PROVERBIOS 26
26
1Che' bajche' i ña'al tsʌñal ti' yorajlel ticwal, che' bajche' ja'al ti' yorajlel jajmel, che'ʌch ja'el jini tonto bʌ am bʌ ñuc bʌ i ye'tel. 2Jini xpuruwoc yic'ot x'ajlum che' jach mi' wejlel ñumel che' ma'anic mi' taj i t'uchlib. Che' ja'el i t'an xp'ajoñel ñumel jach mi' majlel. Ma'anic chuqui mi' tumbeñonla che' ma'anic lac mul. 3Laj an i c'ʌjñibal: Jini chicote cha'an caballo, jini freno cha'an i yej burro, jini asiyal cha'an i pat tonto bʌ. 4Che' mi' pejcañonla ti tonto jini tonto bʌ, mach yomic mi lac jac' ti tonto ame junlajalonicla yilal. 5Che' mi' pejcañonla ti tonto jini tonto bʌ, lajal yom mi lac jac' ame p'ip'ic mi' lon q'uel i bʌ. 6Jini mu' bʌ i choc majlel t'an ti' wenta jini tonto bʌ mi' yʌc' i bʌ ti asintel. Woli' tsep loq'uel i yoc yubil come mach c'otic i t'an. 7¿Chuqui i ye'tel i yoc jini mach bʌ mejlic ti xʌmbal? Lolom ja'el i subal jini año' bʌ i pusic'al che' mi' cha' subob jini tontojo' bʌ. 8¿Chuqui i ye'tel a pʌrʌntun mi tsa' cʌchbe i xajlelal? Che' ja'el ma'anic i c'ʌjñibal tonto bʌ mi tsa' wa'choco ti ñuc bʌ i ye'tel. 9Bʌbʌq'uen mi' lowonla ic'ch'ix che' ch'ʌnch'ʌña jax mi' ñijcan xyʌc'ʌjel. Lajal an i p'ʌtʌlel ti jisaya jini tonto bʌ che' mi' cha' al i subal jini año' bʌ i pusic'al. 10Ma'anic i pusic'al jini yumʌlob mu' bʌ i pʌyob tilel ti e'tel tontojo' bʌ yic'ot jini ñaxan to bʌ mi' tilelob mach bʌ i cʌñʌyobic. Lajalob bajche' jini xjalʌjb mu' bʌ i lu' jul. 11Lajal jini tonto bʌ bajche' ts'i'. Che' bajche' mi' cha' sujtel ts'i' cha'an mi' mʌc' i xej che'ʌch mi' sujtel jini tonto bʌ cha'an mi' cha' mel i tontojlel. 12¿A cʌñʌ ba winic mu' bʌ i lon q'uel i bʌ ti ñuc? Mi' lon al ts'ʌcʌlix i ña'tʌbal. Ñumen an i ye'tel tonto bʌ bajche' jini winic. 13Jini ts'u' bʌ mi' yʌl: Mach loq'uicon ti e'tel come ya'an bajlum ya'ya'i. Tic'ʌl mi talix ti bij, lon che'en. 14Lajalʌch jini ts'u' bʌ bajche' puerta. Che' bajche' welecña mi' majlel puerta chucul bʌ ti' ti' otot che'ʌch ja'el jini ts'u' bʌ ya jach ñolocña ti' wʌyib. 15Jini ts'u' bʌ mi' yotsan i c'ʌb ti ch'ejew. Mi' lujb'an i cha' letsan ti' yej yilal. 16Mi' lon ña'tan ñumen an i ña'tʌbal bajche' wuctiquil yujilo' bʌ toj'esa t'an. 17Jini mu' bʌ i xʌb otsan i bʌ ba' woliyob ti leto lajalʌch bajche' winic mu' bʌ i chucben i chiquin ts'i' che' mach i cha'anic. 18Sojquem i jol yilal jini mu' bʌ i yʌlol choc xutunte' woli bʌ ti lejmel. Che'ʌch ja'el jini ch'ʌnch'ʌña jax bʌ mi' choc majlel sʌp yujil bʌ tsʌnsa. 19Lajal ja'el jini winic mu' bʌ i lotin i pi'ʌl. Ti wi'il mi' suben: Cʌxtʌ tsa'ic c cha'le lot. Alas jach, mi' lon al. 20Mi' yajpel c'ajc che' ma'anix si'. Mi' lajmel a'leya che' ma'anix xjop't'an. 21Jini yujil bʌ a'leya lajalʌch bajche' abʌc yic'ot si' mu' bʌ i chuc c'ajc. Jini yujil bʌ a'leya mi' chʌq'uesan majlel a'leya. 22Lajalʌch i t'an jini x'uyaj bajche' sumuc bʌ i bʌl lac ñʌc'. C'ʌlʌl ti lac pusic'al mi' c'otel. 23Jini xlotiya lajalʌch bajche' uc'um ch'ʌlbil ti' p'ajomal plata. Uts i t'an yilal pero ya' mucul ti' pusic'al an jontolil. 24Jini mu' bʌ i mucul ts'a'leñonla uts mi' pejcañonla, pero ya' ti' pusic'al mi' p'ol lot. 25Che' mi' pejcañet ti uts bʌ t'an mach a ñop come leco i pensar. 26Anquese utsʌch i t'an mu' bʌ i mucul ts'a'leñet, mi caj i tsictesʌntel i mul ti' tojlel jini mu' bʌ i tempañob i bʌ. 27Jini mu' bʌ i japun lum cha'an mi' yʌc' ti yajlel i pi'ʌlob mi' caj ti yajlel ya'i. Jini mu' bʌ i woxq'uin xajlel mi' caj ti lojwel ti xajlel. 28Lajalʌch bajche' veneno jini u'yaj t'an. Cabʌl mi' p'ol wocol. Jini mu' bʌ i cha'len lotiya mi' caj ti com'esʌntel i jabilel.
Currently Selected:
PROVERBIOS 26: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.