Lúkàs 24
24
Yésù səəmcuhó̧tɨ́ cwéé
(Góòmɓwê Mt 28.1-10; Mk 16.1-8; Jŋ 20.1-10)
1Ye sóndèè, kɨ́rɨ̀b kɨ́rɨ̀b, nɨ̀gub ɨ́ ɗókgè nyàbȩ́ȩ́ ɓe kúrúm làmɨ́ndà noò ŋgáb yi nyaaŋkɨ́ré ŋgáré. 2Ŋgáb ɨ́ kwà sɨɨ kàm yi ɓɔ̧ sèrì rè gə́nȩ̀ȩ́ pɨ́ɨŋso̧ó̧ cóo. 3Ŋgáb ɨ́ lə́sò sèrìn ku, ŋgáb ɨ́ dù bɨ́ fín Yésùù sèrìn ku kwàwá. 4Ŋgáb ə́ə̀ŋkɨ́cénɨ náàŋ ɓetí kɨ̀cáàb yi yɔ́ɔ́ ŋgáb, á ŋgáb pə́cì na nɨ̀ŋgwáàb bɨrɨ́b á ə́əŋkɨ́ ŋgábè tíí rè, ɓe júúb mɨ̀vúù só tóóm. 5Hȩ vùù ya bɨɓa ŋgábè, ŋgáb ɨ́ yà ə́ə̀ŋkɨ́nɨ tí ɗàá tɨɨmsȩ́ȩ, á nɨ̀ŋgwáàb lè fɔ́ ŋgáb ɨnè: «Nyí goce nɨ́ mánɨ nò du jááŋ mvókín nɨ̀kwíbí àm níì? 6Ŋgə́ nɨ hò̧ ɗàà, ŋgə́ səəmcuhó̧tɨ́ nɨ́ cwéé. Lə́əmcunáye nɨ́m ŋgə́ yi tana nyí ɓwâ ŋgə́ yi duye Gàlìléè. 7Ŋgə́ ya tahaá: ‹Á ɗúnɨ kùb sə́rɨ̀kɨ́nà nùb ɓáŋhɨ́b Mwin Nɨ̀rì. Ŋgáb a kpáàŋkwíìwúkî ŋgə́ bɨ̧̀ɨ̧́, jíì taarɨ́bí ŋgə́ á sə̀ə̀mcùhô̧ cwéé› ye!»
8Nɨ̀gub lè ɨ́ lə́ə̀mcùgì nyindí yi Yésùù kɨ́. 9Ŋgáb ɨ́ éícùwò sèrìn ku. Nɨ́m tɨ ndóŋndé lâs, ŋgáb ɨ́ gì átɨ̀nànɨ nùb tómé cóóŋ ɨ́ mwi̧ rè ɓe nùb kù. 10Nɨ̀gub yi gɨ sèrìn kɨ́ yɨɨ́m Màríyà nò Màkdàláà, Jáànə̀ ɓe Màríyà yà Jáàk á. Nɨ̀gub kù yi gɨɓwée ɓe ŋgábè ɨ́ átɨ̀nàɓwê nùb tómé sà̧à̧ mwi̧ kɨ́. 11Ɨ́dù nùb tómé ɨ́ lə́mnè bɨ́ ɨnayâna nɨ́m nɨ̀gub lè du vúm átɨ̀nànɨ kɨ́ nɨ nyindí sɨ̀ɨ́ á, ŋgáb ɨ́ dù bɨ́ ə́ə̀mwá. 12Ɨ́dù Píyéèr ɨ́ lùgèhâ sèrìn gìnɨ góòmnyààŋnɨ. Ŋgə́ ɨ́ tɨ̀ɨ̀mndésò, ŋgə́ ɨ́ dù nɨ́ nɨ́m kù pə́wa, sé ndómbó. Ŋgə́ ɨ́ gɨ̀cù no yó, á ŋgə́ gbɨɨŋɓa ɓe nɨ́m tɨ ndóŋ kɨ́.
Yésù túumnatɨ́ nɨ̀fuùb noò bɨrɨ́b kù síí jɨ̀r Èmàyúùs
(Góòmɓwê Mk 16.12-13)
13Ye mwi̧ kɨ́, nɨ̀fuùb bɨrɨ́b yaá gìnɨ Èmàyûs. Èmàyûs kɨ́ yaá ɗaŋhîn ɓe Yèrúsàlèm kílòmétà cóóŋ ɨ́ mwi̧. 14Ŋgáb yaá átɨ̀sénɨ nɨ́m tɨ ndóŋndé. 15Ŋgáb átɨ̀gènɨ sà̧à̧ rè, ŋgáb a ndáŋgece, á Yésù nɨ̀mɨr ŋgɨɨwo gín ŋgábè, ŋgə́ ɓe ŋgáb ɨ́ yà gɨ̀séɓáànɨ. 16Ŋgáb yaá ŋgə́ pə́ɓàhánɨ, ɨ́dù ɗə̀ə̀ŋcùú ŋgéé ɨ́ yɔ̂ nɨ́ ŋgáb. 17Yésù ɨ́ fɔ̂ ŋgáb: «Nyí ndáŋgece nɨ́ ní ya?» Á ŋgáb ə́ŋhȩ, tí kpáíkí̧i̧ lâs. 18Nɨ̀mwi̧ mvókín ŋgábè no ɨ́r yi du Kɨ̀lèwòpâs lè ɨ́ fɔ̂ ŋgə́: «Cáŋhȩ̀ nɨ̀gúr Yèrúsàlèm hò̧, du nɨ́ ɗə̀ə̀ŋwá nɨ́ɨ́b tɨ ndóŋ jíìb lèè duha nɨ wu á ye?» 19Á ŋgə́ fɔ́cu ŋgáb: «Nɨ́m kɨ́ tɨm nɨ ní?» Ŋgáb ɨ́ pììnà ŋgə́ ɨnè: «Nɨ́m tɨ ndóŋ ɓe Yésù nò Nàsàréèt rè à! Ŋgə́ ɨ́ duha tɨ́kìn Mèèín tɨ ndɨŋteekom nɨ́ɨ́b sɨ̀sɨ̀rí, a tɔɔce nɨ̀vɨ́tɨ̀b lɨ ru ye? Ɓe nɨ́ɨ́b kɨ́ á hà ŋgə́ tɨ túmne nyòm noò gbàŋ lâs ɓe Mèèín nɨ̀mɨrí tíí ru ye! 20Mvènnɨ́b nùb na satɨgàà ɓe kɨ̀jííb Jwîf bɨ tɨ téíntɨ́ ŋgù̧ú̧, ŋgáb ɨ́ tà kùb kpáàŋkwíìwúkɨ́ ŋgə́ bɨ̧̀ɨ̧́. 21Kɨ́ nɨ́mè, nɨ́m taá nɨ́ ɓe gíí ɨnayâna, ŋgə́ tií du nò ɓa gònɨ cénnɨ gbàŋ Ísràyéèl ru. Ɨ́dù nɨ́m kɨ́ ndɨŋ á cɨ̀ mwáín ndè jíì taarɨ́b. 22Á mè u̧, nɨ̀gub kù nɨ́mè kpánéné tɨ goó nɨ́m njɔ̧̀ vɨ̀ndɨ̀kɨ́nɨ mwáín. Ŋgáb tɨ ɗókgetɨ́ sèrìn ku kɨ́rɨ̀b kɨ́rɨ̀b. 23Ŋgáb ɨ́ dù bɨ́ fín nóò kwàwá. Á ŋgáb cuwo nɨ́m átɨ̀nànɨ naá, vúm tɨ péé dùgallɨb Mèèín, á ŋgáb tana vúm ɨnayâna, ŋgə́ á nɨ́ jáŋ yáá. 24Nùb kù nɨ́mè kpánéné ɨ́ gɨ̀ɓwê sèrìn ku, ŋgáb ɨ́ kwà nɨ́ɨ́b lâs hȩ nɨ̀gub tɨ átɨna nɨ́mè. Ɨ́dù ŋgáb ɨ́ dù bɨ́ ŋgə́ nɨ̀mɨr pə́wa.» 25Á Yésù tanagi ŋgáb ɨnè: «Nùb kɨ̀cáàb ɗàwáá rè, nyí nɨ sàmàìn ə́əmkɔ́ɔ nɨ́ɨ́b tɨ́kɨ̀nɨ́b Mèèín yi taré ɗàwá ye! 26Tɨ nɨ ɗúwa Mèsî péyè jábɨ́r u̧, ɗà Mèín a ndɨ̀ŋgì kùb mgbíì ŋgə́ à?» 27Yésù ɨ́ tànànyààŋgì ŋgáb njàb nɨ́m yi du tɨín káàtà Mèèín no ɓe ɨ́r ŋgə́ nɨ̀mɨrí. Ŋgə́ ɨ́ yàréyàyè kɨ́ Mòyîs yi tɨnndé ya, ɨ́ tùrégì kɨ́ tɨ́kɨ̀nɨ́b Mèèín yi tɨnndé.
28Ɓwâ ŋgáb yi féín gín kúr ŋgáb yi du nó gìniì, Yésù ɨ́ ndɨ̀ŋ hȩ ŋgə́ ɗú nɨ́ ndóŋnɨ ndó̧o̧. 29Ɨ́dù ŋgáb ɨ́ hàrè ŋgə́, ŋgáb ɨ́ tà: «Nɨ́m gúnná hò̧, mvii gɨcií nɨ́.» Ŋgə́ ɓe ŋgáb ɨ́ gì yó. 30Ŋgə́ ɓe ŋgáb ɨ́ dùrê cɔɔ̀ŋ. Ŋgə́ ɨ́ â bɨ̀rê, ŋgə́ ɨ́ sáktè Mèín, ŋgə́ ɨ́ kùùmè, ŋgə́ ɨ́ gɔ̀knà ŋgáb. 31Á ŋgáb ɗəəŋcugi ŋgə́, ɨ́dù ŋgə́ ɨ́ lɔ̧́kî nɨ́. 32Kí á ŋgáb ta mvókín ŋgábè no ɨnè: «Kɨ́ moò, ɓwâ nɨ́me ŋgáb tɨ du jȩ̀ȩ̀ tùnɨ, ŋgə́ a tananyaŋce nɨ́m njàb nɨ́ɨ́b du tɨín káàtà Mèèín noò rɨ, njɔ̧̀ taáɓà mɨ sarîn fèín.»
33Ŋgáb ɨ́ éícùrê gùr Yèrúsàlèèm ɓè mu̧u̧. Féín ku, ŋgáb ɨ́ kwà nɨ̀fuùb cóóŋ ɨ́ mwi̧ ndè ɓáhîn ɓe kùb ɓoò. 34Nùb kɨ́ ɨ́ tànà ŋgáb: «Kéké səəmcuhó̧meɓatɨ́, ŋgə́ túumnatɨ́ nɨ́ Sìmôŋ síí!» 35Kɨ́ ɓoò cè, ŋgáb ɨ́ átɨ̀nàcê nùb kɨ́ nɨ́m tɨ ndóŋ jȩ̀nè, hȩ ŋgáb tɨ ɗəəŋcu Yésù ɓwâ ŋgə́ tɨ kuume bɨ̀réè.
Yésù túumnatɨ́ nɨ̀fuùb noò síí
(Góòmɓwê Mt 28.16-20; Mk 16.14-18; Jŋ 20.19-23; Ə́.N.T 1.6-8)
36Ŋgáb á cè nyìnkɨ́nɨ, ŋgáb sɨ̀rɨ̀cì na Yésù á ə́əŋkɨ́ nɨ́ ŋgábè tə̧ə̧́ rè. Ŋgə́ ɨ́ nyìndè ŋgáb, ŋgə́ ɨ́ tà: «Ju ɗóóŋ dù ɓe nyí!» 37Ɗà vùù kàm ɨ́ bɨ̀ɓà ŋgáb, ɓetí ŋgáb yi lə́mne vúm pə́ bɨ́ nyéhè kù á. 38Ɨ́dù Yésù ɨ́ tànà ŋgáb: «Nyí ókce nɨ́ vùù ɓe àm níì? Àm níì á nyí duce ɓe mɨ̀sə́ndɨ̀r sumí? 39Góomnáye ŋgárɨ̀b ɓe gurub moò; mɨ nɨ̀mɨr á ɓà. Dì̧ná mɨ, ɓetí nyéhè nɨ ɓe sɨ́r só ɗàà, kúkwí só ɗàà hȩ mɨ dukɨ́ rè.» 40Ŋgə́ nyìnnɨ u̧, ŋgə́ a túumnace ŋgáb ŋgárɨ̀b ɓe gurub noò. 41Hȩ ŋgáb ya ókɓa bɨ́ mɨ̀tù cei ŋgáb a gbɨɨŋce rèé, ŋgáb ɨ́ dù bɨ́ ə́ə̀mtàmwá, á ŋgə́ fɔ́ ŋgáb: «Nɨ́m cɔɔ̀ŋ kù á nyínè ŋgáré hò̧ à?» 42Ŋgáb ɨ́ nà ŋgə́ gbɨ́ktèìn həré ɓamné. 43Ŋgə́ ɨ́ â, ŋgə́ ɨ́ tàŋ ŋgábè tíí ɓè. 44Á ŋgə́ tanagɨ ŋgáb ɨnè: «Ɓwâ nɨ́me náb yi duyeré, nɨ́m mɨ yi tanaɓa nyí wááŋ á rè: Nɨ́ɨ́b du tɨín ɓe ɨ́r moò káàtààb ɓíhɨ̀b Mòyíìs no, káàtààb tɨ́kɨ̀nɨ́bí no, ɓe káàtààb wàìbì noò, á ɗúnɨ nɨ́ɨ́b kɨ́ fó̧ hàrák. Nɨ́m kɨ́ á ndɨŋmece rè.» 45Ɓwâ kɨ́ á ŋgə́ kuumnagɨ ŋgáb kɨ̀cáàb ŋgáb ók nɨ́m du tɨín káàtà Mèèín noò. 46Ɗà ŋgə́ ɨ́ tànà ŋgáb ɨnè: «Á tɨín káàtà kɨ́ no ɨnè: Ɗúú Mèsî pə́ jábɨ́r á, ŋgə́ a kû. Jíì taarɨ́bí, ŋgə́ a sə̀ə̀mcùhô̧ mvókín nɨ̀kwíbí. 47Á ɗúcénɨ nyí tànà gbàŋ lâs nɨ́m ŋgə́ ya tɔɔkɨ́sona nyínè. Nyí a yàwò Yèrúsàlèm, tànànɨ nɨ̀vɨ́tɨ̀b ŋgáb ɓàndɨ̀ sum ŋgábè, Mèín a tɨ́ínà ŋgáb cum. 48Nyí ɨ́ du mɨ̀námé nɨ́ɨ́b kíì ru. 49Mɨ nɨ̀mɨr, mɨ ɓa tómsónɨ nyər Tá moò ya ɓwállé nyí ya á. Ɨ́dù á ɗúnɨ nyí dùkɨ́ kwé hò̧ há̧á̧ hȩ nyí ɓa kwànɨ nyòm Mèín tómsóworé.»
Yésù á wɨ́ínɨ ɓɨllin
(Góòmɓwê Mk 16.19-20; Ə́.N.T 1.9-11)
50Yésù ɨ́ gèhô̧ nɨ̀fuùb noò kúr gɨ́ní, ɓe ŋgáb ɨ́ gì jɨ̀r Bètàníì. Féín yɨ́ kù, gín Bètàníì, ŋgə́ ɨ́ bɨ̀wû ŋgárɨ̀b còóm, ŋgáb fàmnɨ. 51Ŋgə́ á cè ŋgáb fàmnɨ, á ɓe ŋgáb gɔkle. Ŋgə́ ɨ́ wɨ́ì ɓɨllin. 52Kɨ́ ŋgábè, ŋgáb ɨ́ ɗómcê ŋgə́. Ŋgáb ɨ́ gɨ̀cù Yèrúsàlèm ɓe mɨ̀tɔ̀k kàm jíri sumí. 53Ŋgáb yaá ɓwâ lâs Dúú Jíri Mèèín no, mgbíìnɨ Mèín.
Currently Selected:
Lúkàs 24: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
Lúkàs 24
24
Yésù səəmcuhó̧tɨ́ cwéé
(Góòmɓwê Mt 28.1-10; Mk 16.1-8; Jŋ 20.1-10)
1Ye sóndèè, kɨ́rɨ̀b kɨ́rɨ̀b, nɨ̀gub ɨ́ ɗókgè nyàbȩ́ȩ́ ɓe kúrúm làmɨ́ndà noò ŋgáb yi nyaaŋkɨ́ré ŋgáré. 2Ŋgáb ɨ́ kwà sɨɨ kàm yi ɓɔ̧ sèrì rè gə́nȩ̀ȩ́ pɨ́ɨŋso̧ó̧ cóo. 3Ŋgáb ɨ́ lə́sò sèrìn ku, ŋgáb ɨ́ dù bɨ́ fín Yésùù sèrìn ku kwàwá. 4Ŋgáb ə́ə̀ŋkɨ́cénɨ náàŋ ɓetí kɨ̀cáàb yi yɔ́ɔ́ ŋgáb, á ŋgáb pə́cì na nɨ̀ŋgwáàb bɨrɨ́b á ə́əŋkɨ́ ŋgábè tíí rè, ɓe júúb mɨ̀vúù só tóóm. 5Hȩ vùù ya bɨɓa ŋgábè, ŋgáb ɨ́ yà ə́ə̀ŋkɨ́nɨ tí ɗàá tɨɨmsȩ́ȩ, á nɨ̀ŋgwáàb lè fɔ́ ŋgáb ɨnè: «Nyí goce nɨ́ mánɨ nò du jááŋ mvókín nɨ̀kwíbí àm níì? 6Ŋgə́ nɨ hò̧ ɗàà, ŋgə́ səəmcuhó̧tɨ́ nɨ́ cwéé. Lə́əmcunáye nɨ́m ŋgə́ yi tana nyí ɓwâ ŋgə́ yi duye Gàlìléè. 7Ŋgə́ ya tahaá: ‹Á ɗúnɨ kùb sə́rɨ̀kɨ́nà nùb ɓáŋhɨ́b Mwin Nɨ̀rì. Ŋgáb a kpáàŋkwíìwúkî ŋgə́ bɨ̧̀ɨ̧́, jíì taarɨ́bí ŋgə́ á sə̀ə̀mcùhô̧ cwéé› ye!»
8Nɨ̀gub lè ɨ́ lə́ə̀mcùgì nyindí yi Yésùù kɨ́. 9Ŋgáb ɨ́ éícùwò sèrìn ku. Nɨ́m tɨ ndóŋndé lâs, ŋgáb ɨ́ gì átɨ̀nànɨ nùb tómé cóóŋ ɨ́ mwi̧ rè ɓe nùb kù. 10Nɨ̀gub yi gɨ sèrìn kɨ́ yɨɨ́m Màríyà nò Màkdàláà, Jáànə̀ ɓe Màríyà yà Jáàk á. Nɨ̀gub kù yi gɨɓwée ɓe ŋgábè ɨ́ átɨ̀nàɓwê nùb tómé sà̧à̧ mwi̧ kɨ́. 11Ɨ́dù nùb tómé ɨ́ lə́mnè bɨ́ ɨnayâna nɨ́m nɨ̀gub lè du vúm átɨ̀nànɨ kɨ́ nɨ nyindí sɨ̀ɨ́ á, ŋgáb ɨ́ dù bɨ́ ə́ə̀mwá. 12Ɨ́dù Píyéèr ɨ́ lùgèhâ sèrìn gìnɨ góòmnyààŋnɨ. Ŋgə́ ɨ́ tɨ̀ɨ̀mndésò, ŋgə́ ɨ́ dù nɨ́ nɨ́m kù pə́wa, sé ndómbó. Ŋgə́ ɨ́ gɨ̀cù no yó, á ŋgə́ gbɨɨŋɓa ɓe nɨ́m tɨ ndóŋ kɨ́.
Yésù túumnatɨ́ nɨ̀fuùb noò bɨrɨ́b kù síí jɨ̀r Èmàyúùs
(Góòmɓwê Mk 16.12-13)
13Ye mwi̧ kɨ́, nɨ̀fuùb bɨrɨ́b yaá gìnɨ Èmàyûs. Èmàyûs kɨ́ yaá ɗaŋhîn ɓe Yèrúsàlèm kílòmétà cóóŋ ɨ́ mwi̧. 14Ŋgáb yaá átɨ̀sénɨ nɨ́m tɨ ndóŋndé. 15Ŋgáb átɨ̀gènɨ sà̧à̧ rè, ŋgáb a ndáŋgece, á Yésù nɨ̀mɨr ŋgɨɨwo gín ŋgábè, ŋgə́ ɓe ŋgáb ɨ́ yà gɨ̀séɓáànɨ. 16Ŋgáb yaá ŋgə́ pə́ɓàhánɨ, ɨ́dù ɗə̀ə̀ŋcùú ŋgéé ɨ́ yɔ̂ nɨ́ ŋgáb. 17Yésù ɨ́ fɔ̂ ŋgáb: «Nyí ndáŋgece nɨ́ ní ya?» Á ŋgáb ə́ŋhȩ, tí kpáíkí̧i̧ lâs. 18Nɨ̀mwi̧ mvókín ŋgábè no ɨ́r yi du Kɨ̀lèwòpâs lè ɨ́ fɔ̂ ŋgə́: «Cáŋhȩ̀ nɨ̀gúr Yèrúsàlèm hò̧, du nɨ́ ɗə̀ə̀ŋwá nɨ́ɨ́b tɨ ndóŋ jíìb lèè duha nɨ wu á ye?» 19Á ŋgə́ fɔ́cu ŋgáb: «Nɨ́m kɨ́ tɨm nɨ ní?» Ŋgáb ɨ́ pììnà ŋgə́ ɨnè: «Nɨ́m tɨ ndóŋ ɓe Yésù nò Nàsàréèt rè à! Ŋgə́ ɨ́ duha tɨ́kìn Mèèín tɨ ndɨŋteekom nɨ́ɨ́b sɨ̀sɨ̀rí, a tɔɔce nɨ̀vɨ́tɨ̀b lɨ ru ye? Ɓe nɨ́ɨ́b kɨ́ á hà ŋgə́ tɨ túmne nyòm noò gbàŋ lâs ɓe Mèèín nɨ̀mɨrí tíí ru ye! 20Mvènnɨ́b nùb na satɨgàà ɓe kɨ̀jííb Jwîf bɨ tɨ téíntɨ́ ŋgù̧ú̧, ŋgáb ɨ́ tà kùb kpáàŋkwíìwúkɨ́ ŋgə́ bɨ̧̀ɨ̧́. 21Kɨ́ nɨ́mè, nɨ́m taá nɨ́ ɓe gíí ɨnayâna, ŋgə́ tií du nò ɓa gònɨ cénnɨ gbàŋ Ísràyéèl ru. Ɨ́dù nɨ́m kɨ́ ndɨŋ á cɨ̀ mwáín ndè jíì taarɨ́b. 22Á mè u̧, nɨ̀gub kù nɨ́mè kpánéné tɨ goó nɨ́m njɔ̧̀ vɨ̀ndɨ̀kɨ́nɨ mwáín. Ŋgáb tɨ ɗókgetɨ́ sèrìn ku kɨ́rɨ̀b kɨ́rɨ̀b. 23Ŋgáb ɨ́ dù bɨ́ fín nóò kwàwá. Á ŋgáb cuwo nɨ́m átɨ̀nànɨ naá, vúm tɨ péé dùgallɨb Mèèín, á ŋgáb tana vúm ɨnayâna, ŋgə́ á nɨ́ jáŋ yáá. 24Nùb kù nɨ́mè kpánéné ɨ́ gɨ̀ɓwê sèrìn ku, ŋgáb ɨ́ kwà nɨ́ɨ́b lâs hȩ nɨ̀gub tɨ átɨna nɨ́mè. Ɨ́dù ŋgáb ɨ́ dù bɨ́ ŋgə́ nɨ̀mɨr pə́wa.» 25Á Yésù tanagi ŋgáb ɨnè: «Nùb kɨ̀cáàb ɗàwáá rè, nyí nɨ sàmàìn ə́əmkɔ́ɔ nɨ́ɨ́b tɨ́kɨ̀nɨ́b Mèèín yi taré ɗàwá ye! 26Tɨ nɨ ɗúwa Mèsî péyè jábɨ́r u̧, ɗà Mèín a ndɨ̀ŋgì kùb mgbíì ŋgə́ à?» 27Yésù ɨ́ tànànyààŋgì ŋgáb njàb nɨ́m yi du tɨín káàtà Mèèín no ɓe ɨ́r ŋgə́ nɨ̀mɨrí. Ŋgə́ ɨ́ yàréyàyè kɨ́ Mòyîs yi tɨnndé ya, ɨ́ tùrégì kɨ́ tɨ́kɨ̀nɨ́b Mèèín yi tɨnndé.
28Ɓwâ ŋgáb yi féín gín kúr ŋgáb yi du nó gìniì, Yésù ɨ́ ndɨ̀ŋ hȩ ŋgə́ ɗú nɨ́ ndóŋnɨ ndó̧o̧. 29Ɨ́dù ŋgáb ɨ́ hàrè ŋgə́, ŋgáb ɨ́ tà: «Nɨ́m gúnná hò̧, mvii gɨcií nɨ́.» Ŋgə́ ɓe ŋgáb ɨ́ gì yó. 30Ŋgə́ ɓe ŋgáb ɨ́ dùrê cɔɔ̀ŋ. Ŋgə́ ɨ́ â bɨ̀rê, ŋgə́ ɨ́ sáktè Mèín, ŋgə́ ɨ́ kùùmè, ŋgə́ ɨ́ gɔ̀knà ŋgáb. 31Á ŋgáb ɗəəŋcugi ŋgə́, ɨ́dù ŋgə́ ɨ́ lɔ̧́kî nɨ́. 32Kí á ŋgáb ta mvókín ŋgábè no ɨnè: «Kɨ́ moò, ɓwâ nɨ́me ŋgáb tɨ du jȩ̀ȩ̀ tùnɨ, ŋgə́ a tananyaŋce nɨ́m njàb nɨ́ɨ́b du tɨín káàtà Mèèín noò rɨ, njɔ̧̀ taáɓà mɨ sarîn fèín.»
33Ŋgáb ɨ́ éícùrê gùr Yèrúsàlèèm ɓè mu̧u̧. Féín ku, ŋgáb ɨ́ kwà nɨ̀fuùb cóóŋ ɨ́ mwi̧ ndè ɓáhîn ɓe kùb ɓoò. 34Nùb kɨ́ ɨ́ tànà ŋgáb: «Kéké səəmcuhó̧meɓatɨ́, ŋgə́ túumnatɨ́ nɨ́ Sìmôŋ síí!» 35Kɨ́ ɓoò cè, ŋgáb ɨ́ átɨ̀nàcê nùb kɨ́ nɨ́m tɨ ndóŋ jȩ̀nè, hȩ ŋgáb tɨ ɗəəŋcu Yésù ɓwâ ŋgə́ tɨ kuume bɨ̀réè.
Yésù túumnatɨ́ nɨ̀fuùb noò síí
(Góòmɓwê Mt 28.16-20; Mk 16.14-18; Jŋ 20.19-23; Ə́.N.T 1.6-8)
36Ŋgáb á cè nyìnkɨ́nɨ, ŋgáb sɨ̀rɨ̀cì na Yésù á ə́əŋkɨ́ nɨ́ ŋgábè tə̧ə̧́ rè. Ŋgə́ ɨ́ nyìndè ŋgáb, ŋgə́ ɨ́ tà: «Ju ɗóóŋ dù ɓe nyí!» 37Ɗà vùù kàm ɨ́ bɨ̀ɓà ŋgáb, ɓetí ŋgáb yi lə́mne vúm pə́ bɨ́ nyéhè kù á. 38Ɨ́dù Yésù ɨ́ tànà ŋgáb: «Nyí ókce nɨ́ vùù ɓe àm níì? Àm níì á nyí duce ɓe mɨ̀sə́ndɨ̀r sumí? 39Góomnáye ŋgárɨ̀b ɓe gurub moò; mɨ nɨ̀mɨr á ɓà. Dì̧ná mɨ, ɓetí nyéhè nɨ ɓe sɨ́r só ɗàà, kúkwí só ɗàà hȩ mɨ dukɨ́ rè.» 40Ŋgə́ nyìnnɨ u̧, ŋgə́ a túumnace ŋgáb ŋgárɨ̀b ɓe gurub noò. 41Hȩ ŋgáb ya ókɓa bɨ́ mɨ̀tù cei ŋgáb a gbɨɨŋce rèé, ŋgáb ɨ́ dù bɨ́ ə́ə̀mtàmwá, á ŋgə́ fɔ́ ŋgáb: «Nɨ́m cɔɔ̀ŋ kù á nyínè ŋgáré hò̧ à?» 42Ŋgáb ɨ́ nà ŋgə́ gbɨ́ktèìn həré ɓamné. 43Ŋgə́ ɨ́ â, ŋgə́ ɨ́ tàŋ ŋgábè tíí ɓè. 44Á ŋgə́ tanagɨ ŋgáb ɨnè: «Ɓwâ nɨ́me náb yi duyeré, nɨ́m mɨ yi tanaɓa nyí wááŋ á rè: Nɨ́ɨ́b du tɨín ɓe ɨ́r moò káàtààb ɓíhɨ̀b Mòyíìs no, káàtààb tɨ́kɨ̀nɨ́bí no, ɓe káàtààb wàìbì noò, á ɗúnɨ nɨ́ɨ́b kɨ́ fó̧ hàrák. Nɨ́m kɨ́ á ndɨŋmece rè.» 45Ɓwâ kɨ́ á ŋgə́ kuumnagɨ ŋgáb kɨ̀cáàb ŋgáb ók nɨ́m du tɨín káàtà Mèèín noò. 46Ɗà ŋgə́ ɨ́ tànà ŋgáb ɨnè: «Á tɨín káàtà kɨ́ no ɨnè: Ɗúú Mèsî pə́ jábɨ́r á, ŋgə́ a kû. Jíì taarɨ́bí, ŋgə́ a sə̀ə̀mcùhô̧ mvókín nɨ̀kwíbí. 47Á ɗúcénɨ nyí tànà gbàŋ lâs nɨ́m ŋgə́ ya tɔɔkɨ́sona nyínè. Nyí a yàwò Yèrúsàlèm, tànànɨ nɨ̀vɨ́tɨ̀b ŋgáb ɓàndɨ̀ sum ŋgábè, Mèín a tɨ́ínà ŋgáb cum. 48Nyí ɨ́ du mɨ̀námé nɨ́ɨ́b kíì ru. 49Mɨ nɨ̀mɨr, mɨ ɓa tómsónɨ nyər Tá moò ya ɓwállé nyí ya á. Ɨ́dù á ɗúnɨ nyí dùkɨ́ kwé hò̧ há̧á̧ hȩ nyí ɓa kwànɨ nyòm Mèín tómsóworé.»
Yésù á wɨ́ínɨ ɓɨllin
(Góòmɓwê Mk 16.19-20; Ə́.N.T 1.9-11)
50Yésù ɨ́ gèhô̧ nɨ̀fuùb noò kúr gɨ́ní, ɓe ŋgáb ɨ́ gì jɨ̀r Bètàníì. Féín yɨ́ kù, gín Bètàníì, ŋgə́ ɨ́ bɨ̀wû ŋgárɨ̀b còóm, ŋgáb fàmnɨ. 51Ŋgə́ á cè ŋgáb fàmnɨ, á ɓe ŋgáb gɔkle. Ŋgə́ ɨ́ wɨ́ì ɓɨllin. 52Kɨ́ ŋgábè, ŋgáb ɨ́ ɗómcê ŋgə́. Ŋgáb ɨ́ gɨ̀cù Yèrúsàlèm ɓe mɨ̀tɔ̀k kàm jíri sumí. 53Ŋgáb yaá ɓwâ lâs Dúú Jíri Mèèín no, mgbíìnɨ Mèín.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon