JOB 28
28
Winicob mi' sʌclañob i ña'tʌbal
1An i bijlel tac plata ti yebal lum. An e'tijibʌl mu' bʌ i c'ʌñob winicob cha'an mi' chicob loq'uel oro. 2An ba' mi' loc'sañob fierro ti lum. Mi' yulmesañob xajlel cha'an mi' loq'uel chʌchʌc taq'uin. 3Winicob tam mi' yochelob ti mal lum ti ic'ch'ipan bʌ pañimil cha'an mi' sajcañob jini letsem tac bʌ i tojol. Anquese bʌbʌq'uen mi' jilelob, tam mi' majlelob c'ʌlʌl ba' jaxʌl. 4Mi' jamob ch'en c'ʌlʌl ti yebal lum. Mi' c'ʌlʌl majlelob ti jochol bʌ lum ba' maxto c'otemic winic. Mi' ju'sañob i bʌ ti tam bʌ lazo chucul bʌ i cha'añob. Jʌmjʌmña mi' jubelob ochel. 5Jini lum mi' yʌq'ueñonla i bʌl lac ñʌc' cha'an ti la que'tel. Pero ti yebal lum an c'ajc. 6Ya' ti' xajb xajlel mi' tajob zafiro xʌbʌl yic'ot i ji'il oro.
7Ma'anic te'lemut mu' bʌ i cʌmben i bijlel oro. Mach c'otic i wut águila ya' ba' mi' tajtʌl. 8Ma'anic bʌte'el ya'ya'i. Mach c'otic bajlum. 9Pero mi' majlelob winicob yujilo' bʌ i top' tsʌts bʌ xajlel. Mi' jac'ob loq'uel i wi' jini colem wits. Mi' p'ulchocoñob ti pam. 10Mi' picob majlel bij ti yebal wits. Mi' loc'sañob i t'ojol jax bʌ ujʌl wen letsem bʌ i tojol. 11Mi' wa'chocoñob chan bʌ ts'ajc cha'an mi' mʌctañob i bijlel colem ja'. Mi' yʌc'ob ti tsictiyel jini mucul tac bʌ.
12Anquese yujilob pejtel jini, mach yujilobic baqui ch'oyol i ña'tibal mi majqui tsi' yʌq'ueyob i ch'ʌmben isujm. 13Ma'anic mi' p'isob ti' wenta mi ñumen an i c'ʌjñibal lac ña'tibal bajche' oro. Mach tilemic ti pañimil ba' poj chumulonla. 14Muq'uic lac sʌclan ti mal ch'en, mach lac tajayic. Muq'uic lac sʌclan ti colem ñajb, mach ya'ic an. 15Mach mʌmbilic ti taq'uin anquese puro oro. Mach tojbilic ti tsucul taq'uin. 16Mach chombilic ti oro ch'oyol bʌ ti Ofir mi ti ónice letsem bʌ i tojol mi ti zafiro. 17Ñumen an i c'ʌjñibal bajche' oro yic'ot diamante. Mach q'uextʌbilic cha'an ujʌl letsem bʌ i tojol chucul bʌ ti oro. 18I t'ojol jax jini tsepbil bʌ vidrio yic'ot coral, pero ñumen i t'ojol lac ña'tibal. Jini ñaxan bʌ yom tajol jiñʌch lac ña'tibal. Ñumen yom mi laj c'uxbin bajche' perla tac. 19Jini topacio ch'oyol bʌ ti Etiopía mach mejlic i mʌmbeñonla lac ña'tibal. Anquese alatax oro mach jasʌlic.
20¿Baqui ch'oyol lac ña'tibal? ¿Majqui mi' yʌq'ueñonla lac ch'ʌmben isujm? 21Ya' mucul ba' mach q'uelbilic i cha'an winicob x'ixicob. Mach q'uelbilic i cha'an te'lemut ti pañimil. 22An i tajol mi' yʌc' i bʌ ti cʌjñel che' ti' yorajlel lac chʌmel yic'ot ti' yorajlel wocol. 23Añʌch ti' wenta Dios. Cojach Dios yujil baqui mi' tajtʌl. 24Come Dios mi' pam q'uel pañimil c'ʌlʌl ba' jaxʌl. Mi' lu' q'uel chuqui mi' yujtel ti yebal panchan. 25Dios tsi' yʌq'ue i ye'tel ic'. Tsi' p'isi i yonlel colem ja'. Tsi' sube ba' mi' sujtel. 26Tsi' wʌn sube ja'al bajche' c'amel yom ti pañimil. Tsi' wʌn pʌsbe i bijlel jini ic' yic'ot i bijlel chajc woli bʌ ti t'an. 27Che' jini tsi' yʌc'ʌ ti tsictiyel i ña'tibal. Tsi' wʌn ña'ta bajche' yom. Tsi' chajpa. Tsi' yʌc'ʌ ti q'uelol. 28Tsi' sube winicob: Ubinla. Jiñʌch la' ña'tibal che' mi la' bʌc'ñan la' Yum Dios. Jini jach mi' ch'ʌmben isujm mu' bʌ i junyajlel cʌy i mul, che'en.
Currently Selected:
JOB 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.