Hawˇseˍ li‸ 1
1
1Yuˇda‸ mvuhˇmiˬ hkʼaw lo, Awˇziˆ, Yawˇtanˍ, Aˍhaˆ leh Heˍsaˍkiˆ jawˇmawˇ te leh, Iˉsaˍ reˍlaˆ mvuhˇmiˬ hkʼaw Yawˇshaˆ ve yaˇ Yeˍyawˇbaoˍ jawˇmawˇ te chehˇ ve teˇ yanˇ, Gʼuiˬsha lehˬ Beˍriˆ ve yaˇ Hawˇseˍ hta‸ chi hkʼe kʼoˆ piˇ ve yoˬ.
Hawˇseˍ miˇ ma leh awˬ yaˇ teˇ hpaˍ
2Hawˇseˍ hta‸ cuˇ leh, awˉ lawˉ peuˇ teˇ pawˆ Gʼuiˬsha Iˉsaˍreˍlaˆ chaw hui hta‸ tawˇ yaw piˇ leh kʼoˆ ve, Nawˬ awˬ miˇ ma heuˆ loˬ. Nawˬ ve awˬ miˇ ma lehˬ ka ti‸ maˇ yeˬ ve yaˇ miˇ hpeh‸ leh, nawˬ ve yaˇ teˇ hpaˍ htawˇ nawˬ miˇ ma hkʼa shuˍ, haiˬ ve chaw teˇ hpaˍ hpeh‸ la tuˬ yoˬ. Awˬ lawn kʼo, ngaˬ ve chaw teˇ hpaˍ ngaˬ hta‸ baˬ taˉ leh, ka ti‸ maˇ yeˬ ve chaw hpeh‸ la peuˬ, teh‸ yawˇ hta‸ kʼoˆ piˇ ve yoˬ.
3Hkʼe te leh, Hawˉseˍ lehˬ Diˆnaˍlenˍ ve yaˇ miˇ Gawˇmaˍ hta‸ heuˆ ve yoˬ. Yaˇ miˇ oˇ ve yaˇ hu la leh, yawˇ awˬ pon yaˇ paˍ teˇ gʼaˇ paw la piˇ ve yoˬ. 4Oˇ htaˇ Gʼuiˬsha lehˬ, Yawˇ hta‸ Yeˍsaˍreˍlaˆ teh‸ meh piˇ-oˆ. Awˬ lawn kʼo, Yeˍhuˆ lehˬ Yeˍsaˍreˍlaˆ teh‸ kʼoˆ ve chehˇ kuiˬ lo yawˇ ve awˬ ceuˬ awˬ hkʼaˇ Iˉsaˍreˍlaˆ jawˇmawˇ teˇ hpaˍ hta‸ tiˇ pehˍ piˇ ve pa taw, maˇ maw maw ngaˬ yawˇ hta‸ ciˍ yanˍ piˇ tuˬ yoˬ. Ngaˬ lehˬ Yeˍhuˆ leh yawˇ ve awˬ ceuˬ awˬ hkʼaˇ teˇ hpaˍ hta‸ te luˬ te sheˆ piˇ tuˬ yoˬ. 5Oˇ htaˇ, Yeˍsaˍreˍlaˆ teh‸ kʼoˆ ve lawˬ hkʼo‸ hkʼaw, Iˉsaˍreˍlaˆ chaw hui ve la‸ caˉ teˇ hpaˍ hta‸ ngaˬ te luˬ te sheˆ piˇ tuˬ yoˬ, teh‸ Hawˇseˍ hta‸ kʼoˆ piˇ ve yoˬ.
6Oˇ ve hkʼaw‸ nawˉ, Gawˇmaˍ lehˬ yaˇ miˇ ehˉ teˇ gʼaˇ kʼaw‸ paw la ve yoˬ. Oˇ htaˇ Gʼuiˬsha lehˬ, Yawˇ hta‸ Lawˇruˆhaˍmaˍ #1:6 Chi lehˬ maˇ ha‸ ve teh‸ kʼoˆ gaˇ ve yoˬ. teh‸ meh piˇ-oˆ. Awˬ lawn kʼo, ngaˬ Iˉsaˍreˍlaˆ chaw hui hta‸ ha kʼaˉ piˇ leh, yawˇ hui ve venˇbaˆ hta‸ hpehˇ piˇ tuˬ ve maˇ heˆ. 7Ya‸ hkʼaˇ, Yuˇda‸ chaw teˇ hpaˍ hta‸ ngaˬ ha kʼaˉ piˇ tuˬ yoˬ. Ngaˬ yawˇ hui ve Gʼuiˬsha lehˬ, yawˇ hui hta‸ ponˬ piˇ tuˬ yoˬ. Ya‸ hkʼaˇ, aˉhtaw, hkaˆ, hkaˆ ce, iˉ mvuhˇ leh iˉ mvuhˇ ciˇ shehˍ hpaˇ hui hta‸ cuˇ leh yawˇ hui hta‸ ponˬ piˇ tuˬ ve maˇ heˆ, teh‸ Hawˇseˍ hta‸ kʼoˆ piˇ ve yoˬ.
8Oˇ ve hkʼaw‸ nawˉ, Gawˇmaˍ lehˬ yawˇ ve yaˇ miˇ hta‸ cuˉ hpaˆ piˇ peuˬ ve teˇ yanˇ, yaˇ teˇ pawˆ kʼaw‸ hu la leh, yaˇ paˍ teˇ gʼaˇ kʼaw‸ paw la ve yoˬ. 9Oˇ htaˇ Gʼuiˬsha lehˬ, Yawˇ hta‸ Lawˇaˍmiˆ #1:9 Chi lehˬ ngaˬ ve chaw maˇ heˆ teh‸ kʼoˆ gaˇ ve yoˬ. teh‸ meh piˇ-oˆ. Awˬ lawn kʼo, Iˉsaˍreˍlaˆ lehˬ ngaˬ ve chaw hpeh‸ ve maˇ heˆ. Ngaˬ htawˇ yawˇ hui ve Gʼuiˬsha hpeh‸ ve maˇ heˆ, teh‸ Hawˇseˍ hta‸ kʼoˆ piˇ ve yoˬ.
Iˉsaˍreˍlaˆ ve mvuhˇmiˬ hta‸ kʼaw‸ gu te tuˬ
10Iˉsaˍreˍlaˆ chaw teˇ hpaˍ lehˬ, gʼaw maˇ peuˬ htaˇ hkʼa gaˬ maˇ jaˇ ve shehˇ shiˍ hkʼa shuˍ hpeh‸ la tuˬ yoˬ. Nawˬ hui lehˬ ngaˬ ve chaw maˇ heˆ, teh‸ Gʼuiˬsha yawˇ hui hta‸ kʼoˆ piˇ ve yoˬ. Ya‸ hkʼaˇ teˇnyi gaˬ kʼo, Nawˬ hui lehˬ te‸ chehˇ ve Gʼuiˬsha ve yaˇ teˇ hpaˍ hpeh‸ ve yoˬ, teh‸ yawˇ hui hta‸ kʼoˆ piˇ tuˬ yoˬ. 11Yuˇda‸ chaw leh Iˉsaˍreˍlaˆ chaw teˇ hpaˍ kʼaw‸ cawˇ da‸ hawˍ da‸ la tuˬ yoˬ. Yawˇ hui lehˬ awˬ hoˉ teˇ gʼaˇ hta‸ leuˆ yuˬ leh, teˇ pawˆ kʼaw‸ uiˍ la maˇ la tuˬ yoˬ. Yeˍzaˍreˍlaˆ #1:11 Chi lehˬ Gʼuiˬsha awˬ yawˇ sheˍ leh uiˍ la da‸ la ve awˬ nyi teˇ nyi gaˬ la tuˬ yoˬ teh‸ kʼoˆ gaˇ ve yoˬ. lehˬ uiˍ jaˇ ve awˬ nyi teˇ nyi hpeh‸ la tuˬ yoˬ.
Currently Selected:
Hawˇseˍ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.