ISAIAS 44
44
Xuc'ul lac Yum jini cojach bʌ Dios
1Jini cha'an ñich'tan c t'an Jacob, c winic. I p'olbalet Israel yajcʌbil bʌ c cha'an. 2A Yum tsa' bʌ i meleyet che' cʌntʌbilet to, jiñʌch mu' bʌ caj i coltañet, che'en. Mach a cha'len bʌq'uen c winic Jacob, tojet bʌ. Tsac yajcayet. 3Joñon mi caj c choc tilel ja'al ya' ba' tiquin pañimil. Mi caj c ñusan colem ja' ya' ti' tiquiñal pañimil. Mi caj cʌq'ueñob quEspíritu a p'olbal. Mi caj cʌq'ueñob i yutslel c t'an a walobilob. 4Uts'at mi caj i colelob ya' ti jamil che' bajche' te' mu' bʌ i colel ti' ti' colem ja'. 5Juntiquil mi caj i yʌl: “I cha'añoñʌch lac Yum”, che'en. Yambʌ mi caj i pejcan Jacob ti' tat. Yambʌ mi caj i ts'ijban ti' c'ʌb i c'aba' lac Yum yic'ot i c'aba' Israel.
6Che'ʌch woli' yʌl lac Yum, jini i Rey israelob, jini Xcoltaya i cha'añob, i Yum Panchan yic'ot Pañimil: Joñon jini ñaxan bʌ, joñon jini wi'il bʌ. Ma'anic yambʌ Dios. 7¿Am ba yambʌ lajal bajche' joñon? La' i tsictesan i bʌ. La' i sub chuqui mi caj i yujtel mi Diosʌch. La' i wʌn tsictesan tic tojlel. Joñon jach tsa cʌc'ʌ ti melol chuqui tac wʌn ña'tibil c cha'an yic'ot chuqui tac mi' caj ti ujtel. 8Mach la' cha'len bʌq'uen. Mach yomic mi' toj sajtel la' pusic'al. ¿Mach ba anic tsac tsictesʌbeyet chuqui mi' caj ti ujtel c'ʌlʌl ti oñiyi? C testigojetla, ma'anic yambʌ Dios. Joñon jach Dioson, a Xajlelon. Ma'anic yambʌ, che'en lac Yum.
Tontojob jax mu' bʌ i ch'ujutesañob dioste' tac
9Sojquemob pejtel jini xmel diosob. Ma'anic i c'ʌjñibal i melbalob mu' bʌ i lon c'uxbiñob. Jini mu' bʌ i melob mi' bajñel ña'tañob mach c'otic i wut jini diosob. Ma'anic mi' yubiñob t'an. Ma'anic i ña'tʌbal. Jini cha'an mi' cajelob ti quisin. 10Lolom jach i ye'tel jini winic mu' bʌ i mel dioste' tac. 11Pejtel mu' bʌ i ch'ujutesañob mi caj i yubiñob quisin, come i melbal jach winicob. La' i tempañob i bʌ xmel diosob yic'ot mu' bʌ i ch'ujutesañob cha'an mi' tsictiyel i lot. Mi caj i toj sajtelob i pusic'al. Mi caj i yubiñob quisin.
12Jini yujil bʌ i pʌc'ol tsucu taq'uin mi' chuc yic'ot tenaza cha'an mi' ticwesan ti c'ajc. Mi' jats' ti martillo ti' p'ʌtʌlel i c'ʌb cha'an mi' melben i wut. Che' tsa'ix lujba ti e'tel wi'ñayix. Anix i tiquin ti'. Tsa'ix jili i wersa. C'unix pañimil mi ma'anic chuqui mi' jap. 13Jini xjuc' te' mi' c'ʌtchocon regla. Mi' ñusan lápiz ya' ba' yom p'elol. Che' jini mi' juc' ti cepillo. Mi' p'is cha'an mi' melben i yejtal winic. Wen i t'ojol bʌ ti q'uelol, pero ma'anic mi' ñijcan i bʌ. 14Winicob mi' pʌc'ob te'. Jini ja'al mi' cosan. Che' tsa'ix coli, mi' c'otel winic ti te'el. Mi' yajcan toj tac bʌ te' mi ch'ujte' o mi ciprés o mi c'olol. 15Mi' c'ʌn lamital cha'an i si', cha'an mi' q'uixñesan i bʌ, yic'ot cha'an mi' tiq'uesan caxlan waj ti horno. Lamital mi' c'ʌn cha'an mi' mel i dios. Mi' ñocchocon i bʌ ti' tojlel. I melbalʌch. I yejtalʌch winic, pero mi' pʌcchocon i bʌ ti' tojlel. 16Lamital jini te' mi' c'ʌn cha'an i si', cha'an mi' tiq'uesan i we'el cha'an mi' pojpon we'elʌl. Che' jini mi' ñaj'an. Che' jini mi' caj ti q'uix. Mi' yʌl: “Tsa' q'uixñayon ti c'ajc”, che'en. 17Mi' c'ʌn i colojbal jini te' cha'an mi' mel i dios. Mi' ñocchocon i bʌ ti' tojlel. Mi' ch'ujutesan. Mi' c'ajtiben ti wocol t'an: “Coltañon, come c dioset”, che'en.
18Ma'anic mi' cʌñob Dios. Ma'anic mi' ch'ʌmbeñob isujm, come Dios tsi' muts'beyob i wut cha'an ma'anic mi' c'otelob i wut. Tsi' socbeyob i jol cha'an ma'anic mi' ch'ʌmbeñob isujm. 19Ma'anic majqui mi' ñoj ch'ʌmben isujm pañimil. Ma'añobic i ña'tʌbal cha'an mi' yʌlob: “Tsaj c'ʌñʌ lamital ili te' cha'an c si', cha'an mic tiq'uesan waj, cha'an mic pojpon we'elʌl, cha'an mij c'uxe'. ¿Yom ba mij c'ʌn jini jach bʌ te' cha'an mic mel c dios? ¿Mach ba to'ol lolomic jach? ¿Yom ba mic ñocchocon c bʌ ti' tojlel i xujc'unte'lel?” Mach che'ic mi' yʌl. Ma'anic mi' wis ochel ti' pusic'al chuqui woli' mel. 20Jini mu' bʌ i ch'ujutesan dioste' ma'anic mi' we'sʌben i ch'ujlel. Ti' caj i sojquemal i pusic'al mi' sajtel. Ma'anic mi' wis ña'tan chuqui woli' mel. Ma'anic mi' yʌl: “¿Mach ba lotic ili dioste' woli bʌ c mel tij c'ʌb?” che'en.
Lac Yum jiñʌch i yaj coltaya jini israelob
21Lac Yum woli' yʌl: Ña'tan pejtelel iliyi, Jacob, come c winiquet Israel. Joñon tsac meleyet, c cha'añet. Ma'anic mi caj a ñajʌyel c cha'an. 22Joñon tsac sʌc jisa a mul che' bajche' tocal. Majlemix che' bajche' i yowix lum. Jini cha'an yom ma' cha' sutq'uin a bʌ tic tojlel come tsac mʌñʌyet. 23C'ʌyinla c ñuclel añet bʌ la ti panchan, come jiñʌch que'tel. Tsictesanla ti c'am bʌ t'an añet bʌ la ti pañimil. Yom tijicña wits tac yic'ot pejtel te'el, yic'ot jujuntejc te'. Come tsac mʌñʌ Jacob. Tsa cʌc'ʌ ti tsictiyel c ñuclel ti' tojlel Israel. 24Che'ʌch woli' yʌl lac Yum, jini a Waj Coltaya tsa' bʌ i meleyet che' cʌntʌbilet to. Joñon a Yumon tsa' bʌ c mele pejtel chuqui tac an. Tic bajñel tsac lich'i jini panchan. Tic bajñel tsac mele pañimil yic'ot pejtelel i bʌl.
25Joñon mi cʌc'ob ti asiyel jini payxo x'alt'añob. Mic mʌctʌbeñob i t'an. Mic socbeñob i ña'tʌbal jini lon yujilo' bʌ. Mi cʌc' ti sʌc jilel i ña'tʌbal. Tontojob mi' majlelob. 26Joñon mi cʌq'ueñob c t'an jini x'alt'añob c cha'an. Mi cʌc' ti ts'ʌctiyel i t'an jini x'etelob c cha'an. Joñon mic suben c tejclum Jerusalén, cha' talob ti chumtʌl israelob wʌ' ti jini tejclum yic'ot ti' tejclum tac Judá. Cha'an c mandar mi caj i laj wa'chocontel otot ba' tsa' jejmi. 27Mic suben i mal lum cha'an mi' tiquin i ya'al. Mi cʌc' ti tiquin colem ja'. 28Joñon mi cʌq'uen i ye'tel Ciro. Mic sub: “Jiñʌch xcʌnta tiñʌme' c cha'an. Mi caj i mel pejtelel chuqui mi cʌl. Mi caj i yʌc' ti cha' melol Jerusalén. Mi caj cʌc' ti cha' wejlel i c'ʌclib jini Templo”. Tsa'ix cʌc'ʌ c t'an, che'en lac Yum.
Currently Selected:
ISAIAS 44: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.