ISAIAS 25
25
Mi' sujbel i ñuclel lac Yum
1C Yum, c Dioset. Mi caj c sub a ñuclel. Mi caj c tsictesan i ñuclel a c'aba', come tsa'ix a cha'le ñuc tac bʌ. Chuqui tac wʌn ña'tʌbil a cha'an c'ʌlʌl wajali wolix i yujtel. 2Tsa'ix a jisa jini colem tejclum yic'ot wen p'ʌtʌl tac bʌ otot. Jejmenix i ts'ajquil jini ñuc tac bʌ otot, wen i t'ojol jax bʌ. Ma'anix mi' chʌn mejlel ti pejtelel ora. 3Jini cha'an jini p'ʌtʌlo' bʌ mi caj i bʌc'ñañetob. Jini yujilo' bʌ jisaya mi caj i jac'beñetob. 4Come tsa' colta jini c'uño' bʌ yic'ot jini woliyo' bʌ ti wocol. I puts'ibet jini p'ump'uño' bʌ ba' ma'anic mi' jats'ob jini p'ʌtʌl bʌ ic'. I wentajet axñal ti' yorajlel ticwal. Ma' mʌctan jini jontolo' bʌ che' talob i tic'lan jini p'ump'uño' bʌ che' bajche' p'ʌtʌl bʌ ja'al mu' bʌ i poc jubel i pat otot. 5Che' bajche' mi' tsʌñ'an pañimil cha'an tocal, che' ja'el mi' lajmel wocol che' ma' ju'sʌben i chanlel i pusic'al jini jontolo' bʌ yujilo' bʌ tic'laya.
6I Yum Panchan yic'ot Pañimil mi caj i chajpan q'uiñijel wʌ' ti Jerusalén ti Sion wits. Mi caj i pʌy tilel jini ñajt bʌ ch'oyolob cha'an mi' c'uxob sumuc bʌ i bʌl i ñʌc' yic'ot yajcʌbil bʌ we'elʌl, cha'an mi' japob vino am bʌ i jabilel. 7Lac Yum mi caj i jisʌbeñob i mʌjquil am bʌ ti' pusic'al pejtel mach bʌ anic mi' cʌñob. Wʌ' mi caj i cʌñob ti ili wits. 8Lac Yum mi caj i junyajlel jisan jini p'ʌtʌl bʌ mu' bʌ i yʌc'onla ti chʌmel. Che' jini ma'anix majqui mi caj i chʌmel ti pejtelel ora. Lac Yum Dios mi caj i sujcubeñonla i ya'lel lac wut. Ma'anix mi caj i ts'a'lentelob i cha'año' bʌ. Mi caj i yʌc'ob ti ñuc ti' tojlel pejtelel winicob ti pejtelel pañimil. Lac Yum tsa'ix i yʌc'ʌ i t'an.
9Ti jim bʌ q'uin mi caj i yʌlob: Jiñʌch lac Dios mu' bʌ lac ñop. Tsa'ix lac pijta. Tsa'ix juli mu' bʌ caj i coltañonla. La' ñuc'ac lac pusic'al. Yom tijicñayonla cha'an wolix i coltañonla, che'ob. 10Lac Yum mi caj i yʌq'ueñob i wenlel jini año' bʌ ti Sion. Pero mi caj i t'uchtan jini año' bʌ ti Moab. Mi' cajelob ti oc'mʌl che' bajche' ti ta'jibʌl. 11Anquese mi' ñopob i coltañob i bʌ che' bajche' xñuxijel mu' bʌ i ñijcan majlel i c'ʌb, pero lolom jach. Lac Yum mi caj i ju'sʌbeñob i ch'ejlel i pusic'al. 12Mi caj i laj jisan jini chan bʌ ts'ajc am bʌ ti' joytilel Moab. Mi caj i choc jubel ti lum cha'an mi' sujtel ti ts'ubejn.
Currently Selected:
ISAIAS 25: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.