Incito 2
2
Kushika kwa Moza Usalala
1 #
Bale 23:15-21; Ciz 16:9-11 Nibwakashika buzuba bwa Pentekositi boonse bashomi kababungene abusena bomwi. 2Ngoonaawo kwakateelelwa muhuhumo wakeza kuhwa mwizeulu ukoya ikunku lyeuwo, lyakazuzha iŋanda yoonse momo mubaakushite. 3Ngoonaawo kwakabonwa itungamwenje lya milaka ya mulilo uhwilima. Yezhi milaka ya mulilo yakakala ali umwi uumwi muŋanda momo. 4Boonse bakenjilwa Moza Usalala, bakakanka kwaamba mu mishobo iinji kwiingaina u Moza mbuwakabeendelezha.
5Inzho mu Jelusalemu kakuli bashomi ba Juda bakaakukala momo bakahwa mu mashi oonse aandeene andeene. 6Inzho kuhuluma nikwakateelelwa, bantu banji banji bakeza kubungana. Boonse bakazhingwa nkaambo umwi uumwi wabo wakabateelela bashomi babo balakanana mu mushobo wakwe mwini. 7Bakazoowa ukuzhingwa, ucakuti bakabuzha ati, “Sa baba bantu baamba bolya tabali ba Galilaya? 8No caba buti kwaamba uswe toonse tubateelele balaamba mu mishobo yesu? 9Uswe tubamwi twahwa ku cishi ca Patiya, bamwi ku Medesi, uku Elamaiti, bamwi bahwa ku Mesopotamiya uku Judiya, uku Kapadosiya, bamwi ku Pontasi uku Ezha, 10abo bamwi bahwa ku Fuligiya u Pamfiliya, bamwi bahwa ku Ijipiti u mu masena aku Libiya kufwaafwi uku Sailini, ulimwi bamwi mbeenzu bahwa ku Loma. 11Kakuli ba Juda uba kunze babo bakasanduka kuba ba Juda. Tubamwi tuli mushobo wa Kileti uwa ma Alabu, pele nikuba bobo toonse twabateelela balaamba mu mishobo yesu tubeni. Balakanana shintu shikando shesho Leza nshakacita!”
12Mukuzoowa ukuzhingwa cini cini, bakatolelela kubuzhanya ati, “No ceci caambaanzhi?”
13Bamwi bakakanka kusaalizha ati, “Baba bantu bakolwa waini mupiya.”
Pita Wakambauka
14Ngoonaawo Pita wakazhimuka antoomwi u ba shiciiya bamwi bali ikumi uutwesha womwi. Inzho wakakanka kwaamba iizwi ikando kunkamu ya bantu bakaakubungene, wakaamba ati, Umwe nuba Judama, amwe noonse numukala mu Jelusalemu amumpupulale, mwaateeleleshe makani aza ŋunzanda nkwaamba. 15Baba bantu bayina kukolwa pe mbuli mbumutelaika, nkaambo cicili cifwumo fwumo. 16Pele ceci incico ncaakaamba mushinshimi Jowelu ati,
17 #
Jow 2:28-32
Leza wakaamba ati, “Ku mazuba amamanino
Ndakenjizha Moza wangu mubantu boonse.
Banenu balombwana u bashimbi balakashinshima.
Bakubushi balakabona shilengaano,
abo bamacembele balakalota shiloto.
18Ee, ndakenjizha Moza wangu mubatwanga bangu,
balombwana u bakaintu mu mazuba azo.
Ulimwi balakaashinshima mazwi angu.
19Ndakacita shizoosha mwizeulu, ushitondezho anshi ano.
Kulakaba malowa, u mulilo, iingubi yabushi.
20Izuba lilakashiya mbi! Awo mwezhi ulakasubila pyu! Ukoya bulowa,
kabutana kushika buzuba bwa Mwami, bukando bwa bulemu.
21Inzho kufwumbwa wezo uuwompolola izhina lya Mwami ulakafwutuka!”
22“Umwe nuba Izilailima amwaapupulalishe mazwi aza! Welya Jeso Munanzaleta, kali mulombwana wezo Leza ngwakatondezha ati inguwe ngwaakasala. Ceci cakalibonya kwiita mu milimo mikando u maleele, u shintu shizoosha, shesho nshaakacita Leza kwiita mwa Jeso. Umwe nubeni mulyeezhi makani aza, nkaambo kaacitika akati kenu. 23#Mat 27:35; Mk 15:24; Lk 23:33; Joh 19:18Ulimwi Leza mu makanze u muluzhibo lwakwe, wakaakosolela limwi makani aka Jeso kwaamba ulakaabwa kulyuumwe. Ubobo mwakamuyaya, nkaambo mwakamupa ku bantu batacilila mulawo kwaamba bamukankamine aciciinkano. 24#Mat 28:5, 6; Mk 16:6; Lk 24:5Pele Leza wakamubusha ku bafwu ukumuhuna kwisukusho lya lufwu, nkaambo kacili cizumu kwaamba asungwe kunsana sha lufwu.” 25#Inte 16:8-11Nkaambo Devidi ulaamba shakwe mwini ati,
“Ndakamubona Mwami Leza kali kumbele lyangu lyoonse,
nkaambo lyoonse uli kwitashi lyangu lya cilyo, kwaamba intazungaana.
26Ubobo monzo wangu wabotelwa,
awo mulaka wangu ulizwile lutangalo,
mubili wangu awo ulaakuli mubulanjizhi.
27Nkaambo tukashiyi moza wangu mu cuumbwe.
Tukalekela musalazhi wako kubola.
28Wakenzhibya inzhila ya bumi,
Ulakanzuzha lutangalo ku bushu bwako.”
29“Nubakwesu, ndazanda kumukananina butazhimba aka Devidi shaakale wesu. Walo wakafwa ukuzhikwa, u cuumbwe cakwe nkucicili ubwasunu. 30#Inte 132:11; 2 Sam 7:12, 13Nkaambo kali mushinshimi, wakazhiba kwaamba Leza wakamushomezha ca kupinga ati ulakabika a cuuna cakwe umwi wabanakwe. 31Mukubona shiza kumbele a mazuba, Devidi wakaamba shakubuka ku bafwu kwa Munanike wa Leza ati,
“Nshikamushiyi mu cuumbwe,
u mubili wakwe tookabola pe!”
32Inzho Leza wakamubusha wezu Jeso ku bafwu, ulimwi toonse tuli bakamboni ba makani aza. 33Wakasumpulwa kwitashi lya cilyo lya Leza, ukutambula Moza Usalala kuhwa kwa leza ushi, mbubona mbwaakamushomezha. Inzho sheshi nshimubona u kuteelela nizho, nshipo shesho Jeso nshaatuntila aalyuuswe. 34#Inte 110:1Devidi wiina naakaya kwizeulu, pele nikuba bobo wakaamba ati,
“Mwami Leza wakaambila Mwami wangu ati,
‘Kala kwitashi lyangu lya cilyo.
35Mpaka nkacite ba shinkondonoko kwaamba babe cilyatilo ca matende ako.’
36“Ubobo umwe nuba Izilaili amuzhibe kwaamba ati, wezu Jeso nguwena ngumwakakankamina aciciinkano, Leza wamubika kwaamba abe ngu Mwami ulimwi ngu Munanike.” 37Nibakateelela bobo cakabakwata kumyonzo. Bakaambila Pita u batumwanina ati, “No tucite buti bakwesu?”
38Pita wakabaambila ati, “Amusanduke, mupapatizwe umwi uumwi wenu mwizhina lya Jeso Kilisito kwaamba mulecelelwe shibi shenu, mutambule cipo ca Moza Usalala. 39Nkaambo cishomezho ceci ncicenu umwe u banenu, u babo boonse bali kulaale, babo Mwami Leza wesu mbaakaketa.”
40Pita wakabakananina kwiita mu mazwi manji manji aamwi, ukubeenzelezha ati, “Amulihune ku bantu baano mazuba bataluleme.”
41Babo bakaahumina makani ngaakakambauka Pita bakapapatizwa. Mu buzuba bobo mbubona, mweelwe wa bantu bakazunjilwa kunkamu ya bashomi wakashika afwaafwi ku shuulu shotatwe. 42Baba bantu kabaswaangana kuteelela nshibakaakuyiisha batumwa shiindi shoonse. Kabakala mu lukamantano lwa bunina, kabakomauzhanya shinkwa u kukomba antoomwi.
Bumi bwa Bashomi
43Bantu boonse bakalifwiinsha nkaambo kamaleele u shintu shizoosha shakaakucitwa kwiita mubatumwa. 44#Inc 4:32-35Boonse bashomi kabali antoomwi, bakasanganya shoonse nshibakaakukwete. 45Bakauzha inshi iimbono shabo u kwaabana mali kwiingaina iipenzhi lya muntu umwi uumwi. 46Mazuba oonse kabaswaangana muŋanda ya Leza ca monzo womwi, ulimwi kabakomauna shinkwa mumaanda abo ukulya shilyo calutangalo u myonzo iishite. 47Kabatembaula Leza ukubotezha bantu. A buzuba u buzuba Mwami Leza wakaakubazunjilila bantu bakaakuya bufutulwa.
Currently Selected:
Incito 2: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.