2 Raˍsaˍvanˍ li‸ 1
1
Cuˇ yiˍ gʼa tuˬ Sawˉla‸monˍ bon lawˬ ve
1Jawˇmawˇ Daˍviˆ ve yaˇ paˍ Sawˉla‸monˍ lehˬ, Iˉsaˍreˍlaˆ mvuhˇmiˬ hkʼa peu-eˬ ve hta‸ hkʼa deh‸ uˉ peunˍ chehˇ ve yoˬ. Gʼuiˬsha yawˇ hta‸ awˬ bon na‸ piˇ leh, yawˇ hta‸ awˬ me‸ awˬ hponˇ uiˍ la piˇ ve yoˬ.
2Jawˇmawˇ Sawˉla‸monˍ lehˬ, ma‸ yaˇ 1,000 gʼaˇ hta‸ uˉ peunˍ chehˇ ve ma‸ poˍ lonˉ teˇ hpaˍ, ma‸ yaˇ teˇ ha gʼaˇ hta‸ uˉ peunˍ chehˇ ve ma‸ poˍ lonˉ teˇ hpaˍ, a ma‸ lonˉ teˇ hpaˍ, awˬ hoˉ awˬ naˬ teˇ hpaˍ leh Iˉsaˍreˍlaˆ chaw hkʼa peu-eˬ ve hta‸ 3yawˇ geh teˇ geh Giˇbonˍ venˇ lo shiˍ kʼai leh, Gʼuiˬsha hta‸ oˉ kʼoˍ ca pui tuˬ tawˇ piˇ ve yoˬ. Awˬ lawn kʼo, aˬ sho-eˬ htaˇ Moˉseˍ heh puiˉ hkʼaw lo te taˍ ve Gʼuiˬsha ve aˉ po kʼo bon yehˬ oˇ kaˬ lo cawˬ taˍ ve pa taw, yawˇ hui oˇ kaˬ lo kʼai ve yoˬ. 4(Ya‸ hkʼaˇ, Gʼuiˬsha ve ka ti‸ shaˉ caˆ ta kʼoˍ lehˬ, jawˇmawˇ Daˍviˆ Kiˇriˇyaˆyaˍrenˍ venˇ hkʼaw ca taˆ yuˬ leh, Yeˍruˆsaˍlehnˍ venˇ hkʼaw lo teh taˍ ve yoˬ.) 5Huˇraˆ ve awˬ hawehˍ Uˇriˆ ve yaˇ Baˍzaˍreˍlaˆ te taˍ ve kuiˇ tuˉ tanˇ kuiˬ teˇ maˬ htawˇ, Giˇbonˍ venˇ hkʼaw cawˬ ve bon yehˬ gʼuˇ suhˍ lo teh taˍ ve yoˬ. Jawˇmawˇ Sawˉla‸monˍ leh Iˉsaˍreˍlaˆ chaw hkʼa peu-eˬ, oˇ kaˬ lo Gʼuiˬsha hta‸ oˉ kʼoˍ pui ve yoˬ. 6Jawˇmawˇ lehˬ, bon yehˬ gʼuˇ suhˍ lo cawˬ ve tuˉ tanˇ kuiˬ hkʼoˆ lo to nuˇ to shaˆ 1,000 hkeh Gʼuiˬsha hta‸ tuˉ tanˇ piˇ ve yoˬ.
7Oˇ ve teˇ haˉ Gʼuiˬsha Sawˉla‸monˍ geh laˬ leh, Nawˬ ngaˬ geh aˬ hto‸ ma lawˬ gaˇ ve le, teh‸ yawˇ hta‸ na nyi ve yoˬ.
8Sawˉla‸monˍ kʼaw‸ yaw hkʼaw‸ leh kʼoˆ ve, Ngaˬ lehˬ ngaˬ pa Daˍviˆ hta‸ hkʼaˬ htaˆ ka‸ ha‸ jaˇ leh, chi beu‸ ngaˬ hta‸ yawˇ awˬ tan jawˇmawˇ te tcuh laˇ taˍ peuˬ ve yoˬ. 9Jawˇmawˇ Gʼuiˬsha-oˬ, nawˬ ngaˬ pa hta‸ te piˇ taˍ ve ka ti‸ hta‸ a ciˉ te biˇ laˇ-oˆ. Nawˬ lehˬ gʼaw maˇ peuˬ htaˇ hkʼa gaˬ maˇ jaˇ ve chaw chi teˇ hpaˍ awˬ hkʼoˆ lo ngaˬ hta‸ jawˇmawˇ te tcuh laˇ taˍ peuˬ ve yoˬ. 10Chi hta‸ pa taw, chaw chi teˇ hpaˍ hta‸ uˉ peunˍ gʼa tuˬ ngaˬ hta‸ cuˇ yiˍ pe‸ laˇ-oˆ. Oˇ hkʼe maˇ heˆ kʼo, hkʼaˬ hkʼe te leh nawˬ ve chaw chi teˇ hpaˍ hta‸ uˉ peunˍ gʼa tuˬ ve le, teh‸ Gʼuiˬsha hta‸ kʼoˆ piˇ ve yoˬ.
11Oˇ htaˇ, Gʼuiˬsha yawˇ hta‸ chi hkʼe kʼaw‸ kʼoˆ piˇ ve yoˬ. Nawˬ lehˬ da‸ jaˇ ve awˬ ceuˬ hta‸ lawˬ ve yoˬ. Paw sha la tuˬ, awˬ me‸ awˬ hponˇ cawˬ tuˬ, nawˬ ve canˇ paˍ hkʼa peu-eˬ suh peuˬ tuˬ, leh co zuhˬ ha zuhˬ cawˬ tuˬ awˬ pon nawˬ bon maˇ lawˬ. Ngaˬ ve chaw teˇ hpaˍ hta‸ uˉ peunˍ gʼa tuˬ ve cuˇ yiˍ hta‸ nawˬ lawˬ ve yoˬ. 12Nawˬ lawˬ ve hkʼe ngaˬ nawˬ hta‸ cuˇ yiˍ piˇ laˇ tuˬ yoˬ. Chi hkʼoˆ ka‸, ponˬ taˉ peuˬ ve jawˇmawˇ teˇ hpaˍ leh awˬ gʼuˇ suhˍ cawˬ la tuˬ ve jawˇmawˇ teˇ hpaˍ a‸ kehˉ, ngaˬ nawˬ hta‸ hpu shi mawˇ jeˬ leh awˬ me‸ awˬ hponˇ piˇ laˇ tuˬ yoˬ, teh‸ Sawˉla‸monˍ hta‸ kʼoˆ piˇ ve yoˬ.
Sawˉla‸monˍ ve hpu shi mawˇ jeˬ
13Sawˉla‸monˍ lehˬ, aˉ po kʼo bon yehˬ cawˬ kuiˬ Giˇbonˍ venˇ hkʼaw tu leh Yeˍruˆsaˍlehnˍ venˇ lo kʼaw‸ kʼo‸-e ve yoˬ. Yawˇ oˇ kaˬ lo chehˇ taˍ leh, Iˉsaˍreˍlaˆ mvuhˇmiˬ hta‸ uˉ peunˍ chehˇ ve yoˬ. 14Yawˇ lehˬ, iˉ mvuhˇ lawˬ 1,400 maˬ leh, iˉ mvuhˇ ciˇ ve ma‸ yaˇ 12,000 gʼaˇ cawˬ ve yoˬ. Iˉ mvuhˇ lawˬ oˇ ve teˇ hpaˍ hpaˍ hta‸ yawˇ Yeˍruˆsaˍlehnˍ venˇ hkʼaw teh taˍ leh, teˇ hpaˍ hpaˍ hta‸ awˬ nu ve venˇ teˇ hpaˍ hkʼaw teh taˍ ve yoˬ. 15Sawˉla‸monˍ awˬ co-e htaˇ, hpu leh shi teˇ ceuˬ lehˬ, Yeˍruˆsaˍlehnˍ venˇ hkʼaw lo haˉ pui shiˍ hkʼa shuˍ awˬ hpfuhˇ maˇ cawˬ. Keˍdaˍ suhˆ teˇ ceuˬ htawˇ, awˬ nu ve suhˆ teˇ hpaˍ hkʼa shuˍ maˇ jaˇ ve yoˬ. 16Jawˇmawˇ ve iˉ mvuhˇ teˇ hpaˍ hta‸ Muˍsaˍriˍ leh Seˍliˆshaˆ mvuhˇmiˬ teˇ hpaˍ hkʼaw ca vuiˬ yuˬ taˍ ve yoˬ. 17Iˉ mvuhˇ lawˬ teˇ hpaˍ hta‸ Eˇjiˇtu‸ mvuhˇmiˬ hkʼaw vuiˬ yuˬ taˍ ve yoˬ. Yawˇ hui lehˬ, Hiˇtiˆ jawˇmawˇ leh Suˇriˆ jawˇmawˇ teˇ hpaˍ hta‸ htawˇ hawˇ piˇ chehˇ ve yoˬ. Iˉ mvuhˇ lawˬ teˇ maˬ ve 600 hteh‸ hawˇ leh, iˉ mvuhˇ teˇ hkeh ve 150 hteh‸ hawˇ piˇ chehˇ ve yoˬ.
Currently Selected:
2 Raˍsaˍvanˍ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.