1 Saˍmo-eˍlaˆ li‸ 1
1
Eˇlaˍkaˍnaˆ leh Haˍnaˆ awˬ lawn
1Eˇhpaˍrenˍ chaw hui ve mvuhˇmiˬ Raˍmaˆ venˇ hkʼaw lo, Eˇhpaˍrenˍ awˬ ceuˬ awˬ hkʼaˇ Eˇlaˍkaˍnaˆ meh ve chaw teˇ gʼaˇ cawˬ ve yoˬ. Yawˇ lehˬ Zuˇhpaˆ, Tawˇhuˆ hui ve awˬ ceuˬ awˬ hkʼaˇ hpeh‸ leh, Eˇliˇhuˆ ve awˬ hawehˍ, Yeˍyawˇ hanˍ ve yaˇ hpeh‸ ve yoˬ. 2Yawˇ lehˬ, awˬ miˇ ma nyiˇ gʼaˇ cawˬ ve yoˬ. Teˇ gʼaˇ lehˬ Haˍnaˆ hpeh‸ leh, awˬ nu ve teˇ gʼaˇ lehˬ Peˍniˇnaˆ hpeh‸ ve yoˬ. Peˍniˇnaˆ lehˬ yaˇ cawˬ leh, Haˍnaˆ lehˬ yaˇ teˇ gʼaˇ ka‸ maˇ cawˬ. 3Eˇlaˍkaˍnaˆ lehˬ, teˇ hkʼaw‸ le le Raˍmaˆ venˇ lo tu leh, Gʼuiˬsha hta‸ oˉ kʼoˍ ca pui tuˬ Shiˉlonˍ venˇ lo kʼai ve yoˬ. Oˇ kaˬ lo Hawˇhpaˍniˆ leh Hpiˇneˍhaˆ teh‸ kʼoˆ ve Eˇliˆ ve yaˇ paˍ nyiˇ gʼaˇ Gʼuiˬsha ve paw hkuˇ te chehˇ ve yoˬ. 4Eˇlaˍkaˍnaˆ lehˬ, oˇ kaˬ lo Gʼuiˬsha hta‸ oˉ kʼoˍ ca pui ve teˇ pawˆ le le, tuˉ tanˇ tuˬ teˇ hpaˍ hpaˍ Peˍniˇnaˆ leh yawˇ ve yaˇ teˇ hpaˍ hta‸ pehˬ piˇ ve yoˬ. 5Haˍnaˆ hta‸ Gʼuiˬsha yaˇ hu yaˇ paw tuˬ a hkaw-anˬ maˇ piˇ ve htawˇ, yawˇ lehˬ Haˍnaˆ hta‸ ha‸ jaˇ ve pa taw yawˇ hta‸ htawˇ tuˉ tanˇ tuˬ teˇ hpaˍ pehˬ piˇ ve yoˬ. 6Haˍnaˆ hta‸ Gʼuiˬsha yaˇ hu yaˇ paw tuˬ a hkaw-anˬ maˇ piˇ ve pa taw, Peˍniˇnaˆ lehˬ Haˍnaˆ hta‸ maˇ shawˍ maˇ caˆ te piˇ ve yoˬ. 7Yawˇ lehˬ awˬ hkʼaw‸ awˬ yanˇ maw chaweh Haˍnaˆ hta‸ chi hkʼe te piˇ chehˇ ve yoˬ. Teˇ pawˆ le le yawˇ hui Gʼuiˬsha ve bon yehˬ lo kʼai ve teˇ yanˇ, Peˍniˇ naˆ lehˬ Haˍnaˆ nyi ma luˬ tuˬ gʼaˇ hte‸ te piˇ ve pa taw, Haˍnaˆ lehˬ maˇ caˇ maˇ dawˬ leh hawˬ chehˇ ve yoˬ. 8Oˇ htaˇ, yawˇ ve awˬ hpawˇ Eˇlaˍkaˍnaˆ lehˬ, Haˍnaˆ-oˬ, aˬ hto‸ ma pa taw nawˬ maˇ caˇ maˇ dawˬ leh hawˬ chehˇ ve le. Nawˬ yaˇ paˍ teˇ chi gʼaˇ cawˬ ve a‸ kehˉ, nawˬ ngaˬ hta‸ gʼa taˍ ve lehˬ leuˉ leh da‸ jaˇ ve maˇ heˆ laˇ, teh‸ yawˇ hta‸ kʼoˆ piˇ ve yoˬ.
Haˍnaˆ leh Eˇliˆ awˬ lawn
9Shiˉlonˍ venˇ hkʼaw lo, teˇ nyi htaˇ yawˇ hui caˇ peuˬ dawˬ peuˬ hkʼaw‸ nawˉ, Haˍnaˆ tawˆ kʼai ve yoˬ. Paw hkuˇ Eˇliˆ lehˬ Gʼuiˬsha ve bon yehˬ yehˬmiˉhpe‸ lo mui chehˇ taˍ ve yoˬ. 10Haˍnaˆ lehˬ dawˇ haˍ jaˇ ve pa taw, Gʼuiˬsha geh bon lawˬ leh gʼaˇ hte‸ hawˬ chehˇ ve yoˬ. 11Yawˇ Gʼuiˬsha hta‸ ka ti‸ te leh kʼoˆ ve, Kanˇ paˆ uiˍ ve Jawˇmawˇ Gʼuiˬsha-oˬ, nawˬ ve awˬ ceˬ ma hta‸ a ciˉ nyi laˇ-oˆ. Ngaˬ hkʼaˬ ma gʼa tu‸ gʼa hkanˍ chehˇ ve hta‸ nyi leh, ngaˬ hta‸ a ciˉ dawˇ nawˇ laˇ-oˆ. Nawˬ ngaˬ hta‸ yaˇ paˍ teˇ gʼaˇ piˇ laˇ ve kʼo, yawˇ a sha‸ te‸ chehˇ ve teˇ co-e ngaˬ nawˬ hta‸ chiˇ a‸ laˇ tuˬ ka ti‸ te ve yoˬ. Yawˇ ve uˉ hkeh mvuh hta‸ htawˇ, ngaˬ teˇ pawˆ ka‸ chiˇ baˬ piˇ tuˬ ve maˇ heˆ, teh‸ kʼoˆ ve yoˬ.
12Haˍnaˆ Gʼuiˬsha geh awˬ yanˇ maw chaweh bon lawˬ chehˇ leh, Eˇliˇ lehˬ yawˇ ve meuˇ guiˬ hta‸ nyi chehˇ ve yoˬ. 13Yawˇ lehˬ ta‸ iˉ gawˬ lehˍ bon lawˬ chehˇ ve yoˬ. Yawˇ ve meuˇ guiˬ naˇ naˇ te chehˇ ve htawˇ, awˬ hkawˇ maˇ tawˆ. Hkʼe te leh, Eˇliˆ lehˬ yaˇ miˇ oˇ ve tzuhˬ dawˬ bvuhˆ ve hehˉ teh‸ dawˇ leh, 14Nawˬ hkʼaˬ maw maw tzuhˬ bvuhˆ chehˇ tuˬ sheˍ ve le. Nawˬ ve tzuhˬ hta‸ yuˬ baˬ-o‸, teh‸ yawˇ hta‸ kʼoˆ piˇ ve yoˬ.
15Oˇ htaˇ, yaˇ miˇ oˇ ve kʼaw‸ yaw hkʼaw‸ leh kʼoˆ ve, Jawˇmawˇ-oˬ, ngaˬ tzuhˬ dawˬ bvuhˆ ve maˇ heˆ. Ngaˬ lehˬ dawˇ haˍ jaˇ ve pa taw, ngaˬ ve dawˇ haˍ tuˬ hkʼa peu-eˬ Gʼuiˬsha hta‸ hto piˇ chehˇ ve yoˬ. 16Ngaˬ lehˬ chaw luˬ ma hpeh‸ ve teh‸ a ciˉ taˇ dawˇ laˇ sheˍ. Ngaˬ lehˬ dawˇ haˍ jaˇ ve pa taw, bon chi hkʼe te lawˬ chehˇ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.
17Oˇ htaˇ Eˇliˇ lehˬ, Gawˬ lehˍ ve hkʼaw kʼo‸-e loˬ. Iˉsaˍreˍlaˆ ve Gʼuiˬsha lehˬ nawˬ lawˬ ve hkʼe awˬ bon na‸ laˇ piˇ-oˆ, teh‸ kʼoˆ ve yoˬ.
18Oˇ htaˇ yaˇ miˇ oˇ ve lehˬ, Ngaˬ ve bon lawˬ hkawˇ nawˬ geh gaˬ piˇ-oˆ, teh‸ kʼoˆ peuˬ hkʼaw‸ nawˉ tawˆ kʼai leh, caˇ tuˬ kʼaw‸ caˇ ve yoˬ. Chi teˇ pawˆ yawˇ maˇ kʼaw‸ dawˇ haˍ-o.
Saˍmo-eˍlaˆ paw la ve
19Shawˉ pawˍ mvuhˇ shawˉ Eˇlaˍkaˍnaˆ leh yawˇ ve yehˬ yaˇ kʼa yaˇ teˇ hpaˍ teˇ na‸ tu leh Gʼuiˬsha hta‸ oˉ kʼoˍ ca pui taˉ peuˬ hkʼaw‸ nawˉ, Raˍmaˆ venˇ lo kʼaw‸ kʼo‸-e ve yoˬ. Eˇlaˍkaˍnaˆ yawˇ ve awˬ miˇ ma Haˍnaˆ geh zuh‸ leh, Gʼuiˬsha lehˬ yawˇ ve bon lawˬ hkawˇ hta‸ na yuˬ piˇ ve yoˬ. 20Hkʼe te leh yawˇ yaˇ hu la leh, yaˇ paˍ teˇ gʼaˇ paw la ve yoˬ. Oˇ htaˇ yawˇ lehˬ, Yaˇ paˍ chi hta‸ ngaˬ Gʼuiˬsha geh lawˬ yuˬ taˍ ve yoˬ, teh‸ kʼoˆ leh yawˇ hta‸ Saˍmo-eˍlaˆ teh‸ meh piˇ ve yoˬ.
21Gʼuiˬsha hta‸ ka ti‸ te taˍ ve hkʼe, teˇ hkʼaw‸ teˇ pawˆ Gʼuiˬsha hta‸ tuˉ tanˇ piˇ tuˬ ve awˬ yanˇ gaˬ la htaˇ, Eˇlaˍkaˍnaˆ leh yawˇ ve yehˬ yaˇ kʼa yaˇ teˇ hpaˍ Shiˉlonˍ venˇ lo kʼai ve yoˬ. 22Ya‸ hkʼaˇ, chi teˇ pawˆ Haˍnaˆ maˇ kʼai. Ngaˬ ve yaˇ paˍ hta‸ cuˉ hpaˆ piˇ peuˬ htaˇ heh‸, ngaˬ yawˇ hta‸ Gʼuiˬsha ve bon yehˬ lo shiˍ kʼai piˇ tuˬ yoˬ. Yawˇ a sha‸ te‸ chehˇ ve teˇ co-e, oˇ kaˬ lo ceh tiˉ gʼa chehˇ taˍ tuˬ yoˬ, teh‸ yawˇ ve awˬ hpawˇ hta‸ kʼoˆ piˇ ve yoˬ.
23Oˇ htaˇ Eˇlaˍkaˍnaˆ lehˬ, Nawˬ dawˇ taˍ ve hkʼe te leh nawˬ yaˇ paˍ hta‸ cuˉ hpaˆ piˇ peuˬ htaˇ hkʼa gaˬ, aˉ hkʼaw lo chehˉ taˍ-o‸. Gʼuiˬsha lehˬ nawˬ te taˍ ve ka ti‸ hta‸ biˇ la piˇ lawˬ-o‸, teh‸ yawˇ hta‸ kʼoˆ piˇ ve yoˬ. Hkʼe te leh, Haˍnaˆ aˉ hkʼaw lo chehˇ taˉ leh, yawˇ ve yaˇ paˍ hta‸ ha‸ shaˉ chehˇ ve yoˬ.
24Awˬ hkʼaw‸ nawˉ yawˇ ve yaˇ hta‸ cuˉ hpaˆ piˇ peuˬ ve teˇ yanˇ, yawˇ lehˬ yaˇ paˍ oˇ ve hta‸ Shiˉlonˍ venˇ lo shiˍ kʼai ve yoˬ. A sha‸ 3 hkʼaw‸ gaˬ peuˬ ve nuˇ paˍ haˉ teˇ hkeh, junˍ meu-e teˇ hkʼawˍ lawˇ, leh a pehˉ meuˇ gʼuiˬ teˇ kaw hta‸ htawˇ yuˬ kʼai ve yoˬ. Yaˇ paˍ oˇ ve a sha‸ i chehˇ sheˍ ve htawˇ, yawˇ lehˬ yaˇ paˍ oˇ ve hta‸ Shiˉlonˍ venˇ hkʼaw cawˬ ve Gʼuiˬsha ve yehˬ lo shiˍ kʼai ve yoˬ. 25Yawˇ hui nuˇ paˍ oˇ ve hta‸ tiˇ pehˍ leh, yaˇ paˍ oˇ ve hta‸ Eˇliˆ geh shiˍ laˬ ve yoˬ. 26Oˇ htaˇ, Haˍnaˆ yawˇ hta‸ kʼoˆ piˇ ve, Jawˇmawˇ-oˬ, nawˬ ngaˬ hta‸ maˇ dawˇ nawˇ laˇ. Ponˬ laˬ htaˇ choˬ kaˬ nawˬ mehˆ gʼuˇ suhˍ huˉ taˍ leh, Gʼuiˬsha geh bon lawˬ chehˇ ve yaˇ miˇ oˇ ve lehˬ ngaˬ yoˬ. 27Yaˇ paˍ chi hta‸ gʼa tuˬ awˬ pon ngaˬ bon lawˬ leh, Gʼuiˬsha lehˬ ngaˬ lawˬ ve hkʼe pe‸ laˇ ve yoˬ. 28Chi hta‸ pa taw, yaˇ paˍ chi Gʼuiˬsha hta‸ chiˇ a‸ piˇ tuˬ ngaˬ gaˬ la taˍ ve yoˬ. Yawˇ a sha‸ te‸ chehˇ ve teˇ co-e, yawˇ lehˬ Gʼuiˬsha awˬ pon fuiˍ teh taˍ ve chaw hpeh‸ tuˬ yoˬ, teh‸ yawˇ hta‸ kʼoˆ piˇ ve yoˬ.
Oˇ ve hkʼaw‸ nawˉ, yawˇ hui oˇ kaˬ lo Gʼuiˬsha hta‸ oˉ kʼoˍ pui ve yoˬ.
Currently Selected:
1 Saˍmo-eˍlaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.