Johani 11
11
Lufwu Lwaka Lazalo
1 #
Lk 10:38, 39 Kakuli mulombwana umwi wakaakuli mulwazhi, wakaakukala ku Betani, izhina lyakwe kali Lazalo, kakala antoomwi u banina ba Maliya u Malita. 2#Joh 12:3Wezu Maliya inguwe wakananika Mwami Jeso mafwuta, ukumupukuta ku maulu umasusu akwe. Inzho Lazalo munina nguwaakuli mulwazhi. 3Ubobo baba banina bakaintu bobile bakatuma mulumbe wakuti, “Mwami mulongwaako mulwazhi.”
4Jeso naakaateelela aza makani wakaamba ati, “Bobu bulwazhi tabuli bwa lufwu pe. Mbwakuleta bulemu kwa Leza, kwaamba Mwanaa Leza akalemekwe ukaambo kabulwazhi bobu.”
5Jeso kabafwini ba Maliya u Malita u munyokwabo Lazalo. 6Pele nikuba ati wakatambula mulumbe wakuti Lazalo mulwazhi, wakaakucishite koko kubusena kwa mazuba obile. 7Naakamana aza mazuba wakabaambila ba shiciiya ati, “Atubweele ku cishi ca Judiya ulimwi.” 8Ba shiciiya bakamwaambila ati, “Mwiiyi inta kayi ndinizho-ninzho awa ba Juda nibakaakuzanda ukuuma mabwe, saa ulazanda kubweela nkukona ulimwi?” 9Jeso wakabaingula ati, “Inta buzuba bulikwete mawoola ali ikumi u mawoola obile? Muntu uuyenda muunza talifwumpuli kaambo uleenda mu mumuni waanshi ano. 10Pele wezo weenda mashiku ulalifwumpula nkaambo wiina mumuni.” 11Amane kwaamba bobo wakabaambila ba shiciiya bakwe ati, “Lazalo mulongweesu uloona, inzho ndaya nkamubushe.” 12Ba shiciiya bakamwita ati, “Mwami, naa uloona ulateelela kabotu.” 13Jeso wakaakwaamba koona kwa lufwu, pele balo kabatelaika ati nkoona kwatulo. 14Ngoonaawo Jeso wakabashimwina ati, “Lazalo mufwu, 15pele ukaambo kenu ndabotelwa kwaamba ume nciteko naakafwa ubobo mulakashoma. Atweende.” 16Ngoonaawo Tomasi, Didimasi cipandulula ati ngwa maanga, wakabaambila bashiciiyanina ati, “Atweende aswe tukafwe aze.”
Jeso mbu Bubuce u Bumi
17Ciindi Jeso naakashika wakayana Lazalo uli kale mu cuumbwe kuliitile umazuba one. 18Betani katali kulaale uku Jelusalemu, kooli mushinzo uulampa makilomita otatwe. 19Nciceco ba Juda banji-banji bakeza kwililwe lya Lazalo kwiza kulizha banina ba Maliya u Malita. 20Malita naakateelela ati Jeso washika wakaya kumutambula, Maliya kashite muŋanda. 21Ngoonaawo Malita wakamwaambila Jeso ati, “Mwami, kuti niwakaakuliko mukwesu naatakafwa, 22pele nikuba bobo ndizhi ati kufwumbwa nciwakumbila kwa Leza ulakupa.”
23Jeso wakamwaambila ati, “Munyoko ulabuka.”
24Malita wakaingula ati, “Ndizhi kwaamba ati ulakabuka ulimwi kububuke bwa bafwu, mu buzuba bwamamanino.”
25Jeso wakaingula ati, “Ndime kubuka ku bafwu u bumi. Wezo unshoma, nikuba ati wafwa ulakabuka ulimwi. 26Boonse bapona u kushoma mwangu, tabakafwi. Sa ulashoma bobo?”
27Malita wakaingula ati, “Ee ndashoma bobo Mwami ati ndiwe Kilisito Mwanakwe Leza, wezo uuzhiza anshi ano.”
Jeso Walila
28Naakamana kwaamba bobo Malita wakaya ukwita Maliya mucece wakwe, wamuhwiila kumabali ati, “Mwiiyi nkwaali washika, ulakwita.” 29Naakateelela bobo Maliya wakazhimuka calubilo kuya nkwaakaakubele Jeso. 30Nkaambo lelyo Jeso katana kushika amunzhi, kacili kunze lya munzhi koko nkwaakamuswaanganya Malita. 31Inzho ba Juda bakaakumulizha Maliya muŋanda bakamucilila nibakabona ati wazhimuka calubilo nkaambo bakazunga ati ulaya kulila ku cuumbwe.
32Inzho Maliya wakashika koko nkwakaakubele Jeso, mbwaakamubonena bulyo wakalikankata kumatende akwe wamwaambila ati, “Mwami kuti niwakaakuliko, mukwesu naatakafwa pe.”
33Jeso naakabona Maliya u ba Juda balalila, wakapenga cini cini mu monzo u kweetezhewa. 34Wakabuzha ati, “No nkukwi nkumwakamuzhika?” Bakaingula ati, “Mwami kweza ubone.” 35Jeso wakalila. 36Ubobo ba Juda bakaamba ati, “Amubone mbwaakumufwini!”
37Bamwi bakaamba ati, “Wezu muntu wakamubonya moofwu sa katalozha kukwabilila Lazalo kwaamba atafwi?” 38Inzho Jeso u mapenzhi manji manji mu monzo, wakaya ku cuumbwe. Inzho cuumbwe kacili cikolole mwibwe ulimwi kaanshinkilwe ibwe ikando. 39Amane wakabaambila ati, “Amulikushe ibwe.”
Malita munina mufwu wakamwaambila Jeso ati, “Mwami, ceno ciindi ulanunka, nkaambo inzho kuliitile mazuba one kuhwa naakazhikwa.”
40Jeso wakamwiingula ati, “Inta kayi ndakushimwina kale ati, kuti wanshoma ulabubona bulemu bwa Leza.” 41Ubobo bakalikusha ibwe. Ngoonaawo Jeso wakalyaalala kwizeulu waamba ati, “Taata, ndakulumba nkaambo wanteelela. 42Ee ndizhi ati lyoonse ulanteelela, pele ndaamba bobo ukaambo ka bantu baba bali ano kwaamba bashome ati ndiwe uwakantuma.” 43Naakamana kwaamba bobo wakapozomoka iizwi ikando walailila Lazalo ati, “Hwa!” 44Ubobo wezo wakaakuli mufwu wakahwa uliputaililwe ku maulu ukumatashi shisani shiputailwa bafwu, ukumutwi kaputaililwe cisani. Jeso wakabaambila ati, “Amumuzambulule ayende.”
Bakanza Kumukwata Jeso
(Matayo 26:1-5; Maako 14:1-2; Luka 22:1-2)
45Ba Juda banji banji bakamushindikila ku cuumbwe Maliya mucece waka Lazalo, bakamushoma Jeso nibakabona ncaakacita. 46Pele bamwi akati kabo bakaya u kwaambila ba Falisi ncaakacita Jeso. 47Ubobo bapaizhi bakando u ba Falisi bakabunjika inkuta inkando u kwaamba ati, “Anu tucite buti? Nkaambo wezu muntu wacita shitondezho sha nsana shinji-shinji! 48Kuti tumuleke kwaamba aakuciya bucita bolya, boonse bantu balakanka kumushoma, kwamana ati ba Loma baleza kubuzonauna bobu busena busalala antoomwi umushobo wesu woonse.”
49Inzho umwi wabo uutewa ati Kayafa, wakaakuli ngu mupaizhi mukando kumwaka wezo, wakabaambila ati, “Sa mwiina maanu umwe! 50Tamwizhi ati ncibotu kwaamba muntu womwi abafwile banamaleya kubaala ati mushobo woonse uzonaunwe?” 51Ceci ncaakaamba kacitali cakwe mwini pe, pele mbwaakaakuli ngu mupaizhi mukando kumwaka wezo wakashinshima makani aakuti Jeso ulyeelele kufwila bantu boonse, 52ulimwi kutali bulyo mushobo wezo ice, pele kwaamba akobolole ukubunjika antoomwi boonse banakwe bamweele inshi yoonse.
53Ubobo kuhwa mu buzuba bobo bakakanza kumuyaya Jeso. 54Ukaambo kako Jeso wiina naakeenda linji kaanzambwene mu Judiya, pele wakaya kubusena buli kumbali ulukula, ku munzhi wa Efulemu. Koko nkwaakakala u ba shiciiya bakwe.
55Ipobwe lya Kwiitilila lyaba Juda kalili afwaafwi, ubobo bantu banji-banji bahwa mu minzhi yaandeene andeene bakaakulibeelezha kuya ku Jelusalemu kwaamba bakalisalazhe kwiingaina uciyanza caba Juda. 56Bantu bakaakumukapula Jeso koko, kababuzhanya-buzhanya nibakaakweendeenda muŋanda ya Leza ati, “Sa mulatelaika ati tashika kwipobwe leli?” 57Abo bapaizhi bakando u ba Falisi bakapa malailile aakuti kufwumbwa muntu uukwizhi nkwaabele abazhibye kwaamba bamukwate.
Currently Selected:
Johani 11: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.