Exodo 32
32
An Bulawan na Baka
(Deut. 9:6-29)
1Kan mareparo kan mga Israelita na haloy nang dai naghihilig sa bukid si Moises nagdolok sinda ki Aaron dangan nagsabi, “Dai mi aram kun ano na an nangyari sa Moises na iyan na nangenot samo pagluwas sa Egipto; kaya igibo mo kami nin sarong dios#32:1 sarong dios; o mga dios. na mangengenot samo.”
2Sinabihan sinda ni Aaron, “Tanggalon nindo an mga hikaw na bulawan sa talinga kan saindong mga agom saka mga aki dangan darahon nindo sako.” 3Kaya tinanggal kan gabos na tawo an saindang mga hikaw na bulawan asin dinara ki Aaron. 4Kinua niya an mga hikaw asin tinunaw, dangan inula ini sa sarong hormahan asin naggibo siya nin sarong metal na baka.
Nagsabi an mga tawo, “O Israel, iyo ini an satong dios na nagluwas sato sa Egipto!”
5Kan mahiling ini ni Aaron, nagtugdok siya nin altar sa atubangan kan bulawan na baka dangan nagpahayag, “Sa aga magkakaigwa kita nin pyesta para sa Kagurangnan.” 6Sunod na aldaw, nagmaratang amay an mga tawo asin nagdorolot nin mga tinutong na atang. Nagdarara man sinda nin mga atang para sa katoninongan. Nagturukaw sinda tanganing magkarakan asin mag-irinom; an saindang pyesta natapos sa bururatan asin dororogan.
7Nagtaram an Kagurangnan ki Moises, “Humilig ka tolos, huli ta an saimong banwaan, na ilinuwas mo sa Egipto, nagin maraot asin nagkasala. 8Tinalikodan na ninda an ipinagboot kong gibohon ninda. Naggibo sinda nin metal na baka, asin sinamba ninda ini saka dinolotan nin atang. Nagsarabi sinda na iyo idto an saindang dios na nagluwas sainda sa Egipto.” 9Nagtaram pa an Kagurangnan ki Moises, “Nahiling ko na matagas an payo kan mga tawong ini. 10Kaya hare ako pagpugola huli ta labi-labi an kaanggotan ko sainda asin tutunawon ko sinda. Alagad ika gigibohon kong sarong dakulang nasyon.”
11Alagad nakimaherak si Moises sa Kagurangnan na saiyang Dios asin nagsabi, “O Kagurangnan, tadaw ta maaanggot ka sa saimong banwaan, na saimong ilinigtas sa mga Egipcio sa paagi kan saimong dakulang kosog asin kapangyarihan? 12Tadaw ta tatawan mo nin dahelan an mga Egipcio na magsabi na hinale mo sa Egipto an mga Israelita tanganing gadanon sa kabukidan asin paraon sa daga? Dai ka na maanggot sa sainda; hare na pagdagosa an saimong iniisip na pagtunaw sa saimong banwaan. 13Giromdoma si Abraham, si Isaac asin si Jacob, an saimong mga sorogoon na pinanugaan mo saka sinabihan na ‘Papadakulon ko an saimong kapagarakian siring sa mga bitoon sa langit; itatao ko sa saimong kapagarakian an dagang ini na ipinanuga ko, asin mapapasainda ini sagkod lamang.’” 14Kaya dai idinagos nin Kagurangnan an saiyang kaisipan na pagtunaw sa saiyang banwaan.
15Dangan nagbalik si Moises, asin naghilig hale sa bukid dara an duwang tablang gapo na mag-ibong na nasusuratan kan mga togon. 16An Dios mismo an naggibo kan tablang gapo asin nag-ukit kan mga togon.
17Kan madangog ni Josue an ribok kan nagkukurahaw na mga tawo, nagsabi siya ki Moises, “Nadadangog ko an kinurahaw nin gera sa kampo.”
18Alagad nagsimbag si Moises, “An nadadangog ko bakong kinurahaw nin panggana o inagrangay nin pagkadaog kundi karantahan.”
19Kan harani na sinda sa kampo, nahiling ni Moises an baka asin an pagbabarayle kan mga tawo. Huli kaini, nagsulwak an kaanggotan ni Moises asin ipinusak niya sa pamitisan kan bukid an dara niyang mga tablang gapo asin nagkabaraak an mga ini. 20Kinua niya an baka na ginibo kan mga tawo, tinunaw sa kalayo, pinulbos, sinalakan nin tubig dangan ipinainom sa mga Israelita. 21Sinabihan ni Moises si Aaron, “Ano an ginibo saimo kan mga tawong ini ta tinugotan mo sindang magkasala?”
22Nagsimbag si Aaron, “Dai ka maanggot sako; aram mong desidido an mga tawong ini sa paggibo nin maraot. 23Sinabihan ninda ako, ‘Igibo mo kami nin sarong dios na mangengenot samo, huli ta dai mi aram kun ano na an nangyari sa Moises na iyan na nangenot samo paluwas sa Egipto.’ 24Kaya sinabihan ko sinda na darahon sako an saindang mga alahas na bulawan. Itinao ninda sako an saindang mga alahas asin tinunaw ko sa kalayo. An luminuwas iyo ining baka.”
25Kan mahiling ni Moises an makasosopog na gibo kan mga tawo huli ta pinabayaan sinda ni Aaron na magin ngingisihan kan saindang mga kaiwal, 26tuminindog si Moises sa may trangkahan kan kampo asin kuminurahaw, “An siisay man na kampi sa Kagurangnan magdigdi sako!” Nagtiripon sa palibot ni Moises an gabos na aki ni Levi. 27Sinabihan niya sinda, “Ipinagboboot nin Kagurangnan Dios nin Israel na kuahon nindo an saindong mga espada, liboton an kampo, asin gadanon an saindong mga tugang, mga katood saka mga kanatad.” 28Sinunod kan mga Levita an pagboot ni Moises, asin sa aldaw na idto may tolong ribong kalalakihan an nagadan. 29Sinabihan ni Moises an mga Levita, “Ngunyan na aldaw ikinonsagra nindo an saindong mga sadiri#32:29 Sa nagkapirang daan na traduksyon Ngunyan na aldaw ikinonsagra nindo an saindong mga sadiri; sa Hebreyo Ikonsagra nindo an saindong mga sadiri ngunyan na aldaw; o Ikinonsagra kamo ngunyan na aldaw. bilang mga padi nin Kagurangnan huli sa paggadan nindo kan saindong mga aki saka mga tugang. Kaya ngunyan na aldaw itinao saindo nin Kagurangnan an saiyang bendisyon.”
30Sunod na aldaw sinabihan ni Moises an mga tawo, “Nagkasala kamo nin makuri. Alagad matukad ako ngunyan sa bukid pasiring sa Kagurangnan; tibaad ikahagad ko kamo saiya nin tawad para sa saindong kasalan.” 31Kaya nagbalik si Moises sa Kagurangnan asin nagsabi, “An mga tawong ini nagkasala nin makuri; naggibo sinda nin sarong dios-dios na bulawan. 32Nakikimaherak ako na patawadon mo sinda kan saindang mga kasalan; alagad kun dai mo sinda mapapatawad, paraon mo na man an sakong ngaran sa libro na sinuratan mo kan mga ngaran kan saimong banwaan.”
33Nagsimbag an Kagurangnan, “An ngaran kan nagkasala sako iyo an paparaon ko sa sakong libro. 34Alagad lakaw na asin pangenotan mo an mga tawo pasiring sa lugar na itinaram ko saimo. Giromdoma na papangenotan kamo kan sakong anghel, alagad maabot an panahon na papadusahan ko an mga tawong iyan huli kan saindang kasalan.”
35Kaya pinahelang sinda nin Kagurangnan huli ta pinirit ninda si Aaron na maggibo nin bulawan na baka.
Currently Selected:
Exodo 32: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
Exodo 32
32
An Bulawan na Baka
(Deut. 9:6-29)
1Kan mareparo kan mga Israelita na haloy nang dai naghihilig sa bukid si Moises nagdolok sinda ki Aaron dangan nagsabi, “Dai mi aram kun ano na an nangyari sa Moises na iyan na nangenot samo pagluwas sa Egipto; kaya igibo mo kami nin sarong dios#32:1 sarong dios; o mga dios. na mangengenot samo.”
2Sinabihan sinda ni Aaron, “Tanggalon nindo an mga hikaw na bulawan sa talinga kan saindong mga agom saka mga aki dangan darahon nindo sako.” 3Kaya tinanggal kan gabos na tawo an saindang mga hikaw na bulawan asin dinara ki Aaron. 4Kinua niya an mga hikaw asin tinunaw, dangan inula ini sa sarong hormahan asin naggibo siya nin sarong metal na baka.
Nagsabi an mga tawo, “O Israel, iyo ini an satong dios na nagluwas sato sa Egipto!”
5Kan mahiling ini ni Aaron, nagtugdok siya nin altar sa atubangan kan bulawan na baka dangan nagpahayag, “Sa aga magkakaigwa kita nin pyesta para sa Kagurangnan.” 6Sunod na aldaw, nagmaratang amay an mga tawo asin nagdorolot nin mga tinutong na atang. Nagdarara man sinda nin mga atang para sa katoninongan. Nagturukaw sinda tanganing magkarakan asin mag-irinom; an saindang pyesta natapos sa bururatan asin dororogan.
7Nagtaram an Kagurangnan ki Moises, “Humilig ka tolos, huli ta an saimong banwaan, na ilinuwas mo sa Egipto, nagin maraot asin nagkasala. 8Tinalikodan na ninda an ipinagboot kong gibohon ninda. Naggibo sinda nin metal na baka, asin sinamba ninda ini saka dinolotan nin atang. Nagsarabi sinda na iyo idto an saindang dios na nagluwas sainda sa Egipto.” 9Nagtaram pa an Kagurangnan ki Moises, “Nahiling ko na matagas an payo kan mga tawong ini. 10Kaya hare ako pagpugola huli ta labi-labi an kaanggotan ko sainda asin tutunawon ko sinda. Alagad ika gigibohon kong sarong dakulang nasyon.”
11Alagad nakimaherak si Moises sa Kagurangnan na saiyang Dios asin nagsabi, “O Kagurangnan, tadaw ta maaanggot ka sa saimong banwaan, na saimong ilinigtas sa mga Egipcio sa paagi kan saimong dakulang kosog asin kapangyarihan? 12Tadaw ta tatawan mo nin dahelan an mga Egipcio na magsabi na hinale mo sa Egipto an mga Israelita tanganing gadanon sa kabukidan asin paraon sa daga? Dai ka na maanggot sa sainda; hare na pagdagosa an saimong iniisip na pagtunaw sa saimong banwaan. 13Giromdoma si Abraham, si Isaac asin si Jacob, an saimong mga sorogoon na pinanugaan mo saka sinabihan na ‘Papadakulon ko an saimong kapagarakian siring sa mga bitoon sa langit; itatao ko sa saimong kapagarakian an dagang ini na ipinanuga ko, asin mapapasainda ini sagkod lamang.’” 14Kaya dai idinagos nin Kagurangnan an saiyang kaisipan na pagtunaw sa saiyang banwaan.
15Dangan nagbalik si Moises, asin naghilig hale sa bukid dara an duwang tablang gapo na mag-ibong na nasusuratan kan mga togon. 16An Dios mismo an naggibo kan tablang gapo asin nag-ukit kan mga togon.
17Kan madangog ni Josue an ribok kan nagkukurahaw na mga tawo, nagsabi siya ki Moises, “Nadadangog ko an kinurahaw nin gera sa kampo.”
18Alagad nagsimbag si Moises, “An nadadangog ko bakong kinurahaw nin panggana o inagrangay nin pagkadaog kundi karantahan.”
19Kan harani na sinda sa kampo, nahiling ni Moises an baka asin an pagbabarayle kan mga tawo. Huli kaini, nagsulwak an kaanggotan ni Moises asin ipinusak niya sa pamitisan kan bukid an dara niyang mga tablang gapo asin nagkabaraak an mga ini. 20Kinua niya an baka na ginibo kan mga tawo, tinunaw sa kalayo, pinulbos, sinalakan nin tubig dangan ipinainom sa mga Israelita. 21Sinabihan ni Moises si Aaron, “Ano an ginibo saimo kan mga tawong ini ta tinugotan mo sindang magkasala?”
22Nagsimbag si Aaron, “Dai ka maanggot sako; aram mong desidido an mga tawong ini sa paggibo nin maraot. 23Sinabihan ninda ako, ‘Igibo mo kami nin sarong dios na mangengenot samo, huli ta dai mi aram kun ano na an nangyari sa Moises na iyan na nangenot samo paluwas sa Egipto.’ 24Kaya sinabihan ko sinda na darahon sako an saindang mga alahas na bulawan. Itinao ninda sako an saindang mga alahas asin tinunaw ko sa kalayo. An luminuwas iyo ining baka.”
25Kan mahiling ni Moises an makasosopog na gibo kan mga tawo huli ta pinabayaan sinda ni Aaron na magin ngingisihan kan saindang mga kaiwal, 26tuminindog si Moises sa may trangkahan kan kampo asin kuminurahaw, “An siisay man na kampi sa Kagurangnan magdigdi sako!” Nagtiripon sa palibot ni Moises an gabos na aki ni Levi. 27Sinabihan niya sinda, “Ipinagboboot nin Kagurangnan Dios nin Israel na kuahon nindo an saindong mga espada, liboton an kampo, asin gadanon an saindong mga tugang, mga katood saka mga kanatad.” 28Sinunod kan mga Levita an pagboot ni Moises, asin sa aldaw na idto may tolong ribong kalalakihan an nagadan. 29Sinabihan ni Moises an mga Levita, “Ngunyan na aldaw ikinonsagra nindo an saindong mga sadiri#32:29 Sa nagkapirang daan na traduksyon Ngunyan na aldaw ikinonsagra nindo an saindong mga sadiri; sa Hebreyo Ikonsagra nindo an saindong mga sadiri ngunyan na aldaw; o Ikinonsagra kamo ngunyan na aldaw. bilang mga padi nin Kagurangnan huli sa paggadan nindo kan saindong mga aki saka mga tugang. Kaya ngunyan na aldaw itinao saindo nin Kagurangnan an saiyang bendisyon.”
30Sunod na aldaw sinabihan ni Moises an mga tawo, “Nagkasala kamo nin makuri. Alagad matukad ako ngunyan sa bukid pasiring sa Kagurangnan; tibaad ikahagad ko kamo saiya nin tawad para sa saindong kasalan.” 31Kaya nagbalik si Moises sa Kagurangnan asin nagsabi, “An mga tawong ini nagkasala nin makuri; naggibo sinda nin sarong dios-dios na bulawan. 32Nakikimaherak ako na patawadon mo sinda kan saindang mga kasalan; alagad kun dai mo sinda mapapatawad, paraon mo na man an sakong ngaran sa libro na sinuratan mo kan mga ngaran kan saimong banwaan.”
33Nagsimbag an Kagurangnan, “An ngaran kan nagkasala sako iyo an paparaon ko sa sakong libro. 34Alagad lakaw na asin pangenotan mo an mga tawo pasiring sa lugar na itinaram ko saimo. Giromdoma na papangenotan kamo kan sakong anghel, alagad maabot an panahon na papadusahan ko an mga tawong iyan huli kan saindang kasalan.”
35Kaya pinahelang sinda nin Kagurangnan huli ta pinirit ninda si Aaron na maggibo nin bulawan na baka.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.