Chiˇ mvuh ve li‸ 2
2
Gʼuiˬsha leuˆ yuˬ taˍ ve jawˇmawˇ
1Aˬ hto‸ ma pa taw chaw yaˇ teˇ hpaˍ Gʼuiˬsha hta‸ hpfuhˆ tuˬ awˬ hkʼaˇ gu chehˇ ve le.
Aˬ hto‸ ma pa taw, chaw chi teˇ hpaˍ awˬ bon maˇ cawˬ ve kanˉ hta‸ te tuˬ, hkʼawˇ jehˬ da‸ chehˇ ve le.
2Yawˇ hui ve jawˇmawˇ teˇ hpaˍ leh hkunˉ teˇ hpaˍ,
Gʼuiˬsha leh Yawˇ leuˆ yuˬ taˍ ve jawˇmawˇ hta‸
hpfuhˆ tuˬ hkʼawˇ jehˬ da‸ chehˇ ve yoˬ.
3Yawˇ hui uˉ peunˍ laˇ ve hta‸ gʼa ponˬ tuˬ ngaˬ hui te-a veuˬ.
Yawˇ hui uˉ peunˍ laˇ ve hta‸ ngaˬ hui yuˬ baˬ-a veuˬ, teh‸ yawˇ hui kʼoˆ ve yoˬ.
4Gʼuiˬsha lehˬ, Yawˇ ve mvuhˇ naw ma kʼaw jaw hkʼoˆ chehˇ taˍ leh gʼuiˬ chehˇ ve yoˬ.
Yawˇ lehˬ yawˇ hui hta‸ ya‸ taw piˇ lawˬ ve yoˬ.
5Yawˇ lehˬ, yawˇ hui hta‸ nyi ma zuhˆ ve awˬ hkʼaw lo shaˍ ti‸ piˇ leh,
nyi ma zuhˆ jaˇ ve awˬ hkʼaw lo, yawˇ hui hta‸ kawˆ piˇ lawˬ ve yoˬ.
6Ngaˬ ve da‸ kehˬ ve Ziˉonˍ hkʼaw hkʼoˆ lo,
ngaˬ ve jawˇmawˇ hta‸ ngaˬ teh taˍ peuˬ, teh‸ yawˇ kʼoˆ ve yoˬ.
7Gʼuiˬsha kʼoˆ taˍ ve tawˇ teˇ hpaˍ ngaˬ shu hta‸ hto piˇ tuˬ yoˬ, teh‸ jawˇmawˇ kʼoˆ ve yoˬ.
Nawˬ lehˬ ngaˬ ve yaˇ paˍ hpeh‸ ve yoˬ.
Ya‸ nyi ngaˬ nawˬ ve awˬ pa hpeh‸ la peuˬ.
8Lawˬ-o‸. Lawˬ ve kʼo chaw ceuˬ hkʼa peu-eˬ ngaˬ nawˬ hta‸ piˇ laˇ leh,
miˬguiˬ hkʼa peu-eˬ nawˬ ve hpeh‸ la tuˬ yoˬ. 9Nawˬ lehˬ yawˇ hui hta‸ sho juˇ fuiˍ yuˬ uˉ peunˍ leh,
je‸ mu‸ hku hta‸ dawˆ meu-e ve hkʼe, nawˬ yawˇ hui hta‸ dawˆmeu-e piˇ tuˬ yoˬ, teh‸ Gʼuiˬsha ngaˬ hta‸ kʼoˆ laˇ ve yoˬ.
10Hkunˉhawˉhkanˇ teˇ hpaˍ-oˬ,
chi beu‸ ngaˬ ve tawˇ hta‸ na yuˬ-o‸.
11Kawˆ ve awˬ hkʼaw lo Gʼuiˬsha ve kanˉ hta‸ te-o.
12Kawˆ cheˇ ve awˬ hkʼaw lo, yawˇ mehˆ gʼuˇ suhˍ boˆ taˍ-o‸.
Oˇ hkʼe maˇ te ve kʼo, yawˇ nyi ma zuhˆ la leh nawˬ gʼa suh tuˬ yoˬ.
Yawˇ hta‸ gʼaˇ va ve chaw hkʼa peu-eˬ gʼa ha lehˬ ve yoˬ.
Currently Selected:
Chiˇ mvuh ve li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.