ISAIAS 2
2
Mi caj i mʌjlel i cha'an i yumʌntel Dios
(Mi. 4.1-3)
1Jiñʌch tsa' bʌ i q'uele Isaías (i yalobil Amoz). Tsi' q'uele chuqui mi' caj ti ujtel ti Judá yic'ot ti Jerusalén: 2Ti jini tal to bʌ q'uin, jini wits ba' wa'chocobil i Templo lac Yum, ñumen ñuc mi caj i yajñel che' bajche yan tac bʌ wits. Winicob ch'oyolo' bʌ ti pejtelel lum mi caj i tilelob ti ch'ujutesaya. 3Cabʌl winicob tilemo' bʌ ti yan tac bʌ tejclum mi caj i yʌlob: “La' letsiconla ti' wits lac Yum, ya' ti' Templo i Dios Jacob, cha'an mi' pʌsbeñonla toj bʌ i bijlel, cha'an mi mejlel lac tsajcan majlel. Come ya' ti Sion mi caj i cʌntesañonla. Ya'ʌch ti Jerusalén mi caj i loq'uel i t'an lac Yum”, che'ob. 4Lac Yum mi caj i cha'len meloñel ti' tojlel pejtelel winicob x'ixicob cha'an mi' lajmel leto ti' tojlelob. Jini e'tijibʌl cha'an guerra mi caj i sujtel ti e'tijibʌl cha'an cholel. Ma'anix mi caj i chʌn cha'len contra jump'ejl tejclum ti' tojlel yambʌ. Ma'anix mi caj i chʌn ñopob guerra.
I tojol i mul xñusa t'an
5Conla winicob, i yalobiletla Jacob. La' lac cha'len xʌmbal ti' sʌclel lac Yum. 6C Yum Dios tsa'ix i cʌyʌ i cha'año' bʌ, i p'olbalob Jacob, come woli' jac'ob xwujtob tilemo' bʌ ti' pasibal q'uin mu' bʌ i to'ol ña'tañob chuqui tac mi' caj ti ujtel. Che' ja'el woli' jac'ob winicob mu' bʌ i pejcañob xibajob che' bajche' mi' melob jini filisteojob. Woli' temob i t'an yic'ot jini ñajt bʌ ch'oyolob. 7An cabʌl oro yic'ot plata ti Israel, yic'ot cabʌl jax chubʌ'añʌl. An cabʌl caballo yic'ot carreta. 8An ja'el cabʌl dioste' tac ti' petol pañimil. Mi' ñocchocoñob i bʌ cha'an mi' ch'ujutesañob. I wʌlʌc melbalob i c'ʌb. 9Lac Yum mi caj i choc tilel wocol cha'an mi' peq'uesañetla. Ma'anic mi caj i ñusʌbeñetla la' mul. 10Cucula ti ochel ti' ch'eñal colem bʌ xajlel. Mucu la' bʌ ti mal lum, come c'ax bʌbʌq'uen jax jini lac Yum, come cabʌl i c'ʌc'al yic'ot i ñuclel. 11Jini winicob ñuc bʌ mi' q'uelob i bʌ, wersa mi caj i lijob i bʌ. Jini chan bʌ mi melob i bʌ wersa mi caj i peq'uesʌntelob. Ti jim bʌ q'uin jini jach lac Yum mi caj i q'uejlel ti ñuc.
Dios mi' peq'uesan jini chan bʌ mi' melob i bʌ
12Ti jim bʌ q'uin i Yum Panchan yic'ot Pañimil mi caj i tech meloñel ti' contra pejtelel jini ñuco' bʌ yic'ot jini chaño' bʌ yic'ot jini xñusa t'añob, cha'an mi' ju'sʌbeñob i pusic'al. 13Mi caj i jisʌbeñob i p'ʌtʌlel pejtel mu' bʌ i chañ'esañob i bʌ che' bajche' jini ch'ujte' am bʌ ti Líbano, yic'ot c'olol te' am bʌ ti Basán. 14Mi caj i tsictiyel ñumen ñuc Dios bajche' pejtelel jini chan bʌ wits, yic'ot pejtelel chan bʌ bujtʌl. 15Mi caj i jem pejtelel jini chan bʌ ts'ajc, yic'ot jini ts'ajc am bʌ ti' joytʌlel colem tejclum. 16Mi caj i jisan pejtel jini colem barco ya' ti Tarsis, yic'ot jini wen i t'ojol tac bʌ barco ba' mi' cha'leñob xʌmbal jini wen chumulo' bʌ. 17Mi caj i peq'uesan jini ñuco bʌ mu' bʌ i lon chañ'esañob i bʌ. Mi caj i jultesʌbeñob i pusic'al winicob chan bʌ mi' melob i bʌ. Cojach lac Yum mi caj i q'uejlel ti ñuc che' ti jini q'uin. 18Mi caj i sʌcʌ jilelob pejtel jini melbil tac bʌ diosob. 19Che' mi' tejchel wa'tʌl lac Yum ti' ñuclel yic'ot ti' c'ʌc'al cha'an mi' bʌc'tesan jini año' bʌ ti pañimil, mi caj i lon puts'elob ti ch'entun tac yic'ot ti mal japal bʌ xajlel. 20Ti jim bʌ q'uin winicob mi caj i chocob ba'an tsuc yic'ot suts' jini dios tac tsa' bʌ i yajcayob, melbil bʌ ti oro yic'ot ti plata. 21Mi caj i yochelob ti puts'el ba' tocol tac i mal xajlel, yic'ot jajp tac ch'en ya' ti xajlelol, che' mi' tilel lac Yum ti' c'ʌc'al yic'ot ti' nuclel cha'an mi' bʌc'tesan jini año' bʌ ti pañimil. 22Jini cha'an cʌyʌx la' xuc'chocon la' pusic'al ti winicob. ¿Chuqui to mi caj i yʌq'ueñetla? Jumuc' jach mi' japob ic' ti pañimil.
Currently Selected:
ISAIAS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.