RUT 2
2
Rut tsi' tempa cʌlejem bʌ cebada ti' jamil Booz
1An juntiquil winic wen chumul bʌ, i c'aba' Booz. Jiñʌch i pi'ʌl Elimelec, i ñoxi'al Noemí tsa' bʌ chʌmi. Juntiquil jach i ñojte'el ti cha'ticlel. 2Rut jini ch'oyol bʌ ti Moab tsi' sube Noemí: A wocolic la' majlicon ti jamil cha'an mic tempan cʌlejem bʌ cebada. Mux c tsajcan majlel jini stsep cebada mu' bʌ i q'uelon ti uts'at, che'en. I yʌ'lib tsi' sube Rut: Cucu calobil, che'en. 3Jini cha'an tsa' majli Rut. Tsa' c'oti ya' ti jamil. Tsi' tempa majlel cebada ti' pat stsep cebadajob. I yum jini jamil ba' tsa' c'oti jiñʌch Booz, lajal bʌ i ñojte'el yic'ot Elimelec. 4Awilan tsa' c'oti Booz loq'uem bʌ ti Belén. Tsi' sube stsep cebadajob: La' ajnic lac Yum la' wic'ot, che'en. Jini stsep cebadajob tsi' cha' sutq'uibeyob cortesía: La' i yʌq'ueñet i yutslel lac Yum, che'ob. 5Booz tsi' c'ajtibe i winic, jiñʌch mu' bʌ i q'uel stsep cebadajob: ¿Majqui i cha'an jini xch'oc? che'en. 6I winic Booz tsi' sube i yum: Jiñʌch xch'oc bʌ x'ixic ch'oyol bʌ ti Moab. Noemí tsi' pʌyʌ tilel che' bʌ tsa' loq'ui ti' lumal Moab. 7Tsi' subeyon: Awocolic, la' c tempan cebada ti jamil. La' c tsajcan majlel jini stsep cebadajob cha'an mic tempan jini cʌlejem bʌ, che'en. Tsa' juli che' ti sʌc'ajel. C'ʌlʌl wʌle wʌ'to an. Maxto anic tsi' cʌyʌ i ye'tel cha'an mi' sujtel ti' yotot. Che' tsi' yʌlʌ i winic Booz.
8Booz tsi' sube Rut: Ubibeñon xch'oc. Uts'at tsa' tiliyet ilayi. Mach ma' majlel a tempan cebada ti yambʌ jamil. Mach ma' cʌy ili lum cha'an yambʌ. Jalijen wʌ'i ti' t'ejl x'ixic bʌ x'e'telob c cha'an. 9Q'uele jini jamil ba' woli' tsepob cebada. Tsajcañob majlel. Tsac subeyob c winicob cha'an ma'anic mi' tic'lañetob. Che' tiquinix a ti' cucu ba'an uc'um. Japʌ chuqui tsi' luchuyob jini winicob, che'en Booz. 10Rut tsi' ñocchoco i bʌ ti' t'ejl i yoc, ñucul i jol. Tsi' sube: Wocolix a wʌlʌ, c yum. Cabʌl wola' pʌsbeñon i yutslel a pusic'al, anquese yambʌyʌch c lumal ba' ch'oyolon, che'en. 11Booz tsi' sube: Ti isujm tsa cubi pejtel chuqui tsa' melbe a wʌ'lib che' bʌ tsa' chʌmi a ñoxi'al c'ʌlʌl wʌle. Tsa cubi bajche' tsa' cʌyʌ a tat a ña' yic'ot a lumal cha'an ma' tilel ba'an winicob x'ixicob mach bʌ a cʌñʌyobic. 12La' i yʌq'ueñet lac Yum a chobejtʌbal cha'an jini tsa' bʌ a mele. Ts'ʌcʌl yom ma' wʌq'uentel ti lac Yum, come tsa' wʌc'ʌ a bʌ ti' wenta i Dios Israel cha'an ma' taj a coltʌntel ti yebal i wich', che'en. 13Rut tsi' sube: Cabʌl tsa' pʌsbeyon i yutslel a pusic'al, c yum. Tsa' wen ñuq'uesʌbeyon c pusic'al. Wen uts tsa' pejcayon anquese mach añonic ti a wenta, come mach a criadajonic, che'en.
14Che' ti' yorajlel c'ux waj Booz tsi' pʌyʌ Rut: La' wʌ'i. C'uxu waj. Ts'aja a waj ti vino, che'en. Tsa' tili ti buchtʌl ba'an stsep cebadajob. Booz tsi' yʌq'ue i c'ux woch' bʌ cebada. Tsi' c'uxu jinto tsa' ñaj'a. Tsi' loto i colojbal. 15Che' bʌ tsa' ch'ojyi Rut cha'an mi' cha' tempan cebada, Booz tsi' sube i winicob: La' i tempan ya' ba' tsepbil. Mach mi la' tic'. 16Tuc'ula loq'uel ts'ita' ti jujunsejt cebada. Yom mi la' t'ox yʌsan majlel cha'an mi' lot. Mach mi la' tic', che'en.
17Rut tsi' tempa c'ʌlʌl ti ic'ajel. Tsi' jats'ʌ jini tempʌbil bʌ cebada cha'an mi' loc'sʌben i sujl. Tsi' lotbe i bʌc'. Tsa' bujt'i jump'ejl chiquib. 18Tsi' q'ueche majlel. Tsa' sujti ti tejclum. Tsi' pʌsbe i yʌ'lib chuqui tsi' tempa. Tsi' jiti ja'el i colojbal i bʌl i ñʌc' tsa' bʌ cʌle che' bʌ tsa' ñaj'a. Tsi' yʌq'ue i yʌ'lib. 19I yʌ'lib tsi' c'ajtibe: ¿Baqui tsa' tempa sajmʌl? ¿Baqui tsa' cha'le e'tel? Uts jini winic tsa' bʌ i q'ueleyet ti uts'at, che'en Noemí. Rut tsi' sube i yʌ'lib chuqui tsa' ujti ya' ba' tsi' cha'le e'tel. Tsi' yʌlʌ: I c'aba' i yum jini lum ba' tsac cha'le e'tel sajmʌl, jiñʌch Booz, che'en. 20Noemí tsi' sube i yʌ'lib: La' i yʌq'uen i yutslel i pusic'al lac Yum, come uts i pusic'al Booz. Lajal mi' pʌsbeñob i yutslel i pusic'al jini cuxulo' bʌ che' bajche' tsi' pʌsbeyob lac pi'ʌlob tsa' bʌ chʌmiyob, che'en. Tsi' yʌlʌ ja'el: Jini winic mero lac pi'ʌlʌch. Jiñʌch mu' bʌ mejlel i coltañonla, che'en. 21Rut ch'oyol bʌ ti Moab tsi' yʌlʌ: Booz tsi' subeyon ja'el cha'an mic jalijel ba'an x'ixic bʌ x'e'telob i cha'an jinto mi' yujtel i tsepob cebada, che'en. 22Noemí tsi' sube Rut i yʌ'lib: Calobil, uts'atʌch bajche' mi' yʌl. Yom ma' majlel yic'ot x'ixic bʌ x'e'telob i cha'an ame anic majch mi' tic'lañet mi tsa' majliyet ti yambʌ jamil, che'en. 23Jini cha'an tsa' jale Rut ya' ba'an x'ixic bʌ x'e'telob i cha'an Booz. Tsi' tempa cebada jinto tsa' ujti i tsepob cebada yic'ot trigo. Tsa' chumle ti' yotot i yʌ'lib.
Currently Selected:
RUT 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.