JOEL 3
3
Lac Yum mi caj i mel winicob x'ixicob
1Woli' chʌn sub lac Yum: Ti jini q'uin che' mic cha' aq'uen i wenlel año' bʌ ti Judá yic'ot ti Jerusalén, 2mi caj c pʌy majlel soldadojob año' bʌ ti pañimil ya' ti joctʌl am bʌ i c'aba' Lac Yum Mi' Cha'len Meloñel. Mi caj c tsictesʌbeñob i mul cha'an tsi' tic'layob c tejclumob. Tsi' pucuyob c cha'año' bʌ ti ñajt bʌ lum. Tsi' t'oxbeyob i bʌ jini c lum. 3Tsi' cha'leyob alas cha'an mi' yajcañob majqui mi caj i ch'ʌm winicob x'ixicob cha'an mi' yochelob ti' mozo. Tsi' yʌc'ʌyob ch'iton ti' q'uexol ts'i'lel x'ixic. Tsi' yʌc'ʌyob xch'oc ti' q'uexol i ya'lel ts'usub.
4Mach yomic mi la' xʌ' otsan la' bʌ añet bʌ la ti Tiro yic'ot ti Sidón yic'ot ti Filistea. Ma'anic i mul israelob ti la' tojlel cha'an mi la' q'uextʌbeñob. Mi woliyʌch la' ña'tan la' jats'ob, cha'lenla bʌq'uen come mi caj c cha' jats'etla ti ora. Mi caj c cha' q'uextʌbeñetla la' jontolil. 5Tsa'ix la' chilbeyon c plata yic'ot oro yic'ot pejtel letsem tac bʌ i tojol. Tsa'ix la' ch'ʌmʌ majlel ti' yotlel la' dios tac. 6Ya' ba'an griegojob tsa' la' choño' winicob x'ixicob loq'uemo' bʌ ti Judá yic'ot Jerusalén. Ñajt tsa' la' pʌyʌyob majlel. 7Mi caj c cha' pʌyob tilel ya' ba' tsa' la' choñoyob. Mi caj j q'uextʌbeñetla pejtelel la' mul. 8Mi caj c chon la' walobilob ba'an c winicob ti Judá mu' bʌ caj i cha' choñob ti ñajtʌl ba'an sabeojob. Che'ʌch tsi' yʌlʌ lac Yum.
9Subeñob ti pejtelel pañimil: “Chajpan la' bʌ cha'an guerra. Pʌyʌla wen ch'ejl bʌ soldadojob. Tempanla pejtelel la' soldadojob. 10Yom mi la' wulmesan top'o' lum cha'an mi la' pʌntesan ti espada. Jats'ʌla jini e'tijibʌl cha'an pora cha'an mi' pʌntʌyel ti lanza. La' p'ʌtacob jini c'uño' bʌ. 11Tempan la' bʌ. La'la winicob x'ixicob ti pejtelel pañimil”.
Wʌle c Yum, pʌyʌ tilel a soldadojob. 12Lac Yum tsi' jac'ʌ: Tempan la' bʌ, winicob ti pejtelel lum tac. La'la ti joctʌl i c'aba' Lac Yum Mi' Cha'len Meloñel. Come ya'i mi caj c mel pejtelel winicob ti pañimil, che'en lac Yum.
13I yorajlelix meloñel. C'ʌnix i wut ts'usubil. La'ix tejchic ti tujq'uel. Wilts'unixla i yʌjts'ib, come wen cabʌl i jontolil winicob. 14Bajc'ʌl winicob x'ixicob añobix ti joctʌl Melobʌjʌl. Come lʌc'ʌlix tal i Q'uiñilel lac Yum ya' ti Joctʌl Ba' Mi Caj i Melob i Bʌ. 15Mux i mʌjquel q'uin yic'ot uw. Jini ec' ma'anix mi caj i chʌn pʌs i c'ʌc'al.
Jini año' bʌ ti Judá muq'uix caj i yajñelob ti libre
16Lac Yum mi caj i cha'len c'am bʌ t'an ya' ti' Templo ti Jerusalén. Mi caj i tilel yujquel lum. Mi caj i ñijcʌyel panchan. Pero wen uts lac Yum ti' tojlel i cha'año' bʌ. I xuctilelʌch jini israelob. 17Mi caj la' cʌñon la' Yumon, la' Dioson, che'en. Wʌ' chumulon ti Sion jini ch'ujul bʌ wits c cha'an. Jerusalén c cha'añʌch ti pejtelel ora. Tal i yorajlel ma'anix mi caj i chʌn ñumelob soldadojob ch'oyolo' bʌ ti ñajtʌl.
18Mi caj i chʌjq'uel jini tsaj bʌ i ya'lel ts'usub ti wits. Mi' caj ti oñ'an lech che' bajche' pa' ti bujtʌl. Jini tiquin bʌ pa' tac ya' ti Judá mi caj i cha' cuxtʌyel. Jini cuxul bʌ ja' mi caj i wʌjlel loq'uel ya' ti' Templo lac Yum cha'an mi' yʌch'esan jini joctʌl Sitim. 19Mi caj i jisʌntel Egipto yic'ot Edom cha'an i jontolil ti' contra i p'olbal Judá, come tsi' tsʌnsayob winicob x'ixicob mach bʌ añobic i mul.
20Mi caj i chʌn ajñelob winicob x'ixicob ti Judá ti pejtelel ora. Wʌ' ti Jerusalén mi caj i yajñelob i yalobilob ti lajm ti lajm. 21Mi caj j q'uextʌbeñob i jontolil pejtelel tsa' bʌ i tsʌnsayob c cha'año' bʌ. Ma'anic mi caj c ñusʌbeñob i mul tsa' bʌ i tic'layob. Come woliyon ti chumtʌl wʌ' ti Jerusalén quic'ot c cha'año' bʌ, che'en lac Yum.
Currently Selected:
JOEL 3: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.