PROVERBIOS 5
5
Cʌntan a bʌ
1Calobil, ch'ujbibeñon j cʌntesʌbal. La' ochic ti a chiquin a toj'esʌntel 2cha'an ma' mel chuqui uts'at, cha'an ma' sub chuqui tac isujm che' bajche' tsaj cʌntesayet. 3Jini x'ixic am bʌ i maña lajalʌch i t'an yubil bajche' chab. Ñumen bojy i t'an bajche' poyte'. 4Ch'aj bajche' xch'ajte' mi' yubin majqui jach mi' pi'len jini x'ixic. Mi' jejq'uel i pusic'al che' bajche' ti espada cha'wejl bʌ i yej. 5Jini x'ixic woli' majlel ti chʌmel. Woli ti jubel majlel ti mucoñibʌl. 6Jini x'ixic ma'anic mi' cʌn jini wen bʌ bij ba' mi lac taj laj cuxtʌlel. Xotol metel i bijlel. Mach yujilic baqui mi' majlel.
7Jini cha'an calobilob, ubibeñon c t'an, mach la' ñusʌbeñon. 8Ñajt yom ma' ñusan jini x'ixic am bʌ i ts'i'lel. Mach a ñochtʌben i ti' i yotot 9ame i ch'ʌmob a wenlel yaño' bʌ, ame a lon ñusan a jabilel ti' ye'tel jini jontol bʌ, 10ame ñʌm'acob ti a chubʌ'an jini mach bʌ a pi'ʌlobic, ame to'o jilic ti' yotot jini mach bʌ a pi'ʌlic. 11Che' jini mi caj a cha'len ajcʌn che' ti a jilibal, che' mi' jilel a bʌc'tal yic'ot a cuctal. 12Mi caj a wʌl: Obol jax c bʌ cha'an tsac ts'a'le j cʌntesʌntel. Tsac ñusa c tic'ol. Tsac tsʌtsesa c pusic'al. 13Ma'anic tsac jac'be i t'an c maestrojob. Ma'anic tsac ñich'ta jini tsa' bʌ i cʌntesayoñob. 14Colelix c junyajlel sajtel ti jontolil ti' tojlel xñopt'añob yic'ot jini mu' bʌ i tempañob i bʌ ti meloñel, che'et.
A wijñam woli' lajintel yic'ot ja' mu' bʌ a jap
15Japʌ a bajñel cha'an bʌ ja' mu' bʌ a luch ti a pozo. Luchu jini cuxul bʌ ja' ti jini joc'bil bʌ a cha'an. 16¿Mu' ba a lon bec' a wa'al ti calle tac? ¿Mu' ba a lon sʌt a wa'al ti plaza? 17Cʌntan a bʌ cha'an ma' c'uxbin a wijñam che' bajche' ma' wen cʌntan a wa'al. Mach a comol cha'anic yic'ot yaño' bʌ. 18La' lajmic a tiquin ti' ti ja' mu' bʌ i yʌq'ueñet Dios yic'ot a wijñam. Yom tijicñayet a wic'ot a wijñam tsa' bʌ a pʌyʌ che' ch'itoñet to. 19Lajalʌch a wijñam yilal bajche' i t'ojol bʌ me' yic'ot i t'ojol bʌ xch'oc me'. 20Calobil, ¿chucoch ma' mulan yambʌ x'ixic? ¿Yom ba ma' mec'ben i tajn yambʌ? Mach yomic. 21Come woli' q'uel lac Yum pejtelel chuqui tac mi' melob winicob x'ixicob. Mi' wen cʌmbeñob i melbalob.
22Chucbil xjontolil cha'an i jontolil. Cʌchʌl ti lazo yubil cha'an i mul. 23Jini mach bʌ cʌntesʌbilic mi' caj ti chʌmel. Mi' caj ti jilel cha'an ñuc bʌ i sajtemal.
Currently Selected:
PROVERBIOS 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.