Mateu 4
4
Jezu kuhtopõpyry joroko tamuru a
(Maku 1.12-13; Ruka 4.1-13)
1Morarame ahno esaka pyra Jezu tarose Ritonõpo Zuzenu a ikuhpotohme joroko tamuru a. 2Mame moroto tuhke Jezu otuhpyra tõmehse, 40me ẽmepyry. Morarame tomitapãse ynororo. 3Mame porẽ, joroko tamuru tooehse eya. Ynara tykase ynororo Jezu a:
— Ritonõpo mũkurume awahtao senohne topu tyriko ourume, tykase.
4— Arypyra, tykase Jezu eya. — Ynara tymerose Ritonõpo omiryme: “Wyi kure repe. Yrome wyi poko rokẽ awahtao xine orihnõko matose. Mãpyra Ritonõpo omipona awahtao xine ipunaka orihpỹme exĩko matose,” ãko Ritonõpo omiry, tykase Jezu eya.
5Morarame pata kurã pona Jezu tarose joroko tamuru a, Jerusarẽ pona. Morotona Ritonõpo Tapyĩ pona Jezu tarose eya, kaetokõ pona, tapyi mypatarãnaka. 6Mame ynara tykase ynororo Jezu a:
— Ritonõpo mũkuru nymyryme awahtao epukako sero poe nono pona, ynara tymerose exiryke Ritonõpo omiryme:
“Tynenyohtyã tyripõko Ritonõpo mana,
oewomatohme emero rokẽ pona oytoryhtao,
Tomary ke ãpoĩko mã toto,
epuhtãmara opupuru ehtohme topu tõ pona,”
me tymerose mana, tykase joroko tamuru Jezu a.
7Yrome ynara tykase Jezu eya:
— Arypyra. Ynara ãko Ritonõpo omiry roropa: “Oesẽkõme Ritonõpo exiryke, onukuhpyra ehtoko ipunaka,” ãko Ritonõpo omiry, tykase Jezu.
8Morarame Jezu tarose ropa joroko tamuru a ypy emory pona. Moro poe typatary tõ kurã tonepose eya, tuisa tõkehko. 9Ynara tykase ynororo eya:
— Sero nono põkõ patary tuhke nae ase kurãkomo. Tytaõke kurã ke roropa mana. Emero ekarõko ase oya oesekumuru po typorohse jẽpataka awahtao, “Kure mase. Imehxo mase,” katohme ya, tykase joroko tamuru Jezu a.
10Yrome ynara tykase Jezu:
— Ytoko ropa taroino. Kurumekako joroko tamuru, ynara tymerose exiryke Ritonõpo omiryme: “Ywy rokẽ kure kyritoko, oesẽkõme jexiryke. Jomipona rokẽ ehtoko,” ãko Ritonõpo omiry, tykase Jezu joroko tamuru a.
11Morara exiryke Jezu turumekase ropa joroko tamuru a. Mame Ritonõpo nenyohtyã toytose eya, akorehmase.
Imehnõ amorepapitory Jezu a Karirea po
(Maku 1.14-15; Ruka 4.14-15)
12Moromeĩpo João tõmapose ãpuruhpyry taka juteu tõ tuisary a. Mame moro poko Jezu turuse imehnomo a. Mame morara kary totase tyya ahtao, toesyryhmase ropa ynororo Karirea pona ropa. 13Yrome okynã pyra kynexine Nazare po. Toytose ynororo Kapanaũ pona, ikuhpo ehpikoxi, Karirea ehpikoxi. Zepurõ pata moe pyra kynexine. Napatari pata moe pyra roropa kynexine. 14Ritonõpo omihpyry ae ro morotona toytose Jezu, ynara tymerose exiryke Izaja a Ritonõpo omiryme:
15“Zepurõ põkomo, Napatari põkõ roropa, tuna
konõto ehpiõkomo, tuna Joatão mõpoe, Karirea,
juteutõkara esaryme roropa mana! 16Ritonõpo
waro pyra exiketõ ezuru konõto enẽko mana.
Orihketõme matose tyyrypyhpyke oexirykõke.
Yrome Ritonõpo nymenekahpyry oya xine ytõko
mana. Otuarõtanohtorỹko mana,”
me tymerose pake Izaja a.
17Morarame imehnõ tamorepapitose Jezu a Ritonõpo poko. Ynara tykase ynororo eya xine:
— Oorypyrykõ irumekatoko. Ritonõpo enetupuhtoko oesẽkõme nymyry, tykase.
Imehnõ eahmatopõpyry Jezu a tymaro toto ytotohme
(Maku 1.16-20; Ruka 5.1-11)
18Morarame Jezu toytose Karirea ehpikuroko, ikuhpo ehpikuroko. Moroto kana anỹnanõ tonese eya, asakoro. Ximão Peturu kynexine takorõ maro Ãtare maro. Kana anỹnõko toh kynexine tarãpa ke. 19Morarame ynara tykase Jezu eya xine:
— Ymaro ehmaropa. Tyoro ãmorepatorỹko ase, imehnõ amorepatohme oya xine, jomipona toto ehtohme, tykase Jezu eya xine.
20Axĩ tarãpa turumekase eya xine Jezu maro toytotohkõme.
21Mame toesyryhmase Jezu ahtao, imehnõ tonese ropa eya, Tiaku tomo, João maro. Zepeteu poenõ tõ kynexine. Tykanarykõ ao toh kynexine, tohpike ao. Tumykõ maro toh kynexine Zepeteu maro. Tarãpa poko erohnõko toh kynexine. Tykohmase tahtao xine 22axĩ tykanarykõ tynomose tumykõ maro, Jezu maro toytotohkõme.
Imehnõ amorepatopõpyry Jezu a, kurãkõkara kurãkatopõpyry roropa eya
(Ruka 6.17-19)
23Morarame Karirea poro toytoryme Jezu a imehnõ tamorepase eya. Toto atamorepatoh tao tamorepase toto eya Ritonõpo omiry kurã poko, toto esẽme Ritonõpo exiry poko, enara. Mame tuhke kurãkõkara tukurãkase ropa eya. 24Mame Jezu tokãtose eya xine. Xiria põkõ Jezu poko tutuarõtase roropa. Morarame eya xine kurãkõkara tuhke tonehse Jezu a ikurãkatohme. Jorokohpã kõ roropa tonehse toto a epuepukaketomo te, ytoytopyra exiketõ roropa tonehse eya xine. Morarame emero tukurãkase ropa Jezu a toto. 25Morarame imeimehnõ põkomo a Jezu tokahmase, imoihmãkomo a. Karirea põkomo a tokahmase te, Omame Osetoro pata tõ põkomo a te, Jerusarẽ põkomo a te, Jutea põkomo a te, tuna Joatão mõpoẽkomo a roropa Jezu tokahmase, enara.
Currently Selected:
Mateu 4: apy
Highlight
Copy
Compare
Share
Want to have your highlights saved across all your devices? Sign up or sign in
©2017, Wycliffe Bible Translators, Inc.