ROMA 8

Zhwenyə ŋkwi mo nə ŋkwɔ

1Sɔm shɛ tə bɑ cwəlɔ jɑ́ thə́ pɔ pyə wap bɑ m nə Yeso Kristo a pɑ. 2Nə pa' mco' Zhwenyə yə a hɑ vɔk shyə m nə Yeso Kristo a bɑ ɑ lě ŋkwi a bi mco' mhɔ ba m̀ bi vʉ̌. 3Ywə yə mco' lě tə ku' nə ghə, nə pa' a bɑ bap nɑ́ lě bwa mco' a, Si ghə̀: Shyə m nə pa' e nthəm Mú e nthʉm bapnɑ mhɔ pa' yɔk pɑ a, dɑ e nuŋpwɔ' nə mhɔ, e lě nyəŋ shɛ thə mhɔ, nthʉm bap nɑ́. 4Po'o gɑ nwə dəŋdəŋ yə mco' shəŋ a, a pəmtə́ nə́ pɑ̀ pyə pɑ tə́ jɑwə giŋ m nə bap nɑ́ a pɑ́, bɑwə giŋ m nə́ Zhwenyə. 5Nə pa' mo bɑ giŋ nə bap nɑ́ bɑ gə pɑ tsə bap nɑ́, da' gɑ́ bɑ giŋ nə Zhwenyə, gə ywə Zhwenyə. 6Bap nɑ́ gɔ m nə vʉ̌, da' gɑ Zhwenyə pɑ gɔ m nə vɔk ba m nə hwitə. 7Nə pa' nə yu'nyə bi bapnɑ bɑ nə tʉɔthə́ bi Si; bapnɑ tə́ ju'nyə nə mco' Si pɑ́, bɑ a ka ku' nə yu'nyə pɑ. 8A bɑ m nə bap nɑ́ bi a pɑ́ mo lə puŋ Si. 9Tə po tə jɑ bvɔk m nə bap nɑ́ pɑ́, po bɑ m nə Zhwenyə, nə pa' Zhwenyə Si shwə nə po. A pɑ́ gɑ mo ka ghə Zhwenyə Kristo, bɑ́ e tə́ mo Kristo pɑ. 10A pɑ gɑ Kristo bɑ́ nə po, bɑ ba pa' ǎ nyənyɔ gɑ́ nɑ́ bɑ ywə vʉ́ shyə m nə mhɔ a, bɑ Zhwenyə bɑ vɔk yɔ́ shyə m nə nwə dəŋdəŋ. 11Bi á a piŋ bɑ́ gɑ Zhwenyə Mo yə e lə́ yam Yeso nə vʉ̌ a shwə nə po, bɑ Mo yə e lə yam Yeso Kristo a gɔ sɔ' hɑ vɔk nə́ nɑ tsɔ tsyə a bɑ ywə pfʉ̀pfʉ̌ a, cyə m nə Zhwenyə e yə a shwə nə po a.

12A po'o mfɑ́mfɑ́ tə a bɑ́ bɑ pɑ̌ ghə jú, la' a pɑ jú bapnɑ yə a gɔ ghə pɑ vɔk m nə bapnɑ a pɑ. 13Nə pa' po pɑ bvɔk a nə bap nɑ́ bɑ po gɔ sɔ' pfʉ́; da' gɑ́ po cyə m nə Zhwenyə jwə́ mfa' bap nɑ́, bɑ po gɔ sɔ' vɔk. 14Nə pa' pɔ pyə Zhwenyə Si nə shya wap a bɑ po Si. 15Pǒ bɑ po ka kwi Zhwenyə yə a dɑ wɔ gə mkwɔ, po pɑ́ bwɔk a pɑ. A bɑ po kwi Zhwenyə yə a dɑ wɔ gə mcwə po, Zhwenyə yə a gə po cwe gɑ: Aba, Ta. 16Zhwenyə bɔ biŋ bi mzhwenyə mɔk pɑ gɑ pɑ bɑ́ po Si. 17Bɑ pó biŋ bɑ mtsʉ́ mcʉ', mtsʉ̌ mcʉ' Si, pa Kristo, nə pa' pɑ ghə yɔk pɑ tsʉ' nə go' e, bɑ pɑ gɔ sɔ' ghə yɔk pɑ tsʉ' nə ghu' e.

Ghu'tə yə a wə sɔ' a

18Gɑ zhyə gɑ gǒ' yə a si nə yəŋ gɑ́ cwə dzʉ̌ a ka ku' sɔmywə nə ghu'tə yə Si gɔ sɔ' la'tə nə pɑ a. 19Nə pa' dzʉ̌ bɑwə byap tə səŋnyə nə pa' pu gɔ ghə wap zhyə Mu Si a: 20Nə pa' dzʉ̌ bɔ bɑ pu hɑ nə gʉ' simnyə, tə m pa' yʉ nə ŋkhuŋ a pɑ́, m pa' mo yə e nyəŋ e nə́ a nə ŋkhuŋ a; tə́ e yɑwə mɔktə. 21Nə pa' ba yʉ́ yə pu gɔ sɔ' kwi e bi ŋkwɔ vʉ̌, e ghə yə tsʉ' nə nə cyətə pɑ ŋkwɔ ba nə ghu'tə yə a bɑ yə po Si a. 22Pyə bɑ pyə̌ zhyə́ gɑ guŋ dzʉ awɛ jɑwə cwəlɔ bɑwə pfə́ nə ywələ̌m nə dzə́. 23A tə bɑ da' yʉ́ do e pɑ́, ba wɔk pɑ yɔk pɑ pyə a bɑ pɑ ghə zhwi'tə Zhwenyə a, pɑ bɑwə pfə̌ nthʉm tʉm pɑ, byap gɑ pɑ pɑ́ mcwə po, byap nə vɔk nɑ tsɔk pɑ. 24Nə pa' a bɑ pu lě bvɔk wɔk pɑ, tə́ bvɔk wɔk pɑ po'o m nə mɔktə. Tə bi a pɑ mo yɔ ywə yə o mɔktə ya a bɑ o tə́ gɔ piŋ mɔktə pɑ: Bi a pɑ mo yɔ ywə biŋ mɔktə m gɑ kɑ? 25Tə nə mɔktə ywə yə pɑ tə jɔ a pɑ́, a bɑ nə cəŋtə byap.

26Zhwenyə ŋkwitə wɔk pɑ nə pwa yɔk pɑ, nə pa' a bɑ pɑ ka zhyə nə cwyɛ'nyə pa' a shəŋ a; da' gɑ́ Zhwenyə giŋkam nə pɑ̀, bɑ shwiŋ tə dhə, 27bɑ Mo yə é jyə́ tʉm mo a zhyə ywə yə Zhwenyə sɛ a: nə pa' Zhwenyə bɑ giŋkam pɔ dɔlɔ̌ m pa' Si shəŋ a.

28Pɑ́ piŋ jyə́ gɑ guŋ ywə awɛ nyaptə pɑ nwə pɑpuŋ bi pɔ pyə wap ŋkhuŋ Si a, pɔ pyə́ a bɑ e ke wap pa' e jap a. 29Pɔ pyə a bɑ e lě dəŋdzə jyə wap a, e lě jap gɑ́ wap gɔ pɑ hwə́ pa' Mú e bɑ a, po'o gɑ e pɑ́ thə́sə mu nə dú mfɑ, 30pɔ pyə a bɑ e lě dəŋdzə̀ shwɔ' wap a, a bɑ e lě ŋkhe wap; pɔ pyə e lə ké wap a pɑ́ bɑ e lě jap wap dəŋdəŋ; pɔ pyə e lə yap wap dəŋdəŋ a, a pɑ bɑ e lě gu'tə́ wap.

Zhwɔp ŋkhuŋnyə Si

31Pɑ gɔ kwi' ghɔm gɑ́ kɑ? Si pɑ bi pɑ̀ bɑ wɑ gɔ pɔ wɔk pɑ̀?

32Yʉ yə e lě tə́ gho' kwa' Mú e, da' gɑ e lě hɑ é nə thə́ yɔk pɑ awɛ a, a gɔ ghə m gɑ kɑ tə́ e lə hɑ guŋ ywə awɛ bi pa Mu é?

33Wɑ̌ gɔ putə pɔ pyə Si bɑ ě cwɔ' wap a? Si nə́ jap mo dəŋdəŋ.

34Wɑ̌ gɔ nyəŋ shɛ̌? Yeso Kristo bɑ e lě pfʉ́, biŋ jam nə vʉ̌; e bɑ nə ghə̌ŋ tʉɔ Si, bɑ gìŋkám nə pɑ.

35Wɑ gɔ té wɔk pɑ nə ŋkhuŋnyə Kristo? Ghəghʉɔ lə? Kɑ nə zhwiŋ? Kɑ nə cwɔ' mkwə mo cwəpuŋ? Kɑ jikǔ'? Kɑ pə̌ŋ? Kɑ ywə vʉ? Kɑ nyədwɔp?

36Nə pa' a bɑ pú lě bvə gɑ:

A shyə m nə o pu pɑ jwɔk jwətə wɔk zhwətə; pu pɑ jɔ wɔk pɑ pa' mnɔm pyə pu dɑ wap gɔ m nə wa wap a.

37Da' gɑ́ nə guŋ e awɛ pɑ̌ shyə m nə mo yə́ e lə kuŋ wɔk pɑ a, bɑ pɑ cyəshù.

38Əŋ, gɑ̌ zhyə nyənyɔ gɑ: Kɑ vʉ́, kɑ vɔk, kɑ pɑ aŋgəle, kɑ nə hya mo, kɑ cwəlɔ, kɑ cwə yə a gɔ tə sɔ' a lə, kɑ mtʉɔ

39kɑ mgʉ' tə́ thə, kɑ mgʉ' tsʉ̀m, kɑ bǎ kɑ yə pu lə nyaptə a lə, pɑ́ sɔmywə lə haptə́ wɔk pɑ̀ nə ŋkhuŋnyə Si yə pu da'tə nə Yeso Kristo Cyəpɔ yɔk pɑ̀ a!

Currently Selected:

ROMA 8: NTGomala

Highlight

Copy