ ve lehˬ, Nawˬ ngaˬ hta‸ pe‸ laˇ ve chaw hui awˬ hkʼaw lo chaw teˇ gʼaˇ ka‸ maˇ luˬ kʼai teh‸ kʼoˆ taˍ ve tawˇ teˇ hkawˇ hta‸ biˇ la tuˬ awˬ pon kʼoˆ ve yoˬ.
10Oˇ htaˇ, Siˉmonˍ Peˍtruˆ aˉ htaw pfuhˇ taˍ ve pa taw, aˉ htaw oˇ ve hta‸ yawˇ gʼawˬ tawˆ leh, paw hkuˇ lonˉ ve awˬ ceˬ hta‸ chaw leh, la‸ sha paˉ ve naˍ paw cheˆ ve yoˬ. Awˬ ceˬ oˇ ve lehˬ, Maˍlaˍhkuˆ meh ve yoˬ. 11Oˇ htaˇ, Yeˍsuˆ lehˬ Peˍtruˆ hta‸ kʼoˆ piˇ ve, Nawˬ ve aˉ htaw hta‸ awˬ hpui awˬ hkʼaw lo kʼaw‸ hkʼaw‸ keu-o. Awˬ pa ngaˬ hta‸ pe‸ laˇ ve kawˆ hta‸ ngaˬ maˇ gʼa dawˬ leh laˇ teh‸ kʼoˆ ve yoˬ.
Aˍnaˆ Yeˍsuˆ hta‸ suhˉ jehˬ ve
12Oˇ htaˇ, ma‸ yaˇ teˇ moˍ leh ma‸ poˍ ka‸, Yuˇda‸ chaw hui ve ma‸ yaˇ teˇ hpaˍ ka‸ Yeˍsuˆ hta‸ yuˬ hpeh taˍ ve yoˬ. 13Awˉ lawˉ htaˇ yawˇ hta‸ Aˍnaˆ geh yuˬ kʼai ve yoˬ. Awˬ lawn kʼo, Aˍnaˆ lehˬ Kaˍyaˍhpaˆ ve awˬ puˍ hpeh‸ ve yoˬ. Kaˍyaˍhpaˆ lehˬ, oˇ ve teˇ hkʼaw‸ awˬ hkʼaw lo paw hkuˇ lonˉ te chehˇ ve yoˬ. 14Kaˍyaˍhpaˆ oˇ ve teˇ gʼaˇ lehˬ, Chaw ceuˬ awˬ pon chaw teˇ gʼaˇ suh ve kʼo, leuˉ leh da‸ ve yoˬ teh‸, Yuˇda‸ chaw hui hta‸ awˬ hkʼaˇ beˆ maˍ piˇ jaw ve teˇ gʼaˇ yoˬ.
Paw hkuˇ lonˉ ve shaˉ nanˉ awˬ paˇ ko taˍ kuiˬ awˬ hkʼaw lo Peˍtruˆ lo‸-e ve
15Siˉmonˍ Peˍtruˆ leh awˬ kaˍ awˬ nu awˬ la‸ gʼawˇ teˇ gʼaˇ Yeˍsuˆ awˬ hkʼaˇ suh kʼai ve yoˬ. Awˬ la‸ gʼawˇ oˇ ve teˇ gʼaˇ lehˬ, paw hkuˇ lonˉ hta‸ shiˍ da‸ ve pa taw, paw hkuˇ lonˉ ve shaˉ nanˉ awˬ paˇ ko taˍ kuiˬ awˬ hkʼaw lo Yeˍsuˆ geh teˇ geh lo‸-e ve yoˬ. 16Peˍtruˆ lehˬ, awˬ baˬ hpawˇ yehˬ miˉ awˬ paˇ lo huˉ taˍ ve yoˬ. Hkʼe te leh, paw hkuˇ lonˉ hta‸ shiˍ da‸ ve awˬ la‸ gʼawˇ oˇ ve teˇ gʼaˇ tawˆ kʼai leh, yehˬ miˉ shaw shehˍ ma hta‸ kʼoˆ piˇ peuˬ hkʼaw‸ nawˉ, Peˍtruˆ hta‸ shiˍ lo‸ la ve yoˬ. 17Oˇ htaˇ, yehˬ miˉ shaw shehˍ ma lehˬ, Nawˬ htawˇ chaw oˇ ve teˇ gʼaˇ ve awˬ la‸ gʼawˇ hpeh‸ ve maˇ heˆ laˇ teh‸ Peˍtruˆ hta‸ na nyi htaˇ,
Maˇ heˆ teh‸, yawˇ kʼaw‸ kʼoˆ piˇ ve yoˬ.
18Oˇ htaˇ kaˆ ve pa taw, awˬ ceˬ teˇ hpaˍ leh ma‸ yaˇ teˇ hpaˍ lehˬ, shiˉ gʼeu‸ hta‸ aˬ miˍ ceh leh, huˉ lehˬ chehˇ ve yoˬ. Peˍtruˆ htawˇ yawˇ hui geh huˉ taˍ leh aˬ miˍ lehˬ chehˇ ve yoˬ.
Paw hkuˇ lonˉ Yeˍsuˆ hta‸ na nyi ve
19Oˇ htaˇ paw hkuˇ lonˉ lehˬ, Yeˍsuˆ hta‸ yawˇ ve awˬ la‸ gʼawˇ teˇ hpaˍ leh yawˇ maˍ piˇ ve teˇ hpaˍ awˬ lawn na nyi ve yoˬ. 20Yeˍsuˆ kʼaw‸ kʼoˆ ve, Miˬguiˬ yaˇ hui hta‸ ngaˬ hkʼa tawˍ lehˆ maˍ piˇ peuˬ. Yuˇda‸ chaw hkʼa peu-eˬ hpawnˬ da‸ kuiˬ, bon yehˬ teˇ hpaˍ awˬ hkʼaw lo maˇ kʼoˆ, bon yehˬ lonˉ awˬ hkʼaw lo maˇ kʼoˆ, ngaˬ hkʼa htaˆ ka‸ maˍ piˇ chehˇ ve yoˬ. Ngaˬ shu hta‸ teˇ ceuˬ ka‸ maˇ hkʼawˇ maˍ jaw. 21Aˬ hto‸ ma pa taw nawˬ ngaˬ hta‸ na nyi laˇ ve le. Ngaˬ yawˇ hui hta‸ hkʼaˬ hkʼe maˍ piˇ ve awˬ lawn, ngaˬ maˍ piˇ ve chaw teˇ hpaˍ hta‸ na nyi-o. Ngaˬ hkʼaˬ hkʼe maˍ ve hta‸ yawˇ hui shiˍ ve yoˬ teh‸, yawˇ hta‸ kʼaw‸ kʼoˆ piˇ ve yoˬ.
22Yawˇ chi hkʼe kʼoˆ ve teˇ yanˇ, awˬ paˇ lo huˉ chehˇ ve ma‸ yaˇ teˇ gʼaˇ lehˬ, Yeˍsuˆ hta‸ hta hpehˇ leh, Paw hkuˇ lonˉ hta‸ nawˬ chi hkʼe yaw hkʼaw‸ ve laˇ teh‸ kʼoˆ piˇ ve yoˬ.
23Yeˍsuˆ kʼaw‸ kʼoˆ ve, Ngaˬ kʼoˆ ve maˇ cawˇ kʼo, maˇ cawˇ ve hta‸ hkʼa deh‸ beˆ maˍ laˇ-oˆ. Ngaˬ kʼoˆ ve cawˇ ve kʼo, aˬ hto‸ ma te ngaˬ hta‸ dawˆ laˇ ve le teh‸, yawˇ hta‸ kʼoˆ piˇ ve yoˬ.
24Yeˍsuˆ hta‸ shu hpeh taˍ ve hta‸ Aˍnaˆ maˇ hpui leh, paw hkuˇ lonˉ Kaˍyaˍhpaˆ geh sheh kʼai tcuh ve yoˬ.
Peˍtruˆ Yeˍsuˆ hta‸ chiˇ baˬ ve
25Siˉmonˍ Peˍtruˆ huˉ taˍ leh aˬ miˍ lehˬ chehˇ ve teˇ yanˇ, Nawˬ htawˇ yawˇ ve awˬ la‸ gʼawˇ maˇ heˆ laˇ teh‸, yawˇ hui yawˇ hta‸ na nyi ve yoˬ.
Maˇ heˆ teh‸ yawˇ kʼoˆ leh gʼawˬ hkʼaˆ ve yoˬ.
26Peˍtruˆ chaw leh naˍ paw cheˆ ve chaw teˇ gʼaˇ ve awˬ viˉ awˬ nyi hpeh‸ ve, paw hkuˇ lonˉ ve awˬ ceˬ teˇ gʼaˇ kʼoˆ ve, Nawˬ lehˬ hko awˬ hkʼaw lo chaw oˇ ve geh teˇ geh chehˇ ve hta‸ ngaˬ mawˬ ve yoˬ maˇ heˆ laˇ teh‸ kʼoˆ ve yoˬ.
27Peˍtruˆ teˇ pawˆ kʼaw‸ gʼawˬ hkʼaˆ ve yoˬ. Oˇ teˇ hkui gʼaˆ hpfuh bvuhˬ la ve yoˬ.
Jawˇmawˇ Piˉla‸ Yeˍsuˆ hta‸ na nyi ve
28Oˇ ve awˬ hkʼaw‸ nawˉ mvuhˇ shawˉ teˇ na‸ htaˇ, yawˇ hui lehˬ Yeˍsuˆ hta‸ Kaˍyaˍhpaˆ geh lo te leh jawˇmawˇ lonˉ ve hawˉ yehˬ awˬ hkʼaw lo yuˬ kʼai ve yoˬ. Yawˇ hui lehˬ, maˇ gʼa cha‸ chiˆ leh, Paˍsaˍhkaˍ pawehˇ hta‸ gʼa caˇ tuˬ, jawˇmawˇ lonˉ ve hawˉ yehˬ awˬ hkʼaw lo maˇ lo‸-e. 29Hkʼe te leh, jawˇmawˇ Piˉla‸ tawˆ la leh, Chi hpaˇ awˬ hkʼoˆ nawˬ hui aˬ hto‸ ma venˇbaˆ taˍ kuiˬ cawˬ le teh‸, yawˇ hui hta‸ na nyi ve yoˬ.
30Yawˇ hui kʼaw‸ kʼoˆ ve, Chaw chi hpaˇ lehˬ, haiˬ ve hta‸ maˇ te ve hkʼe kʼo, ngaˬ hui nawˬ hta‸ chiˇ a‸ laˇ tuˬ ve maˇ heˆ teh‸ yawˇ hta‸ kʼoˆ piˇ ve yoˬ.
31Hkʼe te leh, jawˇmawˇ Piˉla‸ kʼoˆ ve, Nawˬ hui yawˇ hta‸ yuˬ leh, nawˬ hui awˬliˇtawˇhkawˇ cawˬ taˍ ve hkʼe suhˉ jehˬ-o‸ teh‸ yawˇ hui hta‸ kʼoˆ piˇ ve yoˬ.
Yuˇda‸ chaw teˇ hpaˍ kʼaw‸ kʼoˆ ve, Ngaˬ hui lehˬ, chaw teˇ gʼaˇ hta‸ ka‸ tiˇ pehˍ tuˬ a hkaw-anˬ maˇ cawˬ teh‸ yawˇ hta‸ kʼoˆ piˇ ve yoˬ. 32Yawˇ hui chi hkʼe kʼoˆ ve lehˬ, Yeˍsuˆ yawˇ hkʼaˬ hkʼe gʼa te suh tuˬ ve awˬ lawn kʼoˆ taˍ ve hkʼe biˇ la tuˬ awˬ pon hpeh‸ ve yoˬ.
33Hkʼe te leh jawˇmawˇ Piˉla‸ lehˬ, hawˉ yehˬ awˬ hkʼaw lo kʼaw‸ lo‸-e leh, Yeˍsuˆ hta‸ kuˬ yuˬ peuˬ hkʼaw‸ nawˉ, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, yawˇ hta‸ na nyi ve yoˬ.
34Yeˍsuˆ kʼaw‸ kʼoˆ ve, Nawˬ hkʼaˇ nawˬ dawˇ tawˆ leh na nyi ve laˇ. Maˇ heˆ kʼo, ngaˬ ve awˬ lawn shu nawˬ hta‸ kʼoˆ laˇ ve laˇ teh‸ na nyi ve yoˬ.
35Jawˇmawˇ Piˉla‸ kʼaw‸ kʼoˆ ve, Ngaˬ lehˬ Yuˇda‸ chaw hpeh‸ ve leh laˇ. Nawˬ ve chaw ceuˬ leh paw hkuˇ lonˉ teˇ hpaˍ nawˬ hta‸ ngaˬ ve la‸ hkʼaw lo chiˇ a‸ laˇ peuˬ. Nawˬ aˬ hto‸ ma teˇ ceuˬ te ya‸ ve le teh‸ na nyi ve yoˬ.
36Yeˍsuˆ kʼaw‸ kʼoˆ ve, Ngaˬ hkunˉ hawˉ hkanˇ te kuiˬ lehˬ, chi miˬguiˬ hta‸ maˇ caˉ da‸. Ngaˬ hkunˉ hawˉ hkanˇ te kuiˬ chi miˬguiˬ hta‸ caˉ da‸ ve hkʼe kʼo, ngaˬ lehˬ Yuˇda‸ chaw hui ve la‸ hkʼaw lo maˇ gʼa gaˬ tuˬ, ngaˬ ve yaˇ gʼuiˬ teˇ hpaˍ yawˇ hui hta‸ bawˆ tuˬ yoˬ. Ya‸ hkʼaˇ, ngaˬ hkunˉ hawˉ hkanˇ te kuiˬ lehˬ, chi miˬguiˬ hta‸ maˇ caˉ da‸ teh‸ kʼoˆ piˇ ve yoˬ.
37Jawˇmawˇ Piˉla‸ kʼoˆ ve, Hkʼe te kʼo, nawˬ hkunˉ hawˉ hkanˇ hpeh‸ ve yoˬ laˇ teh‸ yawˇ hta‸ na nyi ve teˇ yanˇ,
Yeˍsuˆ kʼaw‸ kʼoˆ ve, Nawˬ kʼoˆ ve hkʼe, ngaˬ hkunˉ hawˉ hkanˇ hpeh‸ ve yoˬ. Hteˇ ve cawˇ ve teˇ ceuˬ awˬ lawn shaˉ hkiˆ hkanˍ tuˬ awˬ pon ngaˬ paw la leh miˬguiˬ hkʼoˆ lo laˬ ve yoˬ. Hteˇ ve cawˇ ve hta‸ caˉ da‸ ve chaw hkʼa peu-eˬ lehˬ, ngaˬ ve tawˇ hkawˇ hta‸ na ve yoˬ teh‸ kʼoˆ ve yoˬ.
38Jawˇmawˇ Piˉla‸ kʼoˆ ve, Hteˇ ve cawˇ ve teˇ ceuˬ lehˬ, aˬ hto‸ ma le teh‸ yawˇ hta‸ na nyi ve yoˬ.
Jawˇmawˇ Piˉla‸ chi hkʼe kʼoˆ peuˬ hkʼaw‸ nawˉ, Yuˇda‸ chaw hui chehˇ taˍ kuiˬ lo yawˇ tawˆ kʼai leh kʼoˆ ve, Chaw chi hpaˇ awˬ hkʼaw lo ya‸ kuiˬ hta‸ ngaˬ ca maˇ mawˬ. 39Paˍsaˍhkaˍ pawehˇ te ve teˇ yanˇ, ngaˬ nawˬ hui awˬ pon chaw teˇ gʼaˇ hta‸ hpehˇ piˇ ve awˬ liˇ cawˬ ve yoˬ. Hkʼe te leh, Yuˇda‸ chaw hui ve Hkunˉ hawˉ hkanˇ hta‸ ngaˬ hpehˇ laˇ tuˬ nawˬ hui heuˆ gaˇ ve laˇ teh‸, yawˇ hui hta‸ na nyi ve yoˬ.
40Yawˇ hui teˇ pawˆ kʼaw‸ kuˬ leh kʼoˆ ve, Chi hpaˇ hta‸ maˇ heˆ. Baˍraˍbaˆ hta‸ hpehˇ laˇ-oˆ teh‸ kʼoˆ ve yoˬ. Baˍraˍbaˆ lehˬ, chaw hpfuhˆ hpeh‸ ve yoˬ.
Currently Selected:
Yoˇhanˬ li‸ 18: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.