Johani 8
8
Mukaintu Wakakwatwa Wumambe
1Kuhwaawo Jeso wakaya ku lupili lwa masamu a Oliva. 2Ubobo cifwumo-fwumo wakapiluka waya kunjila muŋanda ya Leza. Wakakala wakakanka kuyiisha bantu boonse. 3Ngoonaawo balembi u ba Falisi bakamuletela mukaintu umwi wakakwatwa bumambe bakamuhimika akati. 4Bamane bakamwaambila Jeso ati, “Mwiiyi, wezu mukaintu wakwatwa bumambe. 5#Bale 20:10; Ciz 22:22-24Inzho u mulawo waka Mozesi ulatulailila kubauma mabwe bakaintu bali bolya. No uwe ulaamba buti kukaambo kaka?” 6Kabaamba bobo kwaamba bamuyanine ngawo mulandu. Pele Jeso wakakotama bulyo wakanka kulemba anshi umunwe.
7Bakatolelela kumubuzha mibuzho yezho, wakakotamuka wabaambila ati, “Kufwumbwa uuyina cibi akati kenu awa ataangune kufwusa ibwe a mukaintu wezu.” 8Amane wakakotama ulimwi wakakanka kulemba anshi. 9Nibakateelela bobo, bakakanka kusomauka womwi womwi balaya buya kuhwa kubakando mpaka limwi kwaya kushaala mukaintu wezo ice awo. 10Jeso naakakotamuka wakamubuzha wezo mukaintu ati, “Mukaintu, no balikwi? Sa kwiina uwashaala uukupa mulandu wa lufwu?”
11Wezo mukaintu wakaingula ati, “Kwiina Mwami.” Ngoonaawo Jeso wakamwaambila ati. “Ame nshikupi mulandu pe. Koya utakabisha linji.”
Jeso Mumuni Wanshi
12 #
Mat 5:14; Joh 9:5 Cibe ciindi, Jeso wakabaambila bantu bakaakubungene ati, “Ume ndime mumuni uumunikila bantu banshi yoonse. Kufwumbwa wezo uuncilila takeenda mu mushinze, pele ulakayana mumuni uupa bumi.”
13 #
Joh 5:31
Ba Falisi bakamwiingula ati, “Bolya mbuulipandulula umwini bumboni bwako mbwabulyo.”
14Jeso wakabaingula ati, “Nikuba ati ndalipandulula ndimwini, bumboni bwangu bulishinizhe, kaambo ume ndikwizhi nkundakahwa unkunja. Pele umwe tamukwizhi nkundakahwa unkunja. 15Umwe mulabeteka buntu kumubili, pele ume nshibeteki muntu naaba womwi pe. 16Nikuba ati ndabeteka, kubeteka kwangu kuliluleme kaambo nshili ice pe. Taata wakantuma ngutubeteka aze. 17#Ciz 19:15Kayi inta mu Milawo yenu kulilembelwe ati bumboni bwa bantu bobile bulishinizhe. 18Ee ume ndalipandulula ndimwini, pele aze Taata wakantuma ulampandulula.”
19Bakamubuzha ati, “Anu Uso wezo ulikwi?” Jeso wakabaingula ati, “Umbona mbumutenzhi ume aze Taata tamukonzha kumuzhiba pe. Kuti nimwaakwinzhi ume, u Taata aze nimwaakumwizhi.” 20Aza makani Jeso wakaambila muŋanda ya Leza kumbali u busena bwakutambulila mulumbo, pele kwiina wakacilozha kumukwata kaambo ciindi cakwe kacitana kushika.
Jeso Waamba Aakuya Kwakwe
21Ulimwi Jeso wakaamba ati “Ume ndaya. Nikuba ati mukankapule, mulakafwa bulyo mu shibi shenu. Koko nkwinja tamukonzha kushika.” 22Bakando baba Juda bakakanka kubuzhanya buzhanya ati, “Ulaamba ati tatukonzha kushika nkwaaya, sa ulazanda kuliyaya?” 23Jeso wakabaambila ati, “Umwe muli baanshi ano, ume ndakahwa kwizeulu. Muli baanshi pele ume nshili waanshi ano.” 24Nciceco ncindakamwitela ati mulakafwila mu shibi. Na tamushomi ati, “Ume Ndime Wezo, cini cini mulakafwila mu shibi.” 25Balo bakamubuzha ati, “Anu ndiweni?” Jeso wakaingula ati, “Ncicona ncindamushimwina ku makancilo. 26Ndikwete makani manji-manji akwaamba, ulimwi aakumubeteka. Wezo wakantuma ulashomeka, ubobo oonse makani ngundakateelela kwakwe ingawo ngaazo ngumpandulula ano anshi.”
27Bayina kuzhiba ati Jeso wakakwaamba makani aka Ushi. 28Ubobo Jeso wakabaambila ati, “Mwakamusumpula Mwanaa Muntu nimukaazhiba ati ‘Ume Ndime Wezo,’ ulimwi nshilicitili ndimwini cintu, pele ndaamba makani mbuli mbwakanjiisha Taata. 29Wezo wakantuma tuli aze, nshili ice pe, kaambo lyoonse ndacita shintu shimubotela walo.” 30Banji banji bakamuteelela naakaakwaamba aza makani bakamushoma.
Meni Meni Alakamufwutula
31Inzho Jeso wakabashimwina ba Juda babo bakamushoma ati, “Kuti mwaabamba mazwi angu, mulaba ba shiciiya bangu beni beni. 32Ubobo mulakaazhiba meni meni, awo meni meni alakamulubula.” 33#Mat 3:9; Lk 3:8Bamwi bakaingula ati, “Uswe tuli banakwe Abulahamu, twiina nitwakaakuli bazhice ba muntu mbutwakabela. Ulatwita buti ati tulakalubulwa?” 34Jeso wakaingula ati, “Ndamwaambila meni meni, kufwumbwa ucita cibi muzhice waco. 35Muzhice tali wa mukwashi lyoonse pe, cita mwana wa muŋanda. 36Ubobo kuti Mwana wamulubula, ati mwalubulwa cini cini. 37Ndizhi ati muli banakwe Abulahamu, pele mwamana mulazanda kunjaya, kaambo kakuti mazwi angu taakala mushamba shenu. 38Ndaamba shintu nshindakabona kwa Taata, pele umwe mulacita shintu nshakaamwaambila uswenu.”
39Balo bakaingula ati, “Taata ngu Abulahamu.” Jeso wakabaambila ati, “Nimwaakuli banakwe Abulahamu nimwaakucita milimo njaakaakucita walo. 40Pele inzho mulakanza kunjaya ume nimwaambila makani meni meni ngundakateelela kwa Leza. Abulahamu kataciti shili bobo pe. 41Umwe mulacita milimo ya uswenu.”
Bakamwaambila ati, “Tatuli bana bakazhalilwa umbumambe, tulikwete taata womwi bulyo, walo uuli ngu Leza.” 42Jeso wakabaingula ati, “Kuti Leza naa kuli ngu Uswenu sa nimwaakuzanda kunjaya, kayi inta ume ndakahwa kwa Leza. Ndiina kulizhila lwangu ndimwini pe, Leza nguwakantuma. 43No nkaamboonzhi tamuteeleli nshiŋamba? Nkaambo tamuzanda kuteelela mazwi angu. 44Umwe muli banakwe ushenu Shaatani, u luzando lwenu nkucita nshaazanda ushenu. Walo lyoonse muyazhi, ulimwi mubeshi kuhwa ku makancilo. Tazanda lushinizho kaambo mwakwe mwiina lushinizho. Walo kuti wakanana shabubeshi ati wacita shimweelele, kaambo mubeshi, ulimwi nguushabo babeshi boonse. 45Ume ndamushimwina meni meni pele tamunshomi pe. 46Nguni akati kenu uukonzha kunjanina cibi? Naa ndaamba meni meni kaamboonzhi tamunshomi? 47Woonse muntu waka Leza ulateelela mazwi a Leza. Pele umwe ukaambo kakuti tamuhwi kwa Leza ncimutaateeleli mazwi a Leza.”
Jeso u Abulahamu
48Inzho bakando baba Juda bakaamba ati, “Anu twaakwaambile kabotu nitwaamba ati ‘uli mu Samaliya ulimwi ulinjililwe moza mubiyabi.’” 49Jeso wakaingula ati, “Nshinjililwe moza mubiyabi pe. Pele tamundemeka, Taata ngumutaleka. 50Nshikapula bulemu bwangu ndimwini. Nkwaali uumpa bulemu, wezo uukaamubeteka. 51Cini cini ndamwaambila ati kufwumbwa muntu uubamba mazwi aangu takafwi pe.” 52Inzho ba Juda bakamwaambila ati, “Inzho twazhiba ati ulinjililwe moza mubiyabi, nkaambo Abulahamu wakafwa, abo bashinshimi bakafwa umbona bobo, pele uwe ulaamba ati, kuti muntu kabamba mazwi ako takafwi. 53Sa uwe uli mukando kubaala taata Abulahamu wakafwa? Naa bashinshimi? Anu uwe walibona buni?”
54Jeso wakabaingula ati, “Na kuti ndalitembaula ndimwini, ati bulemu bwangu mbwabulyo. Pele nkwaali uumpa bulemu ngu Taata wezo umwe ngumwaamba ati Leza wenu. 55Wezo umwe ngumutana kuzhiba pe, pele ume ndimwizhi. Kuti ndaamba ati nshimwizhi ati ndaba mubeshi ukoya umwe. Ume ndimwizhi cini cini ulimwi mazwi akwe ndaabamba. 56Uswenu Abulahamu wakatangala kubona kwaamba ulakakubona kwiza kwangu. Wakakubona, ubobo wakabotelwa cini cini.”
57Balo ba Juda bakamwita ati, “Uwe uutana ukukwata myaka iili makumi osanwe, wakamubonena kwi Abulahamu?”
58Jeso wakabaambila ati, “Ndamwaambila meni meni, katana kuzhalwa Abulahamu ume ndakaakuliko kale.”
59Bateelele bobo bakabweza mabwe kwaamba bamuume pele wakazuba wamuhwa muŋanda ya Leza.
Currently Selected:
Johani 8: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.