JOB 30
30
Job woli ti uq'uel cha'an p'ump'un
1Mach che'ix wʌleyi. Mi' wajleñoñob winicob yic'ot ja'el ch'itoñob. Ti yambʌ ora tsa'ic i c'ajtibeyoñob e'tel i tatob, ma'anic tsa cʌq'ueyob mi jinic jach cha'an mi' pi'leñob ti e'tel c ts'i' woli bʌ i cʌntan c tiñʌme'. 2Tsa'ic cʌq'ueyob i ye'tel, ma'añobic i c'ʌjñibal, come tsa'ix i jisayob i p'ʌtʌlel ti mulil. 3Yajyajob cha'an wi'ñal. Chocbilob majlel ti jochol bʌ lum ba' ma'anic chuqui mi' colel. 4Mi' tuc'ob chapʌy yic'ot i yopol xc'ʌn'ej yic'ot i buts. Mi' c'uxob i ña'al ch'ib. 5Chocbilob loq'uel ti tejclum. Jini xchumtʌlob ts'a' mi' q'uelob che' bajche' xujch'. 6Wersa mi' majlelob ti chumtʌl ti' jajp wits yic'ot ti' jajp xajlel. 7Muculob ti yebal tsu'um te' mi' cha'leñob oñel. Ya' ba'an ch'ixol cotcotña mi' ñumelob. 8Che' bajche' i tatob che'ʌch ja'el i yalobilob. Ma'añobic i pusic'al. Chocbilob loq'uel ti' tojlel xchumtʌlob.
9Wʌle mi' c'ʌyiñoñob ti wajleya. Mi' wajleñoñob ti c'ay. 10Ts'a' mi' q'ueloñob. Mach yomobic i ñochtañon. Chan mi' melob i bʌ. Mi' tujbañob c wut. 11Dios tsi' jultesʌbeyon c pusic'al. Ma'anix c p'ʌtʌlel cha'an mic tic'ob. Jini cha'an ma'anix i frenojlel. Mi' melob bajche' jach yomob. Mach yujilobic quisin. 12Mi' xit chocoñoñob tic ñoj cha'an mic yajlel. Mi' yʌc'ob yac tic bijlel. 13Mi' tujc'añob lazo cha'an mi' chucob coc che' woliyon ti ñumel. Yujilob ma'anic caj coltaya. 14Ti ajñel mi' tilelob i chucon ya' ba' jembil pajc'. Mi' ñolchocoñoñob. 15Wʌle cujilix bʌq'uen. Ma'anix c ñuclel ti' tojlel winicob. Mach yujilobic p'untaya. Majlemix c wenlel che' bajche' tocal.
16Wʌle woli' c'uñ'an c pusic'al. Jujump'ejl q'uin chuculon ti wocol mach bʌ yujilic lajmel. 17Ti ac'ʌlel c'ux c bʌc'tal c'ʌlʌl mi' taj c bʌquel. Ma'anic mi' yʌq'ueñon c'aj co. Tsʌc'tsʌc'ña i c'uxel. 18Bʌlʌcñayon tic wʌyib cha'an wocol. Mic ts'ot c bʌ tic pislel. Tsʌts chuculon yubil che' bajche' ti' bic' bujcʌl. 19Dios tsi' chocoyon jubel ti oc'ol. Tsa'ix sujtiyon ti ts'ubejn yubil che' bajche' i tʌñil c'ajc. 20Mic pejcañet ti wocol t'an, Dios, pero ma'anic ma' jac'. Wa'alon ti a tojlel, pero ma'anic ma' q'uelon. 21Jontol a pusic'al tic tojlel. Ma'anic ma' p'untañon. Ma' letsan a c'ʌb a contrajiñon ti cabʌl a p'ʌtʌlel. 22Ma' ch'uyon letsel ti sutujt ic' yilal. Mi' wejlesañon majlel. 23Cujil ti isujm mux caj a pʌyon ti chʌmel ya' ba' tsa' wʌn ña'ta a pʌy majlel pejtel cuxulo' bʌ. 24Jini woli bʌ ti yajlel, ¿mach ba' anic mi' sʌts' i c'ʌb? Jini woli bʌ ti wocol, ¿mach ba muq'uic i c'ajtin i coltʌntel?
25Cujil uq'uel joñon cha'an jini p'ump'un bʌ. Cabʌl tsac tsiqui c pusc'al cha'an jini woli bʌ ti wocol. 26Jini cha'an tsa cʌlʌ mux caj a p'untañon. Pero lolom jach tsac pijta j coltʌntel. Tsa' p'ojli c wocol. Tsac lon pijta i sʌclel pañimil. Tsa' ic'a pañimil. 27Wen c'ux c pusic'al. Mach c'ajix co. Jini jach wocol mi cubin ti jujump'ej q'uin. 28Meba'on yubil. Wen ch'ijiyem c pusic'al. Che' mic wa'tʌl ba' tempʌbilob winicob, mu' jach j c'ajtibeñob j coltʌntel. 29Che'ʌch mi' q'ueloñob bajche' i pi'ʌl jontol bʌ ts'i' yic'ot i pi'ʌl jini xcuj. 30Iq'uix c pʌchʌlel cha'an c'amʌjel. Mi' sujliñiyel. Tiquinix c bʌc'tal cha'an c'ajc. 31Ma'anix tijicña bʌ tic tojlel. Jini arpa yic'ot amʌy mi cha'leñob uq'uel. Mi yuc'tañoñob cha'an wen ch'ijiyem c pusic'al.
Currently Selected:
JOB 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.