JOSUE 1
1
Tsi' chajpayob i bʌ cha'an guerra
1Moisés i winicʌch lac Yum. Che' chʌmenix Moisés, lac Yum tsi' pejca Josué i yalobil Nun tsa' bʌ i pi'le Moisés ti' ye'tel: 2Tsa'ix chʌmi c winic Moisés. Yom ma' chajpan a bʌ wʌle. Yom ma' c'axel ti ili colem ja' i c'aba' Jordán a wic'otob pejtel ili israelob. Yom ma' majlel ti jini lum mu' bʌ caj cʌq'ueñetla. 3Tsa'ix cʌq'ueyetla jini lum che' bajche' tsac wʌn sube Moisés. Pejtelel jini lum ya' ba' ma' cha'len xʌmbal a cha'añʌch, 4c'ʌlʌl ya' ti tiquin bʌ lum, yic'ot ya' ti lum i c'aba' Líbano, c'ʌlʌl ti colem ja' i c'aba' Eufrates. A cha'añʌch pejtelel i lumal heteojob, c'ʌlʌl ti colem ja' ya' ti' tojel i bʌjlibal q'uin. 5Ma'anic majch mi caj i mʌjlel i cha'an che' mi' contrajiñet, che' wʌ'to añet ti pañimil. Che' bajche' tsa' ajniyon quic'ot Moisés mi cajñel quic'otet ja'el. Ma'anic mi caj j cʌyet ti a bajñelil. Mach p'ump'unic mi caj j cʌyet.
6Yom ma' p'ʌtesan a bʌ. Yom ch'ejlet, come mi caj a t'oxben ili lum jini winicob x'ixicob cha'an mi' ch'ʌmob. Jiñʌch jini lum mu' bʌ caj cʌq'ueñob che' bajche' tsac wʌn sube a ñojte'elob. 7Cojach yom ma' ch'ejl'esan a bʌ. Yom ch'ejlet cha'an ma' wen jac' pejtelel c mandar tsa' bʌ i subeyet c winic Moisés. Toj jach yom ma' majlel. Mach yomic ma' xoyben i bijlel Moisés mi ti a ñoj mi ti a ts'ej. Che' jini mi caj i mʌjlel a cha'an ti pejtelel chuqui ma' mel. 8Mach yomic ma' cʌy a sub jini mandar. Yom ma' chʌn ña'tan ti a pusic'al ti q'uiñil yic'ot ti ac'ʌlel cha'an ma' jac', cha'an ma' mel pejtelel jini ts'ijbubil bʌ ti mandar. Che' jini mi caj a cha'len xʌmbal ti uts'at. Pejtelel mu' bʌ a mel mi caj i loq'uel ti uts'at. 9Jiñʌch c mandar woli bʌ c subeñet. Yom ma' p'ʌt'esan a bʌ. Yom ch'ejlet. Mach a cha'len bʌq'uen. Mach yomic ma' lujb'an. Come lac Yum Dios mi caj i yajñel a wic'ot baqui jach ma' majlel. Che' tsi' yʌlʌ lac Yum.
10Josué tsi' yʌq'ueyob mandar jini año' bʌ i ye'tel: 11Yom mi la' ñumel ti yojlil ya' ba' woli' jijlelob israelob. Yom mi la' subeñob: “Chajpanla i bʌl lac ñʌc', come ti yuxp'ejlel q'uin mi caj la' c'axel ya' ti Jordán ja' cha'an mi la' wochel ti jini lum mu' bʌ i yʌq'ueñetla lac Yum Dios. Mi caj la' ch'ʌm jini lum ti la' wenta”, che'en.
12Che' ja'el Josué tsi' subeyob jini rubeñob yic'ot jini gadob yic'ot manasesob, i pi'ʌlo' bʌ efraíñob: 13Yom mi la' ña'tan jini t'an tsa' bʌ i subeyetla Moisés jini i winic lac Yum: “Lac Yum Dios mi caj i yʌq'ueñetla ili lum. Mi caj la' wajñel ti xuc'ul”, che'en Moisés. 14La' wijñam yic'ot la' walobilob yic'ot la' wʌlac' mi caj i cʌytʌlob ti ili lum tsa' bʌ i yʌq'ueyetla Moisés. Ma'anic mi caj i c'axelob ti Jordán ja'. Pero jatetla yic'ot pejtel jini ch'ejlo' bʌ mi caj la' c'axel ñaxan ti' tojel la' pi'ʌlob. Yom chajpʌbiletla cha'an guerra. 15Yom mi la' coltan la' pi'ʌlob israelob jinto lac Yum Dios mi' yʌc'ob ti ochel cha'an xuc'ul mi yajñelob che' bajche' jatetla. Mi caj i ch'ʌmob ti wenta i lumob. Ti' wi'il mi caj la' cha' sujtel ti la' lumal tsa' bʌ la' ch'ʌmʌ. Jiñʌch la' lumal tsa' bʌ i yʌq'ueyetla Moisés i winic lac Yum ti junwejl Jordán ja' ya' ti' tojel i pasibal q'uin. Che' tsi' yʌlʌ Josué.
16Tsi' jac'beyob Josué. Tsi' yʌlʌyob: Mi caj c mel lojon pejtelel mu' bʌ a subeñon lojon. Mi caj c majlel lojon baqui jach a wom. 17Che' bajche' tsac jac'be lojon pejtelel tsa' bʌ i yʌlʌ Moisés, che'ʌch ja'el mi caj c jac'beñet lojon. Yom mi' yajñel lac Yum Dios a wic'ot che' bajche' tsa' ajni yic'ot Moisés. 18La' tsʌnsʌntic jini mu' bʌ i ñusʌbeñet a mandar, jini mach bʌ anic mi' jac'beñet a t'an ti pejtelel. Cojach yom ma' p'ʌt'esan a bʌ. Yom ch'ejlet. Che' tsi' yʌlʌyob jini rubeñob yic'ot gadob yic'ot manasesob.
Currently Selected:
JOSUE 1: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.