ISAIAS 62
62
1Lac Yum woli' yʌl: Mach ñʌch'ʌlic mi caj j cʌytʌl, come c'ux mi cubin Sion. Mic p'untan Jerusalén. Ma'anic mi caj j c'aj co jinto mi' mel chuqui toj, jinto che' coltʌbilix cha'an mi' pam tsictiyel c tojel che' bajche' i sʌclel q'uin, che' bajche' c'ajc woli bʌ ti lejmel, che'en. 2Pejtelel tejclum tac mi caj i q'uelob toj a pusic'al. Pejtelel jini yumʌlob mi caj i q'uelob a ñuclel. Lac Yum mi caj i yʌq'ueñet tsiji' bʌ a c'aba'. 3A t'ojol jax ti' c'ʌb che' bajche' corona. I ch'ʌjlibet rey ti' c'ʌb Dios cha'an ma' pʌs i ñuclel i yumʌntel. 4Ma'anix majqui mi caj i yʌl “cʌybilet”. Ma'anix majqui mi caj i yʌl “jisʌbil a lumal”. Mi caj i yʌlob “c'uxbibilet i cha'an lac Yum” yic'ot “pʌybilet che' bajche' ti ñujpuñijel”, che'ob, come tijicña mi' q'uelet lac Yum. Ñujpuñemet yic'ot. 5A walobilob mi caj i c'uxbiñet, Jerusalén. Wen tijicñayob i pusic'al che' bajche' xñujpuñijel mu' bʌ i pʌy xch'oc cha'an i yijñam. Che' ja'el tijicña i pusic'al a Dios ti a tojlel.
6-7Joñon a Yumon, Jerusalén. Tsa'ix c wachoco xcʌntayajob ya' ti' ts'ajquil a tejclum mu' bʌ caj i pejcañonob ti oración ti q'uiñil yic'ot ti ac'ʌlel. Jatetla mu' bʌ la' c'uxbiñon mach yomic mi la' cʌy la' pejcañon. Mach mi la' wʌq'ueñon j c'aj co jinto mic tilel c cha' wen'esan Jerusalén, jinto che' tsa'ix c cha' mele ti uts'at, che' cha' anix i ñuclel Jerusalén ila ti pañimil. 8Tsa'ix c wa'choco c t'an. Tsa'ix c letsa j c'ʌb yujil bʌ e'tel. Ma'anix mi caj c chʌn aq'ueñob i c'ux a trigo a contrajob. Jini ch'oyolo' bʌ ti yambʌ lum, ma'anix mi caj i japob a vino tsa' bʌ a mele. 9Jini mu' bʌ i cha'leñob c'ajbal mi caj i c'uxob i wut. Mi caj i subob c ñuclel. Jini mu' bʌ i tuc'beñob i wut ts'usub mi caj i japob i ya'lel ya' ti' pat jini ch'ujul bʌ Templo c cha'an. 10Winicob x'ixicob, ochenla, ochenla ti' ti' tac Sion. Chajpʌbenla i bijlel c cha'año' bʌ cha'an mi' sujtelob. Wen melela jini colem bij. Loc'sanla pejtelel mu' bʌ i mʌctan. Letsanla i bandera Israel. 11La' wilan, tsa'ix cʌc'ʌ ti ubintel c'ʌlʌl ti' ñajtlel pañimil: Subeñob c cha'año' bʌ: “Joñon la' Yumon, la' Dioson. Talon cha'an mij coltañetla. Mi caj cʌq'ueñetla cabʌl la' majtan”. 12Mi caj i pejcʌntelob jini israelob ti Chujul bʌ Tejclum, yic'ot Coltʌbilo' bʌ i cha'an i Yum. Jixcu Jerusalén, mi caj i yotsʌbentel i c'aba' ti Sʌclʌbil bʌ Tejclum, yic'ot Tejclum mach bʌ Cʌybilic. Che' tsi' yʌlʌ lac Yum.
Currently Selected:
ISAIAS 62: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.