Roma'en 3
3
1To non kam, woodi ko Yahuudu'en ɓurdata ummaatooje goɗɗe na? Juulnol maɓɓe woodi saman na? 2Fakat, ɗum woodi saman, naa seɗɗa. Aran, Allah halfini ɓe bolle mum. 3To woɗɓe maɓɓe laataaki gooŋga'en, ɗum wilan gooŋgaaku Allah na? 4Wilataa sam! Allah o gooŋgaajo foroy ammaa yimɓe fuu ɓe fewooɓe. Bana ko winnda:
“Sey koo moy fuu yi'a a gooŋgaajo nder bolle maaɗa fuu
e a laato jaaliiɗo to goɗɗo wullake ma#Jab 51:6..”
5To nii sooynde adilaaku meeɗen ɗon waŋgina adilaaku Allah bee laaɓɗum, ko mbi'eten? Kadi Allah wonaay adiliijo to o ukkani en tikkere maako na? Mi ɗon ƴama bana yimɓe ƴamrata. 6Woodaa sam! Ngam to Allah wonaay adiliijo, noy o hiitorto duniyaaru?
7Ammaa to sooynde adilaaku am ɗuɗɗini tedduŋgal Allah, waŋgini gooŋga maako laaɓɗum, ngam ɗume o hiitoto yam ngam mi hakkeejo? 8Noy to en mbi'i: “Kuuwen halleende ngam haa mbooɗeeŋga waŋga.” Woɗɓe ɗon kallinammi, ɗon mbi'a min wi'i ɗum. Kayto, ɓe keɓan kiita deydey aybe maɓɓe.
Walaa adiliijo koo gooto
9Nden kam enen Yahuudu'en en ɓuri yimɓe woɗɓe kadi na? Walaa sam! Ngam mi aarti mi wi'i hakke ɗon laamano Yahuudu'en e Yunaniŋke'en kal-kal. 10Bana ko winnda nder Deftere Seniinde:
“Walaa kuuwanɗo ko fotti, walaa koo gooto.
11Walaa marɗo hakkiilo, ɓaditanɗo Allah.
12Ɓe fuu ɓe celi laawol gooŋga, ɓe mbonnake.
Walaa baɗanɗo ko wooɗi, walaa koo gooto#Jab 14:1-3; 53:2-4..
13Kondondi maɓɓe nanndi bee genaale maɓɓitiiɗe,
ɗemɗe maɓɓe ɗon mbolwa bolle rikiciije,
bolle mbarooje bana tooke poosokje ɗon ngurto kunnduɗe maɓɓe#Jab 5:10; 140:4..
14Kunnduɗe maɓɓe keewi naalooje e bolle kaaɗɗe#Jab 10:7..
15Kosɗe maɓɓe ɗon njaawa yahugo mbara yimɓe,
16bonnonda e halkere waɗan koo toy ɓe njehi fuu.
17Ɓe anndaa laawol jam#Esa 59:7-8.,
18ɓe ngalaa kulol Allah sam#Jab 36:2..”
19En anndi ko tawreeta wi'ata fuu, ɗon wolwana hokkaaɓe tawreeta, ngam taa goɗɗo heɓa geldol, ngam haa yimɓe duniyaaru fuu anndita ɓe aybuɓe yeeso Allah. 20Walaa mo laatoto adiliijo yeeso Allah bee ɗowtanaago tawreeta. Neɗɗo woodi hakke, kanjum tan tawreeta anndinta en#Jab 143:2; Gal 2:16..
No yimɓe laatorto adili'en yeeso Allah
21Ammaa ko tawreeta e annabi'en ceedani en diga ɓooyma, ɗum waɗi jonta: Allah bee hoore mum waŋgini no yimɓe laatorto adili'en yeeso maako bilaa tawreeta. 22Allah adilinan koo moy nuɗɗini Yeesu Almasiihu. O ɗon adilina nuɗɗinɓe fuu ngam haa maako yimɓe fuu potan kal#Gal 2:16.: 23Ɓe fuu ɓe mbaɗi aybe, ɓe cooyi tedduŋgal Allah. 24Ammaa Allah bee mo'ere muuɗum, waɗani ɓe caahu bee adilingo ɓe. O sootti ɓe bee Yeesu Almasiihu. 25-26Allah darni Yeesu Almasiihu haa nuɗɗinɓe mo fuu keɓa yaafuye bee ƴiiƴam maako. O hiitaaki hakkeeji maɓɓe ɓooymaaji, o munyani ɓe, o yaafi ɓe. Bana nii o waŋginiri adilaaku maako jonta waato o adiliijo e o adilinanɗo nuɗɗinanɓe Yeesu fuu.
27Kadi, daliila mawnitaago ɗon luttani en na? Walaa sam! Ngam ɗume? Ngam Allah limataa kuuɗe, sey nuɗɗinki. 28En anndi fakat, Allah ɗon adilina goɗɗo ngam daliila nuɗɗinki, naa ngam daliila ɗowtaare heedi tawreeta. 29Kadi Allah o Allah Yahuudu'en tan na? Naa o Allah ummaatooje goɗɗe boo na? Nonnon, o Allah ummaatooje fuu. 30Allah o gooto, o ɗon adilina juulnotooɓe e ɓe njuulnataako fuu, to ɓe nuɗɗini Yeesu Almasiihu#TT 6:4; Gal 3:20.. 31To mi wi'i bana nii, mi ɗon wila tawreeta na? Naa non sam! Mi ɗon tabitina tawreeta.
Currently Selected:
Roma'en 3: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.