MATIO 27
27
Pu lɑ Yeso gɔ dzə̌ Pilato
(Mk 15.1; Lk 23.1-2; Yhn 18.28-32)
1Dzʉ́ lə lɔ̌, guŋ mkamsi gwyəgwyə awɛ pu a mghətso cɔmnwə nə Yeso nə ja'shɛ e gɑ̀ pu zhwə e. 2Wap lə piŋ shə̀ŋ e cwəlɔ, dɑ e nə gɔ hɑ e bi gɔpna' Pilato.
Vʉ Yuda
3A lə pɑ́ po'o Yuda yə e lə hɑ Yeso a nə yɔ gɑ́ pu nyəŋ shɛ thə́ e zhwìŋ ko nə e, e lɑ ŋkhap bɛ mgham nthá nə bɑnyə hɑ bi mkamsi gwyəgwyə pu a mghətso 4gɔm gɑ: Ŋ khé hɔ nə hɑ mcyə́ tə bya. Da' gɑ wap ghɔm bi e gɑ: A ghə la m wɔk! A yu shɛ. 5A lə pɑ̀ po'o e təm, ma' ŋkhap nə ghəŋ tsʉ' Si, cwəlɔ gɔ shəŋnyə. 6Mkamsi gwyə lə pé ŋkhap gɔm gɑ: Pu ka piŋ gɑ́ pɑ ŋkhap yəŋ ko nthɛ nə pa' a ŋkhap mcyə.
7Wap lə tɛ̌, dɑ ŋkhap bɔ nə jo pe bə̌m mcǎ' nə gə tsʉ' nə nthəŋ mghʉɔ. 8A ywə yə a gə tə́ pu pɑ́ ŋkhe pé bɔ gɑ pé mcyə tə ŋkhəm cwəlɔ a. 9A pɑ́ po'o ywə yə gɔm ghɔm Si Yeremia lə ghɔm a pəmtə gɑ:
Wap lě biŋ ŋkwi ŋkhap bɛ̀ mgham nthá:
A bɑ dəŋ mo yə pu lə tɛ a,
mo yə pǒ pɑ Israɛl lə tɛ a.
10Wap lə hɑ nə́ pě bə̌mmcǎ'
dəŋdəŋ pa' Cyəpɔ lə ghɔm bəm a.
Yeso dzə̌ Pilato
(Mk 15.2-5; Lk 23.3-5; Yhn 18.33-38)
11Pu lə fyɛ' Yeso dzə gɔpna' həŋtə e gɑ: O bɑ fo pɑ Yudea a? Yeso ghɔm bi e gɑ: Wə nə gɔm, 12tə́ sɔ' m nə mnwə myə mkamsi gwyəgwyə pu a mghətso lə gɔm nə e a, e lə pa' sɔmywə nə́. 13A pɑ́ po'o Pilato ghɔm bi e gɑ: O tə́ bɑwə ju' guŋ mnwə myə pu bɑwə gɔm nə́ o a pǎ? 14Yeso lə̀ pa' sɔm nwə bi gɔpna', tə́ nwə cyə e.
15A lə bɑ mɑ̀ gɑ́ a pɑ bǎ nə ya ŋwɛnyə lə, gɔpna' té ta' mo cɛ́, bi pɔmnəŋ, mo yə wap həŋtə a. 16A lə bɑ pu ghə̀ mu' mgha'mgha' gɛ cɛ̌, tso tsyə pɑ Yeso Barabas 17Pilato lə həŋtə pɔmnəŋ pyə wap lə bɑ wap cu'tə a gɑ: Pǒ wə shəŋ gɑ nthak ya mo bi pǒ? Yeso Barabas ká Yeso yə pu ŋkhe e gɑ Kristo a? 18Nə pa' Pilato lə bɑ e zhyə gɑ́ pu lə̀ ŋkhiŋ Yeso kǐŋ tə̀ hɑ é bi e a. 19Cwə yə Pilato lə pɑ́ dyə fyɛ' a, jwi e təm gɑ́ pu ghɔm bi e gɑ: Kɑ ko nə nwə mo nyənyɔ yɑ! Nə pa' jʉ̀m kwɔ' la' tyɛ' ɔ baknyə a nə nwə e te'te'.
20Mkamsi gwyəgwyə pu a mghətso lə́ tɔk pɔmnəŋ gɑ pu həŋtə bi Pilato gɑ e tak Barabas nəŋ, gə pu zhwə Yeso. 21Gɔpna' lə piŋ dɑ ghɔm həŋtə wap gɑ: A ghɔ nə wap pɑpʉə po pɑwə shəŋ gɑ nthak ya mo neŋ? Wap pa' bi e gɑ Barabas. 22Pilato həŋtə wap gɑ: Gɑ gɔ ghə la m Yeso yə pu ŋkhe é gɑ Kristo a? Guŋ yap awɛ pa' gɑ: Kam e thə́ bɛnyəpɛnyə! 23E piŋ həŋtə wap gɑ: A bɑ e ghə kɑ yə a pɔk a? Da' gɑ wap cwé tə thə̀ gɑ: Kam e thə́ bɛnyəpɛnyə. 24Pilato lə nə yɔ gɑ́ ywə yə e wə gɔm a ka kwitə, pɔmnəŋ piŋ bɑwə shaktə nɑ tsap, ŋkwi shyə nə sɔk bu myə́ dzə pɔmnəŋ gɔm gɑ: Ŋ kha zhyə sɔmywə nə mcyə mɔ̌; a yɔ shɛ̀. 25Guŋ pɔ awɛ pa' gɑ: Mcyə myə́ ko nə pyə ba m nə́ pó pɔk. 26A lə pɑ́ po'o e tak Barabas nəŋ bi pu. Tə sɔ' m nə Yeso; e lə ghə̀ pu lɑ nthě shwɔ e, biŋ hɑ e gɑ pu kam e thə bɛnyəpɛnyə.
Msəŋwi cap Yeso
(Mk 15.16-20; Yhn 19.2-3)
27Msəŋwi gɔpna' lə lɑ Yeso ŋkho dyə fyɛ' cwəlɔ, shu'tə guŋ msəŋwi awɛ bəŋ e. 28Wap lə tɔk dzə nə e ŋkwa pɛ dzə nə̌m nə e. 29Dɑ mka'tə ba' ntheŋ nthʉ́ thə é; biŋ hɑ ka'cyə bi e nə pù tʉɔ; wap lə kam mkwi'tə dzə e, shap é gɔm gɑ: Pyə ca'tə o bɑ fo pɑ Yudea! 30Wap lə thə́tə mtǐ nə e, biŋ ŋkwi ka' pu e shwɔ thə e. 31Wap lə cap e po'o nthɔk dzə́ nə́m nə e, ŋkwa kwa' dzə tsyə nə e, biŋ dɑ e gɔ nə kam e thə̀ bɛnyəpɛnyə.
Yeso thə́ bɛnyəpɛnyə
(Mk 15.21-32; Lk 23.26-43; Yhn 19.17-27)
32Wap lə pɑ́ nthəm jɔ mu' mbɛ, yə Kirena, tso tsyə pɑ Simon wap ghəm e gɑ e kwa bɛnyəpɛnyə Yeso. 33Wap lə ghɔ tə ŋkho tsʉ' yə pu ŋkhe gɑ Gɔlgota, a pɑ̀ nthùtə gɑ tsʉ' kəlo' thə́ mò. 34Wap hɑ mlu' bɑ pú ŋi'nyə mcyə́ nə́ bi e gɑ e nwə. E lə́ zhwi'tə, ŋkhəŋnyə nə́ nwə́ 35wap lə kam e thə bɛnyəpɛnyə cwəlɔ, nthamnthùŋ nə gap mdzə myə́. 36Wap lə piŋ shwə̀ tsʉ' u bɑ byap e. 37Wap lə ŋwa' ywə yə a gə tə̀ pu zhwə e a jap dəm thə́ e gɑ: Mo yə̌ŋ gɑ bɑ Yeso, fo pɑ Yudea. 38Pu lə pəmtə̀ ŋkham wap pu a shɑ̀ msamshwə pɑ́pʉə, mu' nə ghəŋ tʉɔ gə yə mu' nə ghəŋ kwyap. 39Mcyə́ jyə̀ lə nə cyə̀ bɑ jəmtə, bɑ ŋʉ' thə yap, 40gɔm gɑ: Wə yə o sa'tə tsʉ' Si biŋ ŋkwɑ nə tyɛ' tá a, o pɑ Mu Si o vɔk thə nɑ o, fi' thə bɛnyəpɛnyə!
41Ba pɑ zhyə mco' pu a mghətso, ba mkamsi gwyəgwyə lə yəmtə e gɑ: 42E lə̀ vɔk shɑ pɔ; bi a pɑ e lə vɔk thə nɑ e a! E bɑ fo pɑ Israɛl, e fi' thə bɛnyəpɛnyə cwəlɔ̌, pyə piŋ e!
43Pu Si nə bɑ́, a Si vɔk e cwəlɔ, a pɑ zhyə́ gɑ́ e ŋkhuŋ e, nə pa' e gɔm gɑ: Gɑ̌ bɑ́ Mu Si! 44Ba msam shwə̀ pyə pu lə kam wap pu a pù a lə kwi' jəmtə e yap pɑ po'o.
Yeso pfʉ́
(Mk 15.33-41; Lk 23.44-49; Yhn 19.28-30)
45Tə́ fɑ mɔkcʉ gɔ ŋkhəm nə mnam tá, jʉ́m lə lɑ guŋ dəmca' awɛ. 46A lə nə kəm nə mnam tá Yeso cwé tə́ thə̀ gɑ: Eli, Eli, lama sabaktani. A pɑ́ nthutə gɑ: Si a, Si a, o gwa' a gɑ kɑ? 47Shɑ pɔ nə pɔ pyə wap lə bɑ tsʉ' u a lə nə yu' e po'o gɔ́m gɑ: E yə́ bɑwə ŋkhe Elia, 48Mu' mo nə pu lə wuŋ ŋkhʉ̀dʉ́ be cù ywə nyəŋ cɔ́kmlu' nə, su nə́ kam kà' nya gɑ e nwə. 49Pyə shɑ́ pɔ ghɔm gɑ: Tiŋnyə! Pɑ yɔ bi a Elia gɔ sɔ' vɔk e a.
50Da' gɑ Yeso lə piŋ shwe tə́ thə cwəlɔ, zhwenyə é təm. 51Pu nə yɔ dzə́ Dyə Si sɔ pak pʉə fɑ thə̀ ŋkhəm si; cǎ' cu'nyə. Mghwɔ' sɔtə, 52mthəsì ghyɛ', mnɑ pɔ dɔlɔ̌ tə jɔm yam nə vʉ̌: 53Jam nə vʉ̌, nthəm mthəsì po'o ŋkho tisuŋ dɔlɔ̌ pɔ jɔmyɔm yɔ wap. 54Tadyə msəŋwi ŋkhə pu a pɔ pyə pu a pu lə bɑwə byap Yeso a lə nə yɔ pa' ca' shʉ'nyə a, ba ywə yə a lə cyə a, bwɔk té' o gɔm gɑ: kwa' nyənyɔ mo yəŋ kɑ bɑ Mu Si.
Nə təŋ Yeso
55Vəŋ pɑ jwǐ lə bɑ tsʉ'u, bɑ wap tiŋnyə gʉə sʉəsʉə bɑwə jɔ; wap lə̀ bɑ jʉm Yeso tə fɑ cwə yə́ é lə́ bɑ́ Galilea, bɑ fa' bi e; 56Maria yə Makdala ba Maria ma Yakop pu Yosɛp, ba ma pǒ Zebede lə bɑ cəcɑ pù.
57A lə̀ kəm bwadzʉ̌, mu' mbɛ yə Arimatea mo jizhǐ tso tsyə pɑ Yosɛp, bɑ e lə bɑ yə mukhʉ̌ Yeso sɔ'. 58Bɛ bɔ lə ghɔ jɔ Pilato, həŋtə gɑ e hɑ pfə Yeso bi e. Pilato lə ghɔm gɑ pu hɑ pfə Yeso bi e. 59Yosɛp lə kwi pfə Yeso dzʉmtə nə kam dzə́ dɔlɔ̌, 60nyəŋ nthʉm sì sə́ yə e lə ghə pu təŋ nthʉm ghu gwɔ' a; biŋ ŋkhəŋnyə mɑ gwɔ̀' nə shɑ thəsì cwəlɔ gɔ. 61Da' gɑ Maria yə Makdala pu yə mu' Maria lə́ bɑ tsʉ'u bɑ wap cwə dzə sì.
Nə pyap thəsì
62Tyɛ' nə nyaptə paska lə cyə̌, dzʉ lɔ cwəlɔ, mkamsi gwyəgwyə pu a pɑ Farisai pəmtə gɔ ywə Pilato, 63gɔm bi e gɑ: Cyəpɔ, pyə kamtə́ gɑ shwanwə yəŋ lə pɑ cwə yə e lə jɑ tə pfʉ̌ a gɔm gɑ: A gɔ la' cyə tyɛ'dzʉ́ yɑtá jam nə vʉ̌. 64Ghɔm gɑ pu pyap thəsì e tə ŋkhəm nə tyɛ' tá, bwɔk gɑ pɑkhʉ̌ pyə kɑ sɔ' jʉ pfə́ e, gɔm bi pɔmnəŋ gɑ́ e yam nə vʉ̌. Nə pa' bɑ yə bɔ cwanwə gɔ piŋ pɔk tə cyə yə dzə. 65Pilato lə ghɔm bi pu gɑ: A bɑ pǒ ghə pɑ pyap tsʉ'. Po ghɔ byap thəsì e pa' po zhyə a. 66Wap lə ghɔ cwəlɔ jap stam nə gwɔ' thəsì e, biŋ jap pɔ gɑ wap pyap.
Currently Selected:
MATIO 27: NTGomala
Highlight
Share
Copy
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.