ISAIAS 19
19
T'an ti' contra Egipto
1Jiñʌch i t'an Dios ti' contra jini año' bʌ ti Egipto. Ti ora mi caj i tilel lac Yum c'ʌchʌl ti' pam tocal. Tsiltsilñayob ti bʌq'uen i diosob egiptojob. Mi' toj sajtelob i pusic'al jini chumulo' bʌ ti Egipto. 2Lac Yum tsi' yʌlʌ: Mi caj cʌq'ueñob i wʌlʌc contrajiñob i bʌ jini egiptojob. Jujuntiquil mi caj i contrajin i yeran yic'ot i pi'ʌl ti chumtʌl. Jujump'ejl tejclum mi caj i contrajin yambʌ. Jini am bʌ i yumʌntel mi caj i contrajin yambʌ yumʌl. 3Mi caj i sʌc sojquelob i pensar pejtel jini egiptojob, come mi caj c jisʌbeñob i ña'tʌbal. Che' jini mi caj i lon majlelob ba'an i dioste' tac yic'ot ba'an jini xwutob, yic'ot ba'an xpejca cruzob yic'ot ba'an payxo bʌ x'alt'añob. 4Mi caj cʌc' jini egiptojob ti' wenta jontol bʌ yumʌl yujil bʌ tic'laya. Wersa mi caj i yumañob, che'en i Yum Panchan yic'ot Pañimil.
5Mi' caj ti tiquin jini colem ja'. Mi' caj ti sajp'ejl, jinto mi' laj tiquin pejtelel jini ja'. 6Jini pimel yujil bʌ pasel ti ja' mi' caj ti oc'mʌl. Mi' cajel ti tuw'an. 7Pejtelel jini pʌc'ʌbʌl tac am bʌ ti' ti'il ñoja', yic'ot ba' mi' loq'uel tilel i jol jini ja', yic'ot ti' joytʌlel jini ñoja' mi caj i laj tiquin. Jini ic' mi caj i wejlan majlel. 8Jini xchuc chʌyob ja'el mi caj i yubiñob i ch'ijiyemlel come ma'anix i ye'tel. Ma'anix i c'ʌjñibal lucojib mi chim. 9Mi' cajelob ti quisin jini mu' bʌ i ñoq'uiñob i puyil lino, mu' bʌ i jalob fino bʌ pisil. 10Mi caj i jisʌntel i p'ʌtʌlel jini yumʌlob. Ch'ijiyemob i yaj e'telob, come ma'anix i tojol cha'an i ye'tel.
11Tontojob jax jini yumʌlob ti Zoán. Tonto i t'an jini xcʌntesajob mu' bʌ i subeñob Faraón bajche' yom melol. Mach chʌn mejlic i chañ'esañob i bʌ cha'an cabʌl i na'tʌbal i tatob ti oñiyi, come mach lajalobic yic'ot i tatob. Ma'anix i c'ʌjñibal ti' tojlel Faraón. 12Jac'ʌ, Faraón, ¿baqui an a winicob año' bʌ i ña'tʌbal? Mi an i ña'tʌbal, la' i tsictesʌbeñet chuqui mi caj i cha'len Dios ti Egipto. 13Tsa'ix ochiyob ti tonto jini yumʌlob ti Zoán. Tsa'ix i ñopoyob lot jini yumʌlob ti Menfis. Jini año' bʌ i ye'tel ti Egipto tsi' lotiyob i pi'ʌlob. Ti jump'ejl i pusic'al tsa' sajtiyob. 14Lac Yum tsi' socbeyob i pensar. Mi' majlelob ti xʌmbal che' bajche' jini xlembal che' woli ti xej. 15Ma'anic majqui mi mejlel i coltan Egipto, mi jinic ñuco' bʌ, mi ch'o'ch'oco' bʌ, mi i tatob, mi i yalobilob, che'en lac Yum.
16Ti jim bʌ ora jini egiptojob mi caj i yubiñob bʌq'uen che' bajche' x'ixicob. Tsiltsilñayob ti bʌq'uen ti' tojlel i Yum Panchan yic'ot Pañimil mu' bʌ caj i ñijcañob ti' mich'lel. 17Jini año' bʌ ti Egipto mi caj i bʌc'ñañob Israel. Pejtel winicob mu' bʌ i ña'tañob Judá mi' cajelob ti bʌq'uen cha'an i ye'tel lac Yum ti' tojlel, come mux caj i ts'ʌctesan pejtel chuqui tsi' wʌn ña'ta i mel i Yum Panchan yic'ot Pañimil. 18Ti jim bʌ ora mux i tajtʌl ti Egipto jo'p'ejl tejclum mu' bʌ caj i cha'leñob t'an ti' t'an israelob. Mi caj i tajob ti t'an i Yum Panchan yic'ot Pañimil. Jump'ejl tejclum i c'aba' Herez. Añʌch i sujmlel i c'aba', “Jiñʌch i tejclum lac ch'ujutat”.
19Ti jim bʌ ora mi caj i wa'chocontel jump'ejl pulʌntib i cha'an lac Yum ya' ti' yojlil Egipto, yic'ot jump'ejl oy i cha'an lac Yum ya' ba' jaxʌl i lumal 20cha'an mi' yʌc' ti c'ajtesʌntel lac Yum. Jini cha'an ba' ora mi' cha'leñob oñel jini egiptojob che' tic'lʌbilob, lac Yum mi caj i choc tilel xcoltaya cha'an mi' coltañob. 21Ti jim bʌ ora lac Yum mi caj i yʌc' i bʌ ti cʌjñel ti Egipto. Jini egiptojob mi caj i cʌñob lac Yum. Mi caj i ch'ujutesañob. Mi caj i yʌq'ueñob tsʌnsʌbil bʌ i majtan yic'ot ofrenda, yic'ot pejtel chuqui tsi' yʌlʌyob che' bʌ tsi' wa'chocoyob i t'an. 22Lac Yum mi caj i yʌq'ueñob wocol jini egiptojob, pero mi caj i lajmesʌbeñob i wocol che' mi' sutq'uiñob i bʌ ti' tojlel. Mi caj i ñich'tʌbeñob i yoración. Mi caj i cha' lajmesañob.
23Ti jim bʌ ora mi caj i melob colem bij c'ʌlʌl ti Egipto c'ʌlʌl ti Asiria. Jini año' bʌ ti Asiria mi caj i c'otelob ti Egipto. Che' ja'el jini egiptojob mi caj i c'otelob ti Asiria. Temel mi caj i ch'ujutesañob lac Yum. 24Ti jim bʌ ora jini israelob mi caj i temob i t'an yic'ot jini egiptojob yic'ot jini asiriajob. Mi caj i tajob i wenlel ti' tojlel pejtel año' bʌ ti pañimil. 25Come i Yum Panchan yic'ot Pañimil mi caj i yʌq'ueñob i yutslel i t'an Egipto yic'ot Asiria che' uts'atix mi' tem ajñelob yic'ot Israel. Come tsi' yʌlʌ: Muc'ʌch i tajob i yutslel c t'an jini egiptojob come c cha'añob, yic'ot jini chumulo' bʌ ti Asiria come c melbalob, yic'ot israelob come tsac yajcayob, che'en.
Currently Selected:
ISAIAS 19: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.