Yoˇhanˬ li‸ 12
12
Beˍtaˍniˆ hkʼaˆ hkʼaw lo yaˇ miˇ teˇ gʼaˇ Yeˍsuˆ hta‸ naˍmanˇ hawnˉ shehˍ piˇ ve
1Paˍsaˍhkaˍ pawehˇ maˇ gaˬ sheˍ awˬ gʼuˇ suhˍ hkaw‸ nyi htaˇ ka‸, Yeˍsuˆ lehˬ Beˍtaˍniˆ hkʼaˆ lo gaˬ ve yoˬ. Hkʼaˆ oˇ ve lehˬ, suh kuiˬ lo yawˇ kʼaw‸ te‸ tu la piˇ ve Laˍzaˍruˆ ve chehˇ kuiˬ hpeh‸ ve yoˬ. 2Oˇ htaˇ, yawˇ hui lehˬ yawˇ hta‸ mvuhˇ hpeu‸ awˍ teˇ poˬ te caˍ piˇ ve yoˬ. Maˍhtaˆ awˍ keu caˍ piˇ shehˍ ma te leh Laˍzaˍruˆ leh awˬ kaˍ awˬ nu chaw teˇ hpaˍ Yeˍsuˆ geh teˇ geh mui caˇ chehˇ ve yoˬ. 3Oˇ htaˇ Maˍriˆ lehˬ, awˬ hpfuhˇ hkʼaˆ jaˇ ve naˍduˆ teh‸ kʼoˆ ve naˍ manˇ hawnˉ teˇ chi law hta‸ yuˬ leh, Yeˍsuˆ ve hkui sheh hta‸ shehˍ piˇ ve yoˬ. Peuˬ leh, Maˍriˆ yawˇ ve uˉ hkeh mvuh yuˬ leh Yeˍsuˆ ve hkui sheh hta‸ shiˆ piˇ ve yoˬ. Naˍ manˇ hawnˉ oˇ ve awˬ shaˉ lehˬ, yehˬ teˇ yehˬ hkʼa peu-eˬ hawnˉ heuˍ lehˍ kʼai ve yoˬ. 4Ya‸ hkʼaˇ, yawˇ hta‸ chiˇ a‸ piˇ tuˬ ve, yawˇ ve awˬ la‸ gʼawˇ Yuˇda‸ Iˉsaˍkaˍriˍoˆ teˇ gʼaˇ kʼoˆ ve, 5Naˍ manˇ hawnˉ chi hta‸ hpu shehˆ ha hteh‸ hawˇ sheˬ leh haˍ yaˇ gʼawˇ yaˇ hui hta‸ aˬ hto‸ ma te maˇ pehˬ piˇ ve le teh‸ kʼoˆ ve yoˬ. 6Yawˇ chi hkʼe kʼoˆ ve lehˬ, haˍ ve gʼawˇ ve chaw hui hta‸ dawˇ nyi leh kʼoˆ ve maˇ heˆ. Yawˇ lehˬ chaw hkʼawˇ hpeh‸ ve pa taw kʼoˆ ve yoˬ. Hpu miˉ chaw hta‸ yawˇ ha‸ shaˉ leh, keu taˍ ve hpu hta‸ yawˇ yuˬ jaw ve yoˬ.
7Yeˍsuˆ kʼoˆ ve, Yaˇ miˇ chi hta‸ taˇ deˇ. Ngaˬ hta‸ tuˍ laˇ tuˬ ve awˬ nyi teˇ nyi awˬ pon, naˍ manˇ hawnˉ oˇ ve hta‸ yawˇ ha‸ shaˉ taˍ peuˬ. 8Haˍ ve gʼawˇ ve chaw hui lehˬ, nawˬ hui geh hkʼaˬ htaˆ ka‸ chehˇ taˍ ve yoˬ. Ya‸ hkʼaˇ, ngaˬ nawˬ hui geh hkʼaˬ htaˆ ka‸ chehˇ tuˬ ve maˇ heˆ teh‸ kʼoˆ ve yoˬ.
Laˍzaˍruˆ hta‸ tiˇ pehˍ tuˬ shu jehˬ da‸ ve
9Yeˍsuˆ oˇ kaˬ lo chehˇ taˍ ve hta‸ Yuˇda‸ chaw awˬ moˍ lonˉ gʼa shiˍ htaˇ, yawˇ hui oˇ kaˬ lo kʼai ve yoˬ. Yeˍsuˆ hta‸ pa taw ceh tiˉ kʼai ve maˇ heˆ. Suh kuiˬ lo yawˇ kʼaw‸ te‸ tu la piˇ ve Laˍzaˍruˆ hta‸ htawˇ mawˬ gaˇ leh kʼai ve yoˬ. 10Oˇ htaˇ, paw hkuˇ lonˉ teˇ hpaˍ lehˬ, Laˍzaˍruˆ hta‸ htawˇ tiˇ pehˍ tuˬ jehˬ da‸ ve yoˬ. 11Awˬ lawn kʼo, Laˍzaˍruˆ hta‸ pa taw Yuˇda‸ chaw laiˉ gʼaˇ yawˇ hui ve awˬ moˍ awˬ hkʼaw lo tawˆ kʼai chehˇ leh Yeˍsuˆ hta‸ yonˍ la chehˇ ve yoˬ.
Piˉ laˬ ehˉ hta‸ ciˇ leh Yeˍruˆsaˍlehnˍ venˇ hkʼaw lo lo‸-e ve
12Awˬ hkʼaw‸ nawˉ teˇ nyi Yeˍsuˆ lehˬ, Yeˍruˆsaˍlehnˍ venˇ lo laˬ chehˇ ve hta‸ pawehˇ oˇ ve awˬ hkʼaw lo gaˬ la ve chaw awˬ moˍ lonˉ gʼa kaˇ ve yoˬ. 13Yawˇ hui lehˬ, tcuhˉ pui meuˇ awˬ kʼaˉ teˇ hpaˍ hta‸ yuˬ leh, yawˇ hta‸ ca ha‸ yuˬ tuˬ tawˆ kʼai ve yoˬ. Yawˇ hui kʼoˆ ve, Hoˍsaˍnaˍ,#12:13 Hoˍsaˍnaˍ teh‸ kʼoˆ ve tawˇ hkawˇ lehˬ, Heˍbrehˇ hkawˇ hpeh‸ ve yoˬ. Tcuhˉ kuiˬ lehˬ, Chi beu‸ Htaiˍ hkʼaw‸ laˇ-oˆ teh‸ kʼoˆ ve yoˬ. Jawˇmawˇ Gʼuiˬsha ve awˬ meh awˬ hkʼaw lo laˬ ve Iˉsaˍreˍlaˆ chaw hui ve Hkunˉ hawˉ hkanˇ hta‸ awˬ bon uiˍ piˇ-oˆ teh‸ kuˬ ve yoˬ.#Chi 118:26
14Oˇ htaˇ Yeˍsuˆ lehˬ, piˉ laˬ ehˉ hta‸ mawˬ leh ciˇ ve yoˬ. Li‸ hpu hkʼaw bvuh‸ taˍ ve hkʼe,
15Ziˉonˍ ve yaˇ miˇ-oˬ, taˇ kawˆ.
Nyi loˬ, nawˬ ve hkunˉ hawˉ hkanˇ lehˬ,
piˉ laˬ awˬ yehˇ hta‸ ciˇ leh laˬ chehˇ ve yoˬ,
teh‸ bvuh‸ taˍ ve yoˬ.#Zhk 9:9
16Yawˇ ve awˬ la‸ gʼawˇ teˇ hpaˍ awˉ lawˉ htaˇ awˬ lawn oˇ ve teˇ hpaˍ hta‸ maˇ shiˍ. Ya‸ hkʼaˇ, Yeˍsuˆ awˬ me‸ awˬ hponˇ hta‸ gʼa peuˬ hkʼaw‸ nawˉ, yawˇ ve awˬ lawn chi hkʼe bvuh‸ taˍ ve teˇ hpaˍ hta‸ maˇ kʼoˆ, shu yawˇ hta‸ chi hkʼe te piˇ ve hta‸ maˇ kʼoˆ, yawˇ hui dawˇ nawˇ la ve yoˬ.
17Yeˍsuˆ Laˍzaˍruˆ hta‸ tuˍ hpfuh awˬ hkʼaw lo kuˬ tawˆ la leh yawˇ hta‸ suh kuiˬ lo kʼaw‸ te‸ tu la piˇ ve teˇ yanˇ, Yeˍsuˆ geh chehˇ taˍ ve chaw awˬ moˍ lonˉ lehˬ, awˬ lawn oˇ ve hta‸ shaˉ hkiˆ hkanˍ chehˇ ve yoˬ. 18Chaw awˬ moˍ lonˉ yawˇ hta‸ ca ha‸ ve lehˬ, yawˇ awˬ heˆ oˇ ve hta‸ te ve awˬ lawn yawˇ hui gʼa kaˇ ve pa taw yoˬ. 19Hkʼe te leh, Hpaˍriˍsehˇ teˇ hpaˍ kʼoˆ da‸ ve, Nawˬ hui te‸ chiˉ te maˇ gʼa. Nyi loˬ, miˬguiˬ yaˇ hkʼa peu-eˬ yawˇ awˬ hkʼaˇ suh kʼai peuˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ.
Heˍlaˍsaˆ chaw teˇ hpaˍ Yeˍsuˆ hta‸ ca ve
20Pawehˇ oˇ ve awˬ hkʼaw oˉ kʼoˍ pui la tuˬ awˬ pon laˬ ve chaw teˇ hpaˍ awˬ hkʼaw lo Heˍlaˍsaˆ chaw teˇ hpaˍ hpaˍ cawˬ ve yoˬ. 21Yawˇ hui lehˬ, Gaˍliˍlehˇ mvuhˇmiˬ hkʼaw cawˬ ve Behˇsehˇdaˆ venˇ yaˇ Hpiˇliˇpuˆ geh kʼai leh, Saˍ la‸-oˬ, ngaˬ hui Yeˍsuˆ hta‸ mawˬ gaˇ ve yoˬ teh‸, yawˇ hta‸ kʼoˆ piˇ ve yoˬ.
22Hpiˇliˇpuˆ kʼai leh Anˍdrehˍ hta‸ hto piˇ leh, Anˍdrehˍ leh Hpiˇliˇpuˆ yawˇ huiˉ maˬ Yeˍsuˆ hta‸ ca hto piˇ ve yoˬ. 23Oˇ htaˇ Yeˍsuˆ kʼoˆ ve, Chaw yaˇ ve Yaˇ hpu awˬ me‸ awˬ hponˇ gʼa tuˬ ve awˬ yanˇ gaˬ la peuˬ. 24Ngaˬ nawˬ hui hta‸ awˬ tehˬ awˬ na kʼoˆ laˇ ve, caˬ yawˇ teˇ shiˍ miˬguiˬ hkʼoˆ lo maˇ ce leh, maˇ luˬ maˇ suh ve kʼo, awˬ yawˇ teˇ shiˍ tiˉ cawˬ chehˇ ve yoˬ. Ya‸ hkʼaˇ, luˬ kʼai suh kʼai ve kʼo, awˬ shiˍ maˇ maˇ naw‸ la ve yoˬ. 25A shu yawˇ ve a sha‸ hta‸ ha‸ ve chaw lehˬ, a sha‸ gʼa shonˇ tuˬ yoˬ. Chi miˬguiˬ hkʼoˆ lo a shu yawˇ ve a sha‸ hta‸ canˇ ve chaw lehˬ, co ti‸ ha ti‸ gʼa tuˬ awˬ pon a shu yawˇ ve a sha‸ hta‸ ha‸ shaˉ tuˬ yoˬ. 26Ngaˬ ve kanˉ hta‸ te ve chaw teˇ gʼaˇ lehˬ, ngaˬ awˬ hkʼaˇ suh gʼa laˬ ve yoˬ. Ngaˬ chehˇ ve teˇ kaˬ lo ngaˬ ve kanˉ hta‸ te ve chaw htawˇ chehˇ tuˬ yoˬ. Ngaˬ ve kanˉ hta‸ te ve chaw teˇ gʼaˇ hta‸ Awˬ pa taˍ uiˍ taˍ mvuh piˇ tuˬ yoˬ.
Chaw yaˇ ve Yaˇ hpu lehˬ, chiˇ taˆ-e ve hta‸ gʼa hkanˍ ve
27Chi beu‸ ngaˬ nyi ma dawˇ haˍ jaˇ ve yoˬ. Ngaˬ hkʼaˬ hkʼe gʼa kʼoˆ tuˬ le. A pa-oˬ, awˬ yanˇ chi awˬ hkʼaw lo ngaˬ hta‸ htaiˍ hkʼaw‸ laˇ-oˆ teh‸ gʼa kʼoˆ tuˬ laˇ. Maˇ heˆ, awˬ lawn kʼo awˬ yanˇ chi awˬ pon ngaˬ gaˬ la peuˬ. 28A pa-oˬ, nawˬ ve awˬ meh hta‸ awˬ me‸ awˬ hponˇ tawˆ la piˇ-oˆ teh‸ kʼoˆ ve yoˬ.
Oˇ htaˇ, mvuhˇ naw ma lo awˬ hkawˇ bvuhˬ la leh, Ngaˬ ve awˬ meh hta‸ awˬ me‸ awˬ hponˇ cawˬ piˇ peuˬ. Ngaˬ teˇ pawˆ kʼaw‸ cawˬ piˇ tuˬ sheˍ ve yoˬ teh‸ kʼoˆ ve yoˬ.
29Oˇ kaˬ lo huˉ chehˇ ve chaw awˬ moˍ lonˉ lehˬ, awˬ hkawˇ oˇ ve hta‸ gʼa kaˇ leh, Mvuhˇ tawˍ tawˍ ve yoˬ teh‸ kʼoˆ ve yoˬ. Teˇ hpaˍ hpaˍ lehˬ, Mvuhˇ naw ma tcuh yaˇ yawˇ hta‸ tawˇ yaw piˇ ve yoˬ teh‸ kʼoˆ ve yoˬ.
30Yeˍsuˆ kʼaw‸ kʼoˆ ve, Bvuhˬ la ve awˬ hkawˇ oˇ ve lehˬ, ngaˬ awˬ pon maˇ heˆ. Nawˬ hui awˬ pon yoˬ. 31Miˬguiˬ chi lehˬ, chi beu‸ ka‸ suhˉ jehˬ ve hta‸ gʼa hkanˍ ve yoˬ. Miˬguiˬ chi hta‸ uˉ peunˍ shehˍ hpaˇhta‸ chi beu‸ ka‸ gʼa‸ kʼoˬ tuˬ yoˬ. 32Chi miˬguiˬ hkʼoˆ ngaˬ chiˇ taˆ-e ve hta‸ gʼa hkanˍ ve teˇ yanˇ, chaw hkʼa peu-eˬ hta‸ ngaˬ geh lo ngaˬ gʼawˬ veu laˇ tuˬ yoˬ teh‸ kʼoˆ ve yoˬ. 33Yawˇ chi hkʼe kʼoˆ ve lehˬ, yawˇ hkʼaˬ hkʼe gʼa te suh tuˬ ve awˬ lawn hta‸ kʼoˆ maˍ piˇ ve yoˬ.
34Chaw awˬ moˍ lonˉ kʼaw‸ kʼoˆ ve, Hkri‸ lehˬ co co taiˍ taiˍ gʼa chehˇ tuˬ yoˬ teh‸, awˬliˇtawˇhkawˇ awˬ hkʼaw lo ngaˬ hui gʼa shiˍ gʼa kaˇ ve yoˬ. Chaw yaˇ ve Yaˇ hpu lehˬ, chiˇ taˆ-e ve hta‸ gʼa hkanˍ tuˬ yoˬ teh‸, nawˬ aˬ hto‸ ma te kʼoˆ ve le. Chaw yaˇ ve Yaˇ hpu oˇ ve lehˬ, a shu le teh‸, yawˇ hta‸ kʼoˆ piˇ ve yoˬ.
35Yeˍsuˆ kʼaw‸ kʼoˆ ve, Awˬ gʼeuˆ lehˬ, nawˬ hui geh teˇ hkui ceh tiˉ cawˬ tuˬ yoˬ. Naˆ ho‸ ve nawˬ hui hta‸ maˇ gʼa hoˆ tiˍ taˍ tuˬ, nawˬ geh awˬ gʼeuˆ cawˬ sheˍ ve teˇ yanˇ, nawˬ hui toˇ kʼai loˬ. Naˆ ho‸ ve awˬ hkʼaw lo toˇ kʼai ve chaw lehˬ, yawˇ hkʼaˬ lo kʼai ve hta‸ yawˇ maˇ shiˍ. 36Nawˬ hui geh awˬ gʼeuˆ cawˬ sheˍ ve teˇ yanˇ, nawˬ hui awˬ gʼeuˆ ve yaˇ hpeh‸ la tuˬ, awˬ gʼeuˆ hta‸ yonˍ loˬ teh‸, yawˇ hui hta‸ kʼoˆ piˇ ve yoˬ.
Yuˇda‸ chaw hui maˇ yonˍ
Tawˇ chi teˇ hpaˍ hta‸ Yeˍsuˆ kʼoˆ peuˬ hkʼaw‸ nawˉ, yawˇ hui geh lo tawˆ kʼai leh ca va‸ taˍ ve yoˬ. 37Yawˇ hui mehˆ gʼuˇ suhˍ awˬ heˆ chi taw taw yawˇ te taˍ ve htawˇ, yawˇ hui yawˇ hta‸ maˇ yonˍ. 38Chi hkʼe hpeh‸ la ve lehˬ, Gʼuiˬsha ve tcuh kaˍ paˍ Iˉsaˍyaˆ kʼoˆ taˍ ve tawˇ teˇ hkawˇ biˇ la ve yoˬ. Yawˇ kʼoˆ ve,
Jawˇmawˇ Gʼuiˬsha-oˬ, ngaˬ hui kʼoˆ ve tawˇ hkawˇ hta‸ a shu yonˍ ve le.
Jawˇmawˇ Gʼuiˬsha ve kanˇ paˆ a shu hta‸ hpeu‸ maˍ piˇ ve le,
teh‸ kʼoˆ ve yoˬ.#Isy 53:1
39Chi hta‸ pa taw yawˇ hui yonˍ maˇ hpeh‸. Awˬ lawn kʼo, Iˉsaˍyaˆ teˇ pawˆ kʼaw‸ kʼoˆ ve,
40Yawˇ hui mehˆ shiˍ maˇ gʼa mawˬ tuˬ, nyi ma maˇ gʼa dawˇ pawnˍ tuˬ leh,
nyi ma maˇ kʼaw‸ pa leh ngaˬ yawˇ hui hta‸ maˇ gʼa gu na-e tuˬ,
yawˇ hui ve mehˆ shiˍ hta‸ yawˇ cuˉ piˇ lawˬ leh,
yawˇ hui ve nyi ma hta‸ heh piˇ lawˬ peuˬ,
teh‸ kʼoˇ ve yoˬ.#Isy 6:9-10
41Iˉsaˍyaˆ oˇ hkʼe kʼoˆ ve lehˬ, Yeˍsuˆ ve awˬ me‸ awˬ hponˇ hta‸ yawˇ gʼa mawˬ ve pa taw, yawˇ awˬ lawn hta‸ yawˇ kʼoˆ ve yoˬ.
42Ya‸ hkʼaˇ htawˇ, jawˇmawˇ teˇ hpaˍ awˬ hkʼaw lo ka‸, laiˉ gʼaˇ yawˇ hta‸ yonˍ ve yoˬ. Yawˇ hui yonˍ ve htawˇ, Hpaˍriˍsehˇ teˇ hpaˍ hta‸ kawˆ ve pa taw, yonˍ ve yoˬ teh‸ yawˇ hui maˇ kʼoˆ. Awˬ lawn kʼo, Yuˇda‸ chaw hui ve awˬ moˍ awˬ hkʼaw lo gʼa‸ tawˆ laˇ ve hta‸ yawˇ hui dawˇ haˍ ve yoˬ. 43Awˬ lawn kʼo, Gʼuiˬsha geh awˬ me‸ awˬ hponˇ gʼa ve a‸ kehˉ, chaw yaˇ hui geh awˬ me‸ awˬ hponˇ gʼa tuˬ ve hta‸ yawˇ hui heuˆ gaˇ ve yoˬ.
Yeˍsuˆ kʼoˆ ve tawˇ hkawˇ teˇ hpaˍ lehˬ, yawˇ hui hta‸ suhˉ jehˬ tuˬ ve awˬ lawn
44Yeˍsuˆ awˬ hkawˇ bvuhˬ chaweh kuˬ leh kʼoˆ ve, Ngaˬ hta‸ yonˍ ve chaw lehˬ, ngaˬ hta‸ yonˍ ve teˇ ceuˬ maˇ heˆ. Ngaˬ hta‸ peu laˇ shehˍ hpaˇ hta‸ yonˍ ve yoˬ. 45Ngaˬ hta‸ mawˬ ve chaw lehˬ, ngaˬ hta‸ peu laˇ shehˍ hpaˇ hta‸ mawˬ ve yoˬ. 46Ngaˬ hta‸ hkʼa yonˍ ve chaw hkʼa peu-eˬ naˆ ho‸ ve awˬ hkʼaw lo maˇ gʼa chehˇ tuˬ, ngaˬ lehˬ awˬ gʼeuˆ hpeh‸ leh, miˬguiˬ hkʼoˆ lo ya‸ la ve yoˬ. 47Ngaˬ ve tawˇ hkawˇ hta‸ kaˇ leh maˇ na yuˬ ve chaw hkʼaˬ ve teˇ gʼaˇ maˇ kʼoˆ, ngaˬ yawˇ hta‸ suhˉ maˇ jehˬ. Awˬ lawn kʼo, miˬguiˬ yaˇ hui hta‸ suhˉ jehˬ tuˬ awˬ pon ngaˬ laˬ ve maˇ heˆ. Miˬguiˬ yaˇ hui hta‸ htaiˍ hkʼaw‸ tuˬ awˬ pon ngaˬ laˬ ve yoˬ. 48Ngaˬ hta‸ chiˇ baˬ leh ngaˬ ve tawˇ hkawˇ hta‸ maˇ na ve chaw hta‸ suhˉ jehˬ shehˍ hpaˇ cawˬ ve yoˬ. Ngaˬ kʼoˆ taˍ ve tawˇ hkawˇ teˇ hpaˍ lehˬ, awˬ leh meuˇ teˇ nyi htaˇ yawˇ hui hta‸ suhˉ jehˬ piˇ tuˬ yoˬ. 49Ngaˬ lehˬ, ngaˬ hkʼaˇ ngaˬ a loˍ cawˇ ve hkʼe te‸ chiˉ ka‸ maˇ kʼoˆ. Ngaˬ hta‸ peu laˇ shehˍ hpaˇ Awˬ pa lehˬ, ngaˬ hkʼaˬ hkʼe gʼa kʼoˆ gʼa yaw tuˬ ve, yawˇ ngaˬ hta‸ tawˇ pe‸ laˇ peuˬ. 50Yawˇ tawˇ pe‸ laˇ ve lehˬ, co ti‸ ha ti‸ hpeh‸ ve yoˬ teh‸ ngaˬ shiˍ ve yoˬ. Hkʼe te leh ngaˬ hkʼa kʼoˆ ve teˇ hpaˍ lehˬ, Awˬ pa ngaˬ hta‸ kʼoˆ laˇ ve hkʼa shuˍ shuˍ ngaˬ kʼoˆ ve yoˬ teh‸ kʼoˆ ve yoˬ.
Currently Selected:
Yoˇhanˬ li‸ 12: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.