ISAIAS 32
32
Jini toj bʌ Rey
1La' wilan, tal jini Rey mu' bʌ caj i cha'len yumʌntel ti toj bʌ i pusic'al. Toj ja'el mi caj i cha'leñob yumʌl jini ñuco' bʌ año' bʌ i ye'tel mu' bʌ i tilelob i coltan jini Rey. 2Jini Winic i wentajʌch puts'ibʌl cha'an ñuqui ic', i wentajʌch ch'entun mu' bʌ i mʌctan sutujt ic'. Lajalʌch bajche' sʌmʌcña bʌ ja' ti tiquin bʌ pañimil yic'ot lech'el bʌ xajlel mu' bʌ i yʌc' i yʌxñʌlel che' c'unix pañimil cha'an c'ux q'uin. 3Tal i yorajlel mux i cajñel i wut israelob. Mi caj i q'uelob lac Yum. Mi caj i yubibeñob i t'an. 4Jini tontojo' bʌ mi caj i ch'ʌmbeñob isujm jini t'an. Jini xbes t'añob uts'atix mi caj i loq'uelob i t'an. 5Ma'anix mi caj i chʌn alob ti uts'at jini mach bʌ uts'atic. Ma'anix mi caj i chʌn alob ti p'ejw jini xujch'ob. 6Mi' caj ti wen cʌjñel jini jontol bʌ winic come jontol i t'an. I melbal jini cha'p'ejl bʌ i pusic'al mi' yʌc' ti cʌjñel. Mi' cha'len lotiya. Mi' socben i t'an Dios. Mi' chilben i bʌl i ñʌc' jini am bʌ i wi'ñal. Mi' chilben i ya'al jini am bʌ i tiquin ti'. 7Wen bʌbʌq'uen i maña jini xjontolil. Mi' wʌn ña'tan i jisan ti lo'loya jini p'ump'un bʌ ya' ti melobʌjʌl. Mi' yutsi tic'lan anquese toj. 8Pero jini xuc'ul bʌ mi' ña'tan i mel chuqui uts'at. Ti pejtelel ora uts'at chuqui mi' mel.
I toj'esʌntel jini x'ixicob ti Jerusalén
9X'ixicob mu' bʌ i to'ol ñusañob q'uin, tejchenla cha'an mi la' wubin c t'an. Xch'ocob mach bʌ anic mi' jac'ob t'an, p'isila ti la' wenta chuqui mic subeñetla. 10Come ti junjab to mi caj la' cha'len bʌq'uen. Ma'anix mi caj la' to'ol ñusan q'uin. Come ma'anic mi caj i yʌc' i wut la' ts'usubil. Ma'anic chuqui mi caj la' c'aj. 11Cha'lenla bʌq'uen x'ixicob mu' bʌ la' to'ol ñusan q'uin. Yom mi' toj sajtel la' pusic'al chan bʌ mi la' mel la' bʌ. Cha'lenla uq'uel. Jochola i t'ojol jax bʌ la' pislel cha'an mi la' lʌp coxtal. 12Tsʌts mi caj la' jats' la' tajn cha'an uq'uel che' ma'anix chuqui mi' loq'uel ti lum, che' ma'anix mi' yʌc' i wut ts'usub. 13Ya' ti' lum c winicob, mi' caj ti colel ch'ixol yic'ot yopol te' mu' bʌ ti c'ux. Jochol mi caj i cʌytʌl la' wotot ya' ti ojlil tejclum ba' tijicñayetla wʌle. 14Mi caj i jochtiyel jini colem bʌ i yotot rey ba' wen chumulob. Jini chan bʌ q'ueloñib am bʌ ti ojlil tejclum mi caj i sujtel ti ch'en. Ya'i mi caj i pam cha'leñob buc'bal burro yic'ot chivo, 15jinto mi la cʌq'uentel jini Espíritu tilem bʌ ti panchan. Che' jini, jini mate'el mi caj i cha' ochel ti pʌc'ʌbʌl. Jini lum mi caj i cha' ac' i wut. 16Toj mi caj i yujtel meloñel baqui jach an winicob, mi ti jochol bʌ lum mi ti cholel. 17Che' toj mi' melob winicob ñʌch'ʌl mi caj i yajñelob. Cha'an ti' caj mi' cha'leñob chuqui toj, tijicñayob mi caj i c'ajob i yo. Ma'anix bʌq'uen ti pejtelel ora.
18Xuc'ul mi caj i chumtʌlob c cha'año' bʌ. Xuc'ul i yotot. Ma'anic majqui mi caj i contrajiñob. 19Pero mi caj i jisʌntelob jini asiriajob yic'ot pejtel i tejclum. 20Tijicña mi caj la' wajñel mu' bʌ la' cha'len pac' ti' ti' pejtelel jini pa' tac. On mi caj la' c'aj. Mi caj i cha'len buc'bal la wʌlac' ti potrero.
Currently Selected:
ISAIAS 32: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.