PROVERBIOS 9
9
An i wenlel lac ña'tʌbal
1Jini mach bʌ anic i p'isol i ña'tʌbal tsi' mele i yotot. Tsi' wa'chocobe i yoyel, i t'ojol jax bʌ i ts'ijbal. 2Tsi' tsʌnsa i wacax. Tsi' xʌbʌ vino. Tsi' tajsi i mesa. 3Tsi' choco majlel xpʌyoñelob ti tejclum ba' mi' rusin i bʌ bij cha'an mi' pʌyob tilel xñumelob. 4Tsi' yʌlʌ: La' tilic jini maxto bʌ anic i pusic'al. 5La' c'uxu c waj. Japʌ jini vino tsa' bʌ c chajpa. 6Cʌyʌx a mul. Taja a cuxtʌlel. Toj yom ma' mel che' bajche' jini mu' bʌ i ch'ʌmbeñob isujm, che'en.
7Jini mu' bʌ i tic' jini xwajleya mi' taj i ts'a'lentel. Jini mu' bʌ i lon ña'tan i cʌntesan, quisintic jax mi caj i melbentel. 8Mach a cʌntesan xwajleya ame ts'a'ic mi' q'uelet. Cʌntesan jini wen bʌ i pusic'al. Che' jini mi caj i c'uxbiñet. 9Cʌntesan jini am bʌ i ña'tʌbal. Mux i yutsi p'ojlel i ña'tʌbal. Cʌntesan jini toj bʌ. Mux i taj cabʌl i pusic'al. 10Jiñʌch i cajibal lac ña'tʌbal che' mi lac bʌc'ñan lac Yum. Jini mu' bʌ i cʌn jini Ch'ujul Bʌ, anix i ña'tʌbal. 11Jini mach bʌ anic i p'isol i ña'tʌbal mi' subeñonla: Mic ñajt'esan a jabilel cha'an jal ma' wajñel ti pañimil. 12Mi an cabʌl a pusic'al a wenlelʌch. Mi a wujil wajleya mux a toj, che'en.
An lac pʌyol ti mulil ja'el
13C'am mi' cha'len t'an jini tonto bʌ x'ixic. Leco i melbal. Ma'anic mi' jac' i cʌntesʌntel. 14Mi' buchtʌl ti' ti' i yotot ti yojlil tejclum ya' ti chan ba' mi' q'uel xñumelob. 15Mi' pejcan jini xñumelob toj bʌ mi' majlelob ti bij. Mi' yʌl: 16Jini maxto bʌ julemic i pusic'al la' ochic ba' añon, che'en. Jini x'ixic mi' pejcan jini mach bʌ anic i pusic'al: 17Uts'at mulil. Lajalʌch bajche' xujch'ibil bʌ ja' sumuc bʌ ti japol. Uts'at chuqui mi lac mel ti mucul. Lajalʌch bajche' sumuc bʌ waj, lon che'en. 18Jini winic mach yujilic woli' pʌjyel majlel ba'an chʌmeño' bʌ tsa'ix bʌ i jac'beyob i t'an. Ya' añob ti' tamlel mucoñibʌl jini pʌybilo' bʌ i cha'an.
Currently Selected:
PROVERBIOS 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.