SALMOS 73
73
LIBRO III
I jilibal jini jontolo' bʌ
1Dios mi' pʌsbeñob i yutslel israelob.
Isujm mi' pʌsbeñob i yutslel jini sʌc bʌ i pusic'al.
2Pero joñon tsa cʌlʌ cʌye' c ñopet. Colel tsa cʌlʌ yajlel.
Mach xuc'ulic coc, colel i tʌjts'el.
3Tsac lon mulʌbe i wenlel jini mu' bʌ i chañ'esañob i bʌ
Che' bʌ tsaj q'uele woli' p'ojlel i chubʌ'an jini jontolo' bʌ.
4Ma'anic mi' yubiñob wocol.
Ch'ejlʌch i bʌc'tal.
5Ma'anic mi' yubiñob wocol bajche' yaño' bʌ winicob.
Ma'anic mi' tic'lʌntelob che' bajche' i pi'ʌlob.
6Jini cha'an uts'atax mi' lon q'uelob i bʌ.
Mi' chajpañob i pusic'al ti jontolil che' bajche' mi ch'ʌlob i bʌ ti ujʌl yic'ot bujcʌl.
7Ma'anic chuqui anto yom i cha'añob.
But'ulob i pusic'al ti lolom tac bʌ.
8Mi' cha'leñob wajleya yic'ot a'leya. Mi' bʌc'tesañob i pi'ʌlob.
Ch'ejlob i pusic'al mi' subob chuqui mi caj i melob.
9Mi' ts'a'leñob Dios. Mi' pucob ti pejtelel pañimil chuqui mi' lon ña'tañob.
10Jini i cha'año' bʌ Dios mi' lon ñopbeñob i t'an. Mi' toj sajtelob i pusic'al.
Mi' jac'beñob i t'an che' bajche' mi' japob ja' che' tiquin i ti'.
11Mi' lon alob: Mach yujilic Dios.
¿Bacan mi' p'isonla ti' wenta jini C'ax Ñuc Bʌ? lon che'ob.
12Che'ʌch mi' melob jini jontolo' bʌ.
Mi' p'ojlesañob i chubʌ'an ti pañimil. Ma'anic majch mi' tic'ob.
13Tsa cʌlʌ lolom jach wolij cʌntan c pusic'al.
Lolom jach mij cʌntan c bʌ cha'an mi cajñel ti sʌc.
14C'ʌlʌl mi' sʌc'an c'ʌlʌl mi' yic'an añʌch c tic'lʌntel.
Mi cubin i ju'sʌntel c pusic'al ti jujump'ejl q'uin.
15Tsa'ic c subeyob a p'olbal chuqui tsac lon ña'ta tic pusic'al
Tsa' sajtiyob cha'an c t'an.
16Che' bʌ tsac na'ta c ch'ʌmben isujm iliyi
Wen wocol tsa cubi
17jinto tsa' ochiyon ti Ch'ujul bʌ Ajñibʌl i cha'an Dios.
Ya'i tsac ña'ta chuqui mi caj i tajob jontolo' bʌ che' ti' jilibal.
18Isujm bʌbʌq'uen jax mi' yajlelob ya' ba' t'uchul i yoc.
Mux a junyajlel jisañob.
19Ti ora jach mi' jilelob.
Mi' bʌc' tilel jini bʌbʌq'uen tac bʌ.
20Lajal i cuxtilel bajche' ñajal mu' bʌ i bʌc' ñajʌyel lac cha'an che' ch'ojyemonixla. Che' mi' ch'ojyelob, mi caj i ña'tañob i sujmlel.
21Che' bʌ tsac ch'ʌmbe isujm, wulwulña c pusic'al tsa cubi.
Tsac cha'le tsic pusic'al.
22Tsa' caji c ña'tan lajalon bajche' tonto bʌ mach bʌ anic i pusic'al.
Lajalon ti a tojlel bajche' bʌte'el mach bʌ anic i ña'tʌbal.
23Pero mach che'ic ma' q'uelon. Chʌn añon quic'otet ti pejtelel ora.
Chucul a cha'an jini ñoj bʌ j c'ʌb.
24Mi caj a chʌn toj'esañon majlel ti a t'an che' wʌ'to añon ti pañimil.
Ti wi'il mi caj a pʌyon majlel ti panchan ba'an a ñuclel.
25Cʌxti anic yambʌ mu' bʌ c ñop ti panchan.
Com jach jatet ti pañimil, mach comic yambʌ.
26Ma'anix i p'ʌtʌlel c bʌc'tal yic'ot c pusic'al.
Pero Dios i p'ʌtʌlelʌch c pusic'al. C cha'añʌch ti pejtelel ora.
27Q'uele bajche' mi' jilelob jini mu' bʌ i tʌts'ob i bʌ ba' añet.
Mi caj a jisan pejtel mu' bʌ i cʌyet.
28Pero joñon mic taj c wenlel che' mic ñochtan Dios.
Tsa'ix c xuc'choco c bʌ ti lac Yum
Cha'an mi mejlel c sub pejtelel i melbal.
Currently Selected:
SALMOS 73: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.