2 TIMOTIO 1
1
Ca'tə̀
1Myə Polo, gɛ nthə̌m Kristo Yeso, shyə m̀ pa' Si nə jap a, shyə m̀ nə mka'nyə vɔk myə a bɑ nə Kristo Yeso a, 2bi Timotio, mu a yə gɑ̌ ŋkhuŋ e te' a: Gho', cɔ̌mmtso ba hwitə pɑ bu shyə́ m nə́ Si Tá, ba m̀ nə Kristo Yeso, Cyəpɔ yɔk pɑ.
Mfa' gho'
3Gɑ̌ go'tə Si yə gɑ̌ fa' bi e pa' mta pɑ̌ a, fa' bi e nə tʉm dɔlɔ̌, nə pa' mtsʉ̌' ba mɔkcʉ, gɑ̌ ŋkhe tso tsǔ guŋ mcwə awɛ nthʉm mcwyɛ'nyə mə̌. 4Gɑ̌ nə kamtə́ shyətsə o, bɑ shəŋtə́ sʉ́m nə piŋ jɔ́ o po'o tə ŋwɛnyə̀ o ló nə m̀. 5Gɑ̌ ŋkhamtə piŋnthʉm yə nyənyɔ yə a bɑ nə o, piŋnthʉm yə a lə ləŋdzə shwə́ nə Lois má mɔ̌ ɔ ba m nə Eʉnik mɔ̌ ɔ a, biŋ bɑwə shəŋtə́ jyə́ gɑ piŋnthʉm bɔ shwə ba m̀ nə o a.
Nə kaktʉɔ nə lo'shù dəŋdəŋ nə cuŋ pɑpúŋ
6A po'o tə́ gɑ̌ wə ŋkhamtə́ bu gɑ o vyə̌ ywə fʉ' yə́ Si hɑ bi mo, a pɑ bu tə fɑ pa' ŋ də yǎp bu nə o a. 7Nə pa' Si tə bɑ ě hɑ pɑ́ zhwenyə pwɔk bi pɑ pɑ̀; a bɑ ě hɑ zhwenyə gʉ', zhwenyə ŋkhuŋnyə ba zhwenyə nə nthɔm nɑ bi pɑ̀. 8Ka sǒ kú o nə kwinthɛ̌ nə Cyəpɔ, o kɑ nə̌ŋ ŋkhú so ba m nə m̀ gɛ cɛ̌ shyə m nə é. Da' gɑ pu pəmtə́ jɔgo' nə Cùŋ pɑpuŋ, bɑ dɑ tʉɔ Si nə byap, Si 9yə e lə vɔk wɔk pɑ̀, biŋ ŋkhe wɔk pɑ m ke dɔlɔ̌, la' e ké wɔk pɑ̀ po'o shyə m̀ nə mfa' pɑpúŋ mɔk pɑ pɑ̀, ŋkhe wɔk pɑ̀ shyə m nə pa' e lə́ yǎp pɑ kwa' yʉ a ba m̀ nə gho' e. Gho' bɔ yə e lə lǎ' gə nə pɑ tə tyɛ̌' mama nə́ Kristo Yeso a, 10a bɑ pú la'tə ya cwəlɔ bi pɑ shyə m̀ nə pa' gɛvɔk wɔk pɑ̀ Kristo Yeso sɔ' a. Yʉ́ nə sa'tə vʉ́' biŋ kyɛ' vɔk ba nə cyətə pfʉ̌ shyə m̀ nə Cuŋ pɑpúŋ; 11yə pu lə lɑ a gə gɛ cyanyə nə́, bɑ gɛ nthə̌m biŋ bɑ tadyə̌ nə a. 12Yə̌ŋ bɑ ywə yə a gə tə́ bɑwə biŋ yəŋ ghəghʉɔ a. Sǒ tə bɑwə ŋkhú a nə pɑ, nə pa' a bɑ gɑ̌ zhyə mo yə gɑ̌ bɑ gɑ̌ yap piŋnthʉm a nə e a, biŋ shəŋtə́ jyə gɑ́ a bɑ ě ghə tʉɔ nə nə dwɔ' ywə yə a bɑ pu hɑ bəm nə tyɛ'dzʉ́ bɔ.
13Lɑ mghɔm pɑpúŋ myə́ o ju' bəm nthʉm piŋnthʉm a, ba ŋkhuŋnyə̀ yə a bɑ nə Kristo Yeso a, nə gə yu fo' nə fǒ' ywə́. 14Tɔ́m ywə pɑpuŋ yə pu lə hɑ bu shyə m̀ nə Zhwenyə Dɔlɔ̌ yə a shwə nə o a pɑpúŋ.
Kwǐnthɛ́ nə so nyənyɔ
15O zhyə gɑ̀ guŋ pɔ pyə wap bɑ Azia a bɑ wap wa' á, tə ba Figəlo pú Hemogene. 16A Cyəpɔ sɛ cɔmmtso e nə tuŋdyə Onesiforo nə pa' e lə́ nthəmtə̀ a mcʉmmcʉ̌m la' é nəŋ ŋkhuso nə mgwɑ mtʉɔ myə́ pu lə nə shəŋ a lə. 17Gɛ̌, e lə ŋwak Roma, shəŋ a tə jɔ a. 18A Cyəpɔ ghə gɑ́ e sɔ' gə cɔmmtso Cyəpɔ nə tyɛ̌'dzʉ́ bɔ. A bɑ ǒ nəŋ jyə guŋ mfa' myə e lə fa' nə m̀ a tə shyə bǎ wɑ̌lə́.
Currently Selected:
2 TIMOTIO 1: NTGomala
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.
