SALMOS 64
64
Woli' chijtañob i contrajob
1Dios, ubibeñon c t'an che' mic subeñet c wocol.
Coltañon ame i bʌc'tesañon j contra.
2Otsañon ba' mucul, ba' mach i tajayoñobic jini mu' bʌ i temob i t'an cha'an mi' contrajiñon.
3Mi' c'ʌñob i yac' che' bajche' espada.
Mi' cha'leñob jontol bʌ t'an che' bajche' jini mu' bʌ i c'ʌñob jalʌjb ti julbʌl
4Cha'an mi' lowob jini tojo' bʌ woli' bʌ i chijtañob.
Ti ora jach mi' julob. Mach yujilobic bʌq'uen.
5Mi' comol xic'ob i bʌ ti jontolil woli bʌ i mucul ña'tañob.
Mi' temob i t'an cha'an mi' chucob jini p'ump'uño' bʌ.
Mi' lon alob: Ma'anic majch mi' q'uel, che'ob.
6Mi' wʌn ña'tañob chuqui mi caj i melob.
Ti mucul jach mi' chajpañob i bʌ.
Mach tsiquilic chuqui an ti' pusic'al winic, mi chuqui an ti' jol.
7Dios mi caj i yʌq'ueñob i toj i mul.
Ti ora jach mi caj i lowob ti' te'el jalʌjb.
8Mi' cajelob ti yajlel cha'an socol i t'an.
Pejtel mu' bʌ i q'uelob mi caj i toj sajtelob i pusic'al.
9Pejtelel winicob mi' cajelob ti bʌq'uen.
Mi caj i subob i melbal Dios.
Mi caj i ña'tañob wen an i ña'tʌbal Dios ti pejtelel i melbal.
10Tijicña mi caj i yubiñob jini tojo' bʌ mu' bʌ i ñopob lac Yum.
Pejtel jini tojo' bʌ i pusic'al mi caj i subob ti ñuc.
Currently Selected:
SALMOS 64: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.