Johani 9
9
Jeso Wamubonya Muntu Wakazhalwa Moofwu
1Jeso naakaakuya bweenda wakabona muntu wakazhalwa moofwu. 2Ba shiciiya bakwe bakamubuzha ati, “Mwiiyi, no nguni wakacita cibi cakapa ati wezu muntu azhalwe moofwu, mbazhali bakwe na ncakwe mwini?” 3Jeso wakaingula ati, “Tacili cibi cabo bakamuazhala naa cakwe mwini pele nkuti Leza atondezhe milimo yakwe kwiita mu muntu wezu. 4Nicicili ciindi ca muunza tulyeelele kusebeza milimo yakwe wezo wakantuma, nkaambo mashiku a Leza lelyo muntu naatakonzha kusebeza pe. 5#Mat 5:14; Joh 8:12Nincili anshi, ndimumuni wanshi!”
6Amane kwaamba bobo, wakafwila mate anshi, wakakanda bulongo umate azo amane wamunanika kumenso wezo moofwu, 7amane wakamulailila moofwu ati, “Koya ukasambe mukazhiba ka Silowamu.” Ceci cilaamba ati, kutumwa. Ngoonaawo wakaya wasamba. Naakapiluka wakeza ulabona.
8Inzho banamuzhaabo u babo bakaakumubona ulalomba bakaamba ati, “Sa wezu ingwe welya wakaakuyanwa ulishite ulalombelela?” 9Bamwi bakahumina ati, “Inguwe,” pele bamwi bakakazha ati, “Ingwe balakozhana bulyo.” Walo mwini wakaingula ati, “Ndime.”
10Bakamubuzha ati, “No bwasunu wabona buti?”
11Wakabaingula ati, “Muntu uutewa ati Jeso nguwakanda bulongo amane wananika kumenso ukundailila ati, ‘Koya kukazhiba ka Silowamu ukasambe.’ Mane ndaya ukusamba ngoonaawo ndabona.” 12Bakamubuzha ati, “No ulikwi ninzho?” Walo wakaingula ati, “Nshimubwene nkwaapama.”
Ba Falisi Babuzhabuzha Moofwu
13Bakamutola kuba Falisi wezo muntu wakaakuli moofwu. 14Kamuli mu buzuba bwa kulyoocezha butewa ati Sabata lelyo Jeso naakakanda bulongo ukumubonya. 15Ba Falisi bakamubuzha ulimwi, “Anu wakubonya buti?” Walo wakabaingula ati, “Wanamba bulongo kumenso, mane ndaya kusamba ngoonaawo ndacikonzha kubona.” 16Bamwi ba Falisi bakaamba ati, “Wezu muntu tahwi kwa Leza pe, nkaambo tabamba buzuba bwa Sabata.”
Pele bamwi bakaamba ati, “Sa muntu shishibi ulakonzha kucita shitondezho shili bolya?” Ubobo bakaandaana mulwabo.
17Ku mamanino bakamubuzha ulimwi wezo mulombwana wakaakuli moofwu ati, “No uwe ulatelaika buti umuntu wezu?” Walo wakaingula ati, “Mushinshimi.”
18Ba Falisi bayina kushoma ati wezu muntu kali moofwu ulimwi ukuti wakabonyewa, ubobo baketa bakwabo 19ukubabuzha ati, “Sa wezu ngu mwana ngumwaamba ati wakazhalwa moofwu? No inzho wabona buti?”
20Bakwabo bakaingula ati, “Tulizhi ati wezu mwanesu, ulimwi wakazhalwa moofwu, 21pele tatwizhi mbwaacilozha kubona, u wezo wamuponya tatumwizhi. Noomubuzhe mwini, ulamushimwina nkaambo wezu muntu mukando!” 22Bakwabo bakaamba bobo kaambo kabatiya bakando baba Juda, babo bakakuhumizhenye kale ati kufwumbwa uukamwaamba ati Jeso ngu Munanike wa Leza ulatandwa mucikombelo caba Juda. 23Nciceco bakwabo ncibakaambila ati, “Noomubuzhe mwini, nkaambo mukando.”
24Ulimwi bakamwita lwabili wezo muntu wakazhalwa moofwu, bakamwita ati, “Shomezha kwa Leza kwaamba ulaamba meni meni, nkaambo uswe tulizhi ati wezu muntu wakubonya ngushishibi.”
25Walo wakaingula ati, “Naa wezo muntu ngushishibi ume shizhi, pele comwi cintu ncinzhi ncakuti ndaakuli moofwu pele inzho ndabona.”
26Bakamubuzha ati, “No wakucita buti? Wakubonya buti?”
27Wakabaingula ati, “Ndamushimwina kale, pele mwiina kunteelela. No mucizandilaanzhi kwaateelela ulimwi? Sa amwe mulazanda kuba ba shiciiya bakwe?”
28Inzho bakamutuka ukumwita ati, “Uwe ndiwe shiciiya wakwe, uswe tuli ba shiciiya baka Mozesi. 29Tulizhi ati Leza kabandika u Mozesi, pele wezo muntu tatumwizhi unkwaakahwa pe.”
30Wezo mulombwana wakabaingula ati, “Ceci cilazhinga cini cini! Toomwizhi unkwaakahwa, pele ume wambonya. 31Tulizhi ati Leza tabatabi ba shishibi, ulataba bulyo wezo muntu uumutiya u kucita nshaazanda. 32Kuhwa kumalengelo anshi takunateelelwe muntu naaba womwi wakabonya muntu wakazhalwa moofwu. 33Kuti wezo muntu naataakuhwa kwa Leza naatakacikonzha pe.”
34Balo bakamwita ati, “Sa uwe ulakonzha kutuyiisha uwakazhalilwa mu shibi?” Ngoonaawo bakamutonkaika ukumutandila ansengwe.
Boofwu bwaku Moza
35Jeso wakateelela ati ba Juda bamutandila ansengwe muntu wakaakuli moofwu, naakamuyana wakamubuzha ati, “Sa ulashoma mu Mwanaa Muntu?”
36Walo wakaingula ati, “Nguni Mwanaa Muntu Mwami, nshimwina kwaamba mushome.”
37Jeso wakamwaambila ati, “Ulimubwene nkaambo ngumwaamba aze.”
38Wakaamba ati, “Ndashoma Mwami.” Ngoonaawo wakamufwukamina Jeso.
39Jeso wakaamba ati, “Nkaambo kubeteka nkundakezhila, kwaamba boofwu babone abo babo babona boofwaale.”
40Bamwi ba Falisi bakaakuli afwaafwi bakaateelela makani aza ngaakaamba bakamubuzha Jeso ati, “Sa aswe tuli boofwu?” 41Jeso wakabaingula ati, “Kuti nimwaakuli boofwu nimwaakwiina mulandu pe, pele inzho mbumulyaamba ati, ‘Mulabona,’ ceci cilaamba ati mucikwete cibi.”
Currently Selected:
Johani 9: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.