Bon maˍ ve li‸ 1
1
Awˬ hkuiˉ puiˍ tawˇ
1Li‸ chi hkʼaw bvuh‸ taˍ ve tawˇ teˇ hpaˍ lehˬ, Iˉsaˍreˍlaˆ chaw teˇ hpaˍ Yawˇ danˍ iˉ kaˆ lawˬ mvuhˇ nyi tawˆ hpawˇ lo cawˬ ve heh puiˉ hkʼaw lo te toˇ chehˇ htaˇ, Moˉseˍ yawˇ hui hta‸ kʼoˆ piˇ taˍ ve tawˇ teˇ hpaˍ hpeh‸ ve yoˬ. Awˬ yanˇ oˇ ve hkʼaw yawˇ hui lehˬ Suˇhpaˆ, Paˍranˍ, Tawˇhpeˍlaˆ, Laˍbanˍ, Haˍzaˍroˆ leh Diˇzaˍhaˆ venˇ chi teˇ hpaˍ awˬ kaˍ lo cawˬ ve Yawˇdanˍ miˬ tawˬ kuiˬ lo chehˇ taˍ ve yoˬ. 2(Siˉnaˆ hkʼaw lo te leh, Kaˍdeˍshaˆbaˍnaˍ venˇ lo teˇ chi teˇ nyi gʼa kʼai ve yoˬ.) 3Yawˇ hui Eˇjiˇtu‸ mvuhˇmiˬ hkʼaw tawˆ la ve awˇ chi hkʼaw‸, teˇ chi teˇ ha pa, awˉ lawˉ peuˇ teˇ nyi htaˇ, Moˉseˍ lehˬ Gʼuiˬsha yawˇ hta‸ hkʼa kʼoˆ piˇ taˍ ve tawˇ hkʼa peu-eˬ, Iˉsaˍreˍlaˆ chaw hui hta‸ kʼoˆ maˍ piˇ ve yoˬ. 4Chi ve lehˬ, Heˍsaˍbonˍ venˇ hta‸ uˉ peunˍ chehˇ ve Aˍmawˇriˆ jawˇmawˇ Siˉhonˍ leh, Aˍshaˆtaˍroˆ venˇ leh Eˍdiˆ venˇ hta‸ uˉ peunˍ chehˇ ve Baˍshanˍ jawˇmawˇ Awˇgaˆ hui hta‸ Gʼuiˬsha te luˬ piˇ peuˬ hkʼaw‸ nawˉ htaˇ hpeh‸ ve yoˬ. 5Iˉsaˍreˍlaˆ chaw hui Mawˇbaˆ mvuhˇmiˬ hkʼaw cawˬ ve Yawˇdanˍ iˉ kaˆ lawˬ mvuhˇ nyi tawˆ hpawˇ lo chehˇ taˍ htaˇ, Moˉseˍ lehˬ Gʼuiˬsha ve awˬliˇtawˇhkawˇ chi teˇ hpaˍ yawˇ hui hta‸ kʼoˆ maˍ piˇ ve yoˬ.
6Yawˇ kʼoˆ ve, Ngaˬ hui Siˉnaˆ hkʼaw hkʼoˆ lo chehˇ taˍ htaˇ, ngaˬ hui ve Jawˇmawˇ Gʼuiˬsha ngaˬ hui hta‸ chi hkʼe kʼoˆ laˇ taˍ ve yoˬ. Nawˬ hui hkʼaw pui chi awˬ hkʼoˆ lo chehˇ taˍ ve maw jaˇ peuˬ. 7A shu yawˇ ve fa la hta‸ hpaˆ leh gʼuˇ suhˍ kʼaw‸ caˉ kʼai loˬ. Aˍmawˇriˆ chaw hui ve mvuhˇmiˬ, Yawˇdanˍ miˬ tawˬ kuiˬ awˬ hawˉ hpawˇ lo cawˬ ve mvuhˇmiˬ leh Awˬ kʼaw ji ve laˇ tsuhˇ gʼuiˬ lo kʼai-o. Oˇ kaˬ lo kʼaw‸ tu leh, Hkaˍnanˍ mvuhˇmiˬ, Leˍbaˍnonˍ hkʼaw teˇ hpaˍ leh Uˉhpaˍraˆ iˉ kaˆ lawˬ lo hkʼa gaˬ kʼai-o. 8Mvuhˇmiˬ oˇ ve hkʼa peu-eˬ lehˬ, nawˬ hui ve awˬ puˍ lonˉ Aˍbraˍhanˍ, Iˉcaˆ, Yaˍkoˆ hui hta‸ ngaˬ piˇ tuˬ ka ti‸ te taˍ peuˬ ve mvuhˇmiˬ hpeh‸ ve yoˬ. Nawˬ hui kʼai leh oˇ kaˬ lo ca chehˇ-oˆ, teh‸ ngaˬ hui hta‸ kʼoˆ laˇ taˍ peuˬ ve yoˬ, teh‸ Moˉseˍ yawˇ hui hta‸ kʼoˆ piˇ ve yoˬ.
Suhˉ jehˬ shehˍ hpaˇ hui hta‸ leuˆ yuˬ ve
9Moˉseˍ Iˉsaˍreˍlaˆ chaw hui hta‸ chi hkʼe kʼoˆ piˇ ve yoˬ. Ngaˬ hui Siˉnaˆ hkʼaw hkʼoˆ lo chehˇ taˍ htaˇ, ngaˬ nawˬ hui hta‸ chi hkʼe kʼoˆ piˇ taˍ ve yoˬ. Nawˬ hui hta‸ sheh kʼai piˇ tuˬ ve kanˉ hta‸ ngaˬ teˇ gʼaˇ tiˉ te maˇ gʼa taˬ. 10Nawˬ hui ve Gʼuiˬsha lehˬ, nawˬ hui hta‸ mvuhˇ naw hkʼoˆ cawˬ ve meu‸ keu shiˍ hkʼa shuˍ maˇ la piˇ taˍ ve yoˬ. 11Nawˬ hui ve awˬ puˍ awˬ pi teˇ hpaˍ ve Gʼuiˬsha lehˬ yawˇ ka ti‸ te taˍ peuˬ ve hkʼe, nawˬ hui hta‸ awˬ hinˉ pawˆ hkʼa gaˬ uiˍ la maˇ la tuˬ te laˇ piˇ-oˆ. 12Ya‸ hkʼaˇ, nawˬ hui ya‸ da‸ jiˆ da‸ chehˇ ve hta‸ hkʼaˬ hkʼe te leh ngaˬ teˇ gʼaˇ tiˉ suhˉ jehˬ laˇ gʼa tuˬ le. 13Nawˬ hui awˬ hkʼaw lo cuˇ yiˍ cawˬ leh cheuˬ ve chaw teˇ hpaˍ hta‸ leuˆ yuˬ-o‸. Ngaˬ yawˇ hui hta‸ nawˬ hui awˬ hkʼoˆ awˬ hoˉ te tcuh tuˬ yoˬ, teh‸ nawˬ hui hta‸ kʼoˆ piˇ taˍ peuˬ ve yoˬ. 14Chi hkʼe te ve lehˬ da‸ ve kanˉ hpeh‸ ve yoˬ, teh‸ nawˬ hui htawˇ nyi ma cawˇ leh ha‸ yuˬ taˍ peuˬ ve yoˬ. 15Hkʼe te leh, nawˬ hui leuˆ laˇ ve awˬ hoˉ teˇ hpaˍ hta‸ ngaˬ ha‸ yuˬ leh, nawˬ hui awˬ hkʼoˆ awˬ hoˉ te tcuh taˍ ve yoˬ. Yawˇ hui teˇ hpaˍ lehˬ, chaw teˇ hinˉ gʼaˇ awˬ hkʼoˆ awˬ hoˉ te leh, teˇ hpaˍ hpaˍ chaw teˇ ha gʼaˇ awˬ hkʼoˆ, chaw ngaˇ chi gʼaˇ awˬ hkʼoˆ leh teˇ chi gʼaˇ awˬ hkʼoˆ awˬ hoˉ gʼa te ve yoˬ. Awˬ nu ve awˬ hoˉ teˇ hpaˍ hta‸ htawˇ, ngaˬ leuˆ yuˬ taˍ ve yoˬ.
16Yawˇ hui hta‸ htawˇ ngaˬ chi hkʼe kʼoˆ maˍ piˇ taˍ ve yoˬ. Chaw yaˇ teˇ hpaˍ ya‸ da‸ jiˆ da‸ ve hta‸ hkʼa deh‸ nyi piˇ leh, hteˇ ve cawˇ ve hkʼaw suhˉ jehˬ piˇ-oˆ. Awˬ chawˇ chawˇ ya‸ da‸ ve maˇ kʼoˆ, awˬ nu ve chaw ceuˬ hta‸ ya‸ da‸ ve maˇ kʼoˆ, hkʼa deh‸ nyi leh hteˇ lehˍ suhˉ jehˬ piˇ-oˆ. 17Chaw teˇ gʼaˇ ve mehˆ hpfuhˇ hta‸ ka‸ taˇ nyi. Hteˇ lehˍ suhˉ jehˬ piˇ-oˆ. Chaw teˇ gʼaˇ hta‸ ka‸ taˇ kawˆ. Awˬ lawn kʼo, nawˬ hui lehˬ Gʼuiˬsha hpawˇ chehˇ leh suhˉ jehˬ piˇ chehˇ ve yoˬ. Nawˬ hui suhˉ jehˬ cheˆ piˇ maˇ gʼa ve haˍ jaˇ ve kanˉ cawˬ la kʼo, ngaˬ geh yuˬ laˬ-o‸. Ngaˬ suhˉ jehˬ laˇ tuˬ yoˬ, teh‸ yawˇ hui hta‸ kʼoˆ piˇ taˍ ve yoˬ. 18Chi awˬ hkʼoˆ, nawˬ hui hkʼaˬ hkʼe te cawˇ ve awˬ ceuˬ teˇ hpaˍ hta‸ htawˇ, ngaˬ nawˬ hui hta‸ kʼoˆ maˍ piˇ taˍ peuˬ ve yoˬ.
Chaw jaˆ teˇ hpaˍ hta‸ hpehˇ peu ve
19Gʼuiˬsha ngaˬ hui hta‸ kʼoˆ laˇ taˍ ve hkʼe, ngaˬ hui hkʼa deh‸ gʼa‸ te taˍ peuˬ ve yoˬ. Ngaˬ hui Siˉnaˆ hkʼaw lo kʼaw‸ tawˆ-e leh, kawˆ law‸ law‸ ve hteunˍ lonˉ hta‸ hpanˍ kʼai peuˬ hkʼaw‸ nawˉ, Aˍmawˇriˆ mvuhˇmiˬ hkʼaw cawˬ ve Kaˍdeˍshaˆbaˍnaˍ venˇ lo gaˬ la ve yoˬ. 20Oˇ htaˇ, ngaˬ nawˬ hui hta‸ chi hkʼe kʼoˆpiˇ ve yoˬ. Gʼuiˬsha ngaˬ hui hta‸ piˇ laˇ taˍ peuˬ ve Aˍmawˇriˆ mvuhˇmiˬ lo nawˬ hui gaˬ la taˍ peuˬ. 21Chiˇ nyi hkʼa sheˍ. Gʼuiˬsha kʼoˆ taˍ peuˬ ve hkʼe, nawˬ hui mvuhˇmiˬ chi hkʼaw chehˇ-oˆ. Taˇ jo chehˇ. Kawˆ ve nyi ma ka‸ taˇ cawˬ piˇ, teh‸ ngaˬ nawˬ hui hta‸ kʼoˆ piˇ taˍ peuˬ ve yoˬ.
22Ya‸ hkʼaˇ, nawˬ hui ngaˬ geh laˬ leh, Mvuhˇmiˬ oˇ ve hta‸ awˉ lawˉ ca jaˆ nyi tcuh shaˍ. Ngaˬ hui hkʼaˬ hkʼe gʼa te kʼai tuˬ leh, mvuhˇmiˬ oˇ ve hkʼaw lo venˇ hkʼaˬ ve teˇ hpaˍ cawˬ naˍ, ca jaˆ nyi tcuh shaˍ, teh‸ ngaˬ hta‸ kʼoˆ laˇ ve yoˬ.
23Nawˬ hui kʼoˆ laˇ ve lehˬ da‸ ve kanˉ hpeh‸ ve yoˬ. Hkʼe te leh, ngaˬchaw 12 gʼaˇ hta‸ leuˆ yuˬ ve yoˬ. 24Yawˇ hui lehˬ, Eˇshaˍkawˇlaˆ lawˬ hkʼo‸ lo hkʼa gaˬ ca jaˆ nyi kʼai ve yoˬ. 25Yawˇ hui lehˬ, oˇ kaˬ lo cawˬ ve iˉ shiˍ teˇ hpaˍ ngaˬ hui geh shaˉ hkʼaw‸ veu laˇ leh, Gʼuiˬsha ngaˬ hui hta‸ piˇ laˇ taˍ ve mvuhˇmiˬ lehˬ hkʼaˬ ma hkuiˇ jaˇ da‸ jaˇ ve awˬ lawn ngaˬ hui hta‸ kʼoˆ laˇ ve yoˬ.
26Ya‸ hkʼaˇ, nawˬ hui lehˬ Gʼuiˬsha hta‸ kʼaw‸ hpfuhˆ leh, mvuhˇmiˬ oˇ ve hkʼaw maˇ lo‸-e. 27Nawˬ hui teˇ gʼaˇ hta‸ teˇ gʼaˇ hkʼanˇ maˍ da‸ leh kʼoˆ ve, Gʼuiˬsha ngaˬ hui hta‸ canˇ jaˇ ve yoˬ. Yawˇ ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ leh tiˇ pehˍ laˇ tuˬ, Aˍmawˇriˆ chaw hui hta‸ chiˇ a‸ piˇ taˍ ve yoˬ. 28Hkʼaˬ hkʼe te ngaˬ hui mvuhˇmiˬ oˇ ve hkʼaw lo‸-e tuˬ le. Ngaˬ hui kawˆ jaˇ ve yoˬ. Chaw oˇ ve teˇ hpaˍ lehˬ, ngaˬ hui a‸ kehˉ mvuh leh, awˬ gʼaˇ ka‸ ngaˬ hui a‸ kehˉ uiˍ jaˇ ve yoˬ. Chi hkʼoˆ ka‸, yawˇ hui lehˬ hkʼa deh‸ caw ko taˍ ve venˇ lonˉ teˇ hpaˍ hkʼaw chehˇ taˍ ve yoˬ, teh‸ chaw jaˆ teˇ hpaˍ ngaˬ hui hta‸ kʼoˆ laˇ ve yoˬ, teh‸ nawˬ hui teˇ gʼaˇ leh teˇ gʼaˇ kʼoˆ da‸ ve yoˬ.
29Ya‸ hkʼaˇ, ngaˬ nawˬ hui hta‸ chi hkʼe kʼaw‸ kʼoˆ piˇ peuˬ ve yoˬ. Chaw oˇ ve teˇ hpaˍ hta‸ taˇ kawˆ. 30Nawˬ hui ve Gʼuiˬsha lehˬ nawˬ hui hta‸ sheh kʼai laˇ leh, ponˬ laˬ htaˇ yawˇ Eˇjiˇtu‸ mvuhˇmiˬ leh heh puiˉ hkʼaw lo te taˉ peuˬ ve hkʼe, chi beu‸ ka‸ nawˬ hui awˬ pon ma‸ bawˆ laˇ tuˬ yoˬ. 31Awˬ pa teˇ gʼaˇ yawˇ ve yaˇ hta‸ chiˇ kʼai piˇ ve hkʼe, choˬ kaˬ lo hkʼa gaˬ yawˇ nawˬ hui hta‸ hkʼaˬ hkʼe te shiˍ kʼai laˇ ve hta‸ nawˬ hui gʼa mawˬ taˍ peuˬ, teh‸ nawˬ hui hta‸ kʼoˆ piˇ taˍ peuˬ ve yoˬ. 32Ya‸ hkʼaˇ, nawˬ hui lehˬ ngaˬ hkʼaˬ ma kʼoˆ maˍ piˇ peuˬ ve htawˇ, Gʼuiˬsha hta‸ gʼaˇ maˇ va. 33Nawˬ hui hta‸ ya‸ kʼaw sheh maˍ laˇ tuˬ, yawˇ lehˬ mvuhˇ hpeu‸ htaˇ aˬ miˍ hkuiˉ daw leh mvuhˇ law‸ kʼaw htaˇ moˬ yehˬ hkuiˉ daw hkʼaw chehˇ taˍ leh nawˬ hui gʼuˇ suhˍ kʼai chehˇ ve yoˬ.
Gʼuiˬsha Iˉsaˍreˍlaˆ chaw hta‸ ciˍ yanˍ piˇ ve
34Gʼuiˬsha lehˬ nawˬ hui hkʼanˇ ve awˬ hkawˇ hta‸ gʼa kaˇ leh, nyi ma zuhˆ ve yoˬ. Hkʼe te leh yawˇ kʼoˆ ve, 35Nawˬ hui ve awˬ puˍ awˬ pi hui hta‸ ngaˬpiˇ tuˬ ka ti‸ te taˍ peuˬ ve mvuhˇmiˬ oˇ ve hkʼaw, nawˬ hui haiˬ ve chaw teˇ gʼaˇ ka‸ gʼa lo‸-e tuˬ ve maˇ heˆ. 36Yeˍhpuˇnaˍ ve yaˇ Kaˍlehˆ ceh tiˉ gʼa lo‸-e tuˬ yoˬ. Yawˇ lehˬ ngaˬ hta‸ ka ti‸ yeˬ leh, yawˇ leh yawˇ ve awˬ ceuˬ awˬ hkʼaˇ teˇ hpaˍ hta‸ ceh tiˉ yawˇ ca jaˆ nyi taˉ ve mvuhˇmiˬ oˇ ve hta‸ ngaˬ piˇ tuˬ yoˬ, teh‸ Gʼuiˬsha kʼoˆ ve yoˬ. 37Nawˬ hui hta‸ pa taw Gʼuiˬsha ngaˬ hta‸ ka‸ nyi ma zuhˆ leh, Moˉseˍ nawˬ ka‸ mvuhˇmiˬ oˇ ve hkʼaw gʼa lo‸-e tuˬ ve maˇ heˆ. 38Ya‸ hkʼaˇ, nawˬ hta‸ ga laˇ chehˇ ve Nunˍ ve yaˇ Yawˇsuˆ hta‸ awˬ gʼaˇ piˇ-oˆ. Yawˇ lehˬ Iˉsaˍreˍlaˆ chaw hui hta‸ mvuhˇmiˬ oˇ ve lo gʼa shiˍ kʼai piˇ tuˬ yoˬ, teh‸ ngaˬ hta‸ kʼoˆ laˇ ve yoˬ.
39Oˇ ve hkʼaw‸ nawˉ, ngaˬ hui hkʼa peu-eˬ ve hta‸ Gʼuiˬsha chi hkʼe kʼoˆ laˇ ve yoˬ. Cawˇ maˇ cawˇ ve hta‸ fuiˍ da‸ pehˬ da‸ maˇ puiˉ sheˍ leh, canˇ paˍ teˇ hpaˍ hpeh yuˬ ve hta‸ gʼa hkanˍ tuˬ yoˬ, teh‸ kʼoˆ chehˇ ve nawˬ hui ve yaˇ teˇ hpaˍ lehˬ, mvuhˇmiˬ oˇ ve hkʼaw gʼa lo‸-e tuˬ yoˬ. Ngaˬ yawˇ hui hta‸ mvuhˇmiˬ piˇ tuˬ yoˬ. 40Ya‸ hkʼaˇ, nawˬ hui chaw mawˇ teˇ hpaˍ lehˬ, Laˇ tsuhˇ gʼuiˬ nyi lo kʼaw‸ hpfuhˆ kʼo‸-e loˬ, teh‸ ngaˬ hui hta‸ kʼoˆ laˇ ve yoˬ.
41Oˇ htaˇ nawˬ hui kʼaw‸ yaw hkʼaw‸ leh kʼoˆ ve, Moˉseˍ-oˬ, ngaˬ hui lehˬ Gʼuiˬsha hta‸ te ya‸ jaˇ peuˬ. Ya‸ hkʼaˇ, ngaˬ hui chi beu‸ tu leh Gʼuiˬsha kʼoˆ laˇ ve hkʼe ma‸ ca bawˆ tuˬ yoˬ teh‸, ngaˬ hta‸ kʼoˆ laˇ ve yoˬ. Nawˬ hui lehˬ hkʼa sha sha-ehˬ ma‸ bawˆ gʼaˇ tuˬ yoˬ teh‸ dawˇ taˍ ve yoˬ. 42Ya‸ hkʼaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. Yawˇ hui ma‸ maˇ gʼa ca bawˆ-e tuˬ kʼoˆ piˇ-oˆ. Awˬ lawn kʼo, ngaˬ yawˇ hui geh chehˇ tuˬ ve maˇ heˆ. Yawˇ hui ma‸ bawˆ shonˇ ve tiˉ yoˬ, teh‸ ngaˬ hta‸ kʼoˆ laˇ ve yoˬ. 43Gʼuiˬsha ngaˬ hta‸ kʼoˆ laˇ ve tawˇ hkʼa peu-eˬ, nawˬ hui hta‸ kʼoˆ piˇ peuˬ ve yoˬ. Ya‸ hkʼaˇ, nawˬ hui maˇ na yuˬ. Nawˬ hui yawˇ hta‸ kʼaw‸ hpfuhˆ leh, nawˬ hui hkʼaˇ nawˬ hui ma‸ bawˆ kuiˬ lo kʼai ve yoˬ. 44Oˇ htaˇ, mvuhˇmiˬ oˇ ve hkʼaw chehˇ ve Aˍmawˇriˆ chaw teˇ hpaˍ maˇ jaˇ ve pehˇ ma hkʼa shuˍ tawˆ la leh, nawˬ hui hta‸ ca bawˆ la ve yoˬ. Yawˇ hui lehˬ Eˇdonˍ mvuhˇmiˬ hkʼaw cawˬ ve Hawˇmaˍ venˇ lo hkʼa gaˬ nawˬ hui hkʼaˇ suh gʼa‸ yuˬ laˬ leh, nawˬ hui hta‸ te luˬ te sheˆ piˇ ve yoˬ. 45Oˇ htaˇ, nawˬ hui Gʼuiˬsha hta‸ kuˬ ca ve yoˬ. Ya‸ hkʼaˇ, yawˇ nawˬ hui kuˬ hkawˇ hta‸ maˇ na yuˬ. 46Hkʼe te leh, ngaˬ hui Kaˍdeˍshaˆ teh‸ kʼoˆ ve chehˇ kuiˬ lo awˬ yanˇ maw chaweh gʼa kʼaw‸ chehˇ taˍ ve yoˬ.
Currently Selected:
Bon maˍ ve li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.