2 KORINTO 2

1Sɔ' m nə m̀, gɑ̌ yap gɑ ŋ tə gɔ pɑnyə wə po nthʉm yɛlúŋ pɑ. 2A bi a pɑ́ gɑ́ gɑ̌ ghə po yɛlúŋ, bɑ wɑ́ gɔ ghə̌ myə ŋwɛnyə́ tə́ pɑ̌ pɑ́ mo yə́ gɑ gə e yɛlúŋ a? 3Nwə ŋwa'nyə a lə bɑ́ nə nə́ bwɔk gɑ ŋ khɑ nə ŋwak wə po bɑ jɛlúŋ nə pɔ pyə wap lə́ ghə ŋwɛnyə a. Gɑ̌ zhyə́ gɑ ŋwɛnyə a bɑ ŋwɛnyə yɔ. 4A po'o tə́ kwa' nthʉm ghəghʉɔ pu a nə kwɑ tʉ̌m tə́ ŋ khɑ bvə ŋwa'nyə bi po nthʉm shyətsə́, la' bvə po'o m nə nɑ dwɔplúŋ yɔ pɑ́, bvə po'o gɑ po nə jyə dəŋ ŋkhuŋnyə yə a bɑ gɑ̌ ghə nə́ po a.

Polo lɑ mhɔ mo shwyɛ' e

5Mo hɔnwə, bɑ e tə́ hɔnwə́ da' bəm pɑ, da' gɑ ka pɑ ghə a sak pɑ té', e hɔnwə bi guŋ yɔ awɛ. 6A sɔ' m nə mo bɔ bi a cu'tə cɔktə e bɑ ǎ ku' pa' a. 7A po'o tə́ gɑ̌ gɔm bi po m̀ gɑ́ po nə shwyɛ' e, biŋ jwyətə e, po'o gɑ e kɑ ko nthʉm sʉəsʉə yɛ̌lúŋ.

8A po'o tə́ gɑ̌ wə gɔm bi po gɑ́ po la'tə e pɑ ŋkhuŋnyə̀, 9nə pa' gɑ̌ nə və bi po po'o nwə yə gɑ̌ shəŋ a pɑ nə yɔ bi a yɔ nə yu'shwə bɑ ŋkwicʉ̌m nthʉm mləŋtə a. 10Mo yə́ po cɔm e a bɑ gɑ̌ gɔ cɔm e! Nə pa' a pɑ gɑ́ gɑ̌ cɔm mo, bi a gɑ̌ cɔm e a, bɑ a lə bɑ m̀ nə po, Kristo pɑwə jɔ. 11Po'o gɑ Sata kɑ fʉ́tə wɔk pɑ. Nə pa' pɑ ka tʉɔnyə myə́ mkwɛnyə.

Lǎm Polo sɔ da' gɑ́ biŋ ŋkho dyə

12Ŋ də́ ŋwak Troas nə siŋ wap Cùŋ pɑpuŋ Kristo, tə́ ba tə́ pa' Cyəpɔ lə́ ghyɛ' jyədyə̌ awɛ bəm, 13tʉm tsɑ̌ la tə́ kodyə, nə pa' ŋ da tə yɔ fɑ a Tito. A pɑ́ po'o da'nyə wap, dɑ m Makedonya. 14Pa'lə pɑ bi Si yə e shyə m nə Kristo bɑ nyəŋ wɔk pɑ nə yə́ nə cyə shù guŋ mcwə awɛ biŋ bɑ shyə m nə pɑ̀ sa zhwyə́ damnyəlamnyə nə zhyə́ é nə guŋ mtsʉ' awɛ. 15A po'o tə pɑ bɑ bi Si bɑ zhwyə́ Kristo yə pɑpúŋ bi pɔ pyə wap bvɔk nɑ tsap, ba m̀ bi pɔ bipǐ, 16bɑ zhwyə́ vʉ́ yə a dɑ mo gɔ nə vʉ̌ bi shɑ́ pɔ, biŋ bɑ zhwyə́ vɔk yə a dɑ mo gɔ nə vɔk a bi pyə́ shɑ pɔ. Tə wɑ̌ po'o bi a pɑ́ e ku' nə tsɔ fa' a?

17Pyə tə́ bɑ pa' pyə shɑ pɔ pyə wap fiŋ ghɔm Si a pɑ́. Pyə gɔm yɔk pɑ nyənyɔ, shyə m nə Si, dzə́ Si nə Kristo.

Currently Selected:

2 KORINTO 2: NTGomala

Highlight

Copy