NEHEMIAS 1
1
Mi cha'len oración Nehemías cha'an Jerusalén
1Jiñʌch i t'an Nehemías i yalobil Hacalías. Che' ti diciembre che' ñumenix junc'al jab che' woli ti yumʌntel jini rey Artajerjes, ya' añon ti Susa i tejclum rey. 2Tsa' juli Hanani, juntiquil c pi'ʌl, yic'ot yaño' bʌ winicob loq'uemo' bʌ ti Judá. Tsaj c'ajtibeyob bajche' yilalob jini judíojob ya' bʌ chumulob. I p'olbalobʌch jini tsa' bʌ cʌleyob che' bʌ tsa' wersa cʌjchiyob majlel i pi'ʌlob. Tsaj c'ajtibeyob ja'el bajche' yilal jini tejclum Jerusalén. 3Tsi' subeyoñob: Cabʌl woli yubiñob wocol jini judíojob ya' bʌ chumulob. Ma'anic jaytiquilob tsa' bʌ cʌleyob ti lum che' bʌ tsa' wersa pʌjyiyob i pi'ʌlob. Cabʌl woli' ts'a'lentelob. Jejmen to jini ts'ajc am bʌ ti' joytilel Jerusalén. Tsa' laj puli jini colem tranca tac ya' ti' yochib tejclum, che'ob.
4Che' bʌ tsa cubi ili t'an tsa' buchleyon. Tsa' cajiyon ti uq'uel. Tsa cuc'ta jini tejclum cha'p'ejl uxp'ejl q'uin. Tsac cha'le ch'ajb yic'ot oración. Tsac pejca Dios am bʌ ti panchan. 5Tsa cʌlʌ: C Yum Dios añet bʌ ti panchan, mic pejcañet. P'ʌtʌl bʌ Dioset cabʌl a ñuclel. Mic bʌc'ñañet lojon. Ma' pʌsbeñob a wutslel yic'ot i sujmlel a pacto pejtel mu' bʌ i jac'beñetob a mandar, mu' bʌ i c'uxbiñetob. 6Awocolic ñich'tʌbeñon c t'an. Q'ueleyon ti uts'at. Ubibeñon coración. Come a winicon, wolic mel oración ti a tojlel ti q'uiñil yic'ot ti ac'ʌlel. Wolic tajob ti oración a cha'año' bʌ ti Israel come israelon ja'el. Wolic subeñet c mul lojon tsa' bʌ c mele lojon ti a contra. Isujm tsa'ix c cha'le lojon mulil joñon quic'ot c pi'ʌlob. 7Cabʌl tsaj cʌyʌyet lojon cha'an c sajtemal lojon. Ma'anic tsac jac'ʌ lojon a mandar yic'ot a ley yic'ot a t'an tsa' bʌ a wʌq'ue Moisés a winic. 8Ña'tan jini t'an tsa' bʌ a wʌq'ue Moisés jini a winic. Tsa' sube: “Mi mach xuc'ulic mi la' jac'beñon c t'an, mi caj c pam puquetla majlel ti ñajtʌl ba'an yan tac bʌ winicob x'ixicob. 9Che' bʌ pam pujquemob la' walobilob ti ñajtʌl cha'an tsi' ñusayob c t'an, mi caj c cha' pʌyob tilel mi ti pejtelel i pusic'al mi' sutq'uiñob i bʌ ba' añon cha'an mi' jac'ob c mandar, cha'an mi' melob bajche' mic sub. Anquese ñajt pujquemob c'ʌlʌl ti junwejl pañimil, mi caj c cha' tempañob. Mi caj c pʌyob tilel ti jini lum yajcʌbil bʌ c cha'an ba' mi caj cʌc' ti c'uxbintel j c'aba'”, che'et. 10Jiñobʌch a winicob, a tejclumob, tsa' bʌ a colta ti ñuc bʌ a p'ʌtʌlel che' bʌ tsa' loc'sayob ti Egipto. 11C Yum, a wocolic mij c'ajtibeñet, ñich'tʌbeñon coración come a winicon. Ñich'tʌbeñob i yoración a winicob año' bʌ ti Jerusalén mu' bʌ i tajob i tijicñʌyel cha'an woli' bʌc'ñañob a c'aba'. Coltañon ti ili q'uin cha'an mi' yujtel ti uts'at chuqui com c mel. Ñijcʌben i pusic'al jini rey cha'an mi' p'untañon ba' ora mic pejcan, cho'on ti oración. Joñon mic ñusʌben i taza jini rey.
Currently Selected:
NEHEMIAS 1: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.