SALMOS 66
66
Tsiquil i ñuclel Dios ti' yejtal tac i p'ʌtʌlel
1Pejteletla añet bʌ la ti pañimil, tijicña yom mi la' pejcan Dios.
2C'ʌyibenla i c'aba' come ñuc.
Subula i ñuclel come i t'ojol jax.
3Subenla Dios: Bʌbʌq'uen a melbal.
Jini cha'an mi' yumañet a contrajob cha'an wen ñuc a p'ʌtʌlel.
4Ti pejtelel pañimil mi' ñoctʌlob ti a tojlel.
Mi' c'ʌyiñetob, mi' c'ʌyiñob a c'aba' cha'an ñuc. Che'ʌch yom mi la' suben.
5La'cula, q'uelela i melbal Dios.
Bʌbʌq'uen i melbal ti' tojlel winicob x'ixicob.
6Dios tsi' tiquesa jini colem ñajb.
Jini winicob x'ixicob tsi' xʌñʌyob ñumel jini colem ja' ti' yoc.
Tijicña tsa cubi lojon ya'i ti lac Yum.
7Mi' cha'len yumʌl ti' p'ʌtʌlel ti pejtelel ora.
Mi' q'uel pejtel winicob x'ixicob.
Tsajiletla ame la' chañ'esan la' bʌ jatetla mu' bʌ la' ñusʌben i t'an.
8Winicob x'ixicob, ch'ujutesanla Dios.
Pam subula majlel i ñuclel.
9Come cʌntʌbilonla i cha'an ti pañimil c'ʌlʌl wʌle.
Mi' cʌntʌbeñonla la coc ame yajliconla.
10Jatet Dios, tsa'ix a wilʌbeyon lojon c pusic'al.
Che' bajche' mi' pulel tsucul taq'uin tsa'ix a sʌq'uesayon lojon.
11Tsa' cha' otsayon lojon ti to'o majtan e'tel yilal.
Tsa' wʌq'ueyon lojon wen al bʌ j cuch lojon.
12Tsa' wotsayon lojon ti' wenta jontol bʌ winicob.
Tsac ñusa lojon c'ajc yic'ot ja',
Pero tsa' cha' ac'ʌyon lojon ba' tijicña pañimil.
13Mi caj cochel ti a wotot. Mi caj c ch'ʌmbeñet tilel pulbil bʌ a majtan.
Mi caj c ts'ʌctesan jini t'an tsa' bʌ c subeyet.
14Jini tsa' bʌ cʌlʌ che' bʌ tsa cubi wocol, mux c mele'.
15Mi caj cʌq'ueñet jujp'em bʌ tat tiñʌme' yic'ot i tat wacax yic'ot i tat chivo, pulbil tac bʌ a majtan,
Yic'ot i buts'il tat tiñʌme'.
16Bej chocola tilel la' bʌ. Ubinla, pejtel mu' bʌ la' bʌc'ñan Dios.
Mi caj c sub chuqui tsi' melbeyon Dios cha'an mi' coltañon.
17C'am tsac pejca Dios.
Ti quej tsac pam pucu i ñuclel.
18Muq'uic c chʌn c'uxbin mulil,
Mach i jac'ʌyic c t'an jini lac Yum.
19Pero tsa'ix i yubiyon Dios ti melel.
Tsi' jac'beyon coración.
20La' ch'ujutesʌntic Dios,
Come ma'anic tsi' ñusʌbeyon coración.
Ma'anic tsi' cʌyʌ i c'uxbiñon.
Currently Selected:
SALMOS 66: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.