Tawˆ kʼai ve li‸ 1
1
Iˉsaˍreˍlaˆ chaw Eˇjiˇtu‸ mvuhˇmiˬ hkʼaw shu ceˬ te ve
1Chaw chi teˇ hpaˍ lehˬ, a shu yawˇ ve miˇ yaˇ hta‸ shiˍ leh Eˇjiˇtu‸ mvuhˇmiˬ lo ya‸ la taˍ ve Yaˍkoˆ ve yaˇ teˇ hpaˍ hpeh‸ ve yoˬ. 2Ruˇbenˍ, Suˉmonˍ, Leˍviˆ, Yuˇda‸, 3Iˉsaˍhkaˍ, Zaˍbuˆlonˍ, Beˍyaˍmenˍ, 4Danˍ, Naˍtaˍliˆ, Gaˆ leh Aˍshaˍ hui hpeh‸ ve yoˬ. 5Yaˍkoˆ ve aw ceuˬ awˬ hkʼaˇ hkʼa peu-eˬ 70 gʼaˇ cawˬ ve yoˬ. Yoˇseh‸ lehˬ, awˉ lawˉ htaˇ ka‸ Eˇjiˇtu‸ mvuhˇmiˬ lo gaˬ taˍ peuˬ ve yoˬ. 6Awˬ yanˇ oˇ ve hkʼaw, Yoˇseh‸ leh yawˇ ve aw viˉ awˬ nyi teˇ hpaˍ, leh Eˇjiˇtu‸ mvuhˇmiˬ hkʼaw gaˬ la taˍ ve awˉ lawˉ peuˇ ve chaw teˇ puˆ hkʼa peu-eˬ suh kʼai peuˬ ve yoˬ. 7Ya‸ hkʼaˇ, Iˉsaˍreˍlaˆ chaw teˇ hpaˍ gʼaˇ hte‸ kʼaw‸ maˇ la leh, Eˇjiˇtu‸ mvuhˇmiˬ hkʼaw lo biˇ la ve yoˬ.
8Oˇ htaˇ, Yoˇseh‸ hta‸ maˇ shiˍ ve jawˇmawˇ awˬ suhˉ teˇ gʼaˇ, Eˇjiˇtu‸ mvuhˇmiˬ hta‸ kʼaw‸ uˉ peunˍ ve yoˬ. 9Jawˇmawˇ oˇ ve yawˇ ve chaw teˇ hpaˍ hta‸ kʼoˆ piˇ ve, Iˉsaˍreˍlaˆ chaw chi teˇ hpaˍ uiˍ la maˇ la leh awˬ gʼaˇ cawˬ la chehˇ ve pa taw, ngaˬ hui dawˇ hkiˉ tuˬ cawˬ ve yoˬ. 10Yawˇ hui maˇ gʼa kʼaw‸ maˇ la tuˬ, ngaˬ hui teˇ ceuˬ ceuˬ te piˇ cawˇ ve yoˬ. Oˇ hkʼe maˇ te kʼo, ma‸ hpeh‸ la ve teˇ yanˇ yawˇ hui canˇ paˍ hpawˇ chehˇ leh ngaˬ hui hta‸ kʼaw‸ bawˆ laˇ tuˬ yoˬ. Oˇ htaˇ, yawˇ hui lehˬ ngaˬ hui ve mvuhˇmiˬ hta‸ uˉ peunˍ tuˬ yoˬ, teh‸ yawˇ hui hta‸ kʼoˆ piˇ ve yoˬ. 11Hkʼe te leh, yawˇ hui lehˬ chaw oˇ ve teˇ hpaˍ hta‸ awˬ moˍ shawˍ leh hkeu‸ jaˇ ve kanˉ gʼaˇ hte‸ te tcuh ve yoˬ. Chi hkʼe te ve hkʼaw, jawˇmawˇ ve mawˇ ha‸ shaˉ taˍ kuiˬ, Piˇtonˍ leh Raˍmaˍseˍ venˇ teˇ hpaˍ hta‸ te gʼa la ve yoˬ. 12Yawˇ hui Iˉsaˍreˍlaˆ chaw hui hta‸ shaˬ fawˉ mehˍ ve kʼo, shaˬ kʼaw‸ maˇ la ve pa taw, yawˇ hui Iˉsaˍreˍlaˆ chaw hui hta‸ kawˆ jaˇ ve yoˬ. 13Hkʼe te leh, Eˇjiˇtu‸ chaw teˇ hpaˍ lehˬ Iˉsaˍreˍlaˆ chaw hui hta‸ hkeu‸ jaˇ haˍ jaˇ ve kanˉ gʼaˇ hte‸ te tcuh ve yoˬ. 14Yawˇ hui hta‸ yehˬ lonˉ teˇ hpaˍ te tcuh leh, ti mi hkʼaw lo htawˇ kanˉ gʼaˇ hte‸ te tcuh ve yoˬ. Yawˇ hui hta‸ a ciˉ ka‸ maˇ ha kʼaˉ piˇ.
15Oˇ htaˇ, Eˇjiˇtu‸ jawˇmawˇ lehˬ Heˍbrehˇ chaw hui hta‸ yaˇ paw piˇ shehˍ ma Shiˆhpaˍraˆ leh Hpuˇ-aˍ hui hta‸ chi hkʼe kʼoˆ piˇ ve yoˬ. 16Nawˬ huiˉ maˬ Heˍbrehˇ yaˇ miˇ teˇ hpaˍ hta‸ yaˇ paw piˇ ve teˇ yanˇ, yaˇ paˍ paw la ve kʼo tiˇ pehˍ-o‸. Yaˇ miˇ paw la ve kʼo, a sha‸ te‸ chehˇ piˇ-oˆ, teh‸ kʼoˆ piˇ ve yoˬ. 17Ya‸ hkʼaˇ, yaˇ paw piˇ shehˍ ma oˇ ve nyiˇ gʼaˇ lehˬ, Gʼuiˬsha hta‸ kawˆ ve chaw hpeh‸ ve pa taw, jawˇmawˇ ve tawˇ hta‸ maˇ na. Yaˇ paˍ teˇ hpaˍ hta‸ htawˇ a sha‸ te‸ chehˇ piˇ lawˬ ve yoˬ. 18Hkʼe te leh, jawˇmawˇ yawˇ huiˉ maˬ hta‸ kuˬ yuˬ leh, Aˬ hto‸ ma pa taw nawˬ huiˉ maˬ yaˇ paˍ teˇ hpaˍ ve a sha‸ hta‸ ponˬ piˇ ve le, teh‸ na nyi ve yoˬ.
19Yawˇ huiˉ maˬ jawˇmawˇ hta‸ kʼoˆ piˇ ve, Heˍbrehˇ yaˇ miˇ teˇ hpaˍ lehˬ, Eˇjiˇtu‸ yaˇ miˇ hta‸ maˇ shuˍ. Yawˇ hui yaˇ paw tuˬ ca kuˬ la ve teˇ yanˇ, ngaˬ hui maˇ gaˬ sheˬ htaˇ ka‸ yaˇ paw gʼa taˍ laˇ peuˬ, teh‸ kʼoˆ piˇ ve yoˬ. 20Gʼuiˬsha lehˬ, yaˇ paw piˇ shehˍ ma oˇ ve nyiˇ gʼaˇ hta‸ awˬ bon na‸ piˇ ve yoˬ. Iˉsaˍreˍlaˆ chaw oˇ ve teˇ hpaˍ, maˇ la leh awˬ gʼaˇ uiˍ la ve yoˬ. 21Yaˇ paw piˇ shehˍ ma oˇ ve nyiˇ gʼaˇ Gʼuiˬsha hta‸ kawˆ puiˉ ve pa taw, Gʼuiˬsha yawˇ huiˉ maˬ hta‸ awˬ yaˇ awˬ duˬ cawˬ la piˇ ve yoˬ. 22Oˇ ve hkʼaw‸ nawˉ, jawˇmawˇ lehˬ Heˍbrehˇ chaw hui geh hkʼa paw la ve yaˇ paˍ teˇ gʼaˇ le le hta‸ Niˍlaˆ iˉ kaˆ lawˬ hkʼaw baˬ keu leh, yaˇ miˇ teˇ hpaˍ hta‸ ceh tiˉ a sha‸ te‸ chehˇ piˇ tuˬ, yawˇ ve chaw teˇ hpaˍ hta‸ tawˇ piˇ ve yoˬ.
Currently Selected:
Tawˆ kʼai ve li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.