Yoˇhanˬ li‸ 14
14
Yeˍsuˆ leh Awˬ pa Gʼuiˬsha awˬ lawn
1Nawˬ hui ve nyi ma taˇ dawˇ haˍ gaˇ haˍ. Gʼuiˬsha hta‸ yonˍ-o‸. Ngaˬ hta‸ htawˇ yonˍ-o‸. 2Ngaˬ Awˬ pa ve yehˬ awˬ hkʼaw lo chehˇ kuiˬ cawˬ maˇ ve yoˬ. Chehˇ kuiˬ maˇ cawˬ ve hkʼe kʼo, maˇ cawˬ teh‸ ngaˬ nawˬ hui hta‸ hto taˍ laˇ tuˬ yoˬ. Ngaˬ kʼo‸-e leh, nawˬ hui awˬ pon chehˇ kuiˬ ca gu tuˬ yoˬ. 3Ngaˬ kʼo‸-e leh nawˬ hui awˬ pon chehˇ kuiˬ ca gu taˉ peuˬ kʼo, ngaˬ ve chehˇ kui lo nawˬ hui htawˇ gʼa chehˇ tuˬ, ngaˬ teˇ pawˆ kʼaw‸ laˬ leh nawˬ hui hta‸ shiˍ kʼo‸-e tuˬ yoˬ. 4Ngaˬ kʼai kuiˬ ya‸ kʼaw hta‸ nawˬ hui shiˍ ve yoˬ teh‸ kʼoˆ piˇ ve yoˬ.
5Htoˉma‸ kʼoˆ ve, Jawˇmawˇ-oˬ, nawˬ hkʼaˬ lo kʼai tuˬ ve hta‸ ngaˬ hui maˇ shiˍ. Ya‸ kʼaw hta‸ ngaˬ hui hkʼaˬ hkʼe te shiˍ tuˬ le teh‸ yawˇ hta‸ kʼoˆ piˇ ve yoˬ.
6Yeˍsuˆ kʼoˆ ve, Ngaˬ lehˬ ya‸ kʼaw yoˬ. Hteˇ ve cawˇ ve teˇ ceuˬ ka‸, co ha te‸ ve teˇ ceuˬ ka‸ hpeh‸ ve yoˬ. Ngaˬ hta‸ maˇ cuˇ kʼo, chaw teˇ gʼaˇ ka‸ Awˬ pa geh gaˬ maˇ hpeh‸. 7Nawˬ hui lehˬ ngaˬ hta‸ shiˍ ve hkʼe kʼo, ngaˬ Awˬ pa hta‸ htawˇ nawˬ hui shiˍ tuˬ yoˬ. Chi beu‸ hta‸ tanˬ leh nawˬ hui yawˇ hta‸ gʼa shiˍ gʼa mawˬ peuˬ teh‸, Htoˉma‸ hta‸ kʼoˆ piˇ ve yoˬ.
8Hpiˇliˇpuˆ kʼoˆ ve, Jawˇmawˇ-oˬ, ngaˬ hui hta‸ Awˬ pa a ciˉ maw laˇ-oˆ. Maw laˇ ve kʼo, ngaˬ hui nyi hkʼaˇ suh tuˬ yoˬ teh‸ yawˇ hta‸ kʼoˆ piˇ ve yoˬ.
9Yeˍsuˆ kʼoˆ ve, Hpiˇliˇpuˆ-oˬ, ngaˬ nawˬ hui geh chi maw maw chehˇ peuˬ ve htawˇ, nawˬ ngaˬ hta‸ maˇ shiˍ sheˍ laˇ. Ngaˬ hta‸ mawˬ ve chaw lehˬ, Awˬ pa hta‸ mawˬ peuˬ. Ngaˬ hui hta‸ Awˬ pa a ciˉ maw laˇ-oˆ teh‸, nawˬ aˬ hto‸ ma te kʼoˆ ve le. 10Awˬ pa awˬ hkʼaw lo ngaˬ chehˇ ve hta‸ maˇ kʼoˆ, ngaˬ awˬ hkʼaw lo Awˬ pa chehˇ ve hta‸ maˇ kʼoˆ, nawˬ maˇ yonˍ leh laˇ. Ngaˬ nawˬ hui hta‸ kʼoˆ laˇ ve tawˇ hkawˇ teˇ hpaˍ lehˬ, ngaˬ hkʼaˇ ngaˬ a loˍ cawˇ ve hkʼe ngaˬ kʼoˆ ve maˇ heˆ. Ngaˬ awˬ hkʼaw lo chehˇ taˍ ve Awˬ pa lehˬ, yawˇ ve kanˉ teˇ hpaˍ hta‸ yawˇ te chehˇ ve yoˬ. 11Ngaˬ lehˬ Awˬ pa awˬ hkʼaw lo chehˇ ve hta‸ maˇ kʼoˆ, Awˬ pa lehˬ ngaˬ awˬ hkʼaw lo chehˇ ve hta‸ maˇ kʼoˆ, yonˍ loˬ. Maˇ heˆ kʼo, ngaˬ te ve kanˉ teˇ hpaˍ hta‸ pa taw ngaˬ hta‸ yonˍ loˬ. 12Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ hta‸ yonˍ ve chaw lehˬ ngaˬ te ve kanˉ teˇ hpaˍ hta‸ yawˇ te tuˬ yoˬ. Chi a‸ kehˉ uiˍ ve kanˉ teˇ hpaˍ hta‸ htawˇ yawˇ te tuˬ yoˬ. Awˬ lawn kʼo, ngaˬ lehˬ Awˬ pa geh kʼo‸-e tuˬ yoˬ. 13Awˬ pa lehˬ Yaˇ hpu hta‸ pa taw awˬ me‸ awˬ hponˇ gʼa tuˬ, ngaˬ ve awˬ meh awˬ hkʼaw lo nawˬ hui hkʼa lawˬ ve teˇ hpaˍ hta‸ ngaˬ te tuˬ yoˬ. 14Ngaˬ ve awˬ meh awˬ hkʼaw lo nawˬ hui teˇ ceuˬ ceuˬ lawˬ ve kʼo, nawˬ hui lawˬ ve hkʼe ngaˬ te tuˬ yoˬ.
Awˬ ha hpu peu laˇ tuˬ ve awˬ lawn Yeˍsuˆ ka ti‸ piˇ ve
15Nawˬ hui ngaˬ hta‸ ha‸ ve kʼo, ngaˬ piˇ taˍ ve tawˇ hkawˇ teˇ hpaˍ hta‸ nawˬ hui na yuˬ leh te tuˬ yoˬ. 16Ngaˬ lehˬ, Awˬ pa hta‸ lawˬ leh, nawˬ hui geh hkʼaˬ htaˆ ka‸ chehˇ tuˬ, awˬ kaˍ awˬ nu Ga piˇ shehˍ hpaˇ teˇ gʼaˇ yawˇ nawˬ hui hta‸ pe‸ laˇ tuˬ yoˬ. Ga piˇ shehˍ hpaˇ oˇ ve lehˬ, hteˇ ve cawˇ ve Awˬ ha hpu hpeh‸ ve yoˬ. 17Miˬguiˬ yaˇ hui lehˬ, yawˇ hta‸ maˇ mawˬ maˇ shiˍ ve pa taw, yawˇ hta‸ ha‸ yuˬ maˇ hpeh‸. Nawˬ hui lehˬ yawˇ hta‸ shiˍ ve yoˬ. Awˬ lawn kʼo, yawˇ nawˬ hui geh chehˇ leh, nawˬ hui awˬ hkʼaw lo htawˇ yawˇ chehˇ tuˬ yoˬ.
18Ngaˬ nawˬ hui hta‸ yaˇcuˬshi hkʼe baˬ taˉ laˇ tuˬ ve maˇ heˆ. Ngaˬ nawˬ hui geh kʼaw‸ laˬ tuˬ yoˬ. 19Teˇ hkui gaˬ kʼo, miˬguiˬ yaˇ teˇ hpaˍ lehˬ ngaˬ hta‸ maˇ gʼa kʼaw‸ mawˬ. Ya‸ hkʼaˇ nawˬ hui lehˬ, ngaˬ hta‸ gʼa kʼaw‸ mawˬ tuˬ yoˬ. Ngaˬ te‸ ve hta‸ pa taw, nawˬ hui htawˇ gʼa te‸ tuˬ yoˬ. 20Oˇ ve teˇ nyi gaˬ kʼo, Awˬ pa awˬ hkʼaw lo ngaˬ chehˇ ve hta‸ maˇ kʼoˆ, nawˬ hui ngaˬ awˬ hkʼaw lo chehˇ ve hta‸ maˇ kʼoˆ, ngaˬ nawˬ hui awˬ hkʼaw lo chehˇ ve hta‸ maˇ kʼoˆ, nawˬ hui gʼa shiˍ tuˬ yoˬ.
21Ngaˬ piˇ taˍ ve tawˇ hkawˇ hta‸ kaˇ leh te ve chaw lehˬ, ngaˬ hta‸ ha‸ ve chaw hpeh‸ ve yoˬ. Ngaˬ hta‸ ha‸ ve chaw teˇ gʼaˇ hta‸ ngaˬ Awˬ pa ha‸ tuˬ yoˬ. Ngaˬ htawˇ chaw oˇ ve hta‸ ha‸ leh, ngaˬ ve awˬ to yawˇ hta‸ hkʼa tawˍ lehˆ maw piˇ tuˬ yoˬ teh‸ kʼoˆ piˇ ve yoˬ.
22Yuˇda‸ Iˉsaˍkaˍriˍoˆ maˇ heˆ ve, Yuˇda‸ meh ve teˇ gʼaˇ kʼoˆ ve, Jawˇmawˇ-oˬ, nawˬ ve awˬ to ngaˬ hui hta‸ maw laˇ leh miˬguiˬ yaˇ hui hta‸ maˇ maw piˇ ve, aˬ hto‸ ma pa taw le teh‸ na nyi ve yoˬ.
23Yeˍsuˆ kʼaw‸ kʼoˆ ve, Ngaˬ hta‸ ha‸ ve chaw lehˬ, ngaˬ ve tawˇ hkawˇ hta‸ na yuˬ leh te tuˬ yoˬ. Ngaˬ Awˬ pa yawˇ hta‸ ha‸ tuˬ yoˬ. Ngaˬ huiˉ maˬ yawˇ geh lo laˬ leh yawˇ geh chehˇ tuˬ yoˬ. 24Ngaˬ hta‸ maˇ ha‸ ve chaw lehˬ, ngaˬ ve tawˇ hkawˇ hta‸ maˇ na yuˬ. Nawˬ hui gʼa kaˇ ve tawˇ hkawˇ lehˬ, ngaˬ ve tawˇ hkawˇ maˇ heˆ. Ngaˬ hta‸ peu laˇ shehˍ hpaˇ Awˬ pa ve tawˇ hkawˇ hpeh‸ ve yoˬ.
25Ngaˬ nawˬ hui geh chehˇ ve teˇ yanˇ, tawˇ hkawˇ chi teˇ hpaˍ ngaˬ nawˬ hui hta‸ kʼoˆ taˉ laˇ ve yoˬ. 26Awˬ pa lehˬ, ngaˬ ve awˬ meh awˬ hkʼaw lo nawˬ hui hta‸ Ga piˇ shehˍ hpaˇ, da‸ ve kehˬ ve Awˬ ha hpu peu laˇ tuˬ yoˬ. Yawˇ lehˬ, nawˬ hui hta‸ teˇ ceuˬ le le maˍ laˇ leh, ngaˬ nawˬ hui hta‸ hkʼa kʼoˆ taˍ ve tawˇ hkawˇ hkʼa peu-eˬ nawˬ hui hta‸ kʼaw‸ dawˇ nawˇ laˇ tuˬ yoˬ.
27Dawˇ sha gaˇ sha ve teˇ ceuˬ ngaˬ nawˬ hui hta‸ teh taˉ laˇ ve yoˬ. Ngaˬ ve dawˇ sha gaˇ sha ve teˇ ceuˬ ngaˬ nawˬ hui hta‸ pe‸ taˉ laˇ ve yoˬ. Miˬguiˬ yaˇ hui piˇ ve hkʼe ngaˬ nawˬ hui hta‸ pe‸ laˇ ve maˇ heˆ. Nawˬ hui ve nyi ma taˇ dawˇ haˍ gaˇ haˍ. Kawˆ ve nyi ma ka‸ taˇ cawˬ piˇ. 28Ngaˬ kʼo‸-e leh nawˬ hui geh ngaˬ teˇ pawˆ kʼaw‸ laˬ tuˬ yoˬ teh‸ ngaˬ kʼoˆ taˍ ve tawˇ hkawˇ hta‸ nawˬ hui gʼa kaˇ peuˬ. Nawˬ hui ngaˬ hta‸ ha‸ ve kʼo, Awˬ pa geh ngaˬ kʼo‸-e ve pa taw nawˬ hui ha lehˬ tuˬ yoˬ. Awˬ lawn kʼo, Awˬ pa lehˬ ngaˬ a‸ kehˉ uiˍ ve yoˬ. 29Awˬ ceuˬ oˇ ve teˇ hpaˍ hpeh‸ la ve teˇ yanˇ, nawˬ hui gʼa yonˍ tuˬ, maˇ hpeh‸ la sheˍ gʼuˇ suhˍ chi beu‸ ka‸ ngaˬ nawˬ hui hta‸ kʼoˆ laˇ peuˬ. 30Chi beu‸ hta‸ tanˬ leh ngaˬ nawˬ hui hta‸ tawˇ tcuhˇ tcuhˬ maˇ kʼaw‸ yaw-o. Awˬ lawn kʼo, chi miˬguiˬ hta‸ uˉ peunˍ shehˍ hpaˇ laˬ chehˇ ve yoˬ. Yawˇ lehˬ ngaˬ awˬ hkʼoˆ te‸ chiˉ kanˇ paˆ maˇ cawˬ. 31Ya‸ hkʼaˇ, Awˬ pa hta‸ ngaˬ ha‸ ve yoˬ teh‸, miˬ guiˬ yaˇ hui gʼa shiˍ tuˬ, Awˬ pa ngaˬ hta‸ tawˇ pe‸ laˇ ve hkʼe ngaˬ te ve yoˬ.
Tu loˬ. Kʼai-a veuˬ.
Currently Selected:
Yoˇhanˬ li‸ 14: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.