Yoˇhanˬ li‸ 13
13
Awˬ la‸ gʼawˇ hui ve hkui sheh hta‸ Yeˍsuˆ tsuhˇ piˇ ve
1Yeˍsuˆ lehˬ chi miˬguiˬ hkʼoˆ lo tawˆ kʼai leh Awˬ pa geh gʼa kʼo‸-e tuˬ ve awˬ yanˇ gaˬ la peuˬ ve hta‸ Paˍsaˍhkaˍ pawehˇ maˇ te sheˍ htaˇ ka‸ yawˇ shiˍ taˍ ve yoˬ. Chi miˬguiˬ hkʼoˆ lo chehˇ ve yawˇ ve chaw teˇ hpaˍ hta‸ yawˇ ha‸ chehˇ ve hkʼe, awˬ leh hkʼa gaˬ yawˇ hui hta‸ yawˇ ha‸ ve yoˬ.
2Yeˍsuˆ hta‸ chiˇ a‸ piˇ tuˬ, neˇhaiˬ lehˬ Siˉmonˍ ve yaˇ paˍ Yuˇda‸ Iˉsaˍkaˍriˍoˆ ve nyi ma awˬ hkʼaw lo dawˇ tawˆ piˇ lawˬ peuˬ. 3Yeˍsuˆ lehˬ, awˬ ceuˬ hkʼa peu-eˬ yawˇ ve la‸ sheh awˬ hkʼaw lo Awˬ pa chiˇ a‸ piˇ peuˬ ve hta‸ maˇ kʼoˆ, yawˇ Gʼuiˬsha lo laˬ leh, Gʼuiˬsha geh kʼaw‸ kʼo‸-e tuˬ ve hta‸ maˇ kʼoˆ, yawˇ shiˍ taˍ ve yoˬ. 4Mvuhˇ hpeu‸ awˍ caˇ chehˇ ve teˇ yanˇ, Yeˍsuˆ tu la leh yawˇ ve aˉ po‸ zuhˬ ma hta‸ kʼehˆ peuˬ hkʼaw‸ nawˉ, hpaˉ ce‸ yuˬ leh, yawˇ ve caw‸ cehˍ nyi hta‸ tsuh‸ ve yoˬ. 5Oˇ htaˇ, hkehˇ lonˉ awˬ hkʼaw lo iˉ kaˆ keu leh, awˬ la‸ gʼawˇ hui ve hkui sheh hta‸ tsuhˇ piˇ ve yoˬ. Peuˬ leh, yawˇ tsuh‸ taˍ ve hpaˉ ce‸ yuˬ leh shiˆ piˇ ve yoˬ. 6Yawˇ Siˉmonˍ Peˍtruˆ geh gaˬ la htaˇ, Peˍtruˆ kʼoˆ ve, Jawˇmawˇ-oˬ, nawˬ lehˬ ngaˬ ve hkui sheh hta‸ tsuhˇ tuˬ ve laˇ teh‸, yawˇ hta‸ na nyi ve yoˬ.
7Yeˍsuˆ kʼaw‸ kʼoˆ ve, Ngaˬ hkʼaˬ hkʼe te chehˇ ve hta‸ chi beu‸ nawˬ maˇ shiˍ sheˍ htawˇ, awˬ hkʼaw‸ nawˉ nawˬ shiˍ la tuˬ yoˬ teh‸ yawˇ hta‸ kʼoˆ piˇ ve yoˬ.
8Peˍtruˆ kʼoˆ ve, Ngaˬ ve hkui sheh hta‸ nawˬ teˇ pawˆ ka‸ maˇ gʼa tsuhˇ teh‸ yawˇ hta‸ kʼoˆ piˇ ve yoˬ.
Yeˍsuˆ kʼaw‸ kʼoˆ ve, Ngaˬ nawˬ hta‸ maˇ gʼa tsuhˇ ve kʼo, nawˬ ngaˬ hta‸ maˇ caˉ da‸ teh‸, yawˇ hta‸ kʼoˆ piˇ ve yoˬ.
9Siˉmonˍ Peˍtruˆ kʼaw‸ kʼoˆ ve, Jawˇmawˇ-oˬ, ngaˬ ve hkui sheh hta‸ ceh tiˉ maˇ heˆ. La‸ sheh leh oˉ kʼoˍ hta‸ htawˇ tsuhˇ laˇ-oˆ teh‸ yawˇ hta‸ kʼoˆ piˇ ve yoˬ.
10Yeˍsuˆ kʼaw‸ kʼoˆ ve, Iˉ kaˆ hehˉ peuˬ ve chaw lehˬ, awˬ to hkʼa peu-eˬ da‸ kehˬ peuˬ ve pa taw, hkui sheh hta‸ ceh tiˉ tsuhˇ tuˬ loˍ ve yoˬ. Nawˬ hui lehˬ da‸ kehˬ peuˬ. Ya‸ hkʼaˇ, nawˬ hui hkʼa peu-eˬ da‸ kehˬ ve maˇ heˆ teh‸ yawˇ hta‸ kʼoˆ piˇ ve yoˬ. 11Awˬ lawn kʼo, yawˇ hta‸ chiˇ a‸ piˇ tuˬ ve chaw teˇ gʼaˇ hta‸ yawˇ shiˍ ve yoˬ. Chi hta‸ pa taw, Nawˬ hui hkʼa peu-eˬ daˬ kehˬ ve maˇ heˆ teh‸ yawˇ kʼoˆ ve yoˬ.
12Yeˍsuˆ yawˇ hui ve hkui sheh hta‸ tsuhˇ piˇ peuˬ hkʼaw‸ nawˉ, yawˇ ve aˉ po‸ zuhˬ ma hta‸ kʼaw‸ deh leh mui ve yoˬ. Peuˬ leh yawˇ kʼoˆ ve, Ngaˬ nawˬ hui hta‸ hkʼaˬ hkʼe te laˇ ve hta‸ nawˬ hui shiˍ-aˬ laˇ. 13Nawˬ hui lehˬ ngaˬ hta‸ Saˍ la‸ ka‸ Jawˇmawˇ ka‸ kʼoˆ chehˇ ve yoˬ. Nawˬ hui kʼoˆ ve lehˬ cawˇ ve yoˬ. Awˬ lawn kʼo, nawˬ hui kʼoˆ ve hkʼe ngaˬ lehˬ Saˍ la‸ ka‸ Jawˇmawˇ ka‸ hpeh‸ ve yoˬ. 14Hkʼe te leh ngaˬ lehˬ, Jawˇmawˇ ka‸, Saˍ la‸ ka‸ hpeh‸ ve htawˇ, nawˬ hui ve hkui sheh hta‸ tsuhˇ laˇ ve kʼo, nawˬ hui htawˇ teˇ gʼaˇ leh teˇ gʼaˇ ve hkui sheh hta‸ tsuhˇ da‸ cawˇ ve yoˬ. 15Ngaˬ nawˬ hui hta‸ te laˇ ve hkʼa shuˍ shuˍ nawˬ hui htawˇ te tuˬ, ngaˬ nawˬ hui hta‸ henˇ yuˬ jawˬ yuˬ tuˬ te maˍ laˇ peuˬ. 16Ngaˬ nawˬ hui hta‸ awˬ tehˬ awˬ na kʼoˆ laˇ ve awˬ ceˬ lehˬ yawˇ ve awˬ shehˍ hpaˇ a‸ kehˉ uiˍ ve maˇ heˆ. Tcuh yaˇ htawˇ, yawˇ hta‸ tcuh peu shehˍ hpaˇ a‸ kehˉ uiˍ ve maˇ heˆ. 17Awˬ ceuˬ chi teˇ hpaˍ hta‸ nawˬ hui shiˍ leh, shiˍ ve hkʼe te ve kʼo, nawˬ hui awˬ bon uiˍ ve yoˬ.
18Nawˬ hui hkʼa peu-eˬ ve awˬ lawn hta‸ ngaˬ kʼoˆ ve maˇ heˆ. Ngaˬ leuˆ yuˬ taˍ ve chaw hui hta‸ ngaˬ shiˍ ve yoˬ. Ya‸ hkʼaˇ Li‸ hpu hkʼaw bvuh‸ taˍ ve hkʼe, Ngaˬ ve caˇ tuˬ hta‸ caˇ ve chaw teˇ gʼaˇ lehˬ, yawˇ ve hkui mehˍ cu ngaˬ hta‸ hteˆ laˇ ve yoˬ teh‸ kʼoˆ taˍ ve tawˇ teˇ hkawˇ gʼa biˇ la tuˬ awˬ pon hpeh‸ ve yoˬ.#Chi 41:9 19Awˬ ceuˬ chi teˇ hpaˍ hpeh‸ la ve teˇ yanˇ, ngaˬ lehˬ Hkri‸ yoˬ teh‸ nawˬ hui yonˍ tuˬ, maˇ hpeh‸ la sheˍ awˬ gʼuˇ suhˍ chi beu‸ ka‸ ngaˬ nawˬ hui hta‸ hto laˇ peuˬ. 20Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ peu kʼai ve chaw hta‸ ha‸ yuˬ ve teˇ gʼaˇ lehˬ, ngaˬ hta‸ ha‸ yuˬ ve yoˬ. Ngaˬ hta‸ ha‸ yuˬ ve chaw lehˬ, ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ teh‸, yawˇ hui hta‸ kʼoˆ piˇ ve yoˬ.
Shu yawˇ hta‸ chiˇ a‸ piˇ tuˬ ve awˬ lawn Yeˍsuˆ kʼoˆ ve
21Yeˍsuˆ lehˬ, chi teˇ hpaˍ hta‸ kʼoˆ peuˬ hkʼaw‸ nawˉ, yawˇ nyi ma hkʼaw dawˇ haˍ jaˇ leh, Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui awˬ hkʼaw lo chaw teˇ gʼaˇ ngaˬ hta‸ chiˇ a‸ piˇ tuˬ yoˬ tehˬ, shaˉ hkiˆ hkanˍ leh kʼoˆ ve yoˬ.
22Yawˇ a shu teˇ gʼaˇ hta‸ kʼoˆ gaˇ leh naˍ teh‸, awˬ la‸ gʼawˇ teˇ hpaˍ dawˇ leh, teˇ gʼaˇ leh teˇ gʼaˇ nyi da‸ ve yoˬ. 23Yawˇ ve awˬ la‸ gʼawˇ teˇ hpaˍ awˬ hkʼaw lo Yeˍsuˆ ha‸ ve teˇ gʼaˇ lehˬ, Yeˍsuˆ nyi ma pui paˇ lo ngeh mui chehˇ ve yoˬ. 24Siˉmonˍ Peˍtruˆ lehˬ, Yawˇ a shu hta‸ kʼoˆ ve leh naˍ, ngaˬ hui hta‸ hto laˇ-oˆ teh‸ awˬ la‸ gʼawˇ oˇ ve teˇ gʼaˇ hta‸ awˬ heˆ te maˍ piˇ ve yoˬ.
25Oˇ htaˇ, awˬ la‸ gʼawˇ oˇ ve lehˬ, Yeˍsuˆ ve nyi ma pui awˬ paˇ lo jiˆ kʼai leh, Jawˇmawˇ-oˬ, a shu le teh‸ yawˇ hta‸ na nyi ve yoˬ.
26Yeˍsuˆ kʼaw‸ kʼoˆ ve, Ngaˬ hkaoˍmonˇ teˇ peu-eˬ hta‸ yuˬ leh awˍ chiˇ hkʼaw tuˍ sheˬ leh piˇ ve chaw teˇ gʼaˇ lehˬ, yawˇ yoˬ teh‸ kʼoˆ peuˬ hkʼaw‸ nawˉ hkaoˍmonˇ teˇ peu-eˬ hta‸ awˍ chiˇ hkʼaw tuˍ sheˬ leh, Siˉmonˍ Iˉsaˍkaˍriˍoˆ ve yaˇ pa Yuˇda‸ hta‸ piˇ ve yoˬ. 27Yuˇda‸ lehˬ, hkaoˍmonˇ oˇ ve teˇ peu-eˬ hta‸ caˇ peuˬ hkʼaw‸ nawˉ, Saˍtanˍ yawˇ awˬ kʼaw lo lo‸-e ve yoˬ. Yeˍsuˆ kʼoˆ ve, Nawˬ te tuˬ ve kanˉ hta‸ haˆ haˆ ca te-o teh‸ yawˇ hta‸ kʼoˆ piˇ ve yoˬ. 28Aˬ hto‸ ma pa taw Yeˍsuˆ yawˇ hta‸ oˇ hkʼe kʼoˆ piˇ ve hta‸ hpui lawˇ paˇ lo mui chehˇ ve chaw teˇ gʼaˇ ka‸ maˇ shiˍ. 29Yuˆda‸ lehˬ, hpu miˉ chaw hta‸ ha‸ shaˉ ve chaw hpeh‸ ve pa taw, Yeˍsuˆ yawˇ hta‸, Pawehˇ chi awˬ pon ngaˬ hui loˍ ve teˇ hpaˍ hta‸ ca vuiˬ-o‸ teh‸ kʼoˆ piˇ leh naˍ, maˇ heˆ kʼo, Haˍ gʼawˇ ve chaw hui hta‸ teˇ ceuˬ ceuˬ ca piˇ-oˆ teh‸ kʼoˆ piˇ leh naˍ teh‸, yawˇ hui teˇ hpaˍ hpaˍ dawˇ chehˇ ve yoˬ.
30Yuˇda‸ lehˬ, hkaoˍmonˇ oˇ ve teˇ peu-eˬ hta‸ caˇ peuˬ hkʼaw‸ nawˉ teˇ cawˬ haˉ yawˇ tawˆ kʼai ve yoˬ. Awˬ yanˇ oˇ ve lehˬ, tanˇ hkuinˇ htaˇ hpeh‸ ve yoˬ.
Tawˇ awˬ suhˉ teˇ hkawˇ piˇ ve
31Yawˇ tawˆ kʼai peuˬ hkʼaw‸ nawˉ Yeˍsuˆ kʼoˆ ve, Chaw yaˇ ve Yaˇ hpu lehˬ, chi beu‸ awˬ me‸ awˬ hponˇ tawˆ la peuˬ. Yawˇ awˬ hkʼaw lo Gʼuiˬsha htawˇ awˬ me‸ awˬ hponˇ tawˆ la peuˬ. 32Yawˇ awˬ hkʼaw lo Gʼuiˬsha awˬ me‸ awˬ hponˇ tawˆ la ve pa taw, Gʼuiˬsha lehˬ yawˇ awˬ to awˬ hkʼaw lo Yaˇ hpu hta‸ awˬ me‸ awˬ hponˇ tawˆ la piˇ tuˬ yoˬ. Yawˇ lehˬ, teˇ cawˬ haˉ awˬ me‸ awˬ hponˇ tawˆ la piˇ tuˬ yoˬ. 33Ha‸ ve yaˇ teˇ hpaˍ-oˬ, ngaˬ nawˬ hui geh teˇ hkui ceh gʼa chehˇ tuˬ yoˬ. Nawˬ hui ngaˬ hta‸ ca tuˬ yoˬ. Ngaˬ kʼai kuiˬ lo nawˬ hui laˬ maˇ hpeh‸ teh‸ Yuˇda‸ chaw teˇ hpaˍ hta‸ ngaˬ kʼoˆ piˇ ve hkʼe, chi beu‸ nawˬ hui hta‸ htawˇ ngaˬ kʼoˆ laˇ ve yoˬ. 34Nawˬ hui teˇ gʼaˇ leh teˇ gʼaˇ ha‸ da‸-o‸ teh‸, ngaˬ nawˬ hui hta‸ tawˇ awˬ suhˉ teˇ hkawˇ piˇ ve yoˬ. Ngaˬ nawˬ hui hta‸ ha‸ ve hkʼe, nawˬ hui htawˇ teˇ gʼaˇ leh teˇ gʼaˇ ha‸ da‸-o‸, 35Nawˬ hui teˇ gʼaˇ leh teˇ gʼaˇ ha‸ da‸ ve kʼo, ha‸ da‸ ve oˇ ve hta‸ pa taw nawˬ hui ngaˬ ve awˬ la‸ gʼawˇ hpeh‸ ve hta‸ chaw hkʼa peu-eˬ gʼa shiˍ tuˬ yoˬ teh‸ kʼoˆ piˇ ve yoˬ.
Peˍtruˆ Yeˍsuˆ hta‸ chiˇ baˬ tuˬ ve awˬ lawn Yeˍsuˆ kʼoˆ piˇ ve
36Siˉmonˍ Peˍtruˆ kʼoˆ ve, Jawˇmawˇ-oˬ, nawˬ hkʼaˬ lo kʼai tuˬ le teh‸ yawˇ hta‸ na nyi ve yoˬ.
Yeˍsuˆ kʼaw‸ kʼoˆ ve, Ngaˬ kʼai kuiˬ lo chi beu‸ nawˬ laˬ maˇ hpeh‸. Awˬ hkʼaw‸ nawˉ heh‸, ngaˬ awˬ hkʼaˇ suh nawˬ laˬ hpeh‸ tuˬ yoˬ teh‸ kʼoˆ piˇ ve yoˬ.
37Peˍtruˆ kʼoˆ ve, Jawˇmawˇ-oˬ, aˬ hto‸ ma pa taw chi beu‸ ngaˬ nawˬ awˬ hkʼaˇ suh laˬ maˇ hpeh‸ ve le. Nawˬ awˬ pon ngaˬ ve a sha‸ tanˇ tuˬ yoˬ teh‸ yawˇ hta‸ kʼoˆ piˇ ve yoˬ.
38Yeˍsuˆ kʼaw‸ kʼoˆ ve, Ngaˬ awˬ pon nawˬ ve a sha‸ tanˇ tuˬ laˇ. Ngaˬ nawˬ hta‸ awˬ tehˬ awˬ na kʼoˆ laˇ ve, gʼaˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hkʼa gaˬ chiˇ baˬ laˇ tuˬ yoˬ teh‸ kʼoˆ piˇ ve yoˬ.
Currently Selected:
Yoˇhanˬ li‸ 13: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.