ISAIAS 8
8
I c'aba' juntiquil i yalobil Isaías
1Lac Yum tsi' cha' subeyon: Yajcan junq'uel ñuc bʌ tabla cha'an ma' ts'ijban ti ñuc bʌ letra tac: Mi caj i yilan pañimil a walobil, jiñʌch Mahersalal Hasbaz. An i sujmlel i c'aba': Mach jalix mi caj i jisʌntel la' contrajob. 2Tsac pʌyʌ tilel cha'tiquil testigo, Urías jini motomaj yic'ot Zacarías i yalobil Jeberequías. Xuc'ulob ti cha'ticlel. Tsi' q'ueleyoñob che' bʌ tsac ts'ijba jini jun che' maxto cʌntʌbilic i cha'an i yalobil quijñam. 3Che' jini tsa' c'otiyon ba'an quijñam, jiñʌch x'alt'an ja'el. Tsa' caji' cʌntan i yalobil. Che' bʌ tsa'ix i yila pañimil, lac Yum tsi' subeyon: Yom ma' wotsʌben i c'aba' jini alʌl ti Mahersalal Hasbaz. P'isi ti wenta i sujmlel i c'aba'. 4Come che' maxto yujilic t'an cha'an mi' pejcan i tat yic'ot i ña' jini ch'iton, jini rey ch'oyol bʌ ti Asiria mi caj i mʌlben Damasco yic'ot Samaria. Mi caj i chilbeñob pejtelel i chubʌ'an, che'en.
5Lac Yum tsi' cha' pejcayon: 6Jini chumulo' ti Jerusalén tsi' cʌyʌyoñob. Mach yomobic mij cʌntañob. Yomob i c'ajtin i coltʌntel ti' tojlel jini rey Rezín, yic'ot jini rey Peka. 7-8Jini cha'an ti' caj i mul mi caj c choc tilel winicob che' bajche' but'ja', ch'oyolo' bʌ ti junwejl colem ja i c'aba' Eufrates. C'ax bʌbʌq'uen jax mi caj i q'uelob. Jini rey ti Asiria yic'ot cabʌl soldadojob mi caj i tilel ti' contra Jerusalén. Mi caj i c'ʌlʌl c'otel ti Judá che' bajche' but'ja' mu' bʌ i letsel ti' bic' winicob. Jini soldadojob mi caj i ñumelob ti pejtelel a lumal Emanuel (Dios la quic'ot), che'en lac Yum.
9-10Siriajob yic'ot israelob, melela chuqui jach la' wom ti' contra Judá, pero mach mʌjlic la' cha'an. Ñich'tañonla ti la' pejtelel. Much'quin la' bʌ cha'an mi la' contrajiñon lojon, pero mi caj la' jilel. Tempan la' bʌ. Laja la' t'an, pero mi caj la' jisʌntel, come wʌ'an Dios quic'ot lojon.
11Lac Yum tsa'ix i subeyon ti tsʌts bʌ t'an: Mach a jac'beñob jini año' bʌ ti Judá yom bʌ i yʌc'ob i bʌ ti' wenta Siria yic'ot Israel. 12Mach ma' puts'el ti bʌq'uen che' bajche' yaño' bʌ. Yom xuc'ul ma' nop Dios. Mach yomic mi' toj sajtel a pusic'al ti' tojlel Siria yic'ot Israel. 13Yom jach ma' bʌc'ñan i Yum Panchan yic'ot Pañimil. Cojach jini yom bʌc'ñʌntel ti pejtelel ora. 14-15Lac Yum jiñʌch xuc'ul bʌ otot yilal ba' mi caj a coltan a bʌ, pero ti' tojlel Israel yic'ot Judá jiñʌch Xajlel ba' mi' jats'ob i yoc, come mach yomobic mi' cʌntʌntelob cha'an lac Yum. Cabʌlob mi' cajelob ti yajlel. Mi' cajelob ti chujquel che' bajche' ti yac. Cʌchʌl mi caj i cʌytʌlob.
16Otsan cʌytʌl c t'an ti' pusic'al c cha'año' bʌ, che'en lac Yum. 17Mi caj c pijtan lac Yum mu' bʌ caj i coltañonla anquese tsi' mʌyʌ i wut cha'an mach mi' q'uelonla. Cojach jini mi caj c pijtan. 18Awilan, joñon quic'ot calobilob tsa' bʌ i yʌq'ueyon Dios, wa'chocobilon lojon cha'an mic tsictesʌben Israel i ñuclel lac Yum chumul bʌ ti wits i c'aba' Sion. Jiñʌch i Yum Panchan yic'ot Pañimil. 19¿Chucoch mi la' lon c'ajtibeñob xwujtob chuqui tac mi caj i yujtel? Mi' cha'leñob t'an che' bajche' te'lemut. Mach tsiquilic i sujmlel. Mach mi la' ñich'tʌbeñob i t'an. Jini cuxulo' bʌ ¿yom ba mi' cha' pejcañob jini chʌmeñobix bʌ? ¿Mejl ba i coltañob? Mach mejlic. ¿Mach ba yomic mi la' c'ajtiben Dios? 20Ña'tanla chuqui ts'ijbubil ti' T'an Dios. Ubinla i t'an: Majqui jach mi' contrajin c t'an jiñʌch payxo x'alt'an. Mach chocbilic tilel c cha'an, come ma'anic i c'ʌc'al. Mach i sujmic i t'an. 21Jini c cha'año' bʌ mi caj i pʌjyelob majlel. Mi caj i yubiñob wocol yic'ot wi'ñal. Mi caj i yochelob ti to'ol jach bʌ e'tel. Che' wi'ñayobix mi' cajelob ti mich'. Mi caj i letsañob i wut ti chan cha'an mi' p'ajob jini Rey i Dios. 22Awilan, baqui jach mi' q'uelob an cabʌl wocol yic'ot i'ic' bʌ pañimil yic'ot i ch'ijiyemlel. Mi caj i chojquelob ti ic'yoch'an bʌ pañimil. Che' tsi' yʌlʌ lac Yum.
Currently Selected:
ISAIAS 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.