Johani 7
7
Jeso u Banina
1Nishakamana shesi shintu, Jeso wakaya mu minzhi ya Galilaya. Wiina naakazanda kushika mucishi ca Judiya nkaambo kakuti bakando baba Juda kabazanda kumuyaya. 2#Bale 23:34; Ciz 16:13Inzho ciindi ce pobwe lyaba Juda lya matente nicakaswena afwaafwi, 3banina bakamwaambila ati, “Kacili cibotu ati niwakuhwa kono uye ku Judiya kwaamba ba shiciiya bakeebone milimo yezhi yansana njuucita. 4Nkaambo muntu uuliseseka u kucita mulimo wakwe kumabali takonzha ukwata impuwo pe. Ncibotu kucita milimo yako kaanzambwene kwaamba bantu ba mu luundu beebone.” 5Banina bakaamba bobo nikuba ati abo kabatamushomi. 6Jeso wakabaingula ati, “Ciindi cangu tacina kushika cakuya koko, pele umwe cenu nkucili lyoonse. 7Bantu baanshi tabamusuli, pele ume balinswile nkaambo ndapa bumboni bwa milimo yabo mibiyabi. 8Kamuya nubeni koko kwipobwe ume nshiyi pe, nkaambo ciindi cangu cakuya kwipobwe leli tacina kushika.” 9Naakamana kwaamba bobo wakashaala mu Galilaya.
Jeso Wayiisha Kwipobwe lya Matente
10Nibakaya banina, munshi aze Jeso wakaya, pele wiina kweenda kaanzambwene wakaliseseka. 11Koko kwipobwe bakando baba Juda bakamukapula, bakabuzha ati, “No ulikwi?”
12Ubobo bantu kabakazhanya ku makani aakwe. Bamwi kabaamba ati, “Muntu uuli kabotu.” Pele bamwi kabaamba ati, “Pe pe ulacenga, ulabasowa bantu.” 13Nkaambo kakutiya bakando baba Juda kwiina wakaakwaamba makani aza kaanzambwene.
14Ipobwe nilyakashika akati, Jeso wakanjila muŋanda ya Leza ukutalika kuyiisha. 15Ba Juda bakazhingwa cini cini u kwaamba ati, “Anu wezu muntu uutayiile ukuba Wakashizhiba buti sheshi shintu shoonse?”
16Jeso wakaingula ati, “Kuyiisha koku takuli kwangu pe, kulahwa kwa Taata wakantuma. 17Kufwumbwa muntu uuzanda kucita shizanda Leza, wezo nguukonzha kuzhiba kuyiisha kwangu naa kulahwa kwa Leza, naa nkwangu ndimwini. 18Nkaambo muntu uuwamba munsana shakwe mwini, ulazanda bulemu bwakwe mwini. Pele wezo uuzanda bulemu bwa wezo wakamutuma ulashomeka ulimwi kwiina lucengo mwakwe. 19Inta Mozesi wakamupa Mulawo? Nikuba bobo kwiina uwomwi wenu uyicilila. Munkanzilaanzhi kunjaya?”
20Inkamu ya bantu yakaamba ati, “Wasondoka uwe. Nguni uuzanda ukuyaya?”
21Jeso wakabaingula ati, “Ndakacita mulimo wansana sha Leza womwi, mumane noonse mwakazhingwa. 22#Bale 12:3; Mata 17:10Mozesi wakamupa ciyanza cakupalula [nikuba ati ceci ciyanza kacitali cakwe ncabamatata bakale kale.] Mulapalula muntu mu buzuba bwa kulyoocezha butewa ati Sabata. 23#Joh 5:9Na mulapalula muntu mu buzuba bwa Sabata kwaamba Mulawo waka Mozesi utasotokwa, no nkaamboonzhi mulandemanina ukaambo kukuponya muntu mu Buzuba bwa Sabata? 24Amubeteke cakutalanga kumenso. Mubeteke cabululami.”
Sa Jeso ngu Munanike wa Leza?
25Inzho bamwi bantu bakahwa ku Jelusalemu bakakanka kubuzha ati, “Sa wezu ingwe ngubakanza kuyaya? 26Inta nguwezu ulakanana kaanzambwene kwiina uncibaamba. Nkukuti abo beendelezhi balizhi ati wezu muntu inguwe Kilisito mwini mwini. 27Pele uswe tulikwizhi nkwaahwa wezu muntu, Kilisito akazhiza kwiina muntu ukaazhiba nkwaakahwa.”
28Jeso naakaakuciyiisha muŋanda ya Leza wakapozomoka ati, “Sa cini cini mulinzhi ume unkundakahwa? Ndiina kwiza munsana shangu ndimwini pe. Wezo wakantuma ulashomeka, pele umwe toomwizhi. 29Ume ndimwizhi nkaambo ndakahwa kwakwe, nguwakantuma.”
30Ubobo bantu bakaakuzanda kumukwata pele kwiina naaba womwi wakalozha nkaambo ciindi cakuti akwatwe kacitana kushika. 31Bantu banji banji kuhwa munkamu bakamushoma bakaamba ati, “Sa wezo Kilisito uuzhiza ulakacita shitondezho shibaala ali sheshi nshaacita wezu muntu?”
Balindizhi Batumwa Kwaanga Jeso
32Ba Falisi bakaateelela manhwiinhwi abantu aza aaka Jeso, ubobo bapaizhi bakando bakatuma balindizhi ba Muŋanda ya Leza kwaamba bakamwaange Jeso. 33Jeso wakaamba ati, “Tulaakucili amwe ciindi cishoonto bulyo nintana kuya kuli wezo wakantuma. 34Ku ciindi ceco mulakankapula pele tamukanjani, nkaambo koko nkunkaaya tamukashikako.”
35Ngoonaawo bakando baba Juda bakakanka kubuzhanya ati, “Anu wezu ulazanda kuya kwi nkututakonzha kumuyana? Sa ulazanda kuya kuminzhi yaba Giliki kukala bantu besu kwaamba akayiishe ba Giliki? 36Ulaamba ati, ‘Mulakankapula, pele tamukanjani!’ No kwaamba ati, ‘Koko kunja tamukashikako,’ cilaambaanzhi?”
Mulonga upa Meenzhi a Bumi
37 #
Bale 23:36
Mu buzuba bwamanino, mbuzuba bukandosha mwipobwe lelyo, Jeso wakazhimuka, wapozomoka waamba ati, “Kufwumbwa uufwile inyota, naazhize kwangu anwe. 38#Eze 47:1; Zaka 14:8Ulimwi Malembe alaamba ati, mulonga wameenzhi aapa bumi ulakakunka kuhwa ku monzo wakwe.” 39Mu kwaamba bobo kaamba Moza Usalala ngubakaatambula babo bamushoma. Nkaambo ku ciindi ceco Moza Usalala katana kupewa nkaambo Jeso katana kunjila mu bulemu bwakwe.
Kwaandaana kwa Bantu
40Bamwi bantu kuhwa munkamu, nibakaateelela aza makani bakaamba ati, “Wezu muntu Mushinshimi mwini mwini!” 41Bamwi bakaamba ati, “Wezu muntu ngu munanike wa Leza.” Pele abo bamwi bakaakubuzha ati, “Sa Mesiya ulyeelele kuhwa mu Galilaya? 42#2 Sam 7:12; Mika 5:2Sa Malembe taamba ati Kilisito ngwa luhubo lwaka Devidi, ulimwi ati ulakahwa ku Betelehemu mu munzhi mwakaakukala mwami Devidi?” 43Ubobo munkamu yezho kwakaba kwaandaana ukaambo ka Jeso. 44Bamwi bakaakuzanda kumukwata pele bakakacilwa kucita bobo.
Kutashoma Kwabakando baba Juda
45Inzho balindizhi bakapiluka, bapaizhi bakando u ba Falisi bakababuzha nibakashika ati, “No mwabulayi kumuleta?”
46Bakaingula ati, “Uswe tatunoombwene muntu waamba bolya!”
47Ba Falisi bakababuzha ati, “Sa inzho amwe wamucenga? 48Sa kuli bamwi beendelezhi nibaba ba Falisi bamushoma? 49Kwiina pe cita bulyo inkamu ya bantu balimbushi bateezhi milawo yaka Mozesi ubobo Leza ulakabashinganya!”
50 #
Joh 3:1, 2 Inzho Nikodimasi welya wakaakwiile mashiku kwa Jeso kali wankamu yaba Falisi wakababuzha beenzhiina ati, 51“Sa mulawo wesu ulatuhuminya kupa mulandu muntu uutana kubetekwa kaambo kakwe, kwaamba cibonwe ncaakacita?” 52Balo bakamwiingula ati, “Sa aze uli waku Galilaya? Kabale mu Malembe ulakayana ati kwiina naaba womwi mushinshimi uhwa mu Galilaya.”
53Ngoonaawo bakaandaana umwi waya kwakwe.
Currently Selected:
Johani 7: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.