NUMEROS 30
30
Mandar cha'an majqui mi' yʌc' i t'an
1Moisés tsi' sube jini ñuco' bʌ i ye'tel ti Israel: 2Lac Yum tsi' yʌlʌ: Che' an winic mu' bʌ i yʌc' i t'an ti' tojlel lac Yum cha'an chuqui tac mi caj i mel, mi tsi' ña'ta ti' pusic'al, mi tsi' yʌlʌ ti yej, mach yomic che' jach mi' cʌytʌl. Yom mi' wersa ts'ʌctesan i t'an. 3Che' an x'ixic mu' bʌ i yʌc' i t'an ti' tojlel lac Yum cha'an chuqui tac mi caj i mel che' anto ti' wenta i tat, 4mi ma'anic tsi' tiq'ui i tat che' bʌ tsi' yubibe i t'an, che' jini wersa mi' ts'ʌctesan i t'an jini xch'oc. 5Pero che' anto ti' wenta i tat, mi tsi' tiq'ui che' bʌ tsi' yʌc'ʌ i t'an jini xch'oc, che' jini quepel mi' cʌytʌl pejtelel jini tsa' bʌ i ña'ta i mel jini xch'oc. Lac Yum mi caj i ñusʌben i mul come i tat tsi' tiq'ui.
6Pero mi ñujpuñemix jini x'ixic mu' bʌ i yʌc' i t'an cha'an chuqui mi caj i melben lac Yum, mi tsi' yʌc'ʌ lolom jach bʌ i t'an, 7mi ma'anic tsi' tiq'ui i ñoxi'al che' bʌ tsi' yubibe i t'an i yijñam, wersa mi' ts'ʌctesan pejtelel jini tsa' bʌ i yʌlʌ jini x'ixic. 8Pero mi jini i ñoxi'al tsi' tiq'ui che' bʌ tsi' yubibe i t'an i yijñam, che' jach mi' cʌytʌl pejtelel i t'an jini x'ixic. Lac Yum mi caj i ñusʌben i mul. 9Mi meba' jini x'ixic mu' bʌ i yʌc' i t'an ti' tojlel lac Yum, mi cʌybil i cha'an i ñoxi'al, wersa mi' ts'ʌctesan pejtelel chuqui tsi' yʌlʌ.
10-11Mi ñujpuñem jini x'ixic tsa' bʌ i yʌc'ʌ i t'an, mi chumul yic'ot i ñoxi'al, che' jini wersa mi' ts'ʌctesan chuqui tsi' yʌlʌ mi ma'anic tsi' tiq'ui jini i ñoxi'al che' bʌ tsi' yubi. 12Pero mi tsi' tiq'ui i ñoxi'al che' bʌ tsi' yubi, che' jini pejtelel jini tsa' bʌ i yʌlʌ mu' bʌ caj i mel jini x'ixic, che' jach mi' cʌytʌl, come i ñoxi'al tsi' tiq'ui. Lac Yum mi caj i ñusʌben i mul jini x'ixic.
13Che' jini an ti' wenta i ñoxi'al mi tsi' tiq'ui i yijñam che' bʌ tsi' yʌc'ʌ i t'an o mi ma'anic tsi' tiq'ui che' bʌ tsi' yubibe i t'an. Mi ma'anic tsi' tiq'ui wersa mi' ts'ʌctesan i t'an i yijñam. 14Pero mi ñʌch'ʌl jach i ñoxi'al, mi ma'anic tsi' tiq'ui che' bʌ tsi' yʌc'ʌ i t'an, che' jini lajal woli' yʌc' i t'an yic'ot i yijñam yubil. Wersa mi' ts'ʌctesan jini mu' bʌ i yʌl jini x'ixic. 15Pero mi tsa' caji i wi'i tic' che' bʌ tsa'ix i wa'choco i t'an jini i yijñam, che' jini bajñel an ti' wenta i mul jini winic. 16Jiñʌch i mandar lac Yum tsa' bʌ i sube Moisés cha'an x'ixicob año' bʌ ti' wenta i ñoxi'al, yic'ot xch'ocob añob to bʌ ti' wenta i tat.
Currently Selected:
NUMEROS 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.