Saumu 41
41
Oturutoh Ritonõpo a kure pyra ahtao
Sero saumu tymerose Tawi a.
1Tãkye mã mokaro
tymõkomokãkara pyno exiketomo.
Mokaro akorehmãko Ritonõpo mana
popyra ehtoh toehse ahtao eya xine.
2Mokaro ewomãko Kuesẽkõ mana
okynahxo isene toto ripõko mana.
Tãkye toto ripõko mana
tynekarohpyry po toto nonoryme.
Toto onyryhmapopyra mana epetõkara a.
3Toto jamihtanohpõko ropa Kuesẽkõ mana
inyhtohkõ po kure pyra toto ahtao
toto akorehmãko mana kure toto ehtohme ropa.
4Ynara ase: “Ritonõpo Jesemy,
iirypyryme toehse ywy oneneryme.
Juãnohpyra exiko kukurãkako ropa.”
5Jepetõkara omiãko xihpyryme ypoko mã toto.
Joorikyry se mã toto wenikehtohme ypoko.
6Jenese oehketõ ajohpe rokẽ mã toto;
oturupõko mã toto kure pyra jehtoh poko,
mame tõmirykõ ahpahnõko mã toto.
7Yse pyra exiketõ putiputime oturũko mã toto
oseya rokẽ ypoko: “Popyra exĩko mana itamurume,”
ãko mã toto, osenetupuhnõko.
8“Tyrohsẽ popỹ tapoise eya
tynyhtoh poe owõpyra ropa mana,
orihnõko mana,” ãko mã toto.
9Jepe kurã roropa, zae exiketyme ekaroase,
ymaro otuhkety, mokyro jewokaneme toehse.
10Ritonõpo Jesemy, juãnohpyra exiko, kukurãkako ropa, mame yzehnotokõ emetakamãko ase!
11Yporemãkara exĩko mã toto,
mame azamaro jehtoh waro exĩko ase.
12Jakorehmãko mase zae ehtoh poko jexiryke.
Amaro jyrĩko mase jũme.
13Ritonõpo eahmatoko, Izyraeu tõ Esemy!
Eahmatoko seromaroro, jũme roropa! Enara rokene!
Currently Selected:
Saumu 41: apy
Highlight
Share
Copy
Want to have your highlights saved across all your devices? Sign up or sign in
©2017, Wycliffe Bible Translators, Inc.
